ລັດຖະບານແຫ່ງ ສປປ ລາວ ແລະ ອົງການຢູນີເຊັບຢືນຢັນຄືນເຖິງຄວາມມຸ່ງໝັ້ນໃນການສ້າງໂລກທີ່ດີກ່ວາສຳລັບເດັກພາຍຫຼັງການລະບາດຂອງພະຍາດ ເນື່ອງໃນວັນເດັກນ້ອຍໂລກ ປີ 2021.
ຈຸດເດັ່ນຂອງວັນເດັກນ້ອຍໂລກປີນີ້ ແມ່ນການເປີດຕົວຄັ້ງປະຖົມມະເລີກບົດເພງໃໝ່ຂອງນາງອາລູນາ ຖາວອນສຸກ, ນັກຮ້ອງຍອດນິຍົມຂອງລາວຊຶ່ງລວມເອົາຂໍ້ຄວາມກ່ຽວກັບການປ້ອງກັນ ແລະ ຄວບຄຸມພະຍາດໂຄວິດ-19.
- ສາມາດມີໃນ:
- English
- ລາວ
ນະຄອນຫຼວງວຽງຈັນ, ວັນທີ 19 ເດືອນພະຈິກ ປີ 2021 – ໃນມື້ນີ້, ເນື່ອງໃນໂອກາດວັນເດັກນ້ອຍໂລກ (WCD), ກະຊວງສາທາລະ ນະສຸກ ແລະ ອົງການຢູນີເຊັບປະຈໍາ ສປປ ລາວໄດ້ເປີດຕົວບົດເພງທຳອິດໃນ ສປປ ລາວ ທີ່ສົ່ງເສີມຄວາມສຳຄັນຂອງການສັກວັກຊີນກັນພະຍາດ ແລະ ເນັ້ນໃສ່ຂໍ້ຄວາມກ່ຽວກັບການປະຕິບັດຕົວຈິງດ້ານຄວາມປອດໄພຕໍ່ພະຍາດໂຄວິດ-19. ບົດເພງດັ່ງກ່າວມີຊື່ວ່າ “ລາວຮ່ວມໃຈສັກວັກຊີນ” ຊຶ່ງປະພັນເພັງ ແລະ ແປໂດຍ ນາງອາລູນາ ທະວີບສຸກ, ນັກຮ້ອງລາວ, ພ້ອມທັງສະເຫຼີມສະຫຼອງຄວາມພະຍາ ຍາມຂອງພະນັກງານສາທາລະນະສຸກທີ່ເປັນແຖວໜ້າໃນການຮັບມືກັບພະຍາດໂຄວິດ-19 ຂອງ ສປປ ລາວ ນັບແຕ່ເກີດການລະບາດຂອງພະຍາດດັ່ງກ່າວ.
ວັນເດັກນ້ອຍໂລກ (WCD) ແມ່ນມື້ຂອງອົງການຢູນີເຊັບທົ່ວໂລກທີ່ປະຕິບັດຕໍ່ເດັກໂດຍມີຈຸດປະສົງເພື່ອຊີ້ໃຫ້ເຫັນເຖິງປະເດັນສໍາຄັນຕ່າງໆທີ່ມີຜົນກະທົບຕໍ່ຊີວິດຂອງພວກເຂົາ ແລະ ໄດ້ຈັດຂຶ້ນທຸກໆປີໃນວັນທີ 20 ເດືອນພະຈິກເພື່ອສະເຫຼີມສະຫຼອງການຮັບຮອງເອົາສົນທິສັນຍາວ່າດ້ວຍສິດທິເດັກ (CRC).
ໃນປີນີ້, ໄດ້ສືບຕໍ່ຈັດງານ WCD ທ່າມກາງສະຖານະການທີ່ທ້າທາຍຂອງການລະບາດຂອງພະຍາດໂຄວິດ-19, ໂດຍໄດ້ຈັດງານຂະໜາດນ້ອຍແບບປະສົມເພື່ອສະເຫຼີມສະຫຼອງວັນດັ່ງກ່າວໃນ ສປປ ລາວ ແລະ ຍັງເປັນການເປີດຕົວບົດເພງທີ່ກ່າວມາຂ້າງເທິງ.
ພິທີດັ່ງກ່າວໄດ້ຈັດຂຶ້ນໃນວັດຂອງທ້ອງຖິ່ນແຫ່ງໜຶ່ງໃນນະຄອນຫຼວງວຽງຈັນ ປະຈຸບັນໄດ້ໃຊ້ເປັນສູນສັກວັກຊີນກັນພະຍາດ ແລະ ໂດຍການເປັນປະທານຂອງພະນະທ່ານ ດຣ. ໄພວັນ ແກ້ວປະເສີດ, ຮອງລັດຖະມົນຕີກະຊວງສາທາລະນະສຸກ ແລະ ທ່ານນາງ ດຣ. ປີອາ ເຣເບລໂລ ບຣີໂຕ, ຜູ້ຕາງໜ້າອົງການຢູນິເຊັບປະຈຳສປປລາວ, ພ້ອມດ້ວຍບັນດາທ່ານຜູ້ເຂົ້າຊົມຫຼາຍທ່ານທີ່ໄດ້ເຂົ້າຮ່ວມແບບທາງໄກຜ່ານການຖ່າຍທອດສົດງານດັ່ງກ່າວທາງອິນເຕີເນັດ.
ໃນງານດັ່ງກ່າວ, ພະນະທ່ານ ດຣ. ໄພວັນ ແກ້ວປະເສີດ, ຮອງລັດຖະມົນຕີກະຊວງສາທາລະນະສຸກກ່າວວ່າ: “ຄວາມວຸ້ນວາຍດ້ານເສດ ຖະກິດ-ສັງຄົມທີ່ເກີດຈາກການລະບາດຂອງພະຍາດໂຄວິດ-19 ແມ່ນມະຫາສານ, ເປັນການທໍາລາຍສຸຂະພາບ ແລະ ຄວາມປາຖະໜາຂອງລູກຫຼານຂອງພວກເຮົາ. ພວກເຮົາຮູ້ວ່າເດັກ ແລະ ຊາວໜຸ່ມແມ່ນອະນາຄົດຂອງປະເທດເຮົາ ແລະ ຈຳເປັນຕ້ອງເພີ່ມທະວີຄວາມພະ ຍາຍາມຂອງຕົນໃນການຄວບຄຸມການລະບາດຂອງພະຍາດໂຄວິດ-19 ແລະ ຊ່ວຍໃຫ້ເດັກ ແລະ ຄອບຄົວຂອງພວກເຂົາໄດ້ຟື້ນຕົວຈາກຜົນກະທົບຂອງພະຍາດລະບາດນີ້. ດ້ວຍເຫດນີ້, ການສັກວັກຊີນກັນພະຍາດຈິ່ງມີຄວາມສໍາຄັນ."
ການເປີດຕົວບົດເພງດັ່ງກ່າວແມ່ນທັນການໃນຂະນະທີ່ລັດຖະບານພວມເລັ່ງລັດຂະບວນການສັກວັກຊີນກັນພະຍາດໂຄວິດ-19 ເພື່ອບັນ ລຸເປົ້າໝາຍໃໝ່ຂອງອັດຕາການສັກວັກຊີນໃຫ້ໄດ້ເຖິງ 70 % ຂອງປະຊາກອນທັງໝົດຂອງ ສປປ ລາວ ໃນທ້າຍປີ 2021 ນີ້. ຍັງຈະໄດ້ເຜີຍແຜ່ບົດເພງດັ່ງກ່າວຜ່ານໂທລະໂຄ່ງຊຸມຊົນ ແລະ ວິທະຍຸກະຈາຍສຽງແຫ່ງຊາດລາວອີກດ້ວຍ, ທັງນີ້ກໍເພື່ອຊ່ວຍໃຫ້ສະມາຊິກໃນຊຸມຊົນເຂົ້າຮ່ວມການສັກວັກຊີນກັນພະຍາດໂຄວິດ-19.
ທ່ານນາງ ດຣ. ປີອາ ເຣເບລໂລ ບຣີໂຕກ່າວວ່າ: “ພະຍາດຍັງສືບຕໍ່ລະບາດຊຶ່ງເປັນວິກິດການຕໍ່ສິດທິເດັກທີ່ເປັນໄພຂົ່ມຂູ່ຕໍ່ອະນາຄົດຂອງທຸກຄົນໃນລຸ້ນຄົນນັ້ນ. ສິ່ງສໍາຄັນແມ່ນພວກເຮົາຕ້ອງຮັບຟັງສຽງຂອງລູກຫຼານໃນເລື່ອງທີ່ສໍາຄັນທີ່ສຸດ ບໍ່ວ່າຈະເປັນການສຶກສາ ຫຼື ການປ່ຽນແປງດິນຟ້າອາກາດ, ສະນັ້ນ ພວກເຮົາຈຶ່ງຈະສາມາດຊ່ວຍພວກເຂົາໃຫ້ຈິນຕະນາການກ່ຽວກັບໂລກທີ່ດີຂຶ້ນຫຼັງພະຍາດລະບາດ ແລະ ຮັບຮູ້ເຖິງວິໄສທັດຂອງຄົນລາວລຸ້ນ 2030 – ຊຶ່ງເປັນລຸ້ນຄົນໄວໜຸ່ມທີ່ມີສຸຂະພາບ, ໂພຊະນາການ, ການສຶກສາ, ການປົກປ້ອງ, ແລະ ທັກສະດ້ານສັງຄົມ, ດ້ານຈິດໃຈ ແລະ ດ້ານສະຕິປັນຍາທີ່ໄດ້ຮັບການປັບປຸງໃຫ້ດີຂຶ້ຶ້ນ”. ຜູ້ຕາງໜ້າອົງການຢູນິເຊັບປະຈຳສປປລາວ ຍັງສະຫຼຸບຄວາມວ່າ: “ວັນເດັກນ້ອຍໂລກປີນີ້ ຍັງກົງກັບວັນຄົບຮອບ 75 ປີຂອງອົງການຢູນິເຊັບອີກດ້ວຍ, ຊຶ່ງເປັນການຢັ້ງຢືນເຖິງຄວາມມຸ່ງໝັ້ນອັນຍາວນານຂອງພວກເຮົາເປັນເວລາຫຼາຍສິບທົດສະວັດແລ້ວໃນການສົ່ງເສີມສິດທິເດັກໃນທົ່ວທຸກແຫ່ງຫົນ, ລວມທັງໃນ ສປປ ລາວອີກດ້ວຍ. ໃນ WCD 2021, ອົງການຢູນິເຊັບຂໍຢືນຢັນຄືນເຖິງຄວາມມຸ່ງໝັ້ນຂອງຕົນທີ່ຈະເຮັດວຽກຮ່ວມກັບລັດຖະບານ ແລະ ຄູ່ຮ່ວມງານຂອງພວກເຮົາເພື່ອປັບປຸງຊີວິດຂອງເດັກນ້ອຍລາວໃຫ້ດີຂຶ້ນ, ໂດຍເນັ້ນໜັກເປັນພິເສດໃສ່ການໃຫ້ວັກຊີນກັນພະຍາດໃຫ້ແກ່ເດັກ ເພາະວ່າພວກເຮົາຈິນຕະນາການຄືນວ່າປະເທດຈະດີຂຶ້ນສຳລັບທຸກຄົນ, ຊຶ່ງເປັນປະເທດທີ່ເດັກທຸກຄົນໄດ້ຮັບວັກຊີນຢ່າງຄົບຖ້ວນ ແລະ ເລີ່ມຕົ້ນຊີວິດທີ່ດີທີ່ສຸດ.”
ນາງ ອາລູນາ ຖາວອນສຸກ ກໍ່ໄດ້ສະແດງຄວາມກະຕືລືລົ້ນຂອງຕົນທີ່ໄດ້ປ່ອຍບົດເພງດັ່ງກ່າວອອກມາດ້ວຍຄວາມມຸ່ງຫວັງວ່າຈະເປັນການປະກອບສ່ວນເຂົ້າໃນຂະບວນການໂຄສະນາສັກວັກຊີນກັນພະຍາດຂອງ ສປປ ລາວ. ນາງກ່າວວ່າ: “ບົດເພງນີ້ໄດ້ເປັນໂອກາດໃຫ້ຂ້າພະ ເຈົ້າໄດ້ປະກອບສ່ວນດ້ວຍວິທີທາງຂອງຕົນເອງເຂົ້າໃນຂະບວນການໂຄສະນາສັກວັກຊີນກັນພະຍາດຢູ່ ສປປ ລາວ. ຂ້າພະເຈົ້າຫວັງວ່າບົດເພງ ແລະ ສຽງດົນຕຣີຂອງຂ້າພະເຈົ້າຈະຊ່ວຍເສີມສ້າງນໍ້າໃຈສາມັກຄີຂອງປະຊາຊົນລາວຊ່ວງການລະບາດຂອງພະຍາດໂຄວິດ-19 ແລະ ຊຸກຍູ້ໃຫ້ປະຊາຊົນໄປສັກວັກຊີນຫຼາຍຂຶ້ນ ເພື່ອເຮັດໃຫ້ເດັກ ແລະ ຄອບຄົວໄດ້ຟື້ນຕົວຈາກຜົນກະທົບຂອງການລະບາດຂອງພະ ຍາດດັ່ງກ່າວ”.
ຕິດຕໍ່ຜູ້ຮັບຜິດຊອບຂ່າວ
ກ່ຽວກັບອົງການຢູນິເຊັບ
ອົງການຢູນິເຊັບ ເຮັດວຽກໃນບາງບ່ອນທີ່ຫຍຸ້ງຍາກທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ, ພວກເຮົາເຮັດວຽກເພື່ອເດັກທຸກຄົນ ແລະ ໃນທຸກແຫ່ງຫົນ ເພື່ອສ້າງໂລກທີ່ດີກວ່າສໍາລັບທຸກຄົນ.
ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການເພື່ອເດັກ ຈົ່ງເຂົ້າເບິ່ງ www.unicef.org.
ຕິດຕາມອົງການຢູນິເຊັບໃນ Twitter and Facebook
