ສປປ ລາວ ຢືນຢັນ ຈະປະຕິບັດ ເປົ້າໝາຍຢຸດຕິຄວາມທຸກຍາກຂອງເດັກໃນ ວັນເດັກໂລກ

ນະຄອນຫຼວງວຽງຈັນ, ວັນທີ 18 ພະຈິກ 2022 – ມື້ນີ້, ເນື່ອງໃນໂອກາດວັນເດັກໂລກ 2022, ການນຳຂັ້ນສູງຂອງລັດຖະບານ ແຫ່ງ ສປປ ລາວ, ທ່ານຮອງເຈົ້າແຂວງຈາກ 18 ແຂວງທົ່ວປະເທດ, ຜູ້ຕາງໜ້າຈາກພາກເອກະຊົນ, ອົງການບໍ່ສັງກັດລັດຖະບານ (NGO), ອົງການຈັດຕັ້ງທາງສັງຄົມ, ອົງການຢູນິເຊັບ ແລະ ເດັກ ໄດ້ເຂົ້າຮ່ວມ ກອງປະຊຸມ ລະດັບສູງ ຂອງຮອງເຈົ້າແຂວງ ໃນທົ່ວປະເທດ ເພື່ອລາຍງານຄວາມຄືບໜ້າໃນການແກ້ໄຂບັນຫາຄວາມທຸກຍາກຂອງເດັກ ຂອງ ສປປ ລາວ.

ວັນ​ເດັກ​​ໂລກ​ແມ່ນ​ໄດ້​ຈັດ​ຂຶ້ນ​ໃນ​ວັນ​ທີ 20 ພະຈິກ ​ຂອງ​ທຸກໆ​ປີ ​ເພື່ອ​ເປັນ​ຂີດ​ໝາຍຂອງ​ການ​ໃຫ້ສັດຕະຍາບັນໃນສົນທິສັນຍາ​ວ່າ​ດ້ວຍ​ສິດທິ​ເດັກ ​ແລະ ​ເພື່ອ​ແນ​ໃສ່​ສ້າງ​ຄວາມ​ຮັບ​ຮູ້​ກ່ຽວ​ກັບ​ບັນຫາ​ສຳຄັນ​ທີ່​ສົ່ງຜົນກະທົບ​ຕໍ່​ຊີວິດ​ຂອງ​ເດັກ.

​ເສີມຕື່ມຈາກຈຸດສຸມ​ໃນ​ປີ​ກາຍ ທີ່ແນໃສ່ການ​ຟື້ນຟູຈາກຜົນກະທົບຂອງ​ພະຍາດ​ໂຄ​ວິດ-19, ຫົວ​ຂໍ້​ຂອງ​ການສະເຫຼີມສະຫຼອງວັນ​ເດັກ​ໂລກ​ໃນປີ​ນີ້​ ຈະ​ເຫນັ້ນ​ໜັກ​ເຖິງ​ການມີສ່ວນຮ່ວມ ແລະ ການເປັນສວ່ນໜຶ່ງຂອງເດັກນ້ອຍ​ ໃນ​ຂະ​ບວນການ​ຟື້ນ​ຟູ​ຈາກຜົນກະທົບຂອງ​ການລະບາດຂອງພະຍາດ​.

ໃນ​ກອງ​ປະຊຸມ​ລະດັບ​ສູງ, ບັນດາ​ພາກສ່ວນ​ກ່ຽວຂ້ອງ​ໄດ້​ນໍາສະ​ເໜີ​ ຄວາມ​ຄືບ​ໜ້າ​ໃນ​ການຈັດຕັ້ງ​ປະຕິບັດ​ຄຳ​ໝັ້ນ​ສັນຍາ​ທີ່​ຜ່ານ​ມາ​ໃນ​ການ​ຫຼຸດຜ່ອນ​ຄວາມທຸກ​ຍາກ​ຂອງ​ເດັກ​ ໃນລະຫວ່າງ​ປີ 2021 – 2022 ພ້ອມ​ທັງ ທົບທວນ​ຄືນ​ຄວາມເປັນຢູ່ຂອງ​ເດັກນ້ອຍ​ໃນ​ສະພາບ​ການ​ແຜ່​ລະບາດ​ຂອງ​ພະຍາດ​ໂຄ​ວິດ-19.

ພະນະທ່ານນາງ ດຣ. ອິນລາວັນ ແກ້ວບຸນພັນ ປະທານສະຫະພັນແມ່ຍິງລາວ ແລະ ປະທານຮ່ວມຂອງ ຄະນະກຳມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ (ຄຊກມດ)ໄດ້ກ່າວວ່າ:

“ກອງປະຊຸມໃນມື້ນີ້ ແມ່ນມີຄວາມໝາຍຄວາມສຳຄັນຍິ່ງ ເພາະມັນເປີດໂອກາດໃຫ້ພວກເຮົາໄດ້ປະເມີນ ແລະ ປຶກສາຫາລື ກ່ຽວກັບ ບັນດາຄຳໝັ້ນສັນຍາທີ່ຜ່ານມາຂອງພວກເຮົາຕໍ່ກັບການຈັດຕັ້ງປະຕິບັດສົນທິສັນຍາ​ວ່າ​ດ້ວຍ​ສິດທິ​ເດັກ, ການພັດທະນາຂອງຄົນລາວລຸ້ນປີ 2030, ເປົ້າໝາຍການພັດທະນາແບບຍືນຍົງ 1.2 ແລະ ຄວາມພະຍາຍາມຂອງພວກເຮົາເພື່ອຫຼຸດຜ່ອນຄວາມທຸກຍາກຂອງເດັກ ໃນລະຫວ່າງປີ 2021-2022, ສອງຄ່ອງກັບແຜນການຫຼຸດຜ່ອນຄວາມທຸກຍາກຂອງເດັກໃນຫຼາຍມິຕິ ໃນປີ 2023,”

ໃນກອງປະຊຸມ ບັນດາພາກສ່ວນທີ່ກ່ຽວຂ້ອງໄດ້ເຫັນດີເປັນເອກະພາບກັນ ໃນການຍົກສູງເດັກນ້ອຍ ແລະ ໄວໜຸ່ມໃຫ້ເປັນບູລິມະສິດແຫ່ງຊາດໃນຄວາມພະຍາຍາມແກ້ໄຂຜົນກະທົບຈາກການລະບາດຂອງພະຍາດໂຄວິດ-19 ແລະ ເຫັນດີໃຫ້ເລັ່ງລັດໃສ່ການຫຼຸດຜ່ອນຄວາມທຸກຍາກຂອງເດັກນ້ອຍໃນທົ່ວ 18 ແຂວງ ໃນ ສປປ ລາວ ໂດຍການເພີ່ມການລົງທຶນໃສ່ບັນດາຂົງເຂດສຳຄັນ ເຊັ່ນ: ການສຶກສາ, ການປົກປ້ອງເດັກ, ສຸຂະພາບ, ໂພຊະນາການ, ສຸຂາພິບານ ແລະ ການປົກປ້ອງທາງສັງຄົມ ແລະ ອື່ນໆ. ພາກສ່ວນກ່ຽວຂ້ອງ ຍັງໄດ້ປຶກສາຫາລືກັນຕື່ມອີກ ກ່ຽວກັບ ຄໍາໝັ້ນສັນຍາສະເພາະ ແລະ ແຜນກິດຈະກໍາ ເພື່ອຊ່ວຍແກ້ໄຂບັນຫາທີ່ກ່ຽວຂ້ອງກັບເດັກໃນປີຕໍ່ໄປ ໃນຂະນະທີ່ເດັກນ້ອຍຍັງໄດ້ມີໂອກາດປະກອບຄໍາຄິດເຫັນ ແລະ ສະແດງຂໍ້ສະເໜີຂອງເຂົາເຈົ້າ ເພື່ອຮັບປະກັນວ່າແຜນງານເຫຼົ່ານີ້ ຈະສະທ້ອນເຖິງຄວາມຕ້ອງການຂອງເຂົາເຈົ້າ ຢ່າງແທ້ຈິງ.

ທ່ານ ດຣ. ເພຍ ແບັນໂລ ບຣິດໂຕ ຜູ້ຕາງໜ້າອົງການຢູນິເຊັບ ປະຈໍາ ສປປ ລາວ ກ່າວວ່າ "ຈາກປະສົບການຂອງພວກເຮົາໃນການຮັບມືກັບການແຜ່ລະບາດຂອງ COVID-19 ມາຮອດປະຈຸບັນນີ້, ສິ່ງໜຶ່ງທີ່ຈະແຈ້ງ ກໍ່ຄື ສິ່ງສຳຄັນທີ່ສຸດ ພວກເຮົາຕ້ອງຍົກເອົາເດັກເປັນບູລິມະສິດ ໃນແຜນການຟື້ນຟູຈາກການແຜ່ລະບາດຂອງພະຍາດ ແລະ ການຮັບຟັງຈາກເດັກນ້ອຍໂດຍກົງຈະຊ່ວຍຮັບປະກັນວ່າ ແຜນການຂອງພວກເຮົາຈະຕອບສະໜອງກັບຄວາມຕ້ອງການຂອງພວກເຂົາ". ເພິ່ນຍັງກ່າວຕື່ມອີກວ່າ "ດຽວນີ້, ມັນມີຄວາມສໍາຄັນຫຼາຍກວ່າທີ່ເຄີຍເປັນມາ, ມັນແມ່ນເວລາທີ່ພວກເຮົາຕ້ອງມາທົບທວນເບິ່ງຄວາມຄືບໜ້າຂອງພວກເຮົາ, ເບິ່ງໄປຂ້າງໜ້າ ແລະ ຖາມຕົນເອງວ່າ ພວກເຮົາຈະແກ້ໄຂບັນຫາທີ່ສຳຄັນທີ່ສົ່ງຜົນກະທົບຕໍ່ເດັກນ້ອຍແນວໃດໃນສະພາບທີ່ຍັງມີການລະບາດຂອງພະຍາດ ໂຄວິດ-19. ຊຶ່ງນີ້ແມ່ນຈຸດປະສົງຫຼັກຂອງກອງປະຊຸມຂອງພວກເຮົາໃນມື້ນີ້”.

ນອກຈາກ​ກອງ​ປະຊຸມ​ລະດັບສູງ ນີ້ແລ້ວ, ອົງການຢູນິເຊັບ ຍັງ​ໄດ້​ຈັດ​ຕັ້ງ​ຫຼາກຫຼາຍກິດຈະກຳ​ເພື່ອສະເຫຼີມສະຫຼອງ​ວັນ​ເດັກ​ໂລກ 2022 ຢູ່ ສປປ ລາວ ​ເຊັ່ນ: ການ​ຍ່າງເພື່ອສຸຂະພາບ ​ແລະ ງານ​ເທດສະການວັນ​ເດັກໂລກ​ໃນ​ວັນ​ທີ 19 ພະຈິກ​ນີ້. ເນື່ອງໃນໂອກາດວັນເດັກໂລກປີນີ້ ກົງກັບ ການແຂ່ງຂັນບານເຕະໂລກ, ງານເທດສະການວັນ​ເດັກໂລກນີ້ ກໍ່ຈະຈັດຂຶ້ນໃນຫົວຂໍ້ການແຂ່ງຂັນບານເຕະ ແລະ ກິລາ.

ໃນວັນ​ທີ 20 ພະຈິກ​ ຊຶ່ງ​ແມ່ນ ​ວັນ​ເດັກ​ໂລກ, ເຮົາຈະມາປ່ຽນປະຕູໄຊ​ເປັນສັນຍາລັກຂອງປະເທດໃຫ້ເປັນສີຟ້າ ເພື່ອສະເຫຼີມສະຫຼອງວັນເດັກໂລກ ແລະ ສົ່ງເສີມສິດທິເດັກໃນທົ່ວປະເທດ.​ ນອກນີ້ເດັກນ້ອຍກໍ່ຍັງ​ຈະ​ໄດ້ມີໂອກາດ​ສົ່ງຄໍາຄິດເຫັນ ແລະ ສະແດງຄວາມປາດຖະໜາຂອງຕົນເອງ ຜ່ານທາງ ​ໂທລະພາບແຫ່ງ​ຊາດ​ລາວ ​ແລະ ວິທະຍຸ​ກະຈາຍສຽງ​ແຫ່ງ​ຊາດ​ລາວ.