ອົງການຢູນິເຊັບ ເເຕ່ງຕັ້ງ ອາສາໂຄສະນາໄວໜຸ່ມ ຄົນທຳອິດໃນ ສປປ ລາວ ຢ່າງເປັນທາງການ

09 ມີຖຸນາ 2023
Chanphone appointment ceremony.
UNICEF Laos/2023

ນະຄອນຫຼວງວຽງຈັນ, ວັນທີ 9 ມິຖຸນາ 2023 - ອົງການຢູນິເຊັບ ປະຈຳ ສປປ ລາວ ໄດ້ເເຕ່ງຕັ້ງ ຈັນພອນ ຊົງໃຈຍົ້ວ, ຊື່ຫຼິ້ນວ່າ ຈັນ, ເປັນ ອາສາໂຄສະນາໄວໜຸ່ມ ຄົນທຳອິດຂອງ ອົງການຢູນີເຊັບໃນ ສປປ ລາວ ຢ່າງເປັນທາງການ. ຈັນ ເປັນໄວໜຸ່ມຈາກແຂວງຫົວພັນ ອາຍຸ 18 ປີ ເເລະ ໃນຖານະອາສາໂຄສະນາໄວໜຸ່ມ, ຈັນ ຈະເຮັດວຽກກັບ ອົງການຢູນິເຊັບ ເພື່ອປູກຈິດສໍານຶກກ່ຽວກັບ ຜົນກະທົບຂອງການປ່ຽນແປງຂອງດິນຟ້າອາກາດ ແລະ ບັນຫາສິ່ງແວດລ້ອມຕ່າງໆ ຕໍ່ໄວໜຸ່ມ ແລະ ຍັງຈະເປັນກະບອກສຽງເພື່ອສົ່ງເສີມສິດທີຂອງບັນດາໄວໜຸ່ມອີກເຊັ່ນດຽວກັນ.

ການທີ່ຈັນໄດ້ຖືກເເຕ່ງຕັ້ງເປັນ ອາສາໂຄສະນາໄວໜຸ່ມນັ້ນ ເຮັດໃຫ້ ຈັນ ເປັນສ່ວນໜື່ງຂອງກຸ່ມໄວໜຸ່ມອື່ນໆໃນທົ່ວໂລກ ທີ່ມີຄວາມມຸ່ງໝັ້ນທີ່ຈະສົ່ງເສີມການປ່ຽນແປງໃນທາງທີ່ສ້າງສັນ ເພື່ອພັດທະນາຊີວິດການເປັນຢູ່ຂອງເດັກນ້ອຍ ແລະ ໄວໜຸ່ມທຸກຄົນ.

ຈັນ ໄດ້ກ່າວວ່າ: “ຂ້າພະເຈົ້າເອງຮູ້ສຶກດີໃຈຫຼາຍທີ່ທາງ ອົງການຢູນິເຊັບ ໄດ້ໃຫ້ໂອກາດຂ້າພະເຈົ້າເອງເຂົ້າມາເປັນ ອາສາໂຄສະນາໄວໜຸ່ມ ຂອງທາງອົງການ, ເຊິ່ງຂ້າພະເຈົ້າກໍ່ຈະພະຍາຍາມຮັບຜິດຊອບ ແລະ ເຮັດໜ້າທີ່ຂອງຕົນເອງໃຫ້ດີທີ່ສຸດ.”

ວຽກງານອາສາໂຄສະນາໄວໜຸ່ມຂອງ ຈັນ ແມ່ນເລີ່ມມາຈາກການທີ່ ຈັນ ໄດ້ມີສ່ວນຮ່ວມກັບ ກຸ່ມສື່ໄວໜຸ່ມແຂວງຫົວພັນ, ເຊິ່ງເປັນໂຄງການທີ່ລິເລີ່ມໂດຍ ວິທະຍຸແຫ່ງຊາດລາວ ເເລະ ອົງການຢູນິເຊັບ. ນອກຈາກນັ້ນ, ຈັນ ເອງຍັງໄດ້ເຮັດວຽກເປັນສ່ວນໜື່ງຂອງ ອາສາໄວໜຸ່ມຊຳເໜືອ ເຊິ່ງເປັນກຸ່ມອາສາສະໝັກທີ່ເຮັດວຽກຢູ່ທີ່ ເມືອງຊຳເໜືອ ແຂວງຫົວພັນ ເພື່ອປູກຈິດສຳນຶກດ້ານສິ່ງແວດລ້ອມໃຫ້ແກ່ໄວໜຸ່ມ ແລະ ສາທາລະນະ.

ເນື່ອງໃນໂອກາດນີ້, ທ່ານນາງ ດຣ. ເພຍ ເຣເບນໂລ ບຣິດໂຕ, ຜູ້ຕາງໜ້າ ອົງການຢູນີເຊັບ ປະຈໍາ ສປປ ລາວ, ກໍໄດ້ມີຄໍາເຫັນວ່າ: “ພວກເຮົາມີຄວາມຍິນດີທີ່ໄດ້ຕ້ອນຮັບ ຈັນ ເຂົ້າສູ່ທີມພວກເຮົາໃນຖານະ ອາສາໂຄສະນາໄວໜຸ່ມ ຄົນທຳອິດຂອງອົງການພວກເຮົາໃນ ສປປ ລາວ. ຄວາມມຸ່ງໝັ້ນຂອງ ຈັນ ເພື່ອສ້າງອະນາຄົດທີ່ດີກ່ວາເກົ່າສຳລັບເດັກນ້ອຍ ເເລະ ໄວໜຸ່ມນັ້ນ ໜ້າປະທັບໃຈຫຼາຍ ເເລະ ພວກເຮົາເຊື່ອໝັ້ນວ່າ ຄວາມພະຍາຍາມຂອງ ຈັນ ຈະຊ່ວຍສົ່ງເສີມ ເເລະ ສ້າງສະພາບແວດລ້ອມທີ່ປອດໄພ ເເລະ ມີສີຂຽວສົດໃສກ່ວາເກົ່າສໍາລັບທຸກຄົນ."

ການເເຕ່ງຕັ້ງ ຈັນ ເປັນອາສາໂຄສະນາໄວໜຸ່ມຄົນທຳອິດຂອງ ອົງການຢູນິເຊັບ ໃນ ສປປ ລາວ ນັ້ນ ຍັງກົງກັບໂອກາດ ຄົບຮອບ 50 ປີ ຂອງ ອົງການຢູນິເຊັບ ໃນ ສປປ ລາວ ອີກເຊັ່ນດຽວກັນ, ດັ່ງນັ້ນ ຈຶ່ງເປັນຂີດໝາຍອັນສຳຄັນໃນວຽກງານພັດທະນາໄວໜຸ່ມຂອງອົງການ ແລະ ການສົ່ງເສີມສຽງຂອງໄວໜຸ່ມໃນສັງຄົມລາວອີກດ້ວຍ.

ຕິດຕໍ່ຜູ້ຮັບຜິດຊອບຂ່າວ

ທ່ານ ໄຊມ້ອນ ນາເຊີ
ຫົວໜ້າພະແນກສື່ສານ
ອົງການຢູນີເຊັບ ປະຈໍາ ສປປ ລາວ
ໂທລະສັບ: +856 2055519681
ອີເມວ: snazer@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook