ສປປ ລາວ ແລະ ອົງການຢູນິເຊັບ ສະເຫຼີມສະຫຼອງ ວັນເດັກສາກົນ ທີ່ ແຂວງຈໍາປາສັກ

31 ພຶດສະພາ 2024
International Children's Day 2024 in Pakse, Champasak province, Lao PDR.
UNICEF Lao PDR/2024/KPhiennachit

ໃນວັນທີ 31 ພຶດສະພາ 2024 ທີ່ ຫໍວັດທະນະທຳ, ແຂວງຈຳປາສັກ ຄະນະກຳມາທິການເພື່ອຄວາມກ້າວໜ້າແມ່ຍິງ, ແມ່ ແລະ ເດັກ (ຄຊກມດ) ສົມທົບກັບ ຄະນະນຳແຂວງຈຳປາສັກ, ຄະນະກຳມາທິການເພື່ອຄວາມກ້າວໜ້າແມ່ຍິງ, ແມ່ ແລະ ເດັກ ແຂວງຈຳປາສັກ ແລະ ອົງການຢູ່ນີເຊັບປະຈຳ ປະຈຳ ສປປ ລາວ ຮ່ວມກັນຈັດງານສະເຫຼີມສະຫຼອງ ວັນເດັກສາກົນ ວັນທີ 1 ມິຖຸນາ 2024 ພາຍໃຕ້ຫົວຂໍ້: ສ້າງອະນາຄົດທີ່ຍືນຍົງ ຄືການສ້າງຄວາມເຂັ້ມແຂງໃຫ້ແກ່ເດັກ, ທີ່ໄດ້ຖຶເອົາ ການພັດທະນາຂອງເດັກ ເປັນບູລິມະສິດສຳຄັນ ໃນການພັດທະນາປະເທດຊາດ. ພິທີສະເຫຼີມສະຫລອງວັນເດັກ ໃນຄັ້ງນີ້  ໃຫ້ກຽດເຂົ້າຮ່ວມ ໂດຍ  ທ່ານ ສຈ.ປອ. ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ ແຫ່ງ ສປປ ລາວ ເເລະ ປະທານ ຄະນະກຳມາທິການແຫ່ງຊາດເພື່ອຄວາມກ້າວຫນ້າ ແມ່ຍິງ, ແມ່ ແລະ ເດັກ; ທ່ານ ອາລຸນໄຊ ສູນນະລາດ, ເຈົ້າແຂວງໆ ຈຳປາສັກ, ທ່ານ ນາງ ອາລີ ວົງ​ໜໍ່​ບຸນ​ທຳ, ປະທານສູນກາງສະຫະພັນແມ່ຍິງລາວ ເເລະ ເປັນ ຮອງປະທານ ຄຊກມດ,  ທ່ານ ນາງ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າ ອົງການຢູນິເຊັບ ປະຈໍາ ສປປ ລາວ, ບັນດາການນຳຂອງແຂວງ, ຫລານນ້ອຍ ທີ່ເປັນຕົວແທນຈາກ ໂຮງຮຽນ ປະຖົມອ້ອມຂ້າງ ເທດສະບານແຂວງ ຈຳປາສັກເຈົາຮ່ວມກວ່າ 500 ຄົນ.

ກ່ອນເຂົາສູ່ພິທີ່ທາງການ ບັນດາແຂກ ແລະ ຫລານນ້ອຍທີ່ເຂົາຮ່ວມງານກໍໄດ້ຮັບຊົມສານຂອງພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ທີ່ກ່າວອວຍພອນໃນວັນເດັກ ຊຶ່ງໃນບາງຕອນ ໄດ້ຍົກໃຫ້ເຫັນເຖິງຄວາມເອົາໃຈໃສ່ຂອງຂອງລັດຖະບານໃນການສົ່ງເສີມ ດູແລ ເບິ່ງແຍງເດັກ ສະແດງອອກອັດຕາການຕາຍຂອງເດັກຕໍ່າກວ່າ 5 ປີ ມີທ່າອ່ຽງຫລຸດລົງ ຈາກ 79/1000 ຄົນ ຕໍ່ການເກີດມີຊີວິດ ໃນປີ 2012, ມາເປັນ 46/1000 ຄົນ ໃນປີ 2017 ແລະ ຍັງເຫລືອ 28/1000 ຄົນ ໃນປີ 2023 ຊຶ່ງສ່ອງແສງໃຫ້ເຫັນວ່າ ທ່າອ່ຽງຄວາມຄືບໜ້າການປັບປຸງດ້ານສຸຂະພາບຂອງເດັກໃນ ສປປ ລາວ; ພ້ອມນີ້, ອັດຕາການເກີດທີ່ມີແພດຊ່ວຍກໍມີອັດຕາສ່ວນເພີ້ມຂຶ້ນ ຈາກ 41,5 % ໃນປີ 2012 ມາເປັນ 64,4 % ໃນປີ 2017 ແລະ ມາເປັນ 79,8% ໃນປີ 2023. ອີງໃສ່ຂໍ້ມູນຜົນການສໍາຫລວດດັ່ງກ່າວ ເມື່ອທຽບໃສ່ບັນດາປະເທດໃນພາກພື້ນ ພວກເຮົາຍັງຈະໄດ້ສືບຕໍ່ສູ້ຊົນ ແລະ ສຸມລົງທຶນໃສ່ເດັກໃຫ້ຫລາຍຂຶ້ນ ເພື່ອຮັບປະກັນການບັນລຸເປົ້າຫມາຍການພັດທະນາແບບຍືນຍົງ ແລະ ການເຕີບໂຕທີ່ເຂັ້ມແຂງຂອງໃນອະນາຄົດ.

ນອກຈາກນີ້ ໃນການກ່າວເຫັນຂອງທ່ານ ສຈ. ປອ. ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ຕໍວັນເດັກສາກົນ ບາງຕອນ ໄດ້ກ່າວ: “ການສະເຫຼີມສະຫຼອງໃນມື້ນີ້ ເປັນການຢັ້ງຢືນເຖິງຄວາມມຸ່ງໝັ້ນຂອງ ລັດຖະບານແຫ່ງ ສປປ ລາວ ໃນການພັດທະນາເດັກເປັນບູລິມະສິດສຳຄັນຫນຶ່ງ ໃນການພັດທະນາປະເທດຊາດ. ພວກ​ເຮົາ​ຈົ່ງ​ສືບ​ຕໍ່​ ເຮັດ​ວຽກ​ຮ່ວມ​ກັນ​ ເພື່ອຮັບປະກັນວ່າ​ ເດັກ​ທຸກໆ​ຄົນ​ໃນ ສ​ປ​ປ ລາວ ມີ​ໂອ​ກາດໃນການ​ເຕີບ​ໂຕໄດ້ຢ່າງເຕັມທີ່ ແລະ ສາມາດມີສ່ວນຮ່ວມໃນການສ້າງ​ອະ​ນາ​ຄົດ​ທີ່​ຍືນ​ຍົງກວ່າເກົ່າ.”

ໃນການຕ້ອນຮັບຂອງ ທ່ານ ອາລຸນໄຊ ສູນນະລາດ, ເຈົ້າແຂວງໆ ຈຳປາສັກ, ກໍໄດ້ກ່າວວ່າ: “ການມີສ່ວນຮ່ວມຂອງເດັກນ້ອຍ ໃນກິດຈະກໍານສະເຫຼີມສະຫຼອງວັນເດັກ, ໂດຍສະເພາະພິທີປູກຕົ້ນໄມ້, ເປັນສັນຍາລັກທີ່ສະແດງໃຫ້ເຫັນເຖິງ ຄວາມມຸ່ງໝັ້ນຂອງ ສປປ ລາວ ໃນການບຳລຸງຮັກສາສິ່ງແວດລ້ອມຂອງພວກເຮົາ ທັງເປັນການປູກຈິດສຳນຶກໃຫ້ແກ່ເດັກໃນການຮັກສາສິ່ງແວັດລ້ອມການເສີມສ້າງເດັກຜູ້ທີ່ເປັນອະນາຄົດຂອງປະເທດຊາດ. ໂດຍຜ່ານຂໍ້ລິເລີ່ມດັ່ງກ່າວ ພວກເຮົາຈະສາມາດປູກຝັງ ຄວາມຮັບຜິດຊອບ ແລະ ເອົາໃຈໃສ່ຕໍ່ສິ່ງແວດລ້ອມ ແລະ ໂລກ ໃຫ້ກັບບັນດາໄວໜຸ່ມຂອງພວກເຮົາ."

​ທ່ານ ນາງ ດຣ. ເພຍ ເຣເບລໂລ ບຣິດໂຕ, ຜູ້ຕາງໜ້າ ອົງການຢູນິເຊັບ ປະຈໍາ ສປປ, ກໍ່ໄດ້ເນັ້ນໜັກເຖິງຄວາມສຳຄັນຂອງການເສີມສ້າງທັກສະ ແລະ ຄວາມຮູ້ ໃຫ້ກັບເດັກນ້ອຍ ແລະ ຄອບຄົວຂອງພວກເຂົາ ເພື່ອໃຫ້ພວກເຂົາສາມາດປະກອບສ່ວນເຂົ້າໃນການແກ້ໄຂສິ່ງທ້າທາຍຕ່າງໆໃນສັງຄົມປັດຈຸບັນ ແລະ ການພັດທະນາແບບຍືນຍົງຂອງ ສປປ ລາວ. ຊຶ່ງທ່ານກ່າວວ່າ: "ພວກເຮົາໄດ້ຮ່ວມກັນສ້າງຄວາມຄືບໜ້າຢ່າງໂດດເດັ່ນໃນຂະແໜງການຕ່າງໆ ເພື່ອເດັກ ແລະ ແມ່ຍີງ ແລະ ຄວາມຄືບໜ້ານີ້ ແມ່ນສາມາດເຫັນໄດ້ຈາກ ຜົນການສຳຫຼວດ ດັດສະນີໝາຍ ສັງຄົມລາວ ຄັ້ງທີ III.  ເຖິງຢ່າງໃດກໍ່ຕາມ, ພວກເຮົາຕ້ອງສືບຕໍ່ສຸມຄວາມພະຍາຍາຕື່ມ ເພື່ອແກ້ໄຂສິ່ງທ້າທາຍທີ່ຍັງຫຼົງເຫຼືອ. ດັ່ງນັ້ນ, ວັນເດັກສາກົນ ຈຶ່ງເປັນໂອກາດອັນດີ ເພື່ອປູກຈິດສຳໜຶກໃນທົ່ວສັງຄົມ ຕໍ່ສິ່ງທ້າທາຍທີ່ເດັກຕ້ອງປະເຊີນໃນປັດຈຸບັນ ແລະ ເປັນໂອກາດເພື່ອຢືນຢັນຄືນເຖິງ ບົດບາດຮ່ວມຂອງພວກເຮົາ ໃນການສົ່ງເສີມສິດທິເດັກໃນ ສປປ ລາວ.”  ທ່ານ ນາງ ດຣ. ເພຍ ເຣເບລໂລ ບຣິດໂຕ ຍັງໄດ້ສະແດງຄວາມຂອບໃຈມາຍັງ ລັດຖະບານແຫ່ງ ສປປ ລາວ ທີ່ໄດ້ເອົາໃຈໃສ່ຕໍ່ການປັບປຸງສຸຂະພາບ ແລະ ການເປັນຢູ່ຂອງເດັກນ້ອຍ ແລະ ແມ່ຍິງ, ພ້ອມທັງຢືນຢັນຄືນເຖິງຄວາມມຸ່ງໝັ້ນຂອງ ອົງການຢູນີເຊັບ ໃນການສືບຕໍ່ເຮັດວຽກເພື່ອເດັກທຸກໆຄົນໃນ ສປປ ລາວ.

ຕິດຕໍ່ຜູ້ຮັບຜິດຊອບຂ່າວ

Simon Nazer
Chief of Communication
UNICEF Lao PDR
ໂທລະສັບ: +856 2055519681
ອີເມວ: snazer@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook