ສຸຂະພາບ
ຮັບປະກັນການຢູ່ລອດ ແລະ ສຸຂະພາບຂອງເດັກ ແລະ ແມ່ຍິງ
- ສາມາດມີໃນ:
- English
- ລາວ
ສິ່ງທ້າທາຍ
ເຖິງວ່າຈະມີຄວາມຄືບໜ້າໃນຊຸມປີມໍ່ໆມານີ້, ສປປ ລາວ ຍັງມີອັດຕາການຕາຍຂອງເດັກອາຍຸຕໍ່າກວ່າ 5 ປີສູງທີ່ສຸດຢູ່ໃນພາກພື້ນອາຊີຕາເວັນອອກສ່ຽງໃຕ້, ອີງຕາມການສຳຫຼວດຕົວຊີ້ວັດສັງຄົມລາວ ຄັ້ງທີ II ເຫັນວ່າ ມີສູງເຖິງ 46 ຄົນຕໍ່ 1,000 ເກີດມີຊີວິດ. ເຊິ່ງສາເຫດສ່ວນໃຫຍ່ແມ່ນຍ້ອນເດັກມີອາການສົນຕອນເກີດໃໝ່, ຖອກທ້ອງ ແລະ ປອດອັກເສບ. ອັດຕາການຕາຍຂອງເດັກມີສູງຫຼາຍ ໃນກຸ່ມເດັກຈາກຄອບຄົວທີ່ທຸກຍາກ ແລະ ດ້ອຍໂອກາດ.
ການເສຍຊີວິດຂອງເດັກສ່ວນຫຼາຍສາມາດປ້ອງກັນ ຫຼື ປິ່ນປົວໄດ້ ດ້ວຍການບໍລິການສຸຂະພາບ ແລະ ໂພຊະນາການທີ່ໄດ້ຜົນສູງ ແລະ ຕົ້ນທຶນຕໍ່າ, ເຊັ່ນ ການສັກຢາກັນພະຍາດ, ແລະ ການປິ່ນປົວພະຍາດເດັກເກີດໃໝ່ ແລະ ເດັກນ້ອຍແບບເຊື່ອມສານ. ຜົນກະທົບດ້ານສຸຂະພາບຂອງເດັກມີລະດັບແຕກຕ່າງກັນໜ້ອຍ ຫຼື ຫຼາຍ ແມ່ນຂຶ້ນກັບລະດັບເສດຖະກິດ-ສັງຄົມ, ຊົນເຜົ່າ, ທີ່ຕັ້ງພູມສັນຖານ ແລະ ລະດັບການສຶກສາຂອງພໍ່ແມ່ຂອງພວກເຂົາ.
ການສັກຢາກັນພະຍາດໃຫ້ທັງແມ່ ແລະ ລູກ ແມ່ນການປະຕິບັດທີ່ຄຸ້ມຄ່າ ແລະ ມີປະສິດທິຜົນສູງທີ່ສຸດໃນການຫລຸດຜ່ອນອັດຕາການຕາຍ ແລະ ການເຈັບເປັນຂອງພວກເຂົາ.
ການຮັກສາສຸຂະພາບຢ່າງຕໍ່ເນື່ອງຕະຫຼອດຊີວິດ ຕັ້ງແຕ່ຢູ່ເຮືອນຈົນຮອດສະຖານທີ່ບໍລິການ, ໂດຍມີການສົ່ງຕໍ່ ແລະ ຕິດຕາມຢ່າງທັນເວລາ, ແມ່ນສິ່ງສຳຄັນສຳລັບການຢູ່ລອດ ແລະ ການພັດທະນາຂອງເດັກ. ມີຫຼັກຖານສະແດງໃຫ້ເຫັນວ່າການດູແລຮັກສາສຸຂະພາບທີ່ມີປະສິດຕິຜົນຢ່າງຕໍ່ເນື່ອງ, ເຊິ່ງລວມມີການບໍລິການຕັ້ງແຕ່ກ່ອນຖືພາຮອດເກີດລູກ, ການດູແລເດັກຫຼັງເກີດ ແລະ ການຊ່ວຍເຫຼືອເດັກນ້ອຍຈົນເຖິງອາຍຸ 5 ປີ, ແມ່ນມີຄວາມຈຳເປັນສຳລັບສະຫວັດດີພາບຂອງເດັກ ແລະ ຄົນຮຸ່ນຕໍ່ໄປ.
ຂໍ້ມູນລ່າສຸດ ສຳລັບ ສປປ ລາວ (ການສຳຫຼວດຕົວຊີ້ວັດສັງຄົມລາວ) ສະແດງໃຫ້ເຫັນວ່າ ເຖິງແມ່ນວ່າເດັກຫຼາຍຄົນໄດ້ເຂົ້າເຖິງການບໍລິການດ້ານສຸຂະພາບ ແລະ ໂພຊະນາການທີ່ມີປະສິດທິຜົນສູງ, ແຕ່ວ່າ ມີໜ້ອຍກວ່າເຄິ່ງໜຶ່ງຂອງເດັກນ້ອຍທັງໝົດທີ່ສາມາດເຂົ້າເຖິງໄດ້. ຍັງມີຫຼັກຖານທີ່ຊີ້ໃຫ້ເຫັນວ່າມີພຽງແຕ່ປະມານເຄິ່ງໜຶ່ງຂອງເດັກນ້ອຍທັງໝົດ ທີ່ໄດ້ຮັບການສັກຢາປ້ອງກັນພະຍາດຕາມເກນອາຍຸຄົບທຸກເຂັມ ເມື່ອອາຍຸເຕັມໜຶ່ງປີ.
ໃນໄລຍະປີ 2007 ຫາ ປີ 2017, ອັດຕາການປົກຄຸມຂອງການສັກຢາວັກຊີນກັນພະຍາດໝາກເແດງເຂັມທີ່ໜຶ່ງເພີ່ມຂຶ້ນຈາກ 40% ມາເປັນ 82%, ອີງຕາມຂໍ້ມູນການສັກຢາກັນພະຍາດທີ່ລາຍງານຕາມປົກກະຕິ; ແລະ ການສັກຢາວັກຊີນກັນພະຍາດຄໍຕີບ, ໄອໄກ່ ແລະ ບາດທະຍັກ ເຂັມທີ່ສາມ ເພີ່ມຂຶ້ນຈາກ 50% ເປັນ 85%. ແຕ່ໃນມໍ່ໆມານີ້ ການບັນລຸອັດຕາການປົກຄຸມຂອງການສັກຢາກັນພະຍາດ ແມ່ນມີຄວາມລໍາບາກ, ແລະ ຍິ່ງໄປກວ່ານັ້ນມັນເປັນສິ່ງທ້າທາຍຫຼາຍທີ່ບໍ່ພຽງແຕ່ຕ້ອງບັນລຸເປົ້າໝາຍການປົກຄຸມເທົ່ານັ້ນ ແຕ່ຍັງຕ້ອງຮັກສາລະດັບໃຫ້ໄດ້ຕາມເປົ້າໝາຍສະຫະສະຫວັດແຫ່ງຊາດອີກດ້ວຍ.
ວິທີແກ້ໄຂ
ແຜນງານສຸຂະພາບ ແລະ ໂພຊະນາການຂອງອົງການຢູນິເຊັບ ເຮັດວຽກຢູ່ໃນລະດັບຊາດ ແລະ ທ້ອງຖິ່ນເພື່ອຮັບປະກັນໃຫ້ການບໍລິການມີປະສິດທິຜົນສູງສຸດ ເພື່ອການຢູ່ລອດຂອງເດັກ ຖືກລວມເຂົ້າໃນນະໂຍບາຍ ແລະ ແຜນງົບປະມານແຫ່ງຊາດ ແລະ ເຂົ້າເຖິງເດັກ ແລະ ຄອບຄົວທັງໝົດ, ໂດຍສະເພາະແມ່ນຜູ້ທີ່ມີຄວາມສ່ຽງ ແລະ ດ້ອຍໂອກາດທີ່ສຸດ.
ຢູ່ ສປປ ລາວ, ອົງການຢູນິເຊັບ ສະໜັບສະໜູນ ລັດຖະບານລາວ ໃນການຮັບປະກັນວ່າເດັກທຸກໆຄົນ ສາມາດເຂົ້າເຖິງການບໍລິການສັກຢາກັນພະຍາດທີ່ມີປະສິດທິພາບ, ປອດໄພ ແລະ ຍືນຍົງ. ອົງການ ຢູນິເຊັບ ສະໜັບສະໜູນຈຸດປະສົງແຫ່ງຊາດໃນການຮັກສາສະຖານະພາບປອດໂປລີໂອ, ລຶບລ້າງພະຍາດໝາກແດງ ແລະ ບາດທະຍັກໃນແມ່ ແລະ ເດັກ.
ອົງການຢູນິເຊັບ ຍັງສະໜັບສະໜູນ ກະຊວງສາທາລະນະສຸກແຫ່ງ ສປປ ລາວ ໃນການສ້າງຄວາມເຂັ້ມແຂງໃຫ້ແກ່ລະບົບສາທາລະນະສຸກ ເພື່ອໃຫ້ສາມາດບໍລິການດ້ານສຸຂະພາບບາງຢ່າງທີ່ມີປະສິດທິຜົນສູງ ແລະ ຈໍາເປັນຕໍ່ການຢູ່ລອດ ແລະ ການພັດທະນາຂອງເດັກ ລວມທັງການບໍລິການໃນຊຸມຊົນ ແລະ ໃນສະຖານທີ່ສາທາລະນະສຸກເຊັ່ນ: ການດູແລເດັກເກີດໃໝ່, ການເລີ່ມໃຫ້ລູກດູດນົມແມ່ທັນທີຫຼັງເກີດ ແລະ ການລ້ຽງລູກດ້ວຍນົມແມ່ພຽງຢ່າງດຽວ, ການສັກຢາກັນພະຍາດ, ການສະໜອງ ORS / ທາດສັງກະສີ ສຳລັບການປິ່ນປົວພະຍາດຖອກທ້ອງ, ການເສີມວິຕາມິນ ອາ ແລະ ຢາຂ້າແມ່ທ້ອງ ໃຫ້ແກ່ເດັກອາຍຸຕໍ່າກວ່າ 5 ປີ.
ສປປ ລາວ ມີເປົ້າໝາຍທີ່ຈະບັນລຸການປົກຄຸມສຸຂະພາບທົ່ວປວງຊົນປີ 2020, ເຊິ່ງເປັນເປົ້າໝາຍທີ່ຕັ້ງໄວ້ໃນຍຸດທະສາດເພື່ອການພັດທະນາ ແລະ ລຶບລ້າງຄວາມທຸກຍາກແຫ່ງຊາດ, ແຜນພັດທະນາຂະແໜງສາທາລະນະສຸກແຫ່ງຊາດ ຄັ້ງທີ 7 ປີ 2011-2015 ແລະ ຍຸດທະສາດການປະຕິຮູບສາທາລະນະສຸກ ແລະ ແຜນການປະຕິບັດງານປີ 2013-2020.