ຜູ້ຕາງໜ້າ ອົງການຢູນິເຊັບ ເຂົ້າຢ້ຽມຂໍ່ານັບ ເລຂາທິການສະພາແຫ່ງຊາດ ສປປ ລາວ

ອົງການຢູນີເຊັບ ຢືນຢັນຄວາມພ້ອມ ໃນການສະໜັບສະໜູນ ສະພາແຫ່ງຊາດ ໃນການເສີມສ້າງ ຄວາມສາມາດຂອງຊັບພະຍາກອນມະນຸດ ຂອງ ສປປ ລາວ, ໂດຍເລີ່ມແຕ່ໄວເດັກເປັນຕົ້ນໄປ.

12 ສີງຫາ 2022
Meeting
UNICEF Laos/2022/SSanoubane
Dr. Pia Rebello Britto, UNICEF Representative to Lao PDR, with H.E. Ms. Pingkham Lasasimma, Secretary General of the National Assembly of Lao PDR.

ນະຄອນຫຼວງວຽງຈັນ, ວັນທີ 9 ສິງຫາ 2022 – ທ່ານນາງ ດຣ. ເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ໄດ້ເຂົ້າຢ້ຽມຂໍ່ານັບ ພະນະທ່ານນາງ ປິງຄຳ ລາຊະສິມມາ, ກຳມະການຄະນະປະຈຳ, ຄະນະເລຂາທິການສະພາແຫ່ງຊາດ ຂອງ ສປປ ລາວ, ເພື່ອປຶກສາຫາລືກ່ຽວກັບ ການຜັນຂະຫຍາຍການຮ່ວມມຶລະຫວ່າງ ອົງການຢູນິເຊັບ ເເລະ ສະພາແຫ່ງຊາດ ເພື່ອສົ່ງເສີມສິດທິ ແລະ ສະຫວັດດີການຂອງເດັກນ້ອຍ ແລະ ແມ່ຍິງໃນ ສປປ ລາວ.

ການເຂົ້າຢ້ຽມຂໍ່ານັບໃນຄັ້ງນີ້ເເມ່ນໄດ້​ຈັດ​ຂຶ້ນ​ໃນ​ປີ​ເລີ່​ມຕົ້ນຂອງການປະຕິບັດ ແຜນງານການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບ ສົກປີ 2022-2026, ເຊິ່ງຈ​ະສະໜອງກອບການຮ່ວມມືລະຫວ່າງ ທັງສອງຝ່າຍ ໃນ 5 ປີ​ຕໍ່ໜ້າ.

ໃນການເຂົ້າຢ້ຽມຂໍ່ານັບໃນຄັ້ງນີ້, ທ່ານນາງ ດຣ. ເພຍ ເຣເບລໂລ ບີຣໂຕ ໄດ້ສະເເດງຄວາມຍິນດີກັບ ພະນະທ່ານນາງ ປິງຄຳ ລາຊະສິມມາ ສໍາລັບການນໍາພາຂອງທ່ານ ເເລະ ຜົນສຳເລັດ ໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX. ທັງສອງ​ຝ່າຍ​ກໍ່ໄດ້​ປຶກສາ​ຫາລືກັນ​ກ່ຽວ​ກັບການສະໜັບສະໜຸນ ເເລະ ປະກອບສ່ວນຂອງ ອົງການຢູນິເຊັບ ເຂົ້າໃນວຽກງານພັດທະນາສັງຄົມຕ່າງໆ, ເຊິ່ງກວມເອົາການຕອບໂຕ້ກັບພະຍາດ ໂຄວິດ-19, ການສຶກສາ, ສາທາລະນະສຸກ ແລະ ໂພຊະນາການ. ທັງສອງຝ່າຍຍັງໄດ້ປຶກສາ​ຫາລື​ກ່ຽວ​ກັບ​ວິທີ​ທີ່​ຂໍ້​ມູນ ​ເເລະ ຜົນການ​ຄົ້ນ​ຄວ້າ​ ທີ່ໄດ້ຮັບຈາກ​ການ​ສະໜັບສະໜູນ​ຂອງ ອົງການຢູນິເຊັບ ຈະສາມາດ​ເສີມ​ຂະຫຍາຍ​ຄວາມ​ສາມາດ​ຂອງ ​ສະພາ​ແຫ່ງ​ຊາດ ​ໃນ​ການ​ຕິດຕາມ ​ແລະ ກວດກາ​ການ​ປະຕິບັດ​ ນິຕິບັນຍັດ ​ແລະ ນະ​ໂຍບາຍຕ່າງໆ, ເເລະ ການ​ຕິດຕາມຄວາມຄືບໜ້າໃນການປະຕິບັດ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX.

ນອກນັ້ນ, ຫົວໜ້າຈາກທັງສອງພາກສ່ວນ ກໍ່ໄດ້​ແລກປ່ຽນ​ຂໍ້​ມູນກັນ​ກ່ຽວ​ກັບສະພາບການຂອງເດັກນ້ອຍລາວ ແລະ ຂົງເຂດວຽກງານທີ່ ສະພາແຫ່ງຊາດ ແລະ ອົງການຢູນີເຊັບ ສາມາດຜັນຂະຫຍາຍການຮ່ວມມືເພື່ອແກ້ໄຂບັນຫາຕ່າງໆ. ພະນະທ່ານນາງ ປິງຄຳ ລາຊະສິມມາ ກໍ່ໄດ້ສະເເດງຄວາມຂອບໃຈມາຍັງ ອົງການຢູນີເຊັບ ທີ່ໄດ້ສະໜັບສະໜຸນ ສະພາ​ແຫ່ງ​ຊາດ ໃນດ້ານໄອທີ ໂດຍການມອບ ແລັບທັອບ ເເລະ ອຸປະກອນອື່ນໆ ​ເພື່ອ​ປະກອບສ່ວນເຂົ້າໃນວຽກງານຂອງ ຄະນະກໍາມະການວັດທະນະທໍາສັງຄົມ, ຄະນະກໍາມະການການຕ່າງປະເທດ, ຄະນະກໍາມະການແຜນການ, ການເງິນ ແລະ ການກວດສອບ, ແລະ ຄະນະກໍາມະການຍຸຕິທໍາ ຂອງສະພາແຫ່ງຊາດ.

ພະນະທ່ານນາງ ປິງຄຳ ລາຊະສິມມາ ໄດ້ກ່າວວ່າ: “ຂ້າພະ​ເຈົ້າ​ຂໍ​ສະ​ແດງ​ຄວາມ​​ຂອບ​ໃຈຕໍ່ ອົງການຢູນິເຊັບ ສຳລັບການສະໜັບສະໜຸນຢ່າງຕໍ່ເນື່ອງເເກ່ບັນດາເດັກນ້ອຍ ແລະ ແມ່ຍິງ ໃນ ສປປ ລາວ, ເເລະ ສະພາແຫ່ງຊາດ ສປປ ລາວ ຫວັງວ່າຈະສາມາດສືບຕໍ່ຜັນຂະຫຍາຍການຮ່ວມມືກັບ ອົງການຢູນິເຊັບ ໃນ​ອະນາ​ຄົດໄດ້.”

ທ່ານນາງ ດຣ. ເພຍ ເຣເບລໂລ ບີຣໂຕ ໄດ້ກ່າວວ່າ: “ອົງການຢູນິເຊັບ ພ້ອມ​ທີ່​ຈະສືບຕໍ່​ໃຫ້ການ​ສະໜັບສະໜູນເເກ່​ລັດຖະບານເເຫ່ງ ສປປ ລາວ ໃນການບັນລຸເປົ້າໝາຍທີ່ໄດ້ກຳນົດໄວ້ໃນ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX ເເລະ ເປົ້າໝາຍການພັດທະນາແບບຍືນຍົງ, ພ້ອມດ້ວຍເສີມສ້າງຄວາມເຂັ້ມເເຂງໃນການ​ສຶກສາ ​ແລະ ທັກ​ສະ​ຂອງ​ເດັກນ້ອຍ ​ແລະ ​ໄວ​ໜຸ່ມ​ຂອງ​ພວກ​ເຮົາ ຜູ້​ເປັນ​ກຸນ​ແຈອັນສຳຄັນຕໍ່ການຫຼຸດພົ້ນອອກຈາກ ສະຖານະ​ການ​ດ້ອຍ​ພັດທະນາ (LDC) ຂອງ ສປປ ລາວ. ພວກເຮົາຫວັງເປັນຢ່າງຢີ່ງວ່າ ຈະສາມາດສືບຕໍ່ເຮັດວຽກຢ່າງໃກ້ຊິດກັບລັດຖະບານ ແຫ່ງ ສປປ ລາວ ພາຍ​ໃຕ້ ແຜນງານການຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ອົງການຢູນິເຊັບ ສົກປີ 2022-2026.”

ຕິດຕໍ່ຜູ້ຮັບຜິດຊອບຂ່າວ

Chiara Frisone
ວ່າການຫົວໜ້າພະແນກສື່ສານ
ອົງການຢູນິເຊັບປະຈໍາ ສປປລາວ ໂທ
ໂທລະສັບ: +856 021-487508
ອີເມວ: cfrisone@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook