ຄູ່ຮ່ວມມືສາກົນ ເສີມສ້າງຄວາມເຂັ້ມແຂງໃຫ້ແກ່ ລັດຖະບານ ແຫ່ງ ສປປ ລາວ ເພື່ອເພີມຄວາມອາດສາມາດໃນການປ້ອງກັນ ເເລະ ຕອບໂຕ້ ພະຍາດອັກເສບປອດ ສາຍພັນໃຫມ່ ຫລື ໂຄວິດ-19 (COVID-19)

ອົງການຢູນີເຊັບ ໄດ້ຮັບການການຊ່ວຍເຫຼືອຈາກ ສະຫະພາບເອີຣົບ (European Union), ລັດຖະບານໄອແລນ (Ireland) ເເລະ ລັດຖະບານຍິປຸ່ນ.

21 ຕຸລາ 2020
Handover
UNICEF Laos/2020/AKarki

ໃນວັນທີ 16 ຕຸລາ 2020 ທີ່ນະຄອນຫຼວງວຽງຈັນ, ອົງການຢູນິເຊັບ (UNICEF) ປະຈໍາ ສປປ ລາວ ໄດ້ມອບວັດຖຸ ເເລະ ອຸປະກອນດ້ານການແພດ ລວມມູນຄ່າທັງໝົດ USD $1,163,860 ໃຫ້ແກ່ ກະຊວງສາທາລະນະສຸກ ເພື່ອເພີ່ມຄວາມສາມາດໃຫ້ແກ່ ລັດຖະບານ ແຫ່ງ ສປປ ລາວ ໃນການປ້ອງກັນ ເເລະ ຕອບໂຕ້ ພະຍາດອັກເສບປອດ ສາຍພັນໃຫມ່ ຫລື ໂຄວິດ-19 (COVID-19).

ວັດຖຸ ເເລະ ອຸປະກອນດ້ານການແພດດັ່ງກ່າວ ເເມ່ນໄດ້ຈັດຊື້ດ້ວຍທຶນການຊ່ວຍເຫຼືອຈາກ ສະຫະພາບເອີຣົບ, ລັດຖະບານໄອແລນ ເເລະ ລັດຖະບານຍີ່ປຸ່ນ, ເຊິ່ງປະກອບດ້ວຍ ອຸປະກອນປ້ອງກັນສ່ວນບຸກຄົນ (PPE) ເຊັ່ນ: ຜ້າອັດປາກ, ໜ້າກາກເເຜ່ນໃສ, ຖົງມື ແລະ ແວ່ນຕາປ້ອງກັນ. ນອກຈາກນີ້ເເລ້ວ, ວັດຖຸປະກອນທີ່ໄດ້ສະໜອງນັ້ນຍັງປະກອບມີ ອຸປະກອນການປິ່ນປົວດ້ວຍອົກຊີເຈນ ເຊັ່ນ ເຄື່ອງດູດອົກຊີເຈນ, ເຄື່ອງຊ່ວຍຫາຍໃຈ, ເຄື່ອງວິເຄາະອົກຊີເຈນ, ເຄື່ອງວັດແທກລະດັບອົກຊີເຈນໃນເລືອດ ແລະ ທໍ່ໃສ່ດັງ ສຳລັບຜູ້ໃຫຍ່ ແລະ ເດັກນ້ອຍ.

ທ່ານ ດຣ. ບຸນກອງ ສີຫາວົງ, ລັດຖະມົນຕີ ກະຊວງສາທາລະນະສຸກ, ໄດ້ກ່າວວ່າ: ລັດຖະບານ ແຫ່ງ ສປປ ລາວ ສາມາດຄວບຄຸມການແຜ່ລະບາດຂອງພະຍາດ ໂຄວິດ-19 ພາຍໃນປະເທດຮອດປັດຈຸບັນນີ້ໄດ້ ກໍ່ຍ້ອນວ່າໄດ້ຮັບການສະໜັບສະໜູນ ເເລະ ຊ່ວຍເຫຼືອຈາກຄູ່ຮ່ວມມືຕ່າງໆ. ເຖິງຢ່າງໃດກໍ່ຕາມ, ພວກເຮົາຍັງຈຳເປັນຕ້ອງສືບຕໍ່ເພີ່ມທະວີຄວາມເຂັ້ມເເຂງທາງດ້ານ ມາດຕະການ ເເລະ ວັດຖຸອຸປະກອນຕ່າງໆ ເພື່ອກຽມພ້ອມຮັບມືໃນກໍລະນີມີການແຜ່ລະບາດຮອບທີ່ສອງ. ວັດຖຸອຸປະກອນດ້ານການແພດເຫລົ່ານີ້ ຈະຊ່ວຍພວກເຮົາໃນການປິ່ນປົວຄົນເຈັບໄດ້ດີກວ່າເກົ່າ ໃນກໍລະນີມີຜູ້ຕິດເຊື້ອ ໂຄວິດ-19 ໃໝ່.

ອຸປະກອນປ້ອງກັນສ່ວນບຸກຄົນ ເເລະ ອຸປະກອນປິ່ນປົວດ້ວຍອົກຊີເຈນ ເຫລົ່ານີ້ ຈະຖືກແຈກຢາຍໃຫ້ກັບ ກົມປິ່ນປົວ ແລະ ຟື້ນຟູຫນ້າທີ່ການ ແລະ ກົມອະນາໄມ ແລະ ສົ່ງເສີມສຸຂະພາບ  ກະຊວງສາທາລະນະສຸກ, ຊຶ່ງຈະຊ່ວຍເພີ່ມທະວີຄວາມອາດສາມາດໃນການຮັບມືກັບ ການແຜ່ລະບາດຂອງພະຍາດ ໂຄວິດ-19 ໃຫ້ກັບ ລັດຖະບານ ແຫ່ງ ສປປ ລາວ ໂດຍການຫຼຸດຜ່ອນຄວາມສ່ຽງໃນການຕິດຕໍ່ ແລະ ແຜ່ເຊື້ອພະຍາດ ລະຫວ່າງ ພະນັກງານສາທາລະນະສຸກ ແລະ ຄົນເຈັບຢູ່ໂຮງໝໍ ແລະ ສຸກສາລາ.

ທ່ານ ນາງ Ina Marčiulionytė, ເອກອັກຄະລັດຖະທູດ ຂອງ ສະຫະພາບເອີຣົບ ປະຈຳ ສປປ ລາວ, ໄດ້ກ່າວວ່າ: “ສະຫະພາບເອີຣົບ ຮູ້ສຶກເປັນກຽດຢ່າງຍິ່ງ ທີ່ໄດ້ໃຫ້ການຊ່ວຍເຫຼຶອໃນການເສີມສ້າງຄວາມສາມາດໃຫ້ກັບ ລັດຖະບານ ແຫ່ງ ສປປ ລາວ ໃນການຕອບໂຕ້ ການແຜ່ລະບາດຂອງພະຍາດ ໂຄວິດ-19.  ພະຍາດ ໂຄວິດ-19 ໄດ້ສົ່ງຜົນກະທົບຢ່າງໜັກໜ່ວງຕໍ່ ເສດຖະກິດ ແລະ ພົນລະເມືອງ ຂອງສະຫະພາບເອີຣົບ ແລະ ຄູ່ຮ່ວມມືຂອງພວກເຮົາອີກດ້ວຍ. ດັ່ງນັ້ນ, ຂ້າພະເຈົ້າ ໃນນາມ ຜູ້ຕາງໜ້າ ຂອງ ສະຫະພາບເອີຣົບ ຂໍໃຫ້ຄໍາໝັ້ນສັນຍາວ່າ ພວກເຮົາຈະຮ່ວມມື ແລະ ຢືນຄຽງຂ້າງກັບ ປະຊາຊົນລາວ ເພື່ອຕອບໂຕ້ໄພວິກິດໃນຄັ້ງນີ້ ແລະ ຊ່ວຍແກ້ໄຂສິ່ງທ້າທາຍໄລຍະຍາວ ທາງດ້ານ ສຸຂະພາບ ແລະ ເສດຖະກິດ-ສັງຄົມ ພາຍໃນປະເທດ.

ທ່ານ John McCullagh, ເອກອັກຄະລັດຖະທູດປະເທດໄອແລນ ປະຈຳ ສປປ ລາວ, ໄດ້ໃຫ້ກ່າວວ່າ ລັດຖະບານໄອແລນ ກໍ່ມີຄວາມພາກພູມໃຈເປັນຢ່າງສູງ ທີ່ໄດ້ຊ່ວຍເສີມສ້າງຄວາມເຂັ້ມແຂງໃຫ້ກັບ ລັດຖະບານ ແຫ່ງ ສປປ ລາວ ໃນການຕອບໂຕ້ການແຜ່ລະບາດຂອງພະຍາດ ໂຄວິດ-19: “ການແຜ່ລະບາດຂອງພະຍາດ ໂຄວິດ-19 ໄດ້ສ້າງຄວາມກົດດັນຢ່າງໜັກໜ່ວງຕໍ່ລະບົບສາທາລະນະສຸກທົ່ວໂລກ ເເລະ ພະນັກງານສາທາທຸກຄົນ ທີ່ມີພາລະໜ້າທີ່ອັນສຳຄັນໃນການຮັບມືກັບພະຍາດດັ່ງກ່າວ. ດັ່ງນັ້ນ, ພະນັກງານແພດຈໍາເປັນຕອ້ງມີອຸປະກອນປ້ອງກັນສ່ວນບຸກຄົນທີ່ພຽງພໍ ເພື່ອທີ່ຈະໃຫ້ພວກເຂົາເຈົ້າສາມາດປະຕິບັດພາລະໜ້າທີ່ຂອງຕົນໄດ້ເຕັມທີ່ຢ່າງປອດໄພ ເເລະ ສາມາດຮັກສາຄວາມປອດໄພໃຫ້ແກ່ຜູ້ອຶ່ນອີກດ້ວຍ.”

ອຸປະກອນປິ່ນປົວດ້ວຍອົກຊີເຈນ ທີ່ ອົງການຢູນີເຊັບ ໄດ້ສະໜອງໃຫ້ ຈະມີພາລະບົດບາດອັນສໍາຄັນໃນການຍົກລະດັບຄວາມສາມາດຂອງ ສຸກສາລາ ແລະ ໂຮງໝໍພາຍໃນປະເທດ ໃນການປິ່ນປົວຄົນເຈັບ: ໂດຍ​ສະ​ເລ່ຍເເລ້ວ 20 ເປີເຊັນ ຂອງ ທຸກໆ 100 ກໍລະນີການຕິດເຊື້ອ ໂຄວິດ-19 ຈໍາເປັນຈະຕ້ອງໄດ້ຮັບການປິ່ນປົວດ້ວຍອົກຊີເຈນ ເເລະ ສອງ ເຖິງ ສາມ ເປີເຊັນ ຂອງກໍລະນີການຕິດເຊື້ອ ໂຄວິດ-19 ເເມ່ນຈຳເປັນຈະຕ້ອງໄດ້ໃຊ້ ເຄື່ອງຊ່ວຍຫາຍໃຈ ເພື່ອໃຫ້ຄົນເຈັບໄດ້ຮັບອົກຊີແຊນພຽງພໍ.

ສຳລັບ ທ່ານ Keiichi Iwamoto, ລັດຖະມົນຕີ ແລະ ຮອງເອກອັກຄະລັດຖະທູດ ຈາກປະເທດຍີ່ປຸ່ນ ປະຈຳ ສປປ ລາວ, ໄດ້ກ່າວວ່າ ອຸປະກອນປິ່ນປົວດ້ວຍອົກຊີເຈນ ທີ່ລັດຖະບານຍີ່ປຸ່ນ ໄດ້ສະໜັບສະໜູນ ເເມ່ນສະແດງໃຫ້ເຫັນເຖິງການຮ່ວມມືທີ່ແໜ້ນແຟ້ນ ລະຫວ່າງ ລັດຖະບານຍີ່ປຸ່ນ ເເລະ ລັດຖະບານ ແຫ່ງ ສປປ ລາວ. ທ່ານ Keiichi Iwamoto ຍັງໄດ້ກ່າວຕື່ມອີກວ່າ: "ພະຍາດ ໂຄວິດ-19 ເປັນໄພຄຸກຄາມຕໍ່ພວກເຮົາທຸກຄົນ, ດັ່ງນັ້ນພວກເຮົາຕ້ອງຮ່ວມຈິດຮ່ວມໃຈກັນເພື່ອທີ່ຈະສາມາດເອົາຊະນະວິກິດນີ້ໄດ້."

ທ່ານ ນ່າງ ປອ Pia Rebello Britto, ຜູ້ຕາງໜ້າ ອົງການຢູນິເຊັບ ປະຈໍາ ສປປ ລາວ, ໄດ້ອະທິບາຍວ່າ: "ອຸປະກອນເຫລົ່ານີ້ ແມ່ນມີຄວາມສຳຄັນຢ່າງຍິ່ງໃນການໂຕບໂຕ້ ເເລະ ປ້ອງກັນ ການແຜ່ລະບາດຂອງພະຍາດ ໂຄວິດ-19 ເເລະ ຂ້າພະເຈົ້າຂໍສະເເດງຄວາມຂອບໃຈໄປຍັງຄູ່ຮ່ວມພັດທະນາຂອງພວກເຮົາ ສຳລັບການປະກອບສ່ວນການຊ່ວຍເຫຼືອໃນຄັ້ງນືີ້. ການຮ່ວມມືລະຫວ່າງທຸກພາກສ່ວນໃນການຕອບໂຕ້ພະຍາດ ໂຄວິດ-19 ຕ້ອງໄດ້ຮັບການຈັດຕັ້ງປະຕິບັດຄຽງຄູ່ກັບ ການສ້າງຄວາມເຂັ້ມແຂງໃຫ້ເເກ່ລະບົບສາທາລະນະສຸກຂອງ ສປປ ລາວ ເພື່ອຮັກສາ ຜົນສຳເລັດດ້ານການສົ່ງເສີມສຸຂະພາບ ແລະ ການເປັນຢູ່ທີ່ດີ ສໍາລັບເດັກນ້ອຍທີ່ພວກເຮົາໄດ້ສ້າງເອົາໄວ້ເເລ້ວ.”  ທ່ານ ນ່າງ ປອ Pia Rebello Britto ຍັງໄດ້ໃຫ້ຄໍາໝັ້ນສັນຍາວ່າ ອົງການຢູນິເຊັບ ຈະສ້າງໂອກາດເພື່ອໃຫ້ເດັກນ້ອຍທຸກຄົນ ສາມາດເລີ່ມຕົ້ນຊິວິດໄດ້ດີທີ່ສຸດ.

ອົງການຢູນິເຊັບ ຈະສືບຕໍ່ຜັນຂະຫຍາຍການຮ່ວມມືກັບລັດຖະບານ ແຫ່ງ ສປປ ລາວ ເພື່ອສ້າງຄວາມອາດສາມາດໃນການຮັບມື ເເລະ ແກ້ໄຂ ຜົນກະທົບຈາກວິກິດການແຜ່ລະບາດຂອງພະຍາດ ໂຄວິດ-19.

--- END ---

ກ່ຽວກັບສະຫະພາບເອີຣົບ (European Union)

ສະຫະພາບເອີຣົບ  ເເລະ ລັດຖະບານ ແຫ່ງ ສປປ ລາວ ໄດ້ມີສາຍພົວພັນດ້ານການທູດທີ່ເເໜັ້ນເເຟ້ນແຕ່ປີ 1975 ເປັນຕົ້ນມາ ເເລະ ໄດ້ເຮັດວຽກຮ່ວມກັບ ລັດຖະບານ ແຫ່ງ ສປປ ລາວ ເພື່ອສົ່ງເສີມການປົກຄອງທີ່ມີປະສິດທິພາບ, ການພັດທະນາທ່າງດ້ານເສດຖະກິດ ເເລະ ສັງຄົມ ທີ່ມີການປະກອບຊ່ວນຈາກທຸກກຸ່ມຄົນ.

ທ່ານສາມາດອ່ານຂໍ້ມູນເພີ່ມເຕີມກ່ຽວກັບສະຫະພາບເອີຣົບໄດ້ທີ່ເວບໄຊ: https://eeas.europa.eu/delegations/lao-pdr_en ຫຼື ຕິດຕາມທາງ Facebook ເເລະ Twitter ຂອງສະຫະພາບເອີຣົບ.

 

ກ່ຽວກັບປະເທດໄອແລນ

 

ປະເທດໄອແລນ ໄດ້ຈັດສັນງົບປະມານຫຼາຍກວ່າ €123 ລ້ານເອີໂຣ ໃຫ້ແກ່ການຮັບມືກັບພະຍາດ ໂຄວິດ-19 ທົ່ວໂລກ. ໃນຈຳນວນທຶນການຊ່ວຍເຫຼືອດັ່ງກ່າວນັ້ນ, €46,5 ລ້ານເອີໂຣ ເເມ່ນໄດ້ມອບໃຫ້ກັບຄູ່ຮ່ວມມື ເຊັ່ນ: ອົງການສະຫະປະຊາຊາດ (UN), ອົງການອະນາໄມໂລກ (WHO), ອົງການ NGO ຕ່າງໆ ແລະ ບັນດາປະເທດຄູ່ຮ່ວມມື, ເພື່ອຊ່ວຍເຫຼືອໃນການຮັບມືກັບພະຍາດ ໂຄວິດ-19,ເເລະ ຈຳນວນ €76,8 ລ້ານເອີໂຣ ເເມ່ນໄດ້ມອບໃຫ້ກັບຄູ່ຮ່ວມມືຕ່າງໆ ເພື່ອຊ່ວຍໃນການຫຼຸດຜ່ອນຜົນກະທົບທາງດ້ານເສດຖະກິດ-ສັງຄົມ ຈາກການເເຜ່ລະບາດຂອງພະຍາດ ໂຄວິດ-19. ນອກຈາກນີ້, ປະເທດໄອແລນຍັງໄດ້ມອບທຶນຈຳນວນ €18 ລ້ານເອີໂຣ ໃຫ້ກັບ ອົງການ GAVI ສໍາລັບໄລຍະປີ 2021-25.

ປະເທດໄອແລນ ຕຽມພ້ອມໃຫ້ການສະໜັບສະໜູນຊ່ວຍເຫຼືອແກ່ ລັດຖະບານ ແຫ່ງ ສປປ ລາວ ໃນການຮັບມືກັບ ພະຍາດໂຄວິດ-19 ແລະ ໃນການເສີມສ້າງຄວາມເຂັ້ມແຂງໃຫ້ກັບລະບົບສາທາລະນະສຸກ ຂອງ ສປປ ລາວ.

 

ທ່ານສາມາດອ່ານຂໍ້ມູນເພີ່ມເຕີມກ່ຽວກັບ ປະເທດໄອແລນ ໄດ້ຢູ່ທີ່: www.irishaid.ie ຫຼື www.dfa.ie/vietnam

ຫຼື ຕິດຕາມທາງ Facebook: Irish Aid ເເລະ Embassy of Ireland

 

ກ່ຽວກັບ ລັດຖະບານຍີ່ປຸ່ນ

 

ລັດຖະບານຍີ່ປຸ່ນໄດ້ໃຫ້ການຊ່ວຍເຫລືອທາງວິຊາການ ແລະ ອຸປະກອນການແພດ ລວມມູນຄ່າປະມານ USD $4 ລ້ານໂດລາ ເເກ່ລັດຖະບານ ແຫ່ງ ສປປ ລາວ  ຜ່ານອົງການຈັດຕັ້ງສາກົນ, ພ້ອມທັງຍັງໃຫ້ການຊ່ວຍເຫລືອ ດ້ານອຸປະກອນການແພດ ທີ່ມີມູນຄ່າປະມານ USD $13,76 ລ້ານໂດລາ ເພື່ອຄວບຄຸມການແຜ່ລະບາດຂອງ ໂຄວິດ-19. ປີນີ້ແມ່ນ ຄົບຮອບ 65 ປີ ຂອງສາຍພົວພັນການທູດລະຫວ່າງ ປະເທດຍີ່ປຸ່ນ ເເລະ ສປປ ລາວ ແລະ ຄົບຮອບ 5 ປີ ຂອງການຮ່ວມມືທາງດ້ານຍຸດທະສາດລະຫ່ວາງ ປະເທດຍີ່ປຸ່ນ ເເລະ ສປປ ລາວ. ໃນນາມຄູ່ຮ່ວມມືອັນໃກ້ຊິດ ຂອງ ສປປ ລາວ, ລັດຖະບານຍີ່ປຸ່ນ ຈະສືບຕໍ່ໃຫ້ການສະໜັບສະໜູນແກ່ ລັດຖະບານ ແຫ່ງ ສປປ ລາວ ເພື່ອເເກ້ໃຂວິກິດການແຜ່ລະບາດຂອງພະຍາດ ໂຄວິດ-19.

ຕິດຕໍ່ຜູ້ຮັບຜິດຊອບຂ່າວ

ມາເຣຍ ເຟີນານເດສ
ຫົວໜ້າພະແນກໂຄສະນາ, ສື່ສານ ແລະ ການຮ່ວມມື
ອົງການຢູນິເຊັບ
ໂທລະສັບ: +856 21 487500 ext. 7508
ໂທລະສັບ: +856 20 55519681
ອີເມວ: mfernandez@unicef.org
ຕະບອງເພັດ ພຸດທະວົງ
ຊ່ຽວຊານວຽກງານໂຄສະນາ ແລະ ສື່ສານມ່ວນຊົນ
ອົງການຢູນິເຊັບ ປະຈຳ ສປປ ລາວ
ໂທລະສັບ: +85621 487520;ext=7520
ໂທລະສັບ: +856 20 96888890
ອີເມວ: tphouthavong@unicef.org

About UNICEF

UNICEF works in some of the world’s toughest places, to reach the world’s most disadvantaged children. Across 190 countries and territories, we work for every child, everywhere, to build a better world for everyone. 

For more information about UNICEF and its work for children, visit www.unicef.org.

Follow UNICEF on Twitter and Facebook