“របបអាហាររបស់កុមារគ្មានភាពប្រសើរឡើងនោះទេ នៅទស្សវត្សរ៍ចុងក្រោយនេះ ហើយនឹងអាចកាន់តែដុនដាប ថែមទៀតនៅក្នុងបរិបទជំងឺកូវីដ-១៩”

រាជធានីភ្នំពេញ ថ្ងៃទី ២២ ខែកញ្ញា ឆ្នាំ ២០២១៖ “កុមារអាយុក្រោម ២ឆ្នាំ មិនបានទទួលរបបអាហារ ឬសារធាតុចិញ្ចឹមដែលពួកគេត្រូវការជាចាំបាច់ដើម្បីអភិវឌ្ឍ និងរីកលូតលាស់បានល្អនោះឡើយ ដែលអាចបង្កអន្តរាយដែលមិនអាចស្រោចស្រង់បានដល់ការអភិវឌ្ឍរបស់ពួកគេ” នេះបើតាមរបាយការណ៍ថ្មីមួយដែលចេញផ្សាយដោយយូនីសេហ្វសកលនៅថ្ងៃនេះ។ 

របាយការណ៍មួយដែលមានចំណងជើងថា៖ “ចិញ្ចឹមឱ្យបរាជ័យឬ? វិបត្តិនៃរបបអាហាររបស់កុមារក្នុងអំឡុងពេលដំបូងនៃជីវិត” ត្រូវបានចេញផ្សាយនៅមុនពេល កិច្ចប្រជុំកំពូលរបស់អង្គការសហប្រជាជាតិស្តីពីប្រព័ន្ធស្បៀង នៅសប្តាហ៍នេះ។ របាយការណ៍នេះបានព្រមានថា ការកើនឡើងនូវភាពក្រីក្រ វិសមភាព ជម្លោះ គ្រោះមហន្តរាយដោយសារអាកាសធាតុ និងស្ថានភាពអាសន្នផ្នែកសុខភាព ដូចជាការឆ្លងរាតត្បាតជាសកលនៃជំងឺកូវីដ-១៩ កំពុងរួមចំណែកធ្វើឱ្យមានវិបត្តិអាហារូបត្ថម្ភចំពោះមនុស្សវ័យក្មេង​បំផុតលើពិភពលោក ដែលនៅតែបន្តអូសបន្លាយពេលជាយូរ និងបង្ហាញពីភាពល្អប្រសើរតិចតួចបំផុតក្នុងអំឡុងពេល ១០ឆ្នាំ ចុងក្រោយនេះ។ 

លោកស្រី ហិនរីតា ហ្វ័រ (Henrietta Fore) នាយិកាប្រតិបត្តិអង្គការយូនីសេហ្វ បានមានប្រសាសន៍ថា៖  “របកគំហើញនៃរបាយការណ៍នេះ ស្តែងចេញយ៉ាងច្បាស់ថាក្នុងអំឡុងពេលដ៏សំខាន់បំផុតនៃជីវិត កុមារជាច្រើនលាននាក់ត្រូវបានចិញ្ចឹមឲ្យបរាជ័យ។” លោកស្រីបានមានប្រសាសន៍បន្ថែមទៀតថា “ការស្រូបយកសារធាតុចិញ្ចឹមមិនបានល្អនៅក្នុងរយៈពេល ២ ឆ្នាំ ដំបូងនៃជីវិតធ្វើឱ្យអន្តរាយដោយមិនអាចស្រោចស្រង់បានដល់រាងកាយ និងខួរក្បាលដែលកំពុងលូតលាស់យ៉ាងឆាប់រហ័សរបស់កុមារ លើសពីនេះទៀតបញ្ហានេះក៏អាចបង្កផលប៉ះពាល់ដល់ការសិក្សារៀនសូត្រ សមត្ថភាពធ្វើការងារ លទ្ធភាពប្រកបមុខរបរ និងអនាគតទាំងស្រុងរបស់ពួកគេ។ ខណៈដែលយើងបានដឹងនូវបញ្ហានេះជាច្រើនឆ្នាំមកហើយក្តី ប៉ុន្តែយើងសង្កេតឃើញថាមានការយកចិត្តទុកដាក់តិចតួចណាស់ក្នុងការផ្តល់នូវប្រភេទអាហារដែលមានសារជាតិចិញ្ចឹមត្រឹមត្រូវ និងមានសុវត្ថិភាពដល់កុមារ។ ជាងនេះទៅទៀតផលរំខានដែលបង្កដោយជំងឺកូវីដ-១៩ ដែលកំពុងអូសបន្លាយនាពេលបច្ចុប្បន្ន អាចធ្វើឱ្យស្ថានភាពអាហារូបត្ថម្ភរបស់កុមារកាន់តែដុនដាបថែមទៀត។ 

ក្នុងការវិភាគដែលធ្វើឡើងក្នុងប្រទេសចំនួន ៩១ របាយការណ៍នេះបានរកឃើញថាពាក់កណ្តាលនៃកុមារអាយុចាប់ពី ៦ ទៅ ២៣ ខែប៉ុណ្ណោះ ដែលបានទទួលនូវរបបអាហារក្នុងកម្រិតអប្បបរមាស្របតាមការណែនាំក្នុងមួយថ្ងៃៗ ខណៈដែលកុមារមួយភាគបីប៉ុណ្ណោះដែលបានទទួលនូវក្រុមអាហារក្នុងកម្រិតអប្បបរមាដើម្បីប្រឹងប្រែងនឹងលូតលាស់។ ចំពោះប្រទេសកម្ពុជា យោងទៅតាមរបាយការណ៍សកល មានតែ ៤០%នៃកុមារដែលមានអាយុ ៦ ទៅ ២៣​ខែប៉ុណ្ណោះដែលបានទទួលក្រុមអាហារក្នុងកម្រិតអប្បបរមា​ ប៉ុន្តែជិត ២ ភាគ ៣ នៃកុមារទាំងនេះមកពីក្រុមដែលស្ថិតនៅបញ្ចភាគខាងលើគេ។ ការវិភាគបន្ថែមទៀតលើប្រទេសចំនួន ៥០ ដែលមានទិន្នន័យនិន្នាការទាំងនេះ បង្ហាញឱ្យឃើញថាទម្លាប់ផ្តល់អាហារពុំបានល្អ ដូចលើកឡើងខាងលើ បានបន្តកើតឡើងពេញមួយទសវត្សរ៍ចុងក្រោយនេះ។

ខណៈដែលជំងឺកូវីដ-១៩ កំពុងបន្តធ្វើឱ្យរអាក់រអួលដល់សេវាសំខាន់ៗ និងរុញច្រានប្រជាពលរដ្ឋជាច្រើនគ្រួសារបន្ថែមទៀតឱ្យធ្លាក់ចូលទៅក្នុងភាពក្រីក្រ របាយការណ៍សកលនេះបានរកឃើញថា ការឆ្លងរាតត្បាតនៃជំងឺនេះកំពុងតែបង្កផលប៉ះពាល់ដល់របៀបផ្តល់អាហារដល់កូនៗរបស់គ្រួសារទាំងនោះ។ ក្នុងចំណោមឧទាហរណ៍នៃបណ្តាប្រទេសជាច្រើន ការអង្កេតស្រាវជ្រាវមួយនៅកម្ពុជា¹ ដែលបានធ្វើឡើងដោយយូនីសេហ្វ កម្មវិធីស្បៀងអាហារពិភពលោក និងដៃគូផ្សេងទៀត ចាប់ពីខែសីហា ឆ្នាំ២០២០ ដល់ខែកក្កដា ឆ្នាំ២០២១ បានរកឃើញថា ចំនួន៤០-៥០% នៃគ្រួសារទាំងនោះមានបញ្ហាចំណូលថយចុះ ដែលនាំឱ្យពួកគេត្រូវប្រើប្រាស់យុទ្ធសាស្ត្រទប់ទល់កាន់តែច្រើនជាងមុនជុំវិញការបរិភោគអាហារ ដែលបង្កផលប៉ះពាល់ដល់គុណភាពនៃរបបអាហាររបស់ពួកគេ។ ទិន្នន័យពីខែកក្កដា ឆ្នាំ ២០២១​ បានបង្ហាញថាមានកុមារអាយុក្រោម ៥ ឆ្នំា ត្រឹមតែ ៣៥% ប៉ុណ្ណោះដែលបានញ៉ាំអាហារក្នុងកម្រិតដែលអាចទទួលយកបានជាអប្បបរមា។  

កុមារអាយុក្រោម ២ ឆ្នាំ គឺជាក្រុមដែលងាយរងគ្រោះបំផុត ដោយសារបញ្ហាអាហារូបត្ថម្ភគ្រប់ទម្រង់ដូចជា ក្រិសក្រិន ស្គម​ស្គាំង និងការខ្វះមីក្រូសារជាតិជាដើម ​(លើសទម្ងន់ និងធាត់ជ្រុល)  ដែលកើតឡើងដោយសាររបបអាហារមិនសមស្រប ព្រោះថាកុមារនៅក្នុងវ័យនេះត្រូវការសារជាតិចិញ្ចឹមសំខាន់ចំាបាច់ ក្នុងមួយគីឡូក្រាម​នៃទម្ងន់របស់ពួកគេ ច្រើនជាងមនុស្សនៅវ័យផ្សេងទៀត។ ការយល់ដឹងនៅមានកម្រិតអំពីបញ្ហាអាហារូបត្ថម្ភ និងការផ្សព្វផ្សាយយ៉ាងគំហុកនៃផលិតផលជំនួសទឹកដោះម្តាយជាកត្តារួមចំណែកធ្វើឱ្យរបបអាហារសម្រាប់កុមារមានកម្រិតទាប និងធ្វើឱ្យថមថយនូវការបំបៅកូនដោយទឹកដោះម្តាយ។ ការកាត់បន្ថយប្រាក់ឈ្នួលនាពេលថ្មីៗនេះ ធ្វើឱ្យបញ្ហាដែលកំពុងមានស្រាប់ទៅហើយ រឹតតែធ្ងន់ធ្ងរបន្ថែមទៀត។

នៅក្នុងសកលលោកទាំងមូល យូនីសេហ្វប៉ាន់ប្រមាណថា ជាងពាក់កណ្តាលនៃកុមារអាយុក្រោម ៥​ ឆ្នាំ ដែលស្គមស្គាំងពោលគឺប្រមាណ ២៣ លាននាក់  អាយុក្រោម ២ ឆ្នាំ។ ប្រេវ៉ាឡង់នៃភាពក្រិសក្រិនកើនឡើងយ៉ាងឆាប់រហ័សលើកុមារដែលមានអាយុចន្លោះពី ៦ ខែ ទៅ ២ ឆ្នាំ នៅពេលដែលរបបអាហាររបស់កុមារពុំបានតាមទាន់តម្រូវការអាហារូបត្ថម្ភ ដើម្បីបម្រើដល់ការលូតលាស់របស់ពួកគេ។  នៅកម្ពុជាកុមារម្នាក់ក្នុងចំណោម ៣ នាក់ ក្រិសក្រិន និង ម្នាក់ក្នុងចំណោម ១០ នាក់ ស្គមស្គាំង។

យោងតាមរបាយកាណ៍សកលកុមារអាយុ ៦-២៣​ ខែ ដែលរស់នៅតំបន់ជនបទ ឬមកពីគ្រួសារដែលមានជីវភាពក្រីក្រ ច្រើនតែទទួលបានរបបអាហារពុំសមស្រប បើធៀបនឹងកុមារក្នុងក្រុមអាយុនេះដែលរស់នៅទីប្រជុំជន ឬមកពីគ្រួសារដែលមានជីវភាពធូរធារជាង។ សមាមាត្រនៃកុមារដែលទទួលបានអាហារទៅតាមចំនួនក្រុមអប្បបរមាដូចដែលត្រូវបានផ្តល់ជា​អនុសាសន៍ នៅទីប្រជុំជន (៣៩ ភាគរយ) មានកម្រិតខ្ពស់ជាងនៅតំបន់ជនបទ (២៣ ភាគរយ) ពីរដង។

លោកស្រី  ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា បានមានប្រសាសន៍ថា “តាងនាមឱ្យទីភ្នាក់ងារសហប្រជាជាតិនានាដែលកំពុងធ្វើការយ៉ាងជិតស្និទ្ធជាមួយនឹងរាជរដ្ឋាភិបាលកម្ពុជា យើងសូមវាយតម្លៃខ្ពស់ដល់សកម្មភាពពង្រីកការអនុវត្តកម្មវិធីឧបត្ថម្ភសាច់ប្រាក់ ដើម្បីកាត់បន្ថយទុក្ខលំបាកជាពិសេសលើវិស័យគាំពារមាតា និងអាហារូបត្ថម្ភរបស់កុមារ។ នាពេលបច្ចុប្បន្ននេះ យើងត្រូវតែវិនិយោគដើម្បីបន្តផ្តល់ការគាំទ្រដល់រយៈពេល ១០០០ ថ្ងៃដំបូងរបស់ទារក ដែលជារយៈពេលដ៏សំខាន់បំផុតនៃជីវិតរបស់ពួកគេ។ ការវិនិយោគទាំងនេះក៏រួមចំណែកបង្កើនកម្រិតការអប់រំ និងផលិតភាពរបស់កុមារម្នាក់ៗសម្រាប់អនាគតនៃជីវិតរបស់ពួកគេផងដែរ។ ឥឡូវនេះគឺជាពេលសំខាន់ជាងពេលណាៗទំាងអស់ ដែលចាំបាច់ត្រូវបង្កើនថវិកាជាតិសម្រាប់ពង្រីកវិសាលភាពនៃកម្មវិធីអាហារូបត្ថម្ភ។ តាមរយៈការសហការជាមួយនឹងដៃគូបច្ចុប្បន្នរបស់យើង យើងនឹងគាំទ្រដល់ការពន្លឿនអនុវត្តផែនការជាតិបច្ចុប្បន្ន ដូចជាយុទ្ធសាស្ត្រជាតិស្តីពីសន្តិសុខស្បៀងនិងអាហារូបត្ថម្ភលើកទី ២ គោលនយោបាយ​ និងផែនការសកម្មភាពជាតិស្តីពីការគាំពារ និងអភិវឌ្ឍន៍កុមារតូច ផែនទីបង្ហាញផ្លូវស្តីពី GAP និងផែនទីបង្ហាញផ្លូវដែលត្រូវបានរៀបចំឡើងកាលពីពេលថ្មីៗនេះ ដើម្បីដាក់ជូនកិច្ចប្រជុំកំពូលស្តីពីប្រព័ន្ធស្បៀង។”

ដើម្បីផ្តល់របបអាហារដែលសំបូរសារធាតុចិញ្ចឹម មានសុវត្ថិភាព និងមានតម្លៃសមរម្យ ដល់កុមារគ្រប់រូប         របាយការណ៍សកលនេះបានអំពាវនាវឱ្យរដ្ឋាភិបាល អ្នកផ្តល់ជំនួយ អង្គការសង្គមស៊ីវិល និងតួអង្គក្នុងវិស័យអភិវឌ្ឍន៍នានាពួតដៃគ្នា ដើម្បីធ្វើការផ្លាស់ប្តូរប្រព័ន្ធស្បៀង ប្រព័ន្ធសុខាភិបាល ព្រមទាំងប្រព័ន្ធគាំពារសង្គម តាមរយៈការដឹកនាំការអនុវត្តសកម្មភាពសំខាន់ៗដូចជា៖

• បង្កើនជម្រើស និងធ្វើឱ្យអាហារដែលសំបូរសារធាតុចិញ្ចឹមមានតម្លៃសមរម្យ ដូចជា បន្លែ ​ផ្លែឈើ ស៊ុត ត្រី សាច់ និងអាហារដែលមានមីក្រូសារជាតិ ដោយផ្តល់ការលើកទឹកចិត្តដល់ផលិតកម្ម ការចែកចាយ និងការលក់រាយនូវអាហារទាំងនេះ។
• បង្កើនតម្រូវការអាហារដែលសំបូរសារធាតុចិញ្ចឹម និងមានសុវត្ថិភាព តាមរយៈការប្រើប្រាស់បណ្តាញអប់រំផ្សព្វផ្សាយចម្រុះ ដើម្បីបញ្ជូនសារសំខាន់ៗដល់ឪពុកមា្តយ និងកុមារ ដោយប្រើប្រាស់ភាសាច្បាស់លាស់ និងងាយស្រួលយល់។
• អនុវត្តស្តង់ដារ និងនីតិកម្មថ្នាក់ជាតិ ដើម្បីការពារកុមារពីអាហារ និងភេសជ្ជៈកែច្នៃធម្មតា និងកែច្នៃដោយក្រុមហ៊ុនធំៗ ដែលអាចបង្កគ្រោះថ្នាក់ដល់សុខភាព និងត្រូវបញ្ចប់ការផ្សាយពាណិជ្ជកម្មដែលអាចបង្កគ្រោះថ្នាក់ចំពោះកុមារ និងគ្រួសារ ជាពិសេសតាមរយៈការបង្កើនការអនុវត្តច្បាប់គ្រប់គ្រងការផ្សាយពាណិជ្ជកម្មយ៉ាងគំហុកអំពីផលិតផលជំនួសទឹកដោះម្តាយ​។

របាយការណ៍នេះអំពាវនាវឱ្យរដ្ឋាភិបាល វិស័យឯកជន សង្គមស៊ីវិល ដៃគូអភិវឌ្ឍន៍ និងដៃគូមនុស្សធម៌ ព្រមទាំងគ្រួសារ ពួតដៃគ្នា ធ្វើការផ្លាស់ប្តូរប្រព័ន្ធស្បៀង និងផ្តល់នូវរបបអាហារដែលសំបូរសារធាតុចិញ្ចឹម មានសុវត្ថិភាព និងមានតម្លៃសមរម្យដល់កុមារគ្រប់រូប។ របបអាហារចម្រុះផ្តល់លទ្ធភាពឱ្យកុមារធំលូតលាស់ អភិវឌ្ឍន៍ និងរៀនសូត្របានល្អប្រសើរ ដើម្បីសម្រេចសក្តានុពលរបស់ពួកគេឱ្យបានពេញលេញ។ កិច្ចប្រជុំកំពូលស្តីពីប្រព័ន្ធស្បៀងរបស់អង្គការសហប្រជាជាតិដែលនឹងរៀបចំនាពេលខាងមុខនេះគឺជាកាលានុវត្តភាពមួយដ៏សំខាន់ ដើម្បីរៀបចំប្រព័ន្ធស្បៀងសកលលោក ដែលអាចឆ្លើយតបទៅនឹងតម្រូវការរបស់កុមារគ្រប់រូប។

¹ការសិក្សាផលប៉ះពាល់សេដ្ឋកិច្ចសង្គមដោយសារជំងឺកូវីដ-១៩ ជំហានទី ១ (ខែសីហា ឆ្នាំ ២០០២- ខែមីនា ឆ្នាំ២០២១) ដោយ UNICEF, WFP, UNFPA, UNAIDS, UN Women និងជំហានទី២ (ខែកក្កដា ឆ្នាំ២០២១ តទៅ) ដោយ UNICEF, WFP, ADB

###

កំណត់សម្គាល់សម្រាប់និពន្ធនាយក

ទិន្នន័យបរិមាណស្តីពីស្ថានភាពបច្ចុប្បន្ន និន្នាការ និងអសមធម៌នៃរបបអាហាររបស់កុមារតូច ដែលត្រូវបានបង្ហាញនៅក្នុងរបាយការណ៍នេះ ត្រូវបានដកស្រង់ចេញពីប្រព័ន្ធទិន្នន័យសកលរបស់យូនីសេហ្វ ដែលបញ្ចូលតែទិន្នន័យ ដែលអាចឱ្យគេយកមកធ្វើការប្រៀបធៀបជាអន្តរជាតិ និងទិន្នន័យដែលមានសារៈសំខាន់ផ្នែកស្ថិតិតែប៉ុណ្ណោះ។ ប្រព័ន្ធទិន្នន័យសកលរបស់យូនីសេហ្វ មានទិន្នន័យបានពីការអង្កេតតំណាងថ្នាក់ជាតិចំនួន ៦០៧ ដែលធ្វើឡើងនៅក្នុងប្រទេស និងដែនដី​ចំនួន ១៣៥ ដែលតំណាងឱ្យកុមារជាង ៩០% ក្នុងចំណោមកុមារទំាងអស់ ដែលមានអាយុក្រោម ២ ឆ្នាំ នៅ       ទូទាំងសកលលោក។ ទិន្នន័យសម្រាប់ប្រទេសកម្ពុជានៅក្នុង​សេចក្តីប្រកាសព័ត៌មាន ត្រូវបានដកស្រង់ពីរបាយការណ៍សកល ឬពីការសិក្សាលើផលប៉ះពាល់សង្គម និងសេដ្ឋកិច្ច ដែលធ្វើឡើងដោយយូនីសេហ្វកម្ពុជា កម្មវិធីស្បៀងអាហារពិភពលោក ដោយមានការគាំទ្រពីធនាគារអភិវឌ្ឍន៍អាស៊ី។ ទិន្នន័យរបស់ប្រទេសកម្ពុជានៅក្នុងរបាយការណ៍សកលនេះ មានប្រភពពីទិន្នន័យថ្មីចុងក្រោយដែលដាក់ឲ្យប្រើប្រាស់នៅឆ្នាំ ២០២០​ និងពីទិន្នន័យរបស់ការអង្កេតប្រជាសាស្ត្រ និងសុខភាព ក្នុងឆ្នាំ ២០១៤។

អំពីកិច្ចប្រជុំកំពូលអង្គការសហប្រជាជាតិស្តីពីប្រព័ន្ធស្បៀង ឆ្នាំ២០២១

កិច្ចប្រជុំកំពូលអង្គការសហប្រជាជាតិស្តីពីប្រព័ន្ធស្បៀង ត្រូវបានប្រកាសដោយអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូតេរ៉ែស នៅក្នុងទិវាស្បៀងពិភពលោក កាលពីខែតុលា ឆ្នាំ២០២០ ជាផ្នែកមួយនៃយុទ្ធនាការទស្សវត្សរ៍នៃសកម្មភាពដើម្បីសម្រេចនូវគោលដៅអភិវឌ្ឍន៍សហសវត្សរ៍ ២០៣០។ គោលដៅនៃកិច្ចប្រជុំកំពូលនេះ គឺដើម្បីធ្វើឱ្យមានភាពរីកចម្រើននូវការអភិវឌ្ឍន៍សហសវត្សរ៍ទាំង ១៧ នៃគោលដៅអភិវឌ្ឍន៍សហសវត្សរ៍ តាមរយៈអភិក្រមវិធីសាស្ត្រប្រព័ន្ធស្បៀង តាមរយៈការទាញប្រយោជន៍ពីភាពប្រទាក់ក្រឡា​គ្នានៃប្រព័ន្ធស្បៀង ជាមួយនឹងបញ្ហាប្រឈមសកលនានា ដូចជាភាពអត់ឃ្លាន ការប្រែប្រួលអាកាសធាតុ ភាពក្រីក្រ និងវិសមភាព។ ព័ត៌មានបន្ថែមអំពីកិច្ចប្រជុំកំពូលរបស់អង្គការសហប្រជាជាតិស្តីពីប្រព័ន្ធស្បៀង អាចរកបាន តាមរយៈគេហទំព័រនេះ https://www.un.org/food-systems-summit

សូមទាញយករបាយការណ៍សកលអំពី​ “ចិញ្ចឹមឱ្យបរាជ័យឬ? វិបត្តិនៃរបបអាហាររបស់កុមារក្នុងអំឡុងពេលដំបូងនៃជីវិត” នៅទីនេះ។