យុវជនទាមទារបរិស្ថានចំណីអាហារល្អជាងមុនសម្រាប់សុខភាពនៅក្នុងតំបន់អាស៊ីបូព៌ា និងប៉ាស៊ីហ្វិក

ទីក្រុងបាងកក ថ្ងៃទី២៧ ខែកុម្ភៈ ឆ្នាំ២០២៣៖  ប្រព័ន្ធចំណីអាហារនៅតំបន់អាស៊ីបូព៌ា និងប៉ាស៊ីហ្វិក ដែលត្រូវបានគេស្គាល់ថាមានវប្បធម៌អាហារចម្រុះ និងរស់រវើកនោះ កំពុងតែមានការផ្លាស់ប្តូរយ៉ាងឆាប់រហ័ស។ របបអាហារស្រស់ដែលល្អសម្រាប់សុខភាពតាមប្រពៃណី កំពុងត្រូវបានជំនួសដោយការប្រើប្រាស់កាន់តែច្រើននូវអាហារកែច្នៃដែល 'អន់គុណភាព' និងភេសជ្ជៈដែលសម្បូណ៌ដោយជាតិស្ករ អំបិល និងខ្លាញ់មិនល្អចំពោះសុខភាព។

កុមារនៅក្នុងតំបន់នេះទាំងមូល កំពុងតែរស់នៅក្នុងបរិស្ថានអាហារដែលជំរុញការលក់ និងការបរិភោគអាហារ និងភេសជ្ជៈ 'អន់គុណភាព' ជាជាងអាហារដែលមានសុខភាពល្អ។ ជាផលវិបាក ក្មេងជំទង់លើសពីម្នាក់ក្នុងចំណោមបីនាក់ កំពុងតែទទួលទានភេសជ្ជៈដែលមានជាតិស្ករយ៉ាងតិចមួយប្រភេទក្នុងមួយថ្ងៃ ជាងពាក់កណ្តាលនៃក្មេងជំទង់ទាំងនេះទទួលទានអាហារចម្អិនរហ័សយ៉ាងតិចមួយដងក្នុងមួយសប្តាហ៍ ហើយតិចជាងពាក់កណ្តាលនៃពួកគេទទួលទានផ្លែឈើ និងបន្លែបានគ្រប់គ្រាន់ជារៀងរាល់ថ្ងៃ ។

លោកស្រី ដេបូរ៉ា កូមីនី នាយិកាប្រចាំតំបន់នៃយូនីសេហ្វនៃតំបន់អាស៊ីបូព៌ា និងប៉ាស៊ីហ្វិក បានមានប្រសាសន៍ថា “បច្ចុប្បន្ន កុមារ និងយុវវ័យត្រូវបានហ៊ុំព័ទ្ធដោយការផ្សព្វផ្សាយលក់អាហារអន់គុណភាពនៅគ្រប់ទីកន្លែងដែលពួកគេទៅ៖ នៅតាមអនឡាញ តាមផ្លូវទៅសាលារៀន នៅមហាវិទ្យាល័យ ឬសាកលវិទ្យាល័យ តាមទូរទស្សន៍ និងសូម្បីតែនៅខណៈពេលឈរក្នុងជួរពេលចេញពីហាងលក់ទំនិញគ្រឿងទេសផងដែរ។ ជាលទ្ធផល កុមារជាច្រើនលើសលប់នៅតំបន់អាស៊ីបូព៌ា និងប៉ាស៊ីហ្វិក ទទួលទានរបបអាហារដែលអន់គុណភាព និងមិនល្អចំពោះសុខភាព ដែលកំពុងបង្កផលប៉ះពាល់យ៉ាងធ្ងន់ធ្ងរលើសុខភាព និងសុខុមាលភាពរបស់ពួកគេ ។ វា​ដល់​ពេល​ហើយ​ដែល​យើងត្រូវ​ដោះស្រាយបញ្ហានេះ» ។

យូនីសេហ្វ បាននឹងកំពុងធ្វើការយ៉ាងជិតស្និទ្ធជាមួយរដ្ឋាភិបាល និងដៃគូនានា ដើម្បីដាក់ចេញគោលនយោបាយ និងច្បាប់ សំដៅបញ្ឈប់ការកើនឡើងនៃសកម្មភាពផ្សព្វផ្សាយលក់ចំណីអាហារ និងភេសជ្ជៈដែលមិនល្អចំពោះសុខភាព  ដូចជាការហាមឃាត់ការផ្សាយពាណិជ្ជកម្ម និងការលក់អាហារដែលមិនល្អចំពោះសុខភាពនៅក្នុង និងជុំវិញបរិវេណសាលារៀន ការដាក់ស្លាកសម្គាល់
អាហារូបត្ថម្ភនៅខាងមុខកញ្ចប់ឲ្យបានច្បាស់លាស់ និងការយកពន្ធលើភេសជ្ជៈដែលមានជាតិស្ករ និងវិធានការផ្សេងៗទៀត ។

ដើម្បីជំរុញឲ្យមានតម្រូវការចាំបាច់បន្ថែមទៀតសម្រាប់បរិស្ថានចំណីអាហារដែលល្អចំពោះសុខភាពជាងមុន យូនីសេហ្វ គាំទ្រយុទ្ធនាការ "កែលម្អអាហារខ្ញុំ" ដែលដឹកនាំដោយយុវវ័យដើម្បីលើកកម្ពស់ការយល់ដឹងអំពីភាពចាំបាច់ក្នុងការបង្កើតបរិស្ថានចំណីអាហារដែលកាន់តែល្អចំពោះសុខភាពនៅក្នុងប្រទេសចិន កម្ពុជា សហព័ន្ធរដ្ឋមីក្រូនេស៊ី ហ្វ៊ីជី ម៉ុងហ្គោលី កោះសូឡូម៉ុន ទីម័រខាងកើត និងវៀតណាម ។

យុវជន រួមជាមួយនឹងតារាល្បីៗ និងអ្នកមានឥទ្ធិពល មកពីប្រទេសទាំងប្រាំបីនេះ បានចូលរួមក្នុងសិក្ខាសាលាបង្កើតឡើងរួមគ្នាស្តីពី “កែលម្អអាហារខ្ញុំ” រយៈពេលពីរថ្ងៃនៅក្នុងទីក្រុងបាងកក - ដោយពិភាក្សាបំផុសគំនិត និងកំណត់អត្តសញ្ញាណដៃគូជាសក្តានុពលដើម្បីជួយរៀបចំយុទ្ធនាការនៅក្នុងប្រទេសរបស់ពួកគេរៀងៗខ្លួន ។

លោកស្រី រស់ រតនៈ ឬ Chef Nak មេចុងភៅស្រ្តីដំបូងបង្អស់របស់កម្ពុជា និងបវរកញ្ញាវៀតណាមប្រចាំឆ្នាំ ២០១៩ កញ្ញា Luong Thuy Linh ក៏បានចូលរួមក្នុងសិក្ខាសាលាបង្កើតឡើងរួមគ្នានេះ និងពិធីប្រកាសផ្សព្វផ្សាយនេះ ផងដែរ ។

ដោយចែករំលែកនូវគំនិតរបស់លោកស្រី ចុងភៅ រតនៈ បានលើកឡើងថា “ខ្ញុំជឿជាក់យ៉ាងមុតមាំក្នុងការថែរក្សា អភិវឌ្ឍ និងលើកកម្ពស់ម្ហូបខ្មែរបុរាណ ជាប្រពៃណីធ្វើម្ហូបដ៏អស្ចារ្យបំផុតមួយរបស់ពិភពលោក ។ អាហារគឺមានលើសពីអ្វីដែលយើងញ៉ាំ។ អាហារជាផ្នែកមួយដ៏សំខាន់នៃវប្បធម៌យើង គ្រួសារយើង និងសហគមន៍យើង ។ ខ្ញុំសប្បាយចិត្ត​ក្នុង​ការ​គាំទ្រ​យុវជនឆ្នើម​ទាំងនេះ ដើម្បី​ថែរក្សា ការពារ និង​ធានា​ថា​បរិស្ថានចំណី​អាហារ​​របស់យើងគឺ​សម្រាប់ទាំងអស់គ្នា និង​ផ្តល់​អត្ថប្រយោជន៍ដល់គ្រប់គ្នា​»​។

កញ្ញា Luong Thuy Linh បវរកញ្ញាពិភពលោកវៀតណាមប្រចាំឆ្នាំ២០១៩ បានបញ្ជាក់ថា “ខ្ញុំជឿជាក់យ៉ាងមុតមាំលើការទទួលទានអាហារដែលល្អចំពោះសុខភាព និងរបៀបរស់នៅដែលមានសុខភាពល្អ និងបានចូលរួមក្នុងយុទ្ធនាការនេះ ដោយសង្ឃឹមថា យើងទាំងអស់គ្នានឹងអាចផ្លាស់ប្តូរប្រព័ន្ធអាហារដែលមិនល្អរបស់យើងបាន។ យើងត្រូវតែធានាថា ប្រជាជន ជាពិសេសកុមារ និងយុវវ័យ មានឱកាស និងសិទ្ធិក្នុងការជ្រើសរើសចំណីអាហារដែលល្អចំពោះសុខភាព មិនថាពួកគេនៅទីណាឡើយ នៅផ្ទះ នៅក្នុងនិងជុំវិញសាលារៀន និងនៅក្នុងសហគមន៍របស់ពួកគេ» ។

ដោយមានយុវជនដឹកនាំយុទ្ធនាការ “កែលម្អអាហារខ្ញុំ” និងការគាំទ្រពីតារាល្បីៗ និងអ្នកមានឥទ្ធិពល យូនីសេហ្វ សង្ឃឹមថា នឹងបង្កើតការយល់ដឹងអំពីផលប៉ះពាល់នៃបរិស្ថានចំណីអាហារដែលកំពុងមានការផ្លាស់ប្តូរនៅក្នុងជីវិតរបស់ក្មេងស្រី និងក្មេងប្រុស និងតម្រូវការបន្ទាន់ដែលរដ្ឋាភិបាល វិស័យឯកជន និងសង្គម​ស៊ីវិល ត្រូវ​ចាត់​វិធានការ​រួមគ្នា​ដើម្បី​កសាង​បរិស្ថានចំណី​អាហារ​ដែលកាន់តែ​មាន​សុខភាព​ល្អ​ថែមទៀតនៅ​ទូទាំង​តំបន់នេះ ។

ថ្លែងនៅឯព្រឹត្តិការណ៍នេះ យុវជន រីកាដូ វ៉ាឡង់តេ អាយុ ២៤ ឆ្នាំ មកពីប្រទេសទីម័រខាងកើត បានលើកឡើងថា “យុទ្ធនាការនេះគឺខុសប្លែកគេ ដោយរៀបចំ និងដឹកនាំដោយពួកយើង ហើយនឹងត្រូវអនុវត្តដោយពួកយើងម្នាក់ៗ នៅពេលពួកយើងវិលត្រឡប់ទៅកាន់ប្រទេសយើងវិញ។ យើងមានក្តីរំភើបដោយបានចូលរួមនៅក្នុងកម្មវិធីនេះ ដើម្បីធ្វើឲ្យបរិស្ថានចំណីអាហារកាន់តែល្អចំពោះសុខភាព និងកាន់តែសម្បូណ៌បែបសម្រាប់កុមារគ្រប់រូប និងយុវវ័យគ្រប់រូបនៅក្នុងតំបន់អាស៊ីបូព៌ា និងប៉ាស៊ីហ្វិក” ។

ជាផ្នែកមួយនៃការងាររបស់យូនីសេហ្វ ដើម្បីកៀរគរ និងផ្តល់ភាពអង់អាចដល់យុវវ័យក្នុងការធ្វើសកម្មភាព គម្រោងនេះនឹងត្រូវបានអនុវត្តនៅក្នុងប្រទេសដែលចូលរួមចំនួនប្រាំបី ហើយនឹងត្រូវគាំទ្រដោយការិយាល័យប្រចាំប្រទេសរបស់យូនីសេហ្វ និងដៃគូ ។

សម្រាប់ព័ត៌មានលម្អិតបន្ថែម និងព័ត៌មានបច្ចុប្បន្នភាពស្តីពីគម្រោង “កែលម្អអាហារខ្ញុំ” សូមចូលមើលវេបសាយ៖ Fix My Food! | UNICEF East Asia and Pacific

###

កំណត់ចំណាំសម្រាប់និពន្ធនាយក៖  

អំពីមូលនិធិសហប្រជាជាតិដើម្បីកុមារ (យូនីសេហ្វ)
យូនីសេហ្វ បំពេញបេសកកម្មនៅតាមទីកន្លែងលំបាកៗបំផុត ដើម្បីផ្តល់ជំនួយទៅដល់កុមារដែលជួបប្រទះការលំបាកបំផុត ក្នុងពិភពលោក។ យើងធ្វើការនៅក្នុងដែនដី និងប្រទេសជាង ១៩០ សម្រាប់កុមារគ្រប់រូប គ្រប់ទីកន្លែង ដើម្បីកសាងពិភពលោក ដ៏ល្អប្រសើរសម្រាប់មនុស្សគ្រប់គ្នា។ សម្រាប់ព័ត៌មានបន្ថែមអំពីយូនីសេហ្វតំបន់អាស៊ីបូព៌ា និងប៉ាស៊ីហ្វិកសូមចូលទៅកាន់៖ www.unicef.org/eap

សូមតាមដានយូនីសេហ្វតំបន់អាស៊ីបូព៌ា និងប៉ាស៊ីហ្វិកតាមរយៈ Twitter  Facebook Instagram និង LinkedIn

សម្រាប់ព័ត៌មានបន្ថែម សូមទាក់ទង៖

លោកស្រី មូមីតា ដាស្ទីដារ ទឹប្រឹក្សាផ្នែកទំនាក់ទំនង យូនីសេហ្វតំបន់អាស៊ីបូព៌ា និងប៉ាស៊ីហ្វិក

ទូរសព្ទ៖ +៦៦(០) ៩៧៣១០៣៧៧៩ ឬសារអេទ្បិកត្រូនិក mdastidar@unicef.org​  

លោកស្រី ហ្ស៊ីម៉ា អ៊ីស្លាម ប្រធានស្តីទីផ្នែកទំនាក់ទំនង យូនីសេហ្វតំបន់អាស៊ីបូព៌ា និងប៉ាស៊ីហ្វិក
ទូរសព្ទ៖ +៦៦(០) ២៣៥៦៩៤០៧ ឬសារអេទ្បិកត្រូនិក ssislam@unicef.org