ປະເທດຍີ່ປຸ່ນ ເພີ່ມທະວີຄວາມສາມາດຂອງ ສປປ ລາວ ໃນການຮັບມືກັບພະຍາດ ໂຄວິດ-19 ດ້ວຍການຊ່ວຍເຫຼືອອຸປະກອນລະບົບຄວາມເຢັນ ແລະ ວັກຊີນກັນພະຍາດ ໂຄວິດ-19 AstraZeneca ຈຳນວນ 320,200 ໂດສ໌.

ລັດຖະບານຍີ່ປຸ່ນ ໄດ້ມອບອຸປະກອນລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນ ມູນຄ່າລວມກວ່າ 900,000 ໂດລາສະຫະລັດ ເເລະ ວັກຊີນປ້ອງກັນພະຍາດ ໂຄວິດ-19 AstraZeneca ຈຳນວນ 320,200 ໂດສ໌ ໃຫ້ແກ່ ກະຊວງສາທາລະນະສຸກ.

28 ທັນວາ 2021
Handover
UNICEF Laos/2021/SSiriphongphanh

ນະ​ຄອນ​ຫຼວງວຽງ​ຈັນ, ວັນ​ທີ 28 ທັນ​ວ​າ 2021 - ໃນ​ມື້ນີ້ ລັດຖະບານຍີ່ປຸ່ນ ​ໄດ້​ມອບ​ອຸປະກອນລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນ​ໃຫ້​ແກ່ ກະ​ຊວງ​ສາ​ທາ​ລະ​ນະ​ສຸກ ເພື່ອ​​ເສີນ​ສ້າງ​ຄວາມເຂັ້ມແຂງໃນຂະ​ບວນ​ການ​ສັກ​ຢາ​ວັກ​ຊີນປ້ອງ​ກັນ​ພະ​ຍາດ​ ໂຄວິດ-19 ​ໃນ ສປປ ລາວ.

ອຸ​ປະ​ກອນ​ດັ່ງ​ກ່າວ​ປະ​ກອບ​ມີ: ​ຕູ້ແຊ່ແຂງເພື່ອເກັບຮັກສາວັກ​ຊີນ​ ເເລະ ແທ່ງນໍ້າແຂງທຽມ ຈຳ​ນວນ 208 ຕູ້, ຕູ້​ເຢັນອີກຈ​ຳ​ນວນ 480 ຕູ້, ອາ​ໄຫຼ່​ສ​ຳ​ລັບ​ອຸ​ປະ​ກອນຕ່າງໆ, ກ່ອງ​ຂົນສົ່ງ​ວັກ​ຊີນ 500 ກ່ອງ, ກ່ອງ​ເຢັນ​ຈຳ​ນວນ 100 ກ່ອງ ແລະ ແທ່ງນໍ້າແຂງທຽມຈຳ​ນວນ 10,000 ແທ່ງ, ເຊີ່ງ​ທັງ​ໝົດນີ້ເເມ່ນການ​ຊ່ວຍ​ເຫຼືອ​ຈາກ​ຍີ່​ປຸ່ນ​ໂດຍ​ຜ່ານອົງການຢູ່ນິເຊັບ​ ເເລະ ມີ​ມູນ​ຄ່າ​ລວມ​ທີ່ 913,141 ໂດລາສະຫະລັດ.

ການ​ສະ​ໜອງອຸປະກອນລະບົບຄວາມເຢັນ​ໃນ​ຄັ້ງ​ນີ້ ​ເເມ່ນເປັນ​ສ່ວນ​ໜຶ່ງ​ຂອງ​ໂຄງ​ການ​ທີ່​ລັດ​ຖະ​ບານ​ຍີ່​ປຸ່ນພວມຈັດ​ຕັ້ງ​ປະ​ຕິ​ບັດ​ເພື່ອສະ​ໜັບ​ສະ​ໜູນ ສ​ປ​ປ ລາວ ໃນ​ການເສີມສ້າງຄວາມເຂັ້ມແຂງໃຫ້ເເກ່ລະບົບຄວາມເຢັນສຳລັບການເກັບຮັກສາ ເເລະ ຂົນສົ່ງວັກຊີນເພື່ອເປັນການປະກອບສ່ວນເຂົ້າໃນວຽກງານການຮັບ​ມື​ກັບ​ພະ​ຍາດ ໂຄ​ວິດ-19, ເຊິ່ງ​ໂຄງ​ການດັ່ງກ່າວເເມ່ນມີມູນ​ຄ່າ​ລວມທັ້ງໝົດ 1.1 ລ້ານ​ໂດ​ລາ​ສະ​ຫະ​ລັດ. ນອກຈາກການຈັດຊື້ອຸປະກອນລະບົບຄວາມເຢັນເເລ້ວ, ຈໍານວນທຶນທີ່ ເຫຼືອພາຍ​ໃຕ້​ໂຄງ​ການ​ນີ້​ແມ່ນຈະປະກອບສ່ວນເຂົ້າໃນການຜັນຂະຫຍາຍການຮ່ວມມືດ້ານວິຊາການລະຫວ່າງລັດຖະບານຍີ່ປຸ່ນ ແລະ ລັດຖະບານ ສປປ ລາວ ໃນວຽກງານເສີມສ້າງລະບົບຄວາມເຢັນ ຂອງ ສປປ ລາວ ໃນອະນາຄົດ.

ພະນະທ່ານ​ ດຣ. ໄພວັນ ແກ້ວປະເສີດ​, ຮອງລັດຖະມົນຕີກະຊວງສາທາລະນະສຸກ, ໄດ້ກ່າວວ່າ: “ກະ​ຊວງ​ສາ​ທາ​ລະ​ນະ​ສຸກ ຂໍ​ສະ​ແດງ​ຄວາມ​ຂອບໃຈຕໍ່​ລັດ​ຖະ​ບານ​ຍີ່​ປຸ່ນສຳລັບການ​ສະ​ໜັບ​ສະ​ໜູນ​ອຸ​ປະ​ກອນລະບົບຄວາມເຢັນໃນຄັ້ງນີ້.  ໂດຍການ​ເສີນ​ສ້າງ​ຄວາມເຂັ້ມ​ແຂງ​ໃຫ້​ກັບລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນປ້ອງກັນ​ພະ​ຍາດ​ ໂຄວິດ-19, ພວກ​ເຮົາກໍ່​ຈະ​ສາ​ມາດຜັນຂະຫຍາຍວຽກງານການຊັກວັກຊີນໃຫ້ສາມາດ​ເຂົ້າ​ເຖິງ​ຈຳນວນປະຊາກອນ​ໄດ້ຫຼາຍຂື້ນໃນໄລ​ຍະ​ການ​ແຜ່​ລະ​ບາດຂອງ​ພະ​ຍາດ​ດັ່ງ​ກ່າວ.

ນອກຈາກອຸ​ປະ​ກອນລະບົບຄວາມເຢັນເເລ້ວ, ລັດຖະບານຍີ່ປຸນຍັງໄດ້ມອບວັກຊີນປ້ອງກັນພະຍາດ ໂຄວິດ-19 AstraZeneca ຈຳນວນ 320,200 ໂດສ໌ ໃຫ້ແກ່ ກະຊວງສາທາລະນະສຸກ ຢ່າງເປັນທາງການອີກດ້ວຍໃນໂອກາດນີ້, ເຊີ່ງວັກຊີນເຫຼົ່ານີ້ເເມ່ນໄດ້ມາຮອດ ສປປ ລາວ ໃນວັນທີ 23 ທັນວາທີ່ຜ່ານມາ  ເເລະ ເປັນການຊ່ວຍເຫຼືອຈາກຍີ່ປຸນໂດຍຜ່ານໂຄງ​ການ COVAX Facility ເຊີ່ງແມ່ນ​ການຮ່ວມມືກັນລະຫວ່າງອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI), ອົງການກາວີ (Gavi) ແລະ ອົງການອະນາໄມໂລກ (WHO), ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ.

ພະນະທ່ານ ໂຄບາຢາຊິ ເຄນອິຈິ, ເອກອັກຄະຣາຊະທູດຍີ່ປຸ່ນປະຈໍາ ສປປ ລາວ, ກໍ່ໄດ້​ກ່າວ​ວ່າ: “ການ​ຊ່ວຍ​ເຫຼືອ​​ຈາກ​ລັດ​ຖະ​ບານ​ຍີ່​ປຸ່ນໃນ​ຄັ້ງນີ້ ​ສະ​ແດງ​ເຖິງມິດຕະພາບ ເເລະ ຄວາມສາມັກຄີ ລະຫວ່າງປະເທດ ຍີ່ປຸ່ນ ແລະ ສປປ ລາວ ໃນ​​ຊ່ວງເວລາ​ອັນ​ທ້າ​ທາຍນີ້. ອຸປະກອນລະບົບຄວາມເຢັນ ເເມ່ນມີຄວາມສຳຄັນຫຼາຍຕໍ່ຂະບວນການສັກຢາວັກຊີນ, ດັ່ງນັ້ນ ພວກເຮົາຮູ້ສຶກເປັນກຽດທີໄດ້ສະໜອງອຸປະກອນຕ່າງໆເຊັນ: ຕູ້ແຊ່ແຂງເພື່ອເກັບຮັກສາວັກຊີນໃຫ້ເເກ່ ສປປ ລາວ ເພື່ອ ຊ່ວຍເສີມສ້າງຄວາມເຂັ້ມແຂງໃຫ້ແກ່ວຽກງານການສັກຢາວັກຊີນໃນປະເທດ. ນອກນີ້, ພວກເຮົາຍັງພູມໃຈທີ່ໄດ້ໃຫ້ການສະໜັບສະໜູນວັກຊີນປ້ອງກັນພະຍາດໂຄວິດ-19 ຈຳນວນ 320,200 ໂດສ໌ ໃຫ້ແກ່ ສປປ ລາວ, ເຊິ່ງຈະຊ່ວຍປົກປ້ອງກຸ່ມຄົນທີ່ມີຄວາມສ່ຽງສູງຕໍ່ພະຍາດດັ່ງກ່າວອີກດ້ວຍ.  ຂ້າພະເຈົ້າຫວັງຢ່າງຢີ່ງວ່າ ວັກຊີນ ເເລະ ອຸປະກອນເຫຼົ່ານີ້ ຈະເປັນການປະກອບສ່ວນອັນສຳຄັນໃນຂະບວນການສັກວັກຊີນໃນ ສປປ ລາວ.”

ທ່ານນາງ Leotes Helin, ວ່າການແທນ​ຜູ້​ຕາງ​ໜ້າ​ອົງ​ການ​ຢູ​ນີ​ເຊບ​ປະ​ຈຳ ສ​ປ​ປ ລາວ, ກ່າວ​ວ່າ: “ອົງ​ການ​ຢູ​ນີ​ເຊບ ນອກ​ຈາກ​ຈະໃຫ້ການ​ສະ​ໜັບ​ສະ​ໜູນ​ວັກ​ຊີນປ້ອງ​ກັນ​ພະ​ຍາດ ໂຄ​ວິດ-19 ​ໃຫ້​ແກ່ລັດ​ຖະ​ບານ​ແຫ່ງ ສ​ປ​ປ ລາວ ເເລ້ວ, ກໍ່ຍັງມີ​ຄວາມ​ພາກ​ພຸມ​ໃຈ​ເປັນ​ຢ່າງ​ຍິ່ງ ທີ່​ໄດ້​ໃຫ້​ການ​ສະ​ໜັ​ສະ​ໜູນ​ແກ່​ກະ​ຊວງ​ສາ​ທາ​ລະ​ນະ​ສຸກ ໃນ​ການ​ຍົກ​ລະ​ດັບຂີດ​ຄວາມ​ສາ​ມາດ​ຂອງ​ລະບົບຄວາມເຢັນເພື່ອເກັບຮັກສາ ເເລະ ຂົນສົ່ງວັກຊີນ ໃນ ສປປ ລາວ ພ້ອມ​ທັງ​ໃຫ້​ການ​ແນະ​ນຳ​ທາງ​ດ້ານ​ວີ​ຊາ​ການ​ອີກ​ດ້ວຍ.  ອົງ​ການ​ຢູ​ນີ​ເຊບ ​ຈະ​ສືບ​ຕໍ່​ເຮັດ​ວຽກ​ຢ່າງ​ໃກ້​ຊິດ​ກັບ​ກະ​ຊວງ​ສາ​ທາ​ລະ​ນະ​ສຸກ ແລະ ຄູ່​ຮ່ວມ​ພັດ​ທະ​ນາ​ຂອງ​ພວກ​ເຮົາ ເພື່ອ​ຮັບ​ປະ​ກັນ​ການ​ເຂົ້າ​ເຖິງວັກ​ຊີນປ້ອງ​​ກັນ​ພະ​ຍາດ ໂຄວິດ-19 ​ຢ່າງ​ເທົ່າທຽມ ໃນ ສປປ ​ລາວ.” ​

ຕິດຕໍ່ຜູ້ຮັບຜິດຊອບຂ່າວ

ມາເຣຍ ເຟີນານເດສ
ຫົວໜ້າພະແນກໂຄສະນາ, ສື່ສານ ແລະ ການຮ່ວມມື
ອົງການຢູນິເຊັບ
ໂທລະສັບ: +856 21 487500 ext. 7508
ໂທລະສັບ: +856 20 55519681
ອີເມວ: mfernandez@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

ກ່ຽວກັບອົງການຢູນິເຊັບ

ອົງການຢູນິເຊັບ ເຮັດວຽກໃນບາງບ່ອນ​ທີ່ຫຍຸ້ງຍາກ​ທີ່ສຸດ ເພື່ອເຂົ້າເຖິງເດັກທີ່ດ້ອຍໂອກາດທີ່ສຸດໃນໂລກ. ໃນ 190 ປະເທດ ແລະ ເຂດແຄວ້ນ​, ພວກເຮົາເຮັດວຽກເພື່ອເດັກ​ທຸກຄົນ ແລະ ໃນທຸກແຫ່ງຫົນ​ ເພື່ອສ້າງໂລກທີ່ດີກວ່າສໍາລັບທຸກຄົນ.

ສໍາລັບຂໍ້ມູນເພີ່ມເຕີມກ່ຽວກັບອົງການຢູນິເຊັບ ແລະ ວຽກງານຂອງອົງການ​ເພື່ອ​ເດັກ​ ຈົ່ງ​ເຂົ້າເບິ່ງ www.unicef.org.

ຕິດຕາມອົງການຢູນິເຊັບ​ໃນ  Twitter and Facebook