យន្តការកូវ៉ាក់បន្តបញ្ជូនវ៉ាក់សាំងកូវីដ-១៩ មកប្រទេសកម្ពុជា

រាជធានីភ្នំពេញ ថ្ងៃទី១៥ ខែវិច្ឆិកា ឆ្នាំ២០២១៖ វ៉ាក់សាំងកូវីដ-១៩ ចំនួន ៣២៤.០០០ ដូសបន្ថែមទៀតបានមកដល់កម្ពុជានៅថ្ងៃនេះ ដែលផ្តល់ដោយយន្តការកូវ៉ាក់។ យន្តការកូវ៉ាក់ គឺជាសម្ព័ន្ធភាពសកល​ក្រោមកិច្ចដឹកនាំរបស់ សម្ព័ន្ធសកលសម្រាប់វ៉ាក់សាំង និងថ្នាំបង្ការ (GAVI) សម្ព័ន្ធនវានុវត្តន៍ដើម្បីត្រៀមទប់ទល់នឹងការរាតត្បាតនៃជំងឺ (CEPI) អង្គការសុខភាពពិភពលោក រួមជាមួយនឹងយូនីសេហ្វ ដែលដៃគូដឹកជញ្ជូនចែកចាយដ៏សំខាន់។ ក្នុងនាមជាអ្នកទិញវ៉ាក់សាំងធំជាងគេតែមួយគត់នៅក្នុងពិភពលោក យូនីសេហ្វគឺជាស្ថាប័នធ្វើលទ្ធកម្ម និងផ្គត់ផ្គង់ឈានមុខគេសម្រាប់យន្តការកូវ៉ាក់។

មកដល់ពេលនេះ មានមនុស្សពេញវ័យអាយុចាប់ពី១៨ឆ្នាំទ្បើងច្រើនជាង ៩,៦ លាននាក់ (គឺស្មើនឹង ៩៧% នៃប្រជាពលរដ្ឋគោលដៅក្នុងក្រុមនេះ) បានចាក់វ៉ាក់សាំងពេញលេញ។ ប្រទេសកម្ពុជានៅតែជាប្រទេសមួយក្នុងចំណោមប្រទេសនាំមុខគេនៅក្នុងពិភពលោកចំពោះការផ្តល់វ៉ាក់សាំងជូនពលរដ្ឋខ្លួន។
អត្រាការផ្តល់វ៉ាក់សាំងរបស់ព្រះរាជាណាចក្រកម្ពុជា គឺត្រូវបានពង្រឹងបន្ថែមដោយយុទ្ធនាការចាក់ដូសជំរុញរបស់រាជរដ្ឋាភិបាល ដែលបានចាប់ផ្តើមកាលពីថ្ងៃទី១១ ខែតុលា ហើយបានពង្រឹងបន្ថែមនូវប្រព័ន្ធការពារខ្លួនរបស់ប្រជាពលរដ្ឋច្រើនជាង២លានមកទល់ពេលបច្ចុប្បន្ននេះ។

ការផ្តល់នូវជំនួយវ៉ាក់សាំង AstraZeneca នៅថ្ងៃនេះតាមរយៈយន្តការកូវ៉ាក់ គឺស្ថិតក្នុងចំណោមការផ្តល់ជាបន្តបន្ទាប់កន្លងមករបស់យន្តការកូវ៉ាក់មកកាន់កម្ពុជា ហើយមកទល់ពេលនេះ ចំនួនវ៉ាក់សាំងដែលបានដឹកជញ្ជូនមកដល់កម្ពុជាតាមរយៈយន្តការកូវ៉ាក់គឺមានចំនួនសរុប ២,៨៤០,៤០០ ដូស។

ស្របពេលដែលកំពុងគាំទ្រកម្មវិធីផ្តល់វ៉ាក់សាំងកូវីដ-១៩ យូនីសេហ្វបន្ត​គាំទ្រកម្មវិធីផ្ដល់ថ្នាំបង្ការ​របស់រាជរដ្ឋាភិបាល​កម្ពុជា តាមរយៈ​ការរៀបចំផែនការ និងការរៀបចំយុទ្ធសាស្រ្ត ការគ្រប់គ្រងវ៉ាក់សាំង និងបរិក្ខារប្រព័ន្ធត្រជាក់ ការបង្កើតតម្រូវការថ្នាំបង្ការ ការកសាងសមត្ថភាព និងការប្រាស្រ័យទាក់ទង
ហានិភ័យ និងការចូលរួមរបស់សហគមន៍ ដោយផ្តោតលើពលរដ្ឋងាយរងគ្រោះបំផុត។