ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ ເຂົ້າຢ້ຽມຢາມຂໍ່ານັບ ລັດຖະມົນຕີກະຊວງອຸດສາຫະກຳ ແລະ ການຄ້າ

ຫຼັກການທາງທຸລະກິດເພື່ອສົ່ງເສີມສິດທິເດັກ ເເມ່ນຫົວຂໍ້ຫຼັກຂອງການສົນທະນາໃນການ ຢ້ຽມຢາມຂໍ່ານັບຄັ້ງນີ້.

09 ກັນຍາ 2022
Meeting
UNICEF Laos/2022/SSanoubane
UNICEF Representative pays courtesy visit to Minister of Industry and Commerce

ນະຄອນຫຼວງວຽງຈັນ, ວັນທີ 6 ກັນຍາ 2022 – ໃນມື້ນີ້, ທ່ານນາງ ດຣ. ເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ໄດ້ເຂົ້າຢ້ຽມຂໍ່ານັບ ພະນະທ່ານ ມາໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ ເເຫ່ງ ສປປ ລາວ.

ພະນະທ່ານ ມາໄລທອງ ກົມມະສິດ ໄດ້ສະເເດງຄວາມຂອບໃຈຕໍ່ ອົງການຢູນິເຊັບ ທີ່ໄດ້ສືບຕໍ່ໃຫ້ການສະໜັບສະໜູນເເກ່ລັດຖະບານເເຫ່ງ ສປປ ລາວ ເພື່ອປັບປຸງຊີວິດຂອງບັນດາເດັກນ້ອຍ ແລະ ຄອບຄົວ ໃນ ສປປ ລາວ ຢ່າງບໍ່ອິດເໝື່ອຍມາເປັນເວລາ 50 ປີ.

ໃນການເຂົ້າຢ້ຽມຂໍ່ານັບໃນຄັ້ງນີ້, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ ກໍໄດ້ສະເເດງຄວາມຍິນດີກັບພະນະທ່ານ ມາໄລທອງ ກົມມະສິດ ໃນໂອກາດທີ່ທ່ານໄດ້ຖືກແຕ່ງຕັ້ງເປັນ ລັດຖະມົນຕີກະຊວງອຸດສາຫະກຳ, ພ້ອມຍັງ​ໄດ້​ຍົກ​ໃຫ້​ເຫັນ​ເຖິງບົດບາດ​ຂອງພາກ​ເອກະ​ຊົນ​​ໃນ​ການ​ປົກ​ປ້ອງ ​ແລະ ສະໜັບສະໜູນ​ແມ່ຍິງ ເເລະ ເດັກນ້ອຍໃນ ສປປ ລາວ.

ນອກນັ້ນ, ທ່ານນາງ ດຣ. ເພຍ ເຣເບລໂລ ບີຣໂຕ ກໍ່ໄດ້ເເບງປັນຂໍ້ມູນກ່ຽວກັບວຽກງານ ເເລະ ໂຄງການຕ່າງໆລະຫວ່າງ ອົງການຢູນິເຊັບ ເເລະ ລັດຖະບານເເຫ່ງ ສປປ ລາວ, ເຊັ່ນ: ວຽກງານການສົ່ງເສີມການສຶກສາທີ່ມີຄຸນນະພາບ; ການສ້າງໂອກາດໃນການເຮັດວຽກທີ່ເໝາະສົມສໍາລັບເດັກນ້ອຍທີ່ມີອາຍຸຖືກຕ້ອງຕາມກົດໝາຍສໍາລັບການເຮັດວຽກ, ລວມເຖິງການຝຶກອົບຮົມວິຊາຊີບ ແລະ ວິຊາສະເພາະ; ແລະ ການພັດທະນາ​ນະ​ໂຍບາຍສຳລັບສະຖານທີ່​ເຮັດ​ວຽກ​ທີ່​ເປັນ​ມິດ​ກັບ​ຄອບຄົວ​ ​ເພື່ອ​ຊຸກຍູ້​ຄວາມ​ສະ​ເໝີ​ພາບລະຫວ່າງ​ເພດ ​ແລະ ປົກປ້ອງ​ຊີວິດ​ການ​ເປັນ​ຢູ່​ຂອງບັນດາ​ລູກ​ຂອງພະນັກງານ.

ພະນະທ່ານ ມາໄລທອງ ກົມມະສິດ ກໍ​ໄດ້ກ່າວວ່າ ລັດຖະບານ​ແຫ່ງ ສປປ ລາວ ຫວັງ​ວ່າ​ຈະສາມາດເສີມ​ສ້າງ​ການ​ຮ່ວມ​ມືກັບ ​ອົງການຢູນິເຊັບ ໃຫ້ເເໜ້ນເເຟ້ນຂຶ້ນຍິ່ງກວ່າເກົ່າພາຍໃຕ້​ ແຜນງານການຮ່ວມມື ສົກປີ 2022-2026 ເເລະ ຍັງໄດ້ກ່າວເຖິງພາລະວຽກງານຂອງແມ່ຍິງໃນສັງຄົມລາວ, ລວມເຖິງໃນສະຖານທີ່ເຮັດວຽກ ແລະ ໃນຄອບຄົວ, ເເລະ ວິທີການທີ່ຈະສາມາດປັບປຸງສະພາບ​ການ​ເຮັດ​ວຽກ​ຂອງ​ແມ່ຍິງລາວ ໂດຍຮວມມືກັບ ອົງການຢູນິເຊັບ.

ທ່ານນາງ ດຣ. ເພຍ ເຣເບລໂລ ບີຣໂຕ ໄດ້ສະຫຼຸບການເຂົ້າພົບໃນຄັ້ງນີ້ໂດຍສະ​ແດງ​ຄວາມ​ຂອບ​ໃຈ​ຕໍ່​ທ່ານ​ລັດຖະມົນຕີ​ທີ່​ໄດ້ໃຫ້ການ​ຕ້ອນຮັບ​ຢ່າງ​ອົບ​ອຸ່ນ ເເລະ​ ຍັງ​ໄດ້​ຢືນຢັນ​ຄືນ​ເຖີງຄຳ​ໝັ້ນ​ສັນຍາ​ຂອງ  ອົງການຢູນິເຊັບ ​ທີ່ຈະ​ສືບ​ຕໍ່​ເຮັດ​ວຽກ​ຢ່າງ​ໃກ້ຊິດ​ກັບ​ ລັດຖະບານ ​ໃນ​ບັນດາໂຄງາການຕ່າງໆ ພາຍໃຕ້ ແຜນງານການຮ່ວມມື ສົກປີ 2022-2026.

ຕິດຕໍ່ຜູ້ຮັບຜິດຊອບຂ່າວ

Chiara Frisone
ວ່າການຫົວໜ້າພະແນກສື່ສານ
ອົງການຢູນິເຊັບປະຈໍາ ສປປລາວ ໂທ
ໂທລະສັບ: +856 021-487508
ອີເມວ: cfrisone@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook