ສປປ ລາວ ເປັນເຈົ້າພາບຈັດງານເປີດຕົວ ຄຳແນະນຳ ແລະ ມາດຕະຖານດ້ານໂພຊະນາການ ສະບັບໃໝ່ ສຳລັບ ອາຊຽນ

ນະຄອນຫຼວງວຽງຈັນ, ສປປ ລາວ, ວັນທີ 7 ສິງຫາ 2024 –  ສປປ ລາວ ຮ່ວມກັບ ອົງການຢູນິເຊັບ ໄດ້ຈັດກອງປະຊຸມເພື່ອແນະນໍາ ມາດຕະຖານຂັ້ນຕໍ່າ ດ້ານໂພຊະນາການ 4 ສະບັບທີ່ພັດທະນາຂື້ນໃໝ່ ສຳລັບສະມາຊິກອາຊຽນ, ເຊິ່ງຈະຊ່ວຍສະໜັບສະໜູນ ບັນດາປະເທດສະມາຊິກອາຊຽນ ໃນການຈັດຕັ້ງປະຕິບັດຍຸດທະສາດ ປັບປຸງວຽກງານໂພສະນາການ, ແລະ ສະໜອງການບໍລິການດ້ານໂພຊະນາການທີ່ມີຄຸນນະພາບ ໂດຍອີງຕາມບົດຮຽນ ແລະ ຜົນສຳເລັດຈາກສາກົນ.

ມາດຕະຖານຂັ້ນຕໍ່າ  ດ້ານໂພຊະນາການດັ່ງກ່າວ ແມ່ນໄດ້ຖືກຮັບຮອງ ຈາກບັນດາປະເທດສະມາຊິກປະເທດອາຊຽນ ແລະ ເຜີຍແຜ່ໃນ ກອງປະຊຸມລັດຖະມົນຕີສາທາລະນະສຸກອາຊຽນ ຄັ້ງທີ  XVI. ກອງປະຊຸມເຜີຍແຜ່ດັ່ງກ່າວ ແມ່ນໄດ້ຈັດຂຶ້ນໂດຍການສະໜັບສະໜຸນຈາກ ອົງການຢູນິເຊັບ ທີ່ ນະຄອນຫຼວງວຽງຈັນ ໂດຍ ລັດຖະບານແຫ່ງ ສປປ ລາວ ໃນນາມ  ປະທານອາຊຽນ ປີ 2024. ຄໍາແນະນໍາ ແລະ ມາດຕະຖານຂັ້ນຕໍ່າດ້ານໂພຊະນາການ 4 ສະບັບທີ່ພັດທະນາຂື້ນມາໃໝ່ດັ່ງກ່າວ ວ ຖື​ເປັນ​ບາດກ້າວ​ອັນ​ສຳຄັນ ​ໃນ​ການ​ສ້າງເງື່ອໄຂດ້ານນິຕິກຳ, ດ້ານນະໂຍບາຍ, ແລະ ​ມາດຕະຖານຮ່ວມ ​ເພື່ອກ້າວໄປສູ່ການປັບປຸງການ​ບໍລິການ​ດ້ານ​ໂພຊະນາ​ການ​ ໃນ​ທົ່ວພາກພື້ນ​ອາ​ຊຽນ.

ພິທີດັ່ງກ່າວໄດ້ຈັດຂຶ້ນໂດຍ ຜູ້ຕາງໜ້າຈາກກະຊວງສາທາລະນະສຸກ ແຫ່ງ ສປປ ລາວ, ອົງການ DSG ຂອງ ປະຊາຄົມວັດທະນະທໍາ-ສັງຄົມ ອາຊຽນ ແລະ ອົງການຢູນິເຊັບ ພາກອາຊີຕາເວັນອອກ ແລະ ປາຊີຟິກ. ພ້ອມດຽວກັນ ບັນດາຄູ່ຮ່ວມພັດທະນາ ແລະ ແຂກຜູ້ມີກຽດຈາກກອງປະຊຸມລັດຖະມົນຕີສາທາລະນະສຸກອາຊຽນ ພ້ອມດ້ວຍ ກອງປະຊຸມຂັ້ນສູງດ້ານສຸຂະພາບ, ກະສິກຳ ແລະ ປ່າໄມ້, ແລະ ການສຶກສາ  ກໍ່ໄດ້ເຂົ້າຮ່ວມ. ນອກນັ້ນ, ບັນດາ​ປະ​ເທດ​ສະມາຊິກອາຊຽນ ທີ່ໄດ້ຮັບໜ້າທີ່​ບົດບາດຊີ້ນຳການພັດທະນາຄຳແນະນຳດ້ານໂພຊະນາການຂັ້ນຕໍ່າ ທີ່ພັດທະນາຂື້ນມາໃໝ່ນີ້ ກໍ່ໄດ້​ ​ຮັບຮອງ​ ມາດຕະຖານຂັ້ນຕໍ່າ  ດ້ານໂພຊະນາການດັ່ງກ່າວ. ໃນພິທີ່ໃດ້ມີການ ​ຕັດ​ແຖບ​ຜ້າ ​ເພື່ອ​ສະ​ເຫຼີ​ມສະຫຼອງໂອກາດອັນສຳຄັນນີ້.

ທ່ານ ປອ. ດຣ ບຸນແຝງ ພູມມະໄລສິດ, ລັດຖະມົນຕີ ກະຊວງສາທາລະນະສຸກ, ໄດ້ກ່າວ: "ການ​ເປີດຮັບຮອງ ແລະ ນໍາສະເໜີ ມາດຕະຖານຂັ້ນຕໍ່າ  ດ້ານໂພຊະນາການດັ່ງກ່າວນີ້ ​ສະ​ແດງ​ໃຫ້​ເຫັນ​ເຖິງ​ຄວາມ​ມຸ່ງ​ໝັ້ນ​ຂອງ ສປປ ລາວ ​ໃນ​ການ​ຢຸດຕິ​ການ​ຂາດ​ສານ​ອາຫານ ທຸກຮູບແບບ​ຂອງ​ແມ່ຍິງ ​ແລະ ​ເດັກນ້ອຍ. ພວກເຮົາມີຄວາມພາກພູມໃຈ ໃນການນໍາພາການພັດທະນາ ຄໍາແນະນໍາກ່ຽວກັບ ການບັງຄັບໃຊ້ການເພີ່ມທະວີ ວິຕາມິນ ແຮ່ທາດເຂົ້າໃນອາຫານ ແລະ ການຮ່ວມມືນໍາພາການພັດທະນາ ຄໍາແນະນໍາດ້ານໂພຊະນາການຂອງແມ່. ກອງປະຊຸມຂອງພວກເຮົາໃນຄັ້ງນີ້ ​ເປັນ​ຂີດ​ໝາຍ​ສຳຄັນ​ໃນ​ຄວາມ​ພະຍາຍາມ​ຮ່ວມ​ກັນຂອງ​ພວກ​ເຮົາ.”

ພາກ​ພື້ນ​ອາ​ຊຽນ ​ໄດ້​ມີ​ຄວາມ​ຄືບ​ໜ້າ​ຢ່າງຕໍ່ເນື່ອງ​ ໃນ​ການ​ຫຼຸດ​ຜ່ອນ ​ການ​ຂາດ​ສານ​ອາຫານ​ຂອງ​ເດັກ. ເຖິງຢ່າງໃດກໍ່ຕາມ, ຍັງຕ້ອງມີການຜັນຂະຫຍາຍ ມາດຕະຖານຂັ້ນຕໍ່າ ດ້ານໂພຊະນາການດັ່ງກ່າວ ຕື່ມອີກ ເພື່ອໃຫ້ສາມາດກ້າວໄປສູ່ການຈັດຕັ້ງປະຕິບັດ ແລະ ເພື່ອບັນລຸຄຳໝັ້ນສັນຍາທີ່ວາງໄວ້ໃນ ຖະແຫຼງການຜູ້ນຳອາຊຽນ ເພື່ອຢຸດຕິທຸກຮູບແບບຂອງການຂາດສານອາຫານ ເຊິ່ງໄດ້ຖືກຮັບຮອງເອົາໃນປີ 2017. ກອງປະຊຸມເພື່ອຮັບຮອງ ແລະ ນໍາສະເໜີ ມາດຕະຖານຂັ້ນຕໍ່າ ດ້ານໂພຊະນາການດັ່ງກ່າວ ດັ່ງກ່າວ ເປັນບາດກ້າວທີ່ສຳຄັນ ເພື່ອຟື້ນຟູຄວາມພະຍາຍາມ ໃນການພັດທະນາໂຄງການໂພຊະນາການຕ່າງໆ ໃຫ້ຄຸນນະພາບ. ນອກ​ນັ້ນ, ​ຄວາມ​ມານະ​ພະຍາຍາມ​ດັ່ງກ່າວ ​ແມ່ນຍັງ​ສອດຄ່ອງ​ກັບ​ບັນດາເປົ້າໝາຍຕ່າງໆຂອງ​ພາກ​ພື້ນ ​ແລະ ຈະຊ່ວຍປະກອບສ່ວນ​ບັນລຸ ເປົ້າໝາຍ​ພັດທະນາ​ແບບ​ຍືນ​ຍົງ (SDG) 2 ແນ່​ໃສ່ການ​ຢຸດບັນຫາການ​ຂາດ​ສານ​ອາຫານ​ໃນທຸກຮູບແບບ ພາຍໃນ​ປີ 2030.

ອົງການຢູນິເຊັບ ໃນຖານະຄູ່ຮ່ວມງານທາງດ້ານວິຊາການອັນສໍາຄັນ, ກໍ່ໄດ້ໃຫ້ການສະໜັບສະໜູນບັນດາປະເທດສະມາຊິກອາຊຽນ ໃນການປະຕິບັດຄໍາໝັ້ນສັນຍາຂອງຜູ້ນໍາອາຊຽນ ໃນການຢຸດຕິການຂາດສານອາຫານ ໂດຍການນໍາພາການພັດທະນາ ຄຳແນະນຳ ແລະ ມາດຕະຖານດ້ານໂພຊະນາການ. ກ່ອນໜ້ານີ້, ອາ​ຊຽນ, ​ໂດຍ​ໄດ້​ຮັບ​ການ​ສະໜັບສະໜູນ​ຈາກ​ ອົງການຢູນິເຊັບ, ​ກໍ່ໄດ້​ເຜີຍແຜ່ ຄຳແນະນຳ ແລະ ມາດຕະຖານດ້ານໂພຊະນາການ ອີກ 2 ສະບັບ ກໍ່ຄື: ຄໍາແນະນໍາວ່າດ້ວຍການປົກປ້ອງ, ສົ່ງເສີມ ແລະ ສະໜັບສະໜູນ ການລ້ຽງລູກດ້ວຍນົມແມ່ ແລະ ການໃຫ້ອາຫານເສີມ, ແລະ ຄຳແນະນຳວ່າດ້ວຍການປົກປ້ອງເດັກນ້ອຍ ຈາກຜົນກະທົບຂອງການຕະຫຼາດອາຫານ ແລະ ເຄື່ອງດື່ມທີ່ບໍ່ມີທາດເຫຼົ້າ. ດັ່ງນັ້ນ, ຄຳແນະນຳ ແລະ ມາດຕະຖານດ້ານໂພຊະນາການ 4 ສະບັບທີ່ພັດທະນາຂື້ນໃໝ່ນີ້ ເປັນຂີດໝາຍອັນສໍາຄັນ ຂອງການຮ່ວມມືຢ່າງຕໍ່ເນື່ອງລະຫວ່າງ ອາຊຽນ ແລະ ອົງການຢູນິເຊັບ ໃນການຈັດຕັ້ງປະຕິບັດຍຸດທະສາດ ແລະ ສະໜອງບໍລິການດ້ານໂພຊະນາການ ທີ່ມີຄຸນນະພາບ ໂດຍອີງຕາມບົດຮຽນ ແລະ ຫຼັກຖານຈາກສາກົນ.

ໃນ​ບົດ​ກ່າວຂອງ ທ່ານ ນາງ ຈູນ ກູນູກິ, ຜູ້ອຳນວຍການຂັ້ນພາກພື້ນອາຊີຕາເວັນອອກ ແລະ ປາຊີຟິກ ​ຂອງ ອົງການຢູນິເຊັບ, ໄດ້​ເນັ້ນ​ເຖິງ​ຄວາມ​ຈຳ​ເປັນ ໃນການ​ແກ້​ໄຂ​ບັນຫາ​ຂາດ​ສານ​ອາຫານ​ ໃນ​ພາກ​ພື້ນ​ອາ​ຊຽນ. "ວຽກງານຂອງພວກເຮົາ ຍັງບໍ່ສິ້ນສຸດເທື່ອ ແລະ ຍັງມີຄວາມຈຳເປັນໃນການແກ້ໄຂບັນຫາການຂາດສານອາຫານ ພ້ອມການສະກັດກັ້ນ ການເພີ່ມຂຶ້ນຂອງອັດຕາໂລກອ້ວນ." ທ່ານ ຈູນ ກູນູກິ ຍັງໄດ້ກ່າວ​ເນັ້ນ​ຕື່ມ​ວ່າ: “ອົງການຢູນິເຊັບ ຖືເປັນກຽດທີ່ໄດ້​ຮ່ວມ​ມື​ກັບ​ ​ກອງ​ເລຂາ​ອາ​ຊຽນ ​ແລະ ບັນດາ​ປະ​ເທດ​ສະມາຊິກ ​ໃນ​ການພັດທະນາ ແລະ ເຜີຍແຜ່ ຄຳແນະນຳ ແລະ ມາດຕະຖານດ້ານໂພຊະນາການ 4 ສະບັບທີ່ພັດທະນາຂື້ນໃໝ່ ເຫຼົ່ານີ້. ອົງການພວກເຮົາ, ທັງໃນລະດັບ ພາກພື້ນ ແລະ ສາກົນ, ຍັງຄົງມີຄວາມມຸ່ງໝັ້ນໃນການສະໜັບສະໜູນປະເທດສະມາຊິກອາຊຽນ ເພື່ອຈັດຕັ້ງປະຕິບັດ ຄຳແນະນຳ ແລະ ມາດຕະຖານດ້ານໂພຊະນາການ ເພື່ອປັບປຸງຄຸນນະພາບ ຂອງແຜນງານດ້ານໂພຊະນາການຂອງພວກເຂົາ."