ຜູ້ຊ່ຽວຊານ ວຽກງານ ໂຄສະນາ ຂອງ ອົງການຢູນີເຊັບ ປະຈໍາ ສປປ ລາວ ໄດ້ຮັບຫຼຽນ ແຮງງານ ສຳລັບການປະກອບສ່ວນ ໃນການພັດທະນາ ສື່ມວນຊົນລາວ ແລະ ການມີສ່ວນຮ່ວມຂອງໄວຫນຸ່ມ ສປປ ລາວ

22 ສີງຫາ 2022
Award handover
UNICEF Laos/2022/SSanoubane
UNICEF Communication Specialist Awarded with Labor Medal for Service to Children of Lao PDR

ເນື່ອງໃນໂອກາດ ງານສະເຫລີມສະຫລອງ ວັນຄົບຮອບ 72 ປີ ຂອງ ສື່ມວນຊົນລາວ ແລະ ການພິມຈໍາຫນ່າຍ, ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ມອບ ຫຼຽນໄຊແຮງງານ ໃຫ້ແກ່ ທ່ານຕະບອງເພັດ ພຸດທະວົງ ຜູ້ຊ່ຽວຊານ ວຽກງານໂຄສະນາ ແລະ ສື່ສານມວນຊົນ ຂອງອົງການຢູນີເຊັບ ປະຈຳ ສປປ ລາວ, ເພື່ອເປັນການຍ້ອງຍໍຜົນງານ ການມີສ່ວນຮ່ວມໃນການພັດທະນາ ສື່ມວນຊົນລາວ, ການມີສ່ວນຮ່ວມຂອງໄວຫນຸ່ມ ພ້ອມທັງການໂຄສະນາສົ່ງເສີມ ການປັບປຸງສະພາບການເປັນຢູ່ທີ່ດີ ສໍາລັບ ແມ່ຍິງ ແລະ ເດັກ. 
ພິທີມອບ ຫຼຽນແຮງງານ ດັ່ງກ່າວໄດ້ຈັດຂຶ້ນທີ່ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໂດຍການເຂົ້າຮ່ວມ ຂອງ ທ່ານ ນາງສວນສະຫວັນ ວີຍາເກດ ລັດຖະມົນຕີ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ແລະ ທ່ານນາງ ເພຍ ຣີແບນໂລ ບະຣິດໂຕ ຜູ້ຕາງຫນ້າອົງການຢູນີເຊັບ ປະຈໍາ ສປປ ລາວ ແລະ ບັນດາຜູ້ຕາງຫນ້າຈາກກະຊວງ ແລະ ອົງການຕ່າງໆ.
 
ໃນພິທີ, ທ່ານ ສົມສະຫວາດ ພົງສາ ຫົວຫນ້າກົມ ສື່ມວນຊົນ ກະຊວງ ຖະແຫລງຂ່າວ ວັດທະນະທໍາ ແລະ ທ່ອງທ່ຽວ ໄດ້ກ່າວວ່າ: "ທ່ານຕະບອງເພັດ ພຸດທະວົງ ໄດ້ປະກອບສ່ວນຢ່າງກວ້າງຂວາງໃນຫລາຍຂຂົງເຂດວຽກງານ, ເສີມຂະຫຍາຍ ການຮ່ວມມືລະຫວ່າງ ອົງການຢູນີເຊັບ ແລະ ບັນດາກະຊວງຕ່າງໆ ແລະ ຄູ່ຮ່ວມງານ ໃນ ສປປ ລາວ, ໂດຍສະເພາະໃນຂົງເຂດວຽກງານສື່ມວນຊົນ. ເພື່ອເປັນການຍົກຍ້ອງ ການປະກອບສ່ວນອັນສຳຄັນດັ່ງກ່າວ, ລັດຖະບານ ແຫ່ງ ສປປ ລາວ ໄດ້ມອບຫຼຽນໄຊແຮງງານໃຫ້ແກ່ ທ່ານຕະບອງເພັດ ພຸດທະວົງ ເພື່ອເປັນການຮັບຮູ້ຜົນງານ ແລະ ການປະກອບສ່ວນອັນຕັ້ງຫນ້າ ຕໍ່ການພັດທະນາຂອງ ແມ່ຍິງ ແລະ ເດັກ ໃນ ສປປ ລາວ.”

ທ່ານ ຕະບອງເພັດ ພຸດທະວົງ ດຳລົງຕຳແໜ່ງ ເປັນຜູ້ຊ່ຽວຊານ ວຽກງານໂຄສະນາ ປະຈໍາອົງການຢູນີເຊັບ ປະຈຳ ສປປ ລາວ ນັບແຕ່ ປີ 2000 ມາຮອດປະຈຸບັນ. ໃນຊ່ວງໄລຍະທີ່ເຮັດວຽກໃຫ້ ອົງການຢູນີເຊັບ, ທ່ານ ຕະບອງເພັດ ໄດ້ມີບົດບາດສຳຄັນໃນປະສານງານ ແລະ ການໂຄສະນາ ວຽກງານຫຼາຍໆຂົງເຂດເພື່ອຜົນປະໂຍດຂອງເດັກນ້ອຍ ແລະ ແມ່ຍິງລາວ, ໂດຍສະເພາະວຽກງານສື່ສານ ມວນຊົນ, ຂົງເຂດວຽກງານດ້ານ ສຸຂະພາບ ແລະ ໂພຊະນາການ, ສຸຂາພິບານ ແລະ ສຸຂະອານາໄມ, ການສຶກສາ, ການປົກປ້ອງເດັກ ແລະ ດ້ານນະ​ໂຍ​ບາຍ​ທາງສັງ​ຄົມ​.

ໃນພິທີ ທ່ານຕະບອງເພັດ ພຸດທະວົງ ໄດ້ກ່າວວ່າ: “ຂ້າພະເຈົ້າຂໍສະແດງຄວາມຂອບໃຈຢ່າງສຸດຊຶ້ງ ມາຍັງລັດຖະບານ ແຫ່ງ ສປປ ລາວ ເເລະ ຖືເປັນກຽດຢ່າງສູງທີ່ໄດ້ຮັບ ຫຼຽນໄຊແຮງງານ ໃນຄັ້ງນີ້. ຂໍສະແດງຄວາມຂອບໃຈ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ, ບັນດາກະຊວງ ແລະ ອົງການຕ່າງໆ ແລະ ອົງການຢູນີເຊັບ ທີ່ໄດ້ໃຫ້ໂອກາດ ຂ້າພະເຈົ້າ ໄດ້ຝຶກຝົນຫລໍ່ຫລອມໂຕເອງ ຜ່ານສື່ມວນຊົນ ແລະ ການພັດທະນາແມ່ຍິງ ແລະ ເດັກ ໃນ ສປປ ລາວ. ຂ້າພະເຈົ້າສຸດແສນພາກພູມໃຈ ທີ່ໄດ້ມີໂອກາດ ມີສ່ວນຮ່ວມ ໃນວຽກງານອັນສຸດແສນມີກຽດ ກໍຄື ວຽກງານຊ່ວຍເຫລືອເດັກ ຊຶ່ງເປັນ ອະນາຄົດຂອງຊາດລາວເຮົາ.”

ຕິດຕໍ່ຜູ້ຮັບຜິດຊອບຂ່າວ

Chiara Frisone
ວ່າການຫົວໜ້າພະແນກສື່ສານ
ອົງການຢູນິເຊັບປະຈໍາ ສປປລາວ ໂທ
ໂທລະສັບ: +856 021-487508
ອີເມວ: cfrisone@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook