ລັດຖະບານອົດສະຕຣາລີ ປະກອບສ່ວນວັກຊີນ ເພີ່ມຕື່ມເພື່ອຊ່ວຍປ້ອງກັນເດັກນ້ອຍໃນ ສປປ ລາວ ຈາກພະຍາດ ໂຄວິດ-19

ນະຄອນຫຼວງວຽງຈັນ, ວັນທີ 28 ກັນຍາ 2022 – ໃນມຶື້ນີ້, ຄະນະຜູ້ແທນຈາກ ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ສະຖານທູດອົດສະຕຣາລີ ປະຈຳ ນະຄອນຫຼວງວຽງຈັນ ແລະ ອົງການຢູນິເຊັບ ປະຈຳ ສປປ ລາວ ໄດ້ໄປຢ້ຽມຢາມໂຮງຮຽນປະຖົມສຶກສາທີ່ ນະຄອນຫຼວງວຽງຈັນ ທີ່ໄດ້ຖືກນຳໃຊ້ເປັນຈຸດສັກວັກຊີນ ເພື່ອສັງເກດຂະບວນການສັກວັກຊີນກັນພະຍາດ ໂຄວິດ-19 ສຳລັບເດັກນ້ອຍໂດຍນຳໃຊ້ວັກຊີນສະເພາະເດັກເປັນຄັ້ງ​ທໍາ​ອິດ ເຊີ່ງສະໜັບສະໜູນໂດຍປະເທດອົດສະຕຣາລີ.

ການປະກອບສ່ວນລ້າສຸດຈາກປະເທດອົດສະຕຣາລີ ໃຫ້ແກ່ ສປປ ລາວ ນັ້ນປະກອບມີວັກ​ຊີນ ໄຟ​ເຊີ ເພື່ອສ້າງພູມຄຸ້ມກັນພະຍາດ ໂຄວິດ-19 ສຳລັບເດັກ ທັງໝົດຈຳນວນເກືອບ 500,000 ໂດສ, ເຊິ່ງມີບຸລິມະສິດໃນການສັກໃຫ້ແກ່ກຸ່ມເດັກນ້ອຍອາຍຸ 5-11 ປີ ໃນ ສປປ ລາວ. ວັກຊີນຈຳນວນດັ່ງກ່າວເເມ່ນໄດ້ສະໜອງໃຫ້ ສປປ ລາວ ເພີ່ມຕື່ມພາຍຫຼັງຈາກການຊ່ວຍເຫຼືອວັກຊີນ ໄຟ​ເຊີ  ແລະ ແອສ​ຕ​ຣາ-​ເຊນິກາ ຈຳນວນຫຼາຍກວ່າໜຶ່ງລ້ານໂດສໂດຍ ລັດຖະບານອົດສະຕຣາລີ ໃນຕົ້ນປີທີ່ຜ່ານມາ.

ພະນະທ່ານ ດຣ. ສະໜອງ ທອງຊະນະ, ຮອງລັດຖະມົນຕີ ກະຊວງສາທາລະນະສຸກ, ໄດ້ກ່າວວ່າ: “ລັດຖະບານ ແຫ່ງ ສປປ ລາວ ຂໍສະແດງຄວາມຂອບໃຈມາຍັງລັດຖະບານ​ອົດ​ສະ​ຕຣາ​ລີ ອີກຄັ້ງສຳລັບການປະກອບສ່ວນອັນມີຄ່ານີ້ຕໍ່ຂະບວນການສັກວັກຊີນກັນພະຍາດ ໂຄວິດ-19 ໃນ ສປປ ລາວ.” ທ່ານຍັງໄດ້ຢໍ້າຄືນອີກກ່ຽວກັບຄວາມປອດໄພ ແລະ ປະສິດທິຜົນຂອງບັນດາວັກຊີນກັນພະຍາດ ໂຄວິດ-19 ທັງໝົດທີ່ນຳໃຊ້ຢູ່ໃນ ສປປ ລາວ ໃນປະຈຸບັນ, ເຊີ່ງແມ່ນໄດ້ຮັບການຮັບຮອງຈາກ ກະຊວງສາທາລະນະສຸກ ເເລ້ວ.

ພະນະທ່ານ ນາງ ຂັນທະລີ ສີຣິພົງພັນ, ຮອງລັດຖະມົນຕີກະຊວງສຶກສາທິການ ແລະ ກິລາ, ກໍໄດ້ກ່າວ​ຄຳ​ເຫັນໃນງານຄັ້ງນີ້ ໂດຍ​ໄດ້​ເນັ້ນ​ເຖິງ​ຄວາມ​ທັນ​ການ​ຂອງ​ການ​ມາ​ເຖິງ​ຂອງ​ວັກ​ຊີນ​ຈຳນວນດັ່ງກ່າວ. ທ່ານໄດ້ກ່າວວ່າ: “ການມາຮອດຂອງວັກຊີນເຫຼົ່ານີ້ໄດ້ກົງກັບໄລຍະເປີດສົກຮຽນໃໝ່ ສົກຮຽນ 2022-2023 ຂອງບັນດາໂຮງຮຽນໃນ ສປປ ລາວ ໃນຕົ້ນເດືອນກັນຍາເຊັ່ນດຽວກັນ, ເຊຶ່ງ ລັດຖະບານເເຫ່ງ ສປປ ລາວ ກໍ່ໄດ້ມີການເພີ່ມທະວີຄວາມເອົາໃຈໃສ່ປຸກລະດົມຂະບວນການສັກວັກຊີນກັນພະຍາດ ໂຄວິດ-19 ໃຫ້ແກ່ເດັກນ້ອຍ, ໂດຍສະເພາະເດັກນັກຮຽນ ເພື່ອສ້າງພູມຄຸ້ມກັນເພີ່ມຕື່ມຈາກພະຍາດດັ່ງກ່າວເເກ່ ນັກຮຽນ, ພົນລະເມືອງຂອງລາວ ແລະ ຜູ້ດຳລົງຊີວິດຢູ່ ສປປ ລາວ ທຸກຄົນ.”

ໃນງານດັ່ງກ່າວນີ້, ພະນະທ່ານ ໂພລ ແຄລີ, ເອກອັກຄະລັດຖະທູດອົດສະຕຣາລີ ປະຈຳ ສປປ ລາວ, ກໍ່ໄດ້​ກ່າວ​ເຖິງສາຍພົວພັນທາງການທູດອັນເເໜ້ນເເຟ້ນລະຫວ່າງ ອົດສະຕຣາລີ ເເລະ ສປປ ລາວ ໃນໄລຍະການລະບາດຂອງພະຍາດ ໂຄວິດ-19 . “ອົດສະຕຣາລີ ມຸ່ງໝັ້ນທີ່ຈະສຶບຕໍ່ໃຫ້ການຊ່ວຍເຫຼືອເເກ່ ສປປ ລາວ ເພື່ອຮັບມືກັບສິ່ງທ້າທາຍທີ່ເກີດຂຶ້ນຈາກການລະບາດຂອງພະຍາດ ໂຄວິດ-19. ໃນປີນີ້, ອົດ​ສະ​ຕາ​ລີ ແລະ ສປປ ລາວ ກໍໄດ້​ສະ​ເຫຼີມ​ສະ​ຫຼອງຄົບຮອບ 70 ປີ ຂອງການພົວພັນດ້ານການທູດ ລາວ-ອົດສະຕຣາລີ ເເລະ ຄໍາໝັ້ນສັນຍາຂອງພວກເຮົາທີ່ຈະສຶບຕໍ່ໃຫ້ການຊ່ວຍເຫຼືອເເກ່ການພັດທະນາຂອງ ສປປ ລາວ ກໍຍັງໜັກແໜ້ນຄືດັ່ງເມື່ອ 70 ປີກ່ອນ.”

ໃນ​ລະຫວ່າງ​ປີ 2020 ຫາ 2023, ອົດ​ສະ​ຕາ​ລີ ໄດ້​ລະດົມ​ທຶນຊ່ວຍເຫຼືອ​ກວ່າ 22 ລ້ານ​ ໂດລາອົດສະຕາລີ ​ ​ເພື່ອສະໜັບສະໜູນ​ລັດຖະບານເເຫ່ງ ສປປ ​ລາວ ​ໃນ​ການ​ຮັບ​ມື​ກັບ​ການລະບາດ​ຂອງ​ພະຍາດ ​ໂຄ​ວິດ-19 ເເລະ ການສະໜອງ​ການ​ເຂົ້າ​ເຖິງ​ວັກຊີນ​ທີ່​ປອດ​ໄພ ​ແລະ ມີ​ປະສິດທິ​ຜົນ ໃຫ້ກັບປະຊາຊົນລາວ. ນອກຈາກນັ້ນ, ອົດສະຕຣາລີຍັງໃຫ້ການຊ່ວຍເຫຼືອດ້ານເຕັກນິກເພື່ອສະໜັບສະໜູນການຈັດສົ່ງວັກຊີນໂດຍຜ່ານ ອົງການຢູນິເຊັບ, ອົງການອະນາໄມໂລກ ເເລະ ບັນດາອົງການຈັດຕັ້ງທີ່ບໍ່ສັງກັດລັດຖະບານ (NGO), ພ້ອມຍັງໄດ້ໃຫ້ຄຳແນະນຳດ້ານສຸຂະພາບຈາກຜູ້ຊ່ຽວຊານຈາກສະຖາບັນຕ່າງໆຂອງປະເທດອົດສະຕາລີ ເພື່ອເສີມສ້າງຄວາມເຂັ້ມແຂງຂອງຂະບວນການສັກວັກຊີນແຫ່ງຊາດຂອງ ສປປ ລາວ.

ພະນະທ່ານ ໂພລ ແຄລີ ໄດ້ກ່າວຕື່ມອີກວ່າ: “ອົດສະຕຣາລີ ມີຄວາມຍິນດີ ທີ່ໄດ້ປະກອບສ່ວນສະໜັບສະໜູນ ແຜນປະຕິບັດການສັກວັກຊີນປ້ອງກັນ ພະຍາດໂຄວິດ-19 ແຫ່ງຊາດ ຂອງ ສປປ ລາວ. ການປະກອບສ່ວນຫລ້າສຸດນີ້ສະເເດງໃຫ້ເຫັນເຖີງສາຍພົວພັນທາງການທູດອັນແໜ້ນແຟ້ນລະຫວ່າງປະຊາຊົນອົດສະຕຣາລີ ແລະ ປະຊາຊົນລາວ, ແລະ ພວກເຮົາຫວັງວ່າວັກຊີນເຫຼົ່ານີ້ຈະຊ່ວຍໃຫ້ການປົກປ້ອງເພີ່ມຕື່ມເເກ່ເດັກນ້ອຍລາວໃນທົ່ວປະເທດ.”

ນອກຈາກການຊ່ວຍເຫຼືອຂອງອົດສະຕາລີ, ຄູ່​ຮ່ວມ​ມື​ສາ​ກົນ​ເຊັ່ນ ອົງການຢູນີເຊັບ ກໍ່ຍັງໄດ້ສືບຕໍ່ເຮັດວຽກຢ່າງໃກ້ຊິດກັບ ກະຊວງສາທາລະນະສຸກ ເເລະ ກະຊວງສຶກສາທິການ ແລະ ກິລາ ເພື່ອປູກຈິດສໍານຶກໃນບັນດາຊຸມຊົນກ່ຽວກັບການສັກວັກຊີນສຳລັບເດັກ ແລະ ການສັກວັກຊີນກັນພະຍາດ ໂຄວິດ-19 ໂດຍລວມ. ນອກນັ້ນ, ອົງການຢູນີເຊັບ ກໍຍັງໄດ້ໃຫ້ການສະໜັບສະໜູນໃນການເສີມສ້າງຂີດຄວາມສາມາດຂອງພະນັກງານ ກະຊວງສາທາລະນະສຸກ ເພື່ອສື່ສານ ເເລະ ສະໜອງຂໍ້ມູນຢ່າງມີປະສິດທິພາບໃຫ້ເເກ່ບັນດາຊຸມຊົນ ກ່ຽວກັບຄວາມສ່ຽງຕ່າງໆຈາກພະຍາດ ໂຄວິດ-19 ອີກເຊັ່ນດຽວກັນ.

“ວັກຊີນເປັນເຄື່ອງ​ມືອັນສຳຄັນໃນການເເກ່ໄຂວິກິດການໃນທົ່ວໂລກທີ່ເກີດຂຶ້ນຈາກການແຜ່ລະບາດຂອງພະຍາດ ໂຄວິດ-19. ເດັກນ້ອຍແມ່ນໜຶ່ງໃນກຸ່ມຄົນທີ່ໄດ້ຮັບຜົນກະທົບຫຼາຍທີ່ສຸດຈາກການລະບາດຂອງພະຍາດດັ່ງກ່າວເພາະພວກເຂົາໄດ້ສູນເສຍການຮຽນຮູ້ຈາກການໂຈະການຮຽນຊົ່ວຄາວ, ເຊີ່ງຍັງໄດ້ສົ່ງຜົນກະທົບຕໍ່​ ການພັດທະນາໃນວຽກງານດ້ານການສຶກສາໂດຍລວມອິກ. ດັ່ງນັ້ນ, ການສັກວັກຊີນຈະຊ່ວຍຮັບປະກັນໃຫ້ເດັກນ້ອຍມີຄວາມປອດໄພຫຼາຍຂຶ້ນຢູ່ໃນໂຮງຮຽນໃນໄລຍະສົກຮຽນໃໝ່ນີ້ ເເລະ ຮັບປະກັນວ່າພວກເຂົາສາມາດໄດ້ຮັບການສຶກສາທີ່ເໝາະສົມ ເພື່ອອະນາຄົດທີ່ສົດໃສຂອງເຂົາເຈົ້າ. ດັ່ງນັ້ນ, ພວກເຮົາກໍຕ້ອງສືບຕໍ່ເອົາໃຈໃສ່ ຕໍ່ການຮັບປະກັນການເຂົ້າເຖິງວັກຊີນຢ່າງເທົ່າ​ທຽມໃນ ສປປ ລາວ​, ລວມເຖີງສຳລັບເດັກນ້ອຍ, ເພາະວ່າບໍ່ມີໃຜຈະປອດໄພຈົນກວ່າທຸກຄົນຈະປອດໄພ,” ກ່າວໂດຍ ທ່ານນາງ ດຣ. ເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ.