ວິທະຍຸກະຈາຍສຽງແຫ່ງຊາດລາວ ເເລະ ອົງການຢູນິເຊັບ ຮ່ວມມືກັນເພື່ອພັດທະນາຄວາມສາມາດຂອງໄວໜຸ່ມ ເເຂວງໄຊສົມບູນ ເພື່ອໂຄສະນາເຜີຍເເຜ່ກ່ຽວກັບບັນຫາໄວໜຸ່ມຕ່າງໆ

ເເຂວງໄຊສົມບູນ, 16 ເດືອນມິຖຸນາ 2023 – ໃນເດືອນມິຖຸນາ ທີ່ຜ່ານມານີ້, ຄະນະຜູ້ແທນຈາກ ວິທະຍຸກະຈາຍສຽງແຫ່ງຊາດລາວ ແລະ ອົງການຢູນີເຊັບ, ໂດຍໄດ້ຮັບການສະໜັບສະໜູນຈາກ ສະຫະພາບເອີຣົບ, ໄດ້ລົງເຄື່ອນໄຫວວຽກງານທີ່ ແຂວງໄຊສົມບູນ ເພື່ອເສີມສ້າງຄວາມສາມາດຂອງກຸ່ມສື່ໄວໜຸ່ມແຂວງ ໃນການໂຄສະນາເຜີຍເເຜ່ກ່ຽວກັບສິດທິເດັກ, ລວມໄປເຖິງ ບັນຫາຕ່າງໆ ທີ່ມີຜົນກະທົບຕໍ່ໄວໜຸ່ມລາວ.

ດ້ວຍການນຳພາໂດຍ ທ່ານ ສຸວັນ ວິໄລແສງ, ຜູ້ອໍານວຍການໃຫຍ່ ວິທະຍຸກະຈາຍສຽງແຫ່ງຊາດລາວ, ຄະນະຜູ້ແທນດັ່ງກ່າວ ໄດ້ໄປພົບປະກັບສື່ມວນຊົນແຂວງ ເພື່ອປຶກສາຫາລືກ່ຽວກັບຄວາມຄືບໜ້າ, ສິ່ງທ້າທາຍ ແລະ ແຜນໃນຕໍ່ໜ້າ ເພື່ອເຜີຍເເຜ່ຄວາມຮູ້ກ່ຽວກັບບັນຫາຕ່າງໆທີ່ຕິດພັນກັບເດັກນ້ອຍ ແລະ ໄວໜຸ່ມ ຕື່ມໃນແຂວງໄຊສົມບູນ.

ທ່ານ ສຸວັນ ວິໄລແສງ ໄດ້ກ່າວວ່າ: “ຂ້າພະເຈົ້າດີໃຈ ທີ່ໄດ້ເຫັນຄວາມຄືບໜ້າອັນດີເດັ່ນ ໃນການສົ່ງເສີມສິດທິ ແລະ ສະຫວັດດີການຂອງເດັກນ້ອຍ ແລະ ແມ່ຍິງ ຜ່ານສື່ທ້ອງຖິ່ນໃນ ເເຂວງໄຊສົມບູນ, ລວມໄປເຖິງ ລາຍການເປີດໃຈໄວໜຸ່ມແຂວງໄຊສົມບູນ. ວິທະຍຸ​ແຫ່ງ​ຊາດ​ລາວ ຈະສືບຕໍ່ໃຫ້ການຊີ້​ນຳ ແລະ ສະໜັບສະໜູນ​ດ້ານ​ວິຊາ​ການ​ໃຫ້ ​ແຂວງ​ໄຊ​ສົມບູນ, ​ໂດຍ​ສະ​ເພາະ​ແມ່ນ​ ໃນວຽກງານສື່ໄວໜຸ່ມແຂວງ ​ເພື່ອ​ຍົກ​ສູງ​ຄວາມ​ຮັບ​ຮູ້​ກ່ຽວ​ກັບ​ ບັນຫາຕ່າງໆ​ທີ່​ມີ​ຜົນ​ກະທົບ​ຕໍ່​ໄວ​ໜຸ່ມ​ໃນ​ແຂວງ ນັບ​ຕັ້ງແຕ່​ ບັນຫາດ້ານ​ການ​ສຶກສາ ຈົນໄປ​ເຖິງ​ ບັນຫາການ​ແຕ່ງງານກ່ອນໄວ.”

ວິທະຍຸກະຈາຍສຽງ ແຂວງໄຊສົມບູນ ໄດ້ອອກອາກາດ ແລະ ໃຫ້ຂໍ້ມູນຂ່າວສານເເກ່ປະຊາຊົນແຂວງໄຊສົມບູນ ນັບແຕ່ປີ 2013 ເປັນຕົ້ນມາ. ດ້ວຍການສະໜັບສະໜູນຈາກ ອົງການຢູນິເຊັບ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ວິທະຍຸກະຈາຍສຽງແຫ່ງຊາດລາວ ກໍ່ໄດ້ດຳເນີນການຝຶກອົບຮົມໃຫ້ແກ່ສື່ມວນຊົນໃນທົ່ວ 5 ເມືອງຂອງ ແຂວງໄຊສົມບູນ ເຊັ່ນດຽວກັນ. ໃນປີ 2015, ກຸ່ມສື່ໄວໜຸ່ມ ແຂວງໄຊສົມບູນ ກໍ່ໄດ້ຖືກສ້າງຕັ້ງຂຶ້ນ ດ້ວຍການສະໜັບສະໜູນຂອງ ອົງການຢູນິເຊັບ ແລະ ນັບເເຕ່ນັ້ນມາ ກໍ່ໄດ້ກາຍເປັນຊ່ອງທາງອັນສຳຄັນໃນການສົ່ງເສີມຄວາມເຂົ້າໃຈກ່ຽວກັບສິດທິ ແລະ ສະຫວັດດີການຂອງເດັກນ້ອຍ ແລະ ແມ່ຍິງໃນແຂວງ, ໂດຍສະເພາະ ໃນກຸ່ມໄວໜຸ່ມ ແຂວງໄຊສົມບູນ.

ພ້ອມດຽວກັນ​ກັບ​ການ​ລົງຢ້ຽມຢາມ​ຂອງ​ຄະນະ​ຜູ້​ແທນ​ວິທະຍຸ​ແຫ່ງ​ຊາດ​ລາວ, ອົງການຢູນິເຊັບ ຍັງ​ໄດ້​ຈັດການຝຶກອົບຮົມ​ກ່ຽວ​ກັບ​ ວຽກ​ງານອາສາໂຄສະນາໄວໜຸ່ມ ໃຫ້ເເກ່ບັນດາສະມາຊິກກຸ່ມສື່ໄວໜຸ່ມແຂວງ​ໄຊ​ສົມບູນ ເຊັ່ນດຽວກັນ ​ເພື່ອ​ສ້າງ​ຄວາມ​ເຂົ້າ​ໃຈ​ກ່ຽວ​ກັບ​ການມີສ່ວນຮ່ວມຂອງໄວໜຸ່ມ ເເລະ ການ​ເປັນອາສາໂຄສະນາໄວໜຸ່ມ, ເເລະ ສ້າງທັກສະຂອງໄວໜຸ່ມໃນການໂຄສະນາເຜີຍເເຜ່ຂໍ້ມູນກ່ຽວກັບບັນຫາພົ້ນເດັ່ນທີ່ໄວໜຸ່ມກຳລັງປະເຊີນ.

ວົງເດືອນ ກົງພັກດີ, ນັກຮຽນຊັ້ນ ມ.11 ແລະ ສະມາຊິກກຸ່ມສື່ໄວໜຸ່ມ ແຂວງໄຊສົມບູນ, ໄດ້ແບ່ງປັນປະສົບການໃນການເຂົ້າຮ່ວມ ການຝຶກອົບຮົມ​ກ່ຽວ​ກັບ ​ວຽກ​ງານອາສາໂຄສະນາໄວໜຸ່ມໃນຄັ້້ງນີ້: "ຂ້າພະເຈົ້າຮຸສຶກວ່າ ການຝຶກອົບຮົມເປັນປະໂຫຍດຫຼາຍ ເເລະ ຈະຊ່ວຍນ້ອງໃນການກະຈາຍ ເເລະ ເຜີຍເເຜ່ຂໍ້ມູນ ເເລະ ປູກຝັງຈິດສຳນຶກກ່ຽວກັບບັນຫາຕ່າງໆທີ່ກ່ຽວຂ້ອງກັບໄວໜຸ່ມ." ລາວຍັງໄດ້ເເບ່ງປັນອີກວ່າ ລາວ​ມີ​ຄວາມ​ສົນ​ໃຈ​ເປັນ​ພິ​ເສດ​ຕໍ່ບັນຫາການສຶກສາ, ໂດຍສະເພາະ ບັນດ້ານພາສາໃນກຸ່ມເດັກນ້ອຍ ເເລະ ໄວໜຸ່ມໃນເເຂວງ ພາຍຫຼັງການລະບາດຂອງພະຍາດ ​ໂຄ​ວິດ-19 ແລະ​ ຫວັງ​ວ່າ​ຈະ​ສາມາດນຳໃຊ້​ທັກສະ​ທີ່​ລາວ​ໄດ້ຮຽນຮູ້ໃນການການຝຶກອົບຮົມຄັ້ງນີ້ ເພື່ອປະກອບສ່ວນໃນການຊ່ວຍ​ອຳນາດ​ການ​ປົກຄອງ​ແຂວງ​​ແກ້​ໄຂບັນຫາດັ່ງກ່າວ.

ນອກຈາກ​ການຝຶກອົບຮົມ​ກ່ຽວ​ກັບ​ວຽກ​ງານອາສາໂຄສະນາໄວໜຸ່ມນີ້​ແລ້ວ, ອົງການຢູນິເຊັບ ຍັງ​ໄດ້​ຈັດ​ການ​ສົນທະນາ​ກັບ​ນັກຮຽນ​ຈາກ​ໂຮງຮຽນ​ມັດທະຍົມ​​ທ້ອງ​ຖິ່ນ ຂອງ ເເຂວງໄຊສົມບູນ ​ໂດຍ​ສຸມ​ໃສ່​ຫົວ​ຂໍ້​ການ​ສຶກສາ ​ແລະ ທັກສະສຳລັບການ​ເຮັດວຽກ​​ໃນໂລກພາຍຫຼັງການລະບາດຂອງ​ພະຍາດ ​ໂຄ​ວິດ-19. ຜູ້ເຂົ້າຮ່ວມ ກໍ່ໄດ້ແລກປ່ຽນປະສົບການກ່ຽວກັບການຮັບມືກັບພະຍາດ ໂຄວິດ-19 ໃນເເຂວງຂອງຕົນ, ໂດຍສະເພາະ ຜົນຂອງພະຍາດດັ່ງກ່າວ ຕໍ່ກັບການຮຽນຮູ້ຂອງພວກເຂົາ, ແລະ ປຶກສາຫາລືກັນກ່ຽວກັບ ແຜນການໃນອະນາຄົດຂອງພວກເຂົາພາຍຫຼັງຮຽນຈົບ.

ການຝຶກອົບຮົມ​ກ່ຽວ​ກັບ​ວຽກ​ງານອາສາໂຄສະນາໄວໜຸ່ມ ທີ່ ເເຂວງໄຊສົມບູນ ​ເເມ່ນຈັດ​ຕັ້ງປະຕິບັດ​ໂດຍ ອົງການຢູນິເຊົບ ໂດຍ​ໄດ້ຮັບການ​ສະ​ຫນັບ​ສະ​ຫນູນຈາກ ​ສະ​ຫະ​ພາບ​ເອີ​ຣົບ. ນອກນັ້ນ, ການຝຶກອົບຮົມດັ່ງກ່າວ ຍັງ​ໄດ້ຖືກ​ຈັດ​ຂຶ້ນ​ຢູ່​ ແຂວງ​ຫົວພັນ, ສະ​ຫວັນ​ນະ​ເຂດ ​ແລະ ​​ຊຽງ​ຂວາງ ອີກເຊັ່ນດຽວກັນ​ ໃນ​ລະຫວ່າງ​ ເດືອນ​ພຶດສະພາ ​ຫາ ​ເດືອນ​ມິຖຸນາ 2023.