شباب الأردن يطالبون بحقوقهم

من التغير المناخي إلى العنف، الشباب يطالبون بحل أهم القضايا التي تواجههم

Claire McKeever
21 تشرين الثاني / نوفمبر 2019
UNICEF-Freedom

تمهيدا لليوم العالمي للطفل وللاحتفال بمرور 30 عامًا على اتفاقية حقوق الطفل، قام فريق يونيسف الأردن بالسفر من الشمال إلى الجنوب للاستماع إلى الشباب والقضايا الأكثر تأثيرًا على حياتهم ولسماع حلولهم.


شارك في الاستشارات 250 شاب وشابة، هذه كانت مطالبهم - بكلماتهم الخاصة:

 

التغير المناخي

احنا صدى صوت الاطفال اللي بيطالبو بالتغيير.

احنا الصدى اللي استغرب من واحد طول عمره اعطاه اكله وشربه وبيته وحتى زينله حياته بالورد والشجر.

وفجأة بلش بالصيف يحرق شجره وينشف ميته وبالشتا بيخرب محصوله و يغرق بيته.

كل الاشجار اللي قطعناها والانهر اللي وسخناها والهواء اللي لوثناه ... قكركم ما رح ندفع ضريبتها؟

كل العالم صار واعي بالمشاكل يلي سببها تغير المناخ سواء احتباس حراري، شح مياه،  تلوث بيئي، ذوبان ثلوج وثقب اوزون وغيرها كتيير... احنا موجودين علي هاي الارض يلي صبرت ولسا بتصبر ورح تصبر، بس لمتى؟

اطفال اليوم واطفال بكرا والاجيال الجاية كيف رح يعيشو وين رح يعيشوعلى اي ارض؟

احنا صدى صوت الارواح اللي خسرناها والي رح نخسرها لو ما بلشنا بإيدينا التغيير.

لازم نوقف اليوم وهلا ونبدا بالتغير

هالارض والحياة بطلوا امور مفروغ منها، العالم صحي ونحنا صحينا، انتو وين؟  ما تخذلونا وما تخذلو ارضنا

اعطونا حقنا انو نعييش على هالارض.. لانه

على هذه الارض مايستحق الحياة


 

التعليم

احنا صدى صوت الاطفال اللي بيطالبو بالتغيير.

احنا صدى صوت الاطفال اللي مش على مقاعد الدراسة، الاطفال الي عم يقرأو ويكتبو بس مش عارفين يعيشو هالحياة

يا جماعة والله  التعليم مش بس ضرب وجمع وكتابة وقراءة

طب ونحنا مين يعلمنا المهارات الي منحتاجها بحياتنا؟

التعليم الجيد هو اسس و مبادئ ومهارات وتربية صحية تأهلنا لنتعامل مع العالم الخارجي ومواقف الحياة

احنا صدى صوت الاطفال الي مآمنين انو التربية قبل التعليم، الي مآمنين ان التعليم هو نهج اجتماعي، ولازم نبلش نفكر بالعصر المتسارع الي نحنا عايشين فيه، كيف ممكن التعليم يكون مواكب لاحتياجات هالعصر؟ نحنا بدنا التعليم الي بيساعدنا

نصقل شخصيتنا ونقوي ثقتنا بحالنا، نعرف حقوقنا ونقدرامكانياتنا وكمان نقوم بواجباتنا.

التعليم لازم يركز على اطلاق قدراتنا، لازم يبني ويطور مهاراتنا لنقدر نكفي هالدرب

بدك تصلح مجتمع ابدأ بتعليمه، ماهو اذا نحنا جيا المستقبل شو رايكم تبلشو تستثمروا فينا هلا ماهو مش خسارة فينا، ووعد العائد تبعنا رح يكون كبير..


 

الحماية

احنا صدى صوت الاطفال اللي بيطالبو بالتغيير.

احنا صوت اطفال اتعرضت للعنف من اقرب الناس الهم، اتعرضو للاساءة من واحد المفروض هو اللي يوعيهم، اتعرضو للتنمر من زملائهم وجيرانهم اللي المفروض هم يكونوا عزوتهم

احنا صدى صوت الاطفال اللي ما بدهم غير يعيشو بامان

أمان.....

امان يعني بيت يؤيهم بالحب، يعني مدرسة تحتويهم بطُمَأْنينة ، يعني صاحب يواسيهم، يعني حارة وشارع آمن يلعبو ويمشوا فيه 

والاهم، أمن نفسي يعزز ثقتهم بحالهم و يدعمهم ليتغلبو على همومهم ومشاكلهم

كل انسان بداخله قائد وهو قائد حياته وكل طفل رح يكون قائد حياته بالمستقبل، ورح يغيير، خلينا نحارب مشاكل العنف والتنمر والتحرش من جذورها ونكسر دورة العنف الي بمجتمعنا. يعني شو بصير لو فرضتو عقوبات صارمة؟ وما تهاونتو باي

حالة من حالات العنف ببلدنا.

مش احنا الي لازم نوقف هون لنحكيلكم احمونا من العنف، انتو الي لازم تطلعوا هون وتحكولنا كيف رح تحمونا. هاي مسؤوليتكم، حكومة، مجتمع، اهل، كلنا لازم نحكي لا للعنف، بيكفي – طفح الكيل! 


 

الصحة

احنا صدى صوت الاطفال اللي بيطالبو بالتغيير.

يلي محتاجين رعاية صحية, اكم من طفل فقد الحياة لعدم قدرته يوصل لسرير بمستشفى او لعلاج يشفيه.

طب والصحة النفسية، حدا سال عنها؟

اطفال اليوم عقولهم عم تتحفز بمختلف ادوات التكنولوجيا، بس محرومين من اساسيات الطفولة الصحية، اطفالنا عم بيفوتو بحالات عاطفية صعبة من كابة، محاولات انتحار، انطواء، وسلوكيات خاطئة.

إذا بدنا يكونوا أطفالنا سعداء وصحيين، لازم نصحى ونرجع للأساسيات، لازم  نوفر للأطفال أسلوب حياة متوازن للشي الي بيحتاجه الأطفال مش بس الي هم بدهم اياه.

اذا اطفال اليوم بدهم يكبروا لازم يعيشوا حياة صحية, لازم يقدروا يوصلوا للرعاية اللازمة وهالرعاية بطلت بس مستشفى ودوا، هالرعاية هية نفسية بقدر ماهي جسدية.


 

التمكين 

احنا صدى صوت الاطفال اللي بيطالبو بالتغيير.

نحن صدى صوت الأطفال يلي هم شباب المستقبل

يلي عنا طموحات وأحلام كبيرة

يلي عنا قدرات كبيرة ومهارات مميزة وابداع ما الو حدود

اسمعونا، اعطونا دور، اعطونا مجال ... اصلا نحن جيل الحلول، جيل الابتكار والافكار بس خلولنا مجال نحكي، نشارك، نغير

خلونا نمسك زمام الامور معكم، رح نعطيكم افكار وحلول جديدة، خلونا ظل للحكومة، ظل للانظمة، ظل للسياسات، ظل للمؤسسات

احنا الاغلبية بالمجتمع و اساس البلد

ومافيكم تعملو اشي النا بدونا، لأنه نحن جيل التغيير


 

العدالة والمساواة

احنا صدى صوت الاطفال اللي بيطالبو بالتغيير.

احنا صدى صوت الاطفال المنسيين

الأطفال الي عاشو تحت وطأة النزاعات، الأطفال ذوي الإعاقة، المنفصلين عن أهلهم، والأطفال المنتمين إلى مجتمعات مهمشة، الأطفال الي ضحوا بدراستهم وودعو كتبهم ليشتغلوا ويعينوا عائلاتهم. 

عم تسمعوهم عم تشوفوهم نحنا صدى صوتهم الي عم بينادي.

الاطفال هم اطفال بدون اي مسميات

والهم الحق يعيشوا على ارض العدل والسلام

نحنا بدنا نزرع بين نبضات قلوبهم الصغيرة أمل، انه مع كل التحديات، رح نوقف جنبهم لنبني المستقبل العادل الي بيتساوى فيه كل البشر

لكل هالاطفال وبدون استثناء سلاحنا بايدنا ... ألا وهو السلام ....والسلام عليكم ورحمة الله