យូនីសេហ្វ៖ ស្ថានភាពពិភពលោក កំពុងបង្កមហន្តរាយលើបញ្ហាខ្វះអាហារូបត្ថម្ភធ្ងន់ធ្ងរសម្រាប់កុមារ

ការឡើងតម្លៃស្បៀងអាហារ និងការកាត់បន្ថយថវិកាសម្រាប់ប្រយុទ្ធនឹងជំងឺរាតត្បាត នឹងបង្កើននូវករណីខ្វះអាហារូបត្ថម្ភធ្ងន់ធ្ងរ ស្របពេលដែលជំនួយនៃការព្យាបាលសង្រ្គោះជីវិត កំពុងធ្លាក់ចុះ

18 ឧសភា 2022
© UNICEF Cambodia/2021/Antoine Raab
UNICEF Cambodia/2021/Antoine Raab

ទីក្រុងញ៉ូវយ៉ក ថ្ងៃទី១៧ ខែឧសភា ឆ្នាំ២០២២ នៅថ្ងៃនេះយូនីសេហ្វបានព្រមាននៅក្នុង​សេចក្ដីប្រកាសបន្ទាន់របស់ខ្លួនថា ចំនួនកុមារដែលមានបញ្ហាស្គមស្គាំងធ្ងន់ធ្ងរ មានការកើនឡើងតាំងពីនៅមុនពេលមានសង្រ្គាមនៅប្រទេសអ៊ុយក្រែន ហើយសង្រ្គាមក៏បានកំពុងធ្វើឲ្យពិភពលោកធ្លាក់កាន់តែជ្រៅទៅក្នុងវិបត្តិស្បៀង​អាហារសកល ហើយស្ថានភាពនេះកាន់តែធ្ងន់ធ្ងរទៅៗ។

តាមរយៈការចេញផ្សាយនៅថ្ងៃនេះនូវរបាយការណ៍ដែលមានចំណងជើងថា ភាពស្គមស្គាំងធ្ងន់ធ្ងរ៖ គ្រោះអាសន្នលើការរស់រានមានជីវិតរបស់កុមារ ដែលត្រូវបានមើលរំលង បានបង្ហាញថា ថ្វីបើកម្រិតកាន់តែខ្ពស់នៃភាពស្គមស្គាំងធ្ងន់ធ្ងរលើកុមារ​ និងតម្លៃនៃការព្យាបាលសង្រ្គោះជីវិតមានការកើនទ្បើងក្ដី ការផ្ដល់ហិរញ្ញប្បទានជាសាកលនៅតែមិនបានឆ្លើយតប ដែលជានិន្នាការគួរឲ្យបារម្ភ គំរាមកំហែងដល់ជីវិតកុមាររាប់លាននាក់។  

បញ្ហាស្គមស្គាំងធ្ងន់ធ្ងរ ពោលគឺស្ថានភាពកុមារស្គមខ្លាំងពេក​បើធៀបនឹងកម្ពស់ខ្លួន ដែលបង្កឡើងដោយប្រព័ន្ធការពាររាងកាយខ្សោយ គឺជាទម្រង់នៃការខ្វះអាហារូបត្ថម្ភ​ចំពោះមុខ អាចមើលឃើញយ៉ាងច្បាស់ និងកំពុងគំរាមកំហែងដល់អាយុជីវិត។ ​នៅទូទាំងពិភពលោក កុមារអាយុក្រោមប្រាំឆ្នាំ យ៉ាងហោចណាស់ចំនួន ១៣,៦លាននាក់ មានបញ្ហាស្គមស្គាំងធ្ងន់ធ្ងរ ដែលបង្កឲ្យកុមារម្នាក់​ក្នុងចំណោម​កុមារ ៥នាក់នៅក្នុងក្រុមអាយុនេះ​បានបាត់បង់ជីវិត។

តំបន់អាស៊ីខាងត្បូងនៅតែបន្តជា “ចំណុចរាតត្បាត” នៃបញ្ហាស្គមស្គាំងធ្ងន់ធ្ងរ ជាកន្លែងដែលកុមារម្នាក់ក្នុងចំណោម ២២នាក់ មានបញ្ហាស្គមស្គាំងធ្ងន់ធ្ងរ​ ដែលចំនួននេះខ្ពស់ជាងបីដងបើធៀបនឹងអនុតំបន់សាហារ៉ាអាហ្រ្វិក។​ នៅប្រទេសកម្ពុជា កុមារ​ចំនួន ១០ភាគរយមានបញ្ហាស្គមស្គាំង។​ កុមារទាំងនោះច្រើនមកពីគ្រួសារដែលមានស្ថានភាពសេដ្ឋកិច្ចសង្គមងាយរងគ្រោះ។ ពួកគេពុំសូវទទួលបានទឹកស្អាត និងលក្ខខណ្ឌអនាម័យ​ប្រកបដោយសុវត្ថិភាព និងខ្វះការអនុវត្តល្អក្នុងការផ្ដល់អាហារ​ដល់ទារក និងកុមារតូច ​ គួបផ្សំជាមួយនឹងផលប៉ះពាល់ផ្នែកសេដ្ឋកិច្ចបច្ចុប្បន្នបង្កឡើងដោយ​ការរាតត្បាតជំងឺកូវីដ-១៩ ដែលកាន់តែបង្កហានិភ័យធ្ងន់ធ្ងរលើអសន្តិសុខស្បៀង និងការខ្វះអាហារូបត្ថម្ភសម្រាប់គ្រួសារងាយរងគ្រោះ។

រួមផ្សំនឹងវិបត្តិអាហារូបត្ថម្ភនេះ យ៉ាងហោចណាស់មានកុមារស្គមស្គាំងធ្ងន់ធ្ងរចំនួន ១០លាននាក់ ឬកុមារ ២នាក់ក្នុងចំណោម ៣នាក់ មិនមានលទ្ធភាពទទួលបាន​ការព្យាបាលភាពស្គមស្គាំងដែលមានប្រសិទ្ធភាពបំផុត ពោលគឺមិនបានទទួលអាហារព្យាបាលផលិតរួចស្រេច (RUTF) ឡើយ។​ យូនីសេហ្វព្រមានថា ការរួមបញ្ចូលគ្នានៃការប៉ះទង្គិចជាសកលចំពោះ​សន្តិសុខស្បៀងដោយសារ​សង្រ្គាមនៅប្រទេសអ៊ុយក្រែន និង​ការលំបាកផ្នែកសេដ្ឋកិច្ចជាមួយនឹងការស្តារទ្បើងវិញពីជំងឺរាតត្បាត និងគ្រោះរាំងស្ងួតជាប់ៗគ្នានៅក្នុងប្រទេសមួយចំនួនដោយសារបម្រែបម្រួលអាកាសធាតុ កំពុងបង្កើតលក្ខខណ្ឌនានាធ្វើឲ្យបញ្ហាស្គមស្គាំងធ្ងន់ធ្ងរ​កាន់តែកើនទ្បើងគួរឲ្យកត់សម្គាល់​នៅកម្រិតពិភពលោក។​

ទន្ទឹមនឹងនេះដែរ តម្លៃនៃអាហារព្យាបាលផលិតរួចស្រេច  ត្រូវបានព្យាករថានឹងកើនឡើងរហូតដល់ ១៦ភាគរយនៅក្នុងរយៈពេល៦ខែបន្ទាប់ ដោយសារការកើនឡើងយ៉ាងខ្លាំង​នៃតម្លៃគ្រឿងផ្សំជាវត្ថុធាតុដើម។​ ចំណែកឯតម្លៃនៃការដឹកជញ្ជូនក៏ត្រូវបានរំពឹងថា នឹងបន្តនៅមានកម្រិតខ្ពស់ផងដែរ។

របាយការណ៍នេះបន្តព្រមានទៀតថា ជំនួយសម្រាប់បញ្ហាស្គមស្គាំងនៅតែមានកម្រិតទាបយ៉ាងខ្លាំង ព្រមទាំងត្រូវបានព្យាករថានឹងធ្លាក់ចុះយ៉ាងខ្លាំងទៀតនៅឆ្នាំខាងមុខ ជាមួយនឹងក្ដីសង្ឃឹមតិចតួចនៃការស្ដារឡើងវិញទៅរកស្ថានភាពមុនមានជំងឺរាតត្បាត នៅមុនឆ្នាំ២០២៨។​ ជំនួយពិភពលោកដែលត្រូវបានចំណាយលើបញ្ហាស្គមស្គាំងមានចំនួនស្មើនឹងត្រឹម ​ ២,៨ភាគរយតែប៉ុណ្ណោះនៃ ODA​ (ជំនួយអភិវឌ្ឍន៍ផ្លូវការ) សរុប​សម្រាប់វិស័យសុខាភិបាល និង ០,២ភាគរយនៃការចំណាយ​ ODA​ សរុប។​

នៅកម្ពុជា មូលនិធិដើម្បីប្រយុទ្ធនឹងបញ្ហាស្គមស្គាំងធ្ងន់ធ្ងរ គឺមានចំនួនមិនគ្រប់គ្រាន់ទ្បើយដើម្បីឆ្លើយតបនឹងតម្រូវការកាន់តែកើនទ្បើង។  ផែនទីបង្ហាញផ្លូវជាតិសម្រាប់ឆ្លើយតបនឹងបញ្ហាស្គមស្គាំងរបស់កុមារ​ត្រូវបានកំណត់តម្លៃថាមានចំនួនសរុបស្មើនឹង ២៥លានដុល្លារ ដើម្បីឆ្លើយតបនឹងតម្រូវការនៃបញ្ហាខ្វះអាហារូបត្ថម្ភនៅក្នុងរយៈពេលបីឆ្នាំខាងមុខ។​ ទោះបីជាយ៉ាងណាក៏ក្ដី ៦៩% (១៧,២ដុល្លារ) នៃមូលនិធិត្រូវការសម្រាប់ការអនុវត្ថពេញលេញនូវផែនការសកម្មភាពនេះ គឺមិនទាន់មានថវិកាគ្រប់គ្រាន់នៅទ្បើយ។

នាយិកាយូនីសេហ្វប្រចាំប្រទេសកម្ពុជា លោកស្រី ហ្វ័រូហ្គ ហ្វយូហ្សិថ ​ បានលើកឡើងថា “អាហារូបត្ថម្ភ ដើរតួនាទីយ៉ាងសំខាន់នៅក្នុងការអភិវឌ្ឍវ័យកុមារតូច និងមានឥទ្ធិពលយ៉ាងសំខាន់លើសមត្ថភាពរបស់កុមារក្នុងការរស់រាន ចម្រើនពេញវ័យ រៀនសូត្រ និងរីកចម្រើន។ យូនីសេហ្វ​កំពុងធ្វើការងារជាមួយរាជរដ្ឋាភិបាលកម្ពុជា ដើម្បីចាត់អាទិភាពលើបញ្ហាស្គមស្គាំងនៅក្នុងគោលនយោបាយ និងថវិកាជាតិ ដើម្បីបិទភ្ជិតគម្លាតនេះ ជាពិសេស ដោយស្វែងរកមតិគាំទ្រឲ្យ​មានការផ្ដល់ហិរញ្ញប្បទានប្រកបដោយចីរភាព​ សម្រាប់ធានាឲ្យមានអាហារព្យាបាលផលិតរួចស្រេច (RUTF) ដើម្បីព្យាបាលបញ្ហាខ្វះអាហាររូបត្ថម្ភធ្ងន់ធ្ងរ​ក្នុងវ័យ​កុមារភាព។​ យើងក៏កំពុងគាំទ្ររាជរដ្ឋាភិបាលក្នុងការពង្រឹង​សកម្មភាពចុះដល់សហគមន៍ផងដែរ ដោយសារហេតុនេះ ករណីនៃបញ្ហាស្គមស្គាំងធ្ងន់ធ្ងរត្រូវបានកំណត់ឃើញតាំងពីដំបូង ហើយអ្នកថែទាំ​ដឹងអំពី​សេវាសុខភាព និងអាហារូបត្ថម្ភ​នៅក្នុងតំបន់របស់ពួកគេ នឹងចូលរួម​នៅក្នុងការប្រើប្រាស់សេវាទាំងនោះជាប្រចាំ សម្រាប់ការបង្ការបញ្ហាខ្វះអាហារូបត្ថម្ភ។

ដើម្បីឆ្លើយតបនឹងវិបត្តិសកលនេះ យូនីសេហ្វ សូមស្នើដល់រដ្ឋាភិបាល ដៃគូអភិវឌ្ឍន៍ និងអង្គការសង្គមស៊ីវិលនានានៅជុំវិញពិភពលោក ត្រូវចាត់អាទិភាពលើការផ្ដល់មូលនិធិបន្ទាន់ សម្រាប់អន្តរាគមន៍ផ្តល់អាហារព្យាបាល និងការព្យាបាល សម្រាប់កុមារមានបញ្ហាស្គមស្គាំង និងធានាឲ្យមាននូវមូលនិធិសម្រាប់តម្រូវការរយៈពេលវែងនៃកុមារដែលងាយរងគ្រោះបំផុត។

###

 

កំណត់សម្គាល់សម្រាប់និពន្ធនាយក

 

អំពីអាហារព្យាបាលផលិតរួចស្រេច (RUTF)

អាហារព្យាបាលផលិតរួចស្រេច(RUTF) គឺជាអាហារសារធាតុលីពីដសម្បូរទៅដោយថាមពល ល្បាយមីក្រូជីវជាតិ ដោយប្រើប្រាស់​សណ្ដែកដី ស្ករស ប្រេង និងម្សៅទឹកដោះគោរួមបញ្ចូលគ្នា ដែលត្រូវបាន​ខ្ចប់ទៅជាកញ្ចប់ៗ។ យូនីសេហ្វ ដែលជា​ស្ថាប័ននាំមុខសកលផ្នែកលទ្ធកម្ម RUTF បានទិញ និងចែកចាយ​ការផ្គត់ផ្គង់នេះចំនួនប្រមាណ ៧៥ ទៅ ៨០ភាគរយ​នៃការផ្គត់ផ្គង់សរុបនៅជុំវិញពិភពលោក​ ពីរោងចក្រចំនួនជាង ២០ ដែលមានទីតាំងនៅទូទាំងពិភពលោក។ ​

 

អំពី ODA

ជំនួយអភិវឌ្ឍន៍​ផ្លូវការ (ODA) គឺជាជំនួយដល់រដ្ឋាភិបាល ដែលលើកកម្ពស់ និងផ្ដោតគោលដៅជាក់លាក់​លើការអភិវឌ្ឍសេដ្ឋកិច្ច និង​សុខុមាលភាពរបស់ប្រទេសកំពុងអភិវឌ្ឍ។ គណៈកម្មាធិការ​ជំនួយអភិវឌ្ឍន៍ (DAC) នៃអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) បានអនុម័តODA ថាជាឧបករណ៍ចម្បង​នៃជំនួយបរទេស​នៅឆ្នាំ១៩៦៩ ហើយវានៅតែជា​ប្រភពចម្បងនៃ​ហិរញ្ញប្បទាន​សម្រាប់ជំនួយ​អភិវឌ្ឍន៍។ ទិន្នន័យ ODA ត្រូវបានប្រមូល ផ្ទៀងផ្ទាត់ និងផ្សព្វផ្សាយជាសាធារណៈ​ដោយ OECD

ទំនាក់ទំនងប្រព័ន្ធផ្សព្វផ្សាយ

Rudina Vojvoda
Chief of Communication
UNICEF Cambodia
ទូរស័ព្ទ: +85523260204;ext=434
អ៊ីម៉ែល: rvojvoda@unicef.org
លោក​ មាស ប៊ុនលី
មន្ត្រីជំនាញផ្នែកទំនាក់ទំនង
យូនីសេហ្វកម្ពុជា
ទូរស័ព្ទ: +85523260204;ext=435
អ៊ីម៉ែល: bmeas@unicef.org

អំពីយូនីសេហ្វ៖
យូនីសេហ្វកម្ពុជាធ្វើការងារ ដើម្បីលើកកម្ពស់ការអភិវឌ្ឍល្អប្រសើររបស់កុមារ ការពារសិទ្ធិរបស់ពួកគេ និងជួយឱ្យពួកគេសម្រេចសក្ដានុពលចាប់ពីវ័យកុមារតូច រហូតដល់វ័យក្មេងជំទង់។ សម្រាប់ព័ត៌មានបន្ថែមអំពីយូនីសេហ្វ និងការងារដែលយូនីសេហ្វធ្វើដើម្បីកុមារ សូមចូលមើលគេហទំព័រwww.unicef.org/cambodia/
សូមតាមព័ត៌មានអំពីយូនីសេហ្វ Twitter និង Facebook