ຊາວໜຸ່ມລາວຄົ້ນຄິດຄືນໃໝ່ ເຖິງອະນາຄົດທີ່ສົດໃສ ຫຼັງການລະບາດຂອງພະຍາດໂຄວິດ ໃນເວທີ “ສົນທະນາຂອງຕົວແທນຊາວໜຸ່ມລາວ”
ຊາວໜຸ່ມລາວຄົ້ນຄິດຄືນໃໝ່ ເຖິງອະນາຄົດທີ່ສົດໃສ ຫຼັງການລະບາດຂອງພະຍາດໂຄວິດ ໃນເວທີ “ສົນທະນາຂອງຕົວແທນຊາວໜຸ່ມລາວ”
ໃນຕອນເຊົ້າ, ວັນທີ 27 ມັງກອນ ປີ 2022 – ອົງການ UNICEF ດ້ວຍການເປັນຄູ່ຮ່ວມງານກັບກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (MICT), ສູນກາງຊາວໜຸ່ມປະຊາຊົນປະຕິວັດລາວ (LYU), ມະຫາວິທະຍາໄລແຫ່ງຊາດລາວ(NUOL), ອົງການ ChildFund ໃນປະເທດລາວ ແລະ ອົງການ Global Shapers, ໄດ້ຈັດງານນຳສະເໜີແນວຄວາມຄິດ, ໂອ້ລົມ, ສົນທະນາຂອງຕົວແທນຊາວໜຸ່ມລາວທີ່ເນັ້ນໃສ່ຜົນກະທົບຂອງການລະບາດຂອງພະຍາດໂຄວິດ-19 ຕໍ່ ເດັກ ແລະ ໄວໜຸ່ມໃນ ສປປ ລາວ.
ງານສົນທະນາແລກປ່ຽນຄໍາຄິດເຫັນຂອງຊາວໜຸ່ມລາວ ໄດ້ຈັດຂຶ້ນພາຍໃຕ້ຫົວຂໍ້ຫຼັກ ເພື່ອຄົ້ນຄິດຄືນໃໝ່ເຖິງຄົນລາວແຕ່ນີ້ຫາປີ 2030 - ສ້າງຍຸກຫຼັງການລະບາດຂອງພະຍາດທີ່ດີກວ່າ, ມີສີຂຽວຫຼາຍຂຶ້ນ ແລະ ຍືນຍົງກວ່າເກົ່າ ເພື່ອເດັກທຸກໆຄົນ”, ໄດ້ເຕົ້າໂຮມເອົາຊາວໜຸ່ມລາວ ທີ່ມີພອນສະຫວັນ ແລະ ມີຄວາມມຸ່ງໝັ້ນເປັນຕົວແທນຈໍານວນ 7 ຄົນ ທີ່ມາຈາກພື້ນຖານທີ່ແຕກຕ່າງກັນໃນຂອບເຂດທົ່ວປະເທດ ເພື່ອນຳສະເໜີທັດສະນະຂອງເຂົາເຈົ້າກ່ຽວກັບບັນຫາທີ່ສຳຄັນທີ່ສົ່ງຜົນກະທົບຕໍ່ເດັກ ແລະ ໄວໜຸ່ມ ໃນ ສປປ ລາວ ລວມທັງຫົວຂໍ້ທີ່ກ່ຽວພັນກັບ ການສຶກສາ, ການປ່ຽນແປງຂອງດິນຟ້າອາກາດ, ສາທາລະນະສຸກ, ການປົກປ້ອງເດັກ.
ທັງໝົດເຈັດຫົວຂໍ້ນັ້ນແມ່ນມີຫົວຂໍ້ຕໍ່ໄປນີ້ 1) 'ການຢຸດພັກໜຶ່ງປີກະກຽມຂ້ອຍສູ່ການຮຽນຮູ້ຕະຫຼອດຊີວິດ' ໂດຍ ພຣະ ສົມກຽດ ສີຢາງວົງສາ, 2) 'ເປັນຫຍັງຈິ່ງບໍ່ມີຊີວິດປົກກະຕິແບບໃໝ່ສຳລັບການປ່ຽນແປງດິນຟ້າອາກາດ' ໂດຍ ນາງ ມະໄລສອນ ວັນນະລາດ, 3) 'ເປັນຫຍັງສຸຂະພາບຈິດທີ່ດີຈິ່ງເລີ່ມຈາກການຮັບຟັງ' ໂດຍ ນາງ ດາລາສັກ ຍອດຈະເລີນ, 4) 'ຄວາມຫວັງທີ່ເດັກຈະຫຼຸດພົ້ນຈາກຄວາມຮຸນແຮງທຸກຮູບແບບ' ໂດຍ ນາງ ປາເຢຍ ຢ່າງເຊົາ ເຢ້, 5) 'ຄວາມຊັບຊ້ອນຂອງໂພຊະນາການຂອງເດັກ ແລະ ແມ່ຍິງໃນ ສປປ ລາວ' ໂດຍ ນາງ ໄພລິນ ເກີດຫຼ້າ, 6) 'ສິ່ງທີ່ພໍ່ແມ່ຂອງຂ້ອຍສອນຂ້ອຍກ່ຽວກັບຄວາມສະເໝີພາບຍິງ-ຊາຍ' ໂດຍ ນາງ ພະນົມພອນ ຜາອຸດົມ ແລະ 7) 'ຄວາມສໍາຄັນຂອງການຍອມຮັບ ແລະ ການເຄົາລົບຕໍ່ຄວາມເປັນຕົວເອງຂອງທຸກເພດຈິ່ງສໍາຄັນ' ໂດຍ ທ້າວ ວັນນະນ້ອຍ ນິຍົມສິນ. ເຊິ່ງຕົວແທນໄວໜຸ່ມແຕ່ລະຄົນລ້ວນແລ້ວແຕ່ເປັນບຸກຄົນທີ່ເປັນແບບຢ່າງໃນທ້ອງຖິ່ນຂອງຕົນ ໂດຍນັກເວົ້າເອງໄດ້ມີປະສົບການດໍາເນີນໂຄງການເພື່ອປູກຈິດສໍານຶກກ່ຽວກັບບັນຫາທີ່ສໍາຄັນຕໍ່ຕົນເອງທີ່ເປັນໄວໜຸ່ມ ຫຼື ໄດ້ມີສ່ວນຮ່ວມຢ່າງໃນການວຽກງານເພື່ອປັບປຸງຊຸມຊົນຂອງຕົນ.
ທ່ານນາງ ປອ. ເພຍ, ເຣເບລໂລ ບຣີໂຕ ຜູ້ຕາງໜ້າອົງການຢູນິເຊັບປະຈຳ ສປປ ລາວ ກ່າວວ່າ: “ຄໍາຄິດເຫັນຊາວໜຸ່ມລາວ“ ເປັນເວທີໃຫ້ຊາວໜຸ່ມໄດ້ສະແດງອອກ ແລະ ມີສ່ວນຮ່ວມຢ່າງຫ້າວຫັນໃນການສ້າງໂລກຄືນໃໝ່ຫຼັງການລະບາດຂອງພະຍາດໃຫ້ດີກ່ວາ, ຂຽວສົດໃສກວ່າ, ແບບຍືນຍົງກວ່າ. ງານດັ່ງກ່າວມີຄວາມສຳຄັນເປັນພິເສດສຳລັບພວກເຮົາ ເນື່ອງຈາກວ່າ ເມື່ອບໍ່ດົນມານີ້ອົງການ UNICEF ໄດ້ສະເຫຼີມສະຫຼອງວັນຄົບ ຮອບ 75 ປີຂອງຕົນ, ຊຶ່ງເປັນການຢັ້ງຢືນເຖິງຄວາມມຸ່ງໝັ້ນອັນຍາວນານເປັນເວລາຫຼາຍທົດສະວັດຂອງພວກເຮົາໃນການສົ່ງເສີມສຽງຂອງເດັກໃນທົ່ວໂລກ, ລວມທັງໃນ ສປປ ລາວອີກດ້ວຍ.”
ງານດັ່ງກ່າວໄດ້ຈັດຂື້ນທີ່ສູນກາງຊາວໜຸ່ມລາວເປັນງານແບບປະສົມ ໂດຍມີບຸກຄະລາກອນຫຼັກເຂົ້າຮ່ວມດ້ວຍຕົວເອງ, ສ່ວນຜູ້ຊົມສ່ວນໃຫຍ່ເຂົ້າຮ່ວມຊົມການຖ່າຍທອດສົດຜ່ານຊ່ອງທາງອອນໄລນ໌ ແລະ ສື່ສັງຄົມ.
ທ່ານ ອາລຸນໄຊ ສູນນະລາດ, ກຳມະການສູນກາງພັກ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ກ່າວວ່າ: “ຍ້ອນການລະບາດຂອງພະຍາດໂຄວິດ-19 ຢ່າງຕໍ່ເນື່ອງ, ເດັກນ້ອຍ ແລະ ໄວໜຸ່ມໃນ ສປປ ລາວ ພວມປະເຊີນກັບວິກິດການຂະໜາດໃຫ່ຍທີ່ບໍ່ເຄີຍມີມາກ່ອນ. ໃນຂະນະທີ່ພວກເຮົາພວມສ້າງໂລກຄືນໃໝ່ຫຼັງການລະບາດຂອງພະຍາດໂຄວິດ-19, ຊາວໜຸ່ມຕ້ອງການເວທີເພື່ອສະແດງຄວາມຄິດເຫັນຂອງຕົນກ່ຽວກັບບັນຫາທີ່ມີຄວາມສໍາຄັນຕໍ່ພວກເຂົາເອງ ແລະ ມີສ່ວນຮ່ວມໃນຂະບວນການເພື່ອຈິນຕະນາການຄືນໃໝ່ເຖິງອະນາຄົດທີ່ດີກວ່າ. ສະນັ້ນ, “ຄຳຄິດເຫັນຂອງຊາວໜຸ່ມລາວ” ຈິ່ງເປັນບັນຫາສຳຄັນ, ນຳມາຄົ້ນຄ້ວາໃຫ້ຊັດເຈນ.”
ທ່ານ ໂພສີ ແກ້ວມະນີວົງ, ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວກ່າວວ່າ: “ໃນເກືອບ 2 ທົດສະວັດຂອງການຮ່ວມມືລະຫວ່າງ MICT ແລະ ອົງການ UNICEF, ພວກເຮົາໄດ້ເຫັນແລ້ວວ່າສື່ມວນຊົນມີບົດບາດອັນມີພະລັງທີ່ສຸດໃນການເປັນກະບອກສຽງຂອງຊາວໜຸ່ມລາວ ແລະ ການໂຄສະນາສົ່ງເສີມສະຫັວດດີພາບຂອງພວກເຂົາ. ດຽວນີ້, ດ້ວຍ “ຄຳຄິດເຫັນຂອງຊາວໜຸ່ມລາວ”, ຊາວໜຸ່ມມີເວທີຫຼາກຫຼາຍເພື່ອສືບຕໍ່ເປັນກະບອກສຽງຂອງຕົນໃນຊ່ວງການລະບາດຂອງພະຍາດ. ພວກເຮົາຈໍາເປັນຕ້ອງສ້າງໂອກາດໃຫ້ແກ່ເດັກ ແລະ ຊາວໜຸ່ມໄດ້ເຂົ້າຮ່ວມໃນການພັດທະນາປະເທດຊາດໃນຖານະເປັນພົນລະເມືອງທີ່ຫ້າວຫັນ.”
ທ່ານ ຮສ. ປອ. ອຸດົມ ພອນຄໍາແພງ, ຮັກສາການອະທິການບໍດີ NUOL ກ່າວວ່າ: “ມີຄວາມສຳຄັນຫຼາຍທີ່ຄົນຮຸ່ນອາວຸໂສກວ່າໄດ້ມີສ່ວນຮ່ວມ ແລະ ໄດ້ຍິນສຽງຈາກຄົນຮຸ່ນໜຸ່ມກ່ວາໃນເລື່ອງທີ່ສຳຄັນທີ່ສຸດຕໍ່ພວກເຂົາໃນຊ່ວງທີ່ທ້າທາຍນີ້ ແລະ ຊາວໜຸ່ມລາວກໍມີວິທີການແລກປ່ຽນທັດສະນະ ແລະ ວິໄສທັດຂອງຕົນສໍາລັບອະນາຄົດທີ່ພວກເຂົາຕ້ອງການ. NUOL ພູມໃຈທີ່ໄດ້ມີບົດບາດໃນການສະໜັບສະໜູນຊາວໜຸ່ມໃນລາວ ໂດຍຜ່ານ “ຂະບວນການຄົ້ນຄິດຂອງຊາວໜຸ່ມລາວ”. ພວກເຮົາຮູ້ສຶກຕື່ນເຕັ້ນທີ່ສຸດທີ່ໄດ້ປະກອບສ່ວນເຂົ້າໃນການສ້າງເວທີສົນທະນາແລກປ່ຽນບົດຮຽນສໍາລັບໄວໜຸ່ມ ແລະ ຫວັງວ່າແນວຄວາມຄິດ ແລະ ທັດສະນະຂອງພວກເຂົາຈະຖືກຮັບຟັງ ແລະ ໄດ້ຮັບການພິຈາລະນາ."
ທ່ານ ບີຈູ ອັບຣາຮາມ, ຫົວໜ້າອົງການຊາຍຟັນ ປະຈໍາ ສປປ ລາວ ChildFund ປະຈໍາ ສປປ ລາວ ກ່າວວ່າ: “ໂດຍສະເພາະໃນປະຈຸບັນນີ້ແລ້ວ, “ຄຳຄິດເຫັນຂອງຊາວໜຸ່ມລາວ” ມີຄວາມພົ້ນເດັ່ນທີ່ສຸດຍ້ອນການລະບາດຂອງພະຍາດໂຄວິດ-19. ເປັນທີ່ຊັດເຈນວ່າເດັກແມ່ນໜຶ່ງໃນບັນດາຜູ້ໄດ້ຮັບຜົນກະທົບຫຼາຍທີ່ສຸດຈາກການລະບາດຂອງພະຍາດ, ນັບຕັ້ງແຕ່ການຂາດປະສົບການການຮຽນຮູ້ ໃນໂຮງຮຽນຊຶ່ງມີຄວາມສຳຄັນຕໍ່ພັດທະນາການຂອງພວກເຂົາຈົນເຖິງການເຂົ້າເຖິງການບໍລິການສາທາລະນະສຸກທີ່ສຳຄັນຂອງພວກເຂົາກໍຖືກລົບກວນ. ດັ່ງນັ້ນ, ເປັນສິ່ງສໍາຄັນທີ່ພວກເຮົາຕ້ອງໄດ້ຍິນສຽງ ແລະ ການມີຄໍາຄິດເຫັນຈາກຊາວໜຸ່ມ ແລະ ເດັກເພື່ອຮັບປະກັນວ່າຄວາມພະຍາຍາມຂອງພວກເຮົາໃນການຟື້ນຟູຫຼັງຈາກການລະບາດຂອງພະຍາດແມ່ນລວມເອົາທຸກຄົນ."
ທ່ານເບັນຈາມິນ ໂຊ ຈາກອົງການ Global Shapers ກ່າວວ່າ: “ນີ້ເປັນງານທຳອິດໃນລັກສະນະນີ້ທີ່ໄດ້ຈັດຂຶ້ນໃນສປປ ລາວ. ພວກເຮົາຫວັງວ່າການໂອ້ລົມດັ່ງກ່າວຈະຊ່ວຍສ່ອງແສງໃຫ້ເຫັນເຖິງຜົນກະທົບຂອງການລະບາດຂອງພະຍາດໂຄວິດ-19 ຕໍ່ເດັກທີ່ມີຄວາມສ່ຽງທີ່ສຸດໃນປະເທດ ແລະ ເປັນແຮງບັນດານໃຈໃຫ້ມີການສົນທະນາໃນຫົວຂໍ້ນີ້ໃນວົງກວ້າງກ່ວາ.”
ບັນດາຄູ່ຮ່ວມງານທີ່ຢູ່ເບື້ອງຫຼັງຂອງງານນີ້ຮັບຮູ້ເຖິງຄວາມສໍາຄັນຂອງເຂົ້າຮ່ວມ ແລະ ການມີສ່ວນຮ່ວມຂອງຊາວໜຸ່ມ ແລະ ເດັກໃນຖານະເປັນຕົວແທນຂອງການປ່ຽນແປງ. “ທັດສະນະຊາວໜຸ່ມລາວ” ເປັນຂີດໝາຍສຳຄັນໃນການພັດທະນາ ແລະ ສົ່ງເສີມເວທີສົນທະນາທີ່ຊາວໜຸ່ມໃນ ສປປ ລາວ ສາມາດເຂົ້າຮ່ວມການສົນທະນາຢ່າງຈິງຈັງເພື່ອແນໃສ່ສ້າງ ສປປ ລາວ ໃຫ້ເປັນບ່ອນທີ່ບໍ່ມີເດັກ ຫຼືຊາວໜຸ່ມຖືກປ່ອຍປະໄວ້ຢູ່ເບື້ອງຫຼັງ.
--- ຈົບ ---
ກ່ຽວກັບອົງການຢູນິເຊັບ
ອົງການຢູນິເຊັບເຮັດວຽກໃນບາງບ່ອນທີ່ຫຸ້ຽງຍາກທີ່ສຸດໃນໂລກເພື່ອເຂົ້າເຖິງເດັກດ້ອຍໂອກາດທີ່ສຸດໃນໂລກ. ໃນທົ່ວ 190 ປະ ເທດ ແລະ ເຂດແຄ້ວນ, ພວກເຮົາເຮັດວຽກເພື່ອເດັກທຸກຄົນ ແລະ ໃນທຸກແຫ່ງຫົນ ເພື່ອສ້າງໂລກທີ່ດີກ່ວາສໍາລັບທຸກຄົນ. ສໍາລັບຂໍ້ມູນເພີ່ມເຕີມກ່ຽວກັບອົງການຢູນິ ເຊັບ ແລະ ວຽກງານຂອງອົງການເພື່ອເດັກໃນສປປລາວ ຈົ່ງເຂົ້າເບິ່ງ: http://www.unicef.org/laos
ຈົ່ງຕິດຕາມພວກເຮົາໃນ: Facebook, Twitter, YouTube and at www.unicef.org
ສໍາລັບຂໍ້ມູນເພີ່ມເຕີມ ຈົ່ງຕິດຕໍ່:
ທ່ານນາງ ມາເຣຍ ເຟີນານເດສ ຫົວໜ້າພະແນກໂຄສະນາ, ສື່ສານ ແລະ ການຮ່ວມມື, ອົງການຢູນິເຊັບປະຈໍາ ສປປ ລາວ
ໂທ: (+856) 20 55519681, ອີເມລ: mfernandez@unicef.org
ທ່ານ ຕະບອງເພັດ ພຸດທະວົງ, ຜູ້ຊ່ຽວຊານດ້ານການສື່ສານ, ອົງການຢູນີເຊັບ ປະຈຳ ສປປລາວ, ໂທ: (+856) 20 96888890,
ອີເມລ: tphouthavong@unicef.org
ຕິດຕໍ່ຜູ້ຮັບຜິດຊອບຂ່າວ
About UNICEF
UNICEF works in some of the world’s toughest places, to reach the world’s most disadvantaged children. Across 190 countries and territories, we work for every child, everywhere, to build a better world for everyone.
For more information about UNICEF and its work for children, visit www.unicef.org.
