ប្រទេសកម្ពុជានឹងវាយតម្លៃការសិក្សាសិស្សានុសិស្ស ដើម្បីពង្រឹងកិច្ចខិតខំប្រឹងប្រែងស្តារទ្បើងវិញក្រោយជំងឺរាតត្បាតកូវីដ

រាជធានីភ្នំពេញ ថ្ងៃទី០១ ខែកញ្ញា ឆ្នាំ២០២២៖ នៅក្នុងខែមិថុនាឆ្នាំនេះ ក្រសួងអប់រំ យុវជន និងកីឡា (MoEYS) បានចូលរួមនៅក្នុងកម្មវិធីវាយតម្លៃសិស្សអន្តរជាតិ (PISA) ដែល​ជាជំហាន​ដ៏សំខាន់​​ឆ្ពោះ​ទៅរកការ​ស្វែង​​យល់អំពីលទ្ធផលសិក្សារបស់សិស្សានុសិស្ស ដោយពិនិត្យមើលយ៉ាងយកចិត្តទុកដាក់លើ​ចំណេះដឹង​​ដែល​អ្នក​សិក្សា​បានចេះដឹង ដោយវាស់វែងទៅលើការ​ត្រៀមខ្លួនរបស់យុវជនកម្ពុជាសម្រាប់ពេលអនាគត និងដោយតម្រង់ទិសកិច្ចខិតខំប្រឹងប្រែងស្ដារឡើងវិញក្រោយជំងឺរាតត្បាតកូវីដ-១៩ ។ លទ្ធផលទាំងនេះត្រូវបានរំពឹងទុកថានឹងទទួលបាននៅដើមឆ្នាំ២០២៣ ។

ដោយបានដាក់ឱ្យដំណើរការដោយអង្គការសហប្រតិបត្តិការសេដ្ឋកិច្ច​និងអភិវឌ្ឍន៍ (OECD)  កម្មវិធីវាយតម្លៃ PISA ធ្វើតេស្តិ៍សមត្ថភាពសិស្សានុសិស្សដែលមានអាយុ១៥ឆ្នាំ ទៅលើការប្រើប្រាស់នូវជំនាញ និងចំណេះដឹងរបស់ពួកគេលើអំណាន គណិតវិទ្យា និងវិទ្យាសាស្ត្រ សម្រាប់យកមកប្រើប្រាស់ដើម្បីជំនះរាល់បញ្ហាប្រឈមនានាក្នុងជីវិតពិតរបស់ខ្លួន។ លទ្ធផលទាំងនេះនឹងត្រូវផ្សព្វផ្សាយដោយអង្គការ OECD សម្រាប់ប្រទេសទាំងអស់ដែលបានចូលរួមនៅក្នុងកម្មវិធីវាយតម្លៃ PISA នេះ។ ចាប់តាំងពីការចាប់ផ្ដើមនៅក្នុងឆ្នាំ២០០០មក កម្មវិធី PISA បានក្លាយជាស្តង់ដារសាកលនៅក្នុងការវាយតម្លៃលើសមិទ្ធផល និងវឌ្ឍនភាពរបស់សាលា ហើយបាននឹងកំពុងដើរតួនាទីយ៉ាងសំខាន់នៅក្នុងការផ្លាស់ប្ដូរគោលនយោ​បាយ ពីការផ្តោតការយកចិត្តទុកដាក់លើធាតុចូលអប់រំ ទៅលើការយកចិត្តទុកដាក់ចំពោះលទ្ធផលសិក្សាវិញ នៅក្នុង​សម្រេចចិត្តរបស់រដ្ឋាភិបាល និងការរៀបចំគោលនយោបាយ។

នេះគឺជាលើកដំបូងហើយ ដែលប្រទេសកម្ពុជាបានចូលរួមនៅក្នុងកម្មវិធីនេះ។ គំនិតផ្ដួចផ្ដើមនេះត្រូវបានដឹកនាំ និងផ្ដល់ថិវកាមួយផ្នែកដោយក្រសួងអប់រំ យុវជន និងកីឡា ជាមួយនឹងវិភាគទានហិរញ្ញវត្ថុបន្ថែមពីមូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំ (CDPF) គាំទ្រដោយប្រទេសមួយចំនួន  រួមមានសហភាពអឺរ៉ុប (EU) ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត (SIDA) ភាពជាដៃគូជាសកលសម្រាប់ការអប់រំ (GPE) និងមូលនិធិសហប្រជាជាតិដើម្បីកុមារ  (UNICEF) ផងដែរ ។

ទិន្នន័យរបស់កម្មវិធី PISA នឹងគាំទ្រក្រសួងអប់រំ យុវជន និងកីឡា ក្នុងការកំណត់គោលដៅអន្តរាគមន៍ និងកំណត់អំពីវិធីសាស្ត្រល្អបំផុតសម្រាប់ផ្ដល់ការអប់រំប្រកបដោយគុណភាពដល់សិស្សានុសិស្សទាំងអស់ ក៏​ដូច​ជាជួយដល់ពួកគេក្នុងការស្ដារឡើងវិញពីការបាត់បង់ការសិក្សាបង្កដោយជំងឺឆ្លងរាតត្បាតនេះ ។ ការវិភាគនាពេលថ្មីៗនេះលើការវាយតម្លៃលទ្ធផលសិក្សាថ្នាក់ជាតិសិស្សថ្នាក់ទី៦ ដែលក៏ត្រូវបានគាំទ្រដោយមូលនិធិ CDPF ដែរនោះ បានរកឃើញយ៉ាងច្បាស់នូវការបាត់បង់ការសិក្សាយ៉ាងធ្ងន់ធ្ងររបស់សិស្សានុសិស្ស ដោយសារតែការបិទសាលារៀនបណ្ដាលមកពីជំងឺកូវីដ-១៩ ។ ការស្វែងយល់អំពីកម្រិតសិក្សាបច្ចុប្បន្នរបស់កុមារ ពិតជាអាចជួយដល់អ្នកពាក់ព័ន្ធក្នុងវិស័យអប់រំ អាចវាស់វែងបាននូវវឌ្ឍនភាពទៅតាមកាលវេលា ប៉ុន្តែចំណុចសំខាន់ជាងនេះទៀតនោះ គឺវាបានផ្ដល់នូវទិន្នន័យផ្អែកលើភស្ដុតាង សម្រាប់អ្នកធ្វើសេចក្ដីសម្រេចចិត្ត ដើម្បីគាំទ្រកាន់តែប្រសើរដល់សាលារៀន គ្រូបង្រៀន និងសិស្សានុសិស្ស នៅក្នុងការផ្តល់នូវទិសដៅ និងបង្ហាញនូវមាគ៌ាស្ដារការសិក្សាឡើងវិញ ហើយជាលទ្ធផលគឺសំដៅទៅរកការបង្រៀន និងការរៀនសូត្រនាពេលអនាគតដ៏មានគុណភាពប្រសើរជាងមុន។

ដៃគូរបស់មូលនិធិ CDPF កំពុងគាំទ្រក្រសួងអប់រំ យុវជន និងកីឡា លើគ្រប់ទិដ្ឋភាពនៃការស្ដារការសិក្សាឡើងវិញ ដោយចាប់ផ្ដើមពីការគាំទ្រផ្ទាល់ដល់កុមារ បង្កលទ្ធភាពឱ្យពួកគេអាចចូលរៀនទ្បើងវិញ និងបន្តរៀននៅក្នុងសាលា។ កម្មវិធីមូលដ្ឋានគ្រឹះសិក្សា “អំណានថ្នាក់ដំបូង” និង “គណិតវិទ្យាថ្នាក់ដំបូង” បាននឹងកំពុងអនុវត្តនៅក្នុងខេត្តចំនួន១២ ដែលជាជំហានដ៏សំខាន់មួយឆ្ពោះទៅរកការជួយកុមារកម្ពុជាបង្កើននូវជំនាញអំណាន និងជំនាញគិតលេខរបស់ពួកគេ ហើយតាមរយៈការផ្អែកលើជំនាញកម្រិតដំបូងទាំងនេះ នោះពួកគេនឹងអាចសិក្សាបន្តទៅមុខទៀតបាន ។

ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា
“កម្ពុជាមានសេចក្ដីសោមនស្សរីករាយ ដែលបានចូលរួមក្នុងក្របខ័ណ្ឌវាយតម្លៃជាសាកលនេះ។ យើងរំពឹងទុកនូវការយល់ដឹងកាន់តែប្រសើរអំពីកម្រិតការសិក្សារបស់សិស្សានុសិស្ស ព្រោះវាមានសារៈសំខាន់ណាស់ ដើម្បីធានាថាអន្តរាគមន៍នានារបស់យើងនឹងធ្វើឡើងចំគោលដៅយ៉ាងត្រឹមត្រូវ។ ក្រសួងអប់រំ យុវជន និងកីឡា កំពុងវិនិយោគជាច្រើនលើការសិក្សារបស់សិស្សនៅថ្នាក់ដំបូង លើកកម្ពស់ជំនាញគ្រូបង្រៀន និងការអប់រំតាម
ឌីជីថល ដែលការវិនិយោគទាំងអស់នេះនឹងជួយយើងឱ្យជំនះបញ្ហាប្រឈមនានាចំពោះការសិក្សាដែលបង្កឡើងដោយការបិទសាលារៀនដោយសារជំងឺកូវីដ-១៩ ។”

លោកជំទាវ ខាម៉ិន ម៉ូរ៉េណូ ឯកអគ្គរដ្ឋទូតសហភាពអឺរ៉ុបប្រចាំកម្ពុជាបានមានប្រសាសន៍ថា  “ទិន្នន័យ និងការស្រាវជ្រាវប្រកបដោយគុណភាព គឺមានសារសំខាន់ណាស់សម្រាប់ការរៀបចំគោលនយោបាយល្អ ។ យើងពិតជាអាចដោះស្រាយបញ្ហាបាន នៅពេលយើងអាចកំណត់ដឹងពីបញ្ហាទាំងនោះបានច្បាស់លាស់។ ទិន្នន័យជាពិសេសការស្រាវជ្រាវដែលអាចប្រៀបធៀបគ្នាបានជាមួយប្រទេសផ្សេងៗ អាចជួយយើងនៅក្នុងការស្វែងយល់អំពីបញ្ហានានាកាន់តែប្រសើរឡើង។ ដើម្បីធានាថាថវិកាសាធារណៈត្រូវបានចំណាយចំគោលដៅកាន់តែប្រសើរ យើងត្រូវវាយតម្លៃលើអន្តរាគមន៍ និងគោលនយោបាយ ថាពិតជាសម្រេចបាននូវលទ្ធផលដែលយើងបានរំពឹងទុកដែរឬយ៉ាងណា ។ ជាថ្មីម្ដងទៀត ទិន្នន័យ និងភស្ដុតាងទាំងនេះធ្វើឱ្យយើងមានភាពខ្លាំង ហើយវាជួយយើងនៅក្នុងការសម្រេចចិត្តថាតើដំណោះស្រាយដែលបានស្នើឡើងនោះ អាចប្រព្រឹត្តទៅតាមទិសដៅត្រឹមត្រូវឬទេ។ ដូច្នេះមានន័យថាយើងបានចំណាយត្រឹមត្រូវ សម្រាប់លទ្ធផលដែលយើងចង់បាន។ សហភាពអឺរ៉ុប (EU) មានមោទនភាពនៅក្នុងការធ្វើជាដៃគូជាមួយកម្ពុជានៅក្នុងការរៀបចំគោលនយោបាយផ្អែកលើភ័ស្ដុតាងនេះ”។ ​

លោកស្រី រីបេខា ប្លេក នាយិកាបេសកកម្មស្ដីទីរបស់ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ​(USAID) ប្រចាំកម្ពុជាបានមានប្រសាសន៍ថា “ខ្ញុំមានសេចក្ដីសប្បាយរីករាយនៅក្នុងការតាមដានវឌ្ឍនភាពយ៉ាងទៀងទាត់នៃកំណែទម្រង់ប្រព័ន្ធអប់រំកម្ពុជាចាប់តាំងពីឆ្នាំ២០១៣មក។ កម្មវិធីវាយតម្លៃ PISA ពិតជាបំពេញបន្ថែមឱ្យការវាយតម្លៃអំណានថ្នាក់ដំបូងយ៉ាងប្រសើរ ដែល USAID បាននឹងកំពុងអនុវត្តការវាយតម្លៃនេះជាមួយនឹងអ្នកជំនាញកម្ពុជា ដើម្បីពិនិត្យមើលការសិក្សារបស់សិស្សានុសិស្សនៅថ្នាក់បឋមសិក្សា ។ យើងខ្ញុំមានមោទនភាពដែលបានធ្វើជាដៃគូ នៅក្នុងគំនិតផ្ដួចផ្ដើមដ៏សំខាន់នេះ នៅក្នុងការប្រមូល និងប្រើប្រាស់ទិន្នន័យដោយតម្លាភាព នៅក្នុងវិស័យ​អប់រំ ។”

លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំ​កម្ពុជាបានមានប្រសាសន៍ថា “យើងបានឃើញផល ប៉ះពាល់ធ្ងន់ធ្ងរបង្កដោយជំងឺកូវីដ-១៩ ដែល​ធ្វើឱ្យមានវិសមភាពកាន់តែខ្លាំងឡើងនៅទូទាំងសកលលោក។ ការវិនិយោគលើការអប់រំ ជាពិសេសការ​ចាត់​វិធានការសមស្រប និងបន្ទាន់ ដើម្បីឆ្លើយតបនឹងការបាត់បង់ ការសិក្សាធ្ងន់ធ្ងររបស់កុមារ ដោយ​សារ​​ការ​រិតត្បឹត​នានាបណ្ដាលមកពីជំងឺកូវីដ គឺមានសារៈសំខាន់ណាស់ ដើម្បីទប់ស្កាត់ និងស្តារ​ស្ថានភាពឱ្យប្រសើរទ្បើងវិញ​នេះ។ ការទទួលបានដោយសមធម៌នូវការអប់រំប្រកបដោយ គុណភាពមានតួនាទីដ៏សំខាន់​នៅ​ក្នុងការ​ពង្រឹងធនធានមនុស្សនៅក្នុងប្រទេសកម្ពុជា និងធានាថាកុមារគ្រប់រូប អាចទទួលបាន​ចំណេះដឹង ជំនាញ និងសមត្ថភាពមូលដ្ឋាន ដែលពួកគេត្រូវការ ដើម្បីត្រាយផ្លូវសម្រាប់អនាគត របស់ខ្លួននាអនាគតខាង​មុខ ។”

សាវតា៖
មូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំ(CDPF)៖
មូលនិធិភាពជាដៃគូសម្រាប់អភិវឌ្ឍន៍សមត្ថភាពវិស័យអប់រំ  (CDPF) គឺជាភាពជាដៃគូ​រវាង​ក្រសួងអប់រំ យុវជន និងកីឡានៅកម្ពុជា (MoEYS) និងសហភាពអឺរ៉ុប (EU) ទីភ្នាក់ងារស៊ុយអែតសម្រាប់​អភិវឌ្ឍន៍​អន្តរជាតិ (SIDA) ទីភ្នាក់ងារសហរដ្ឋអាមេរិក​សម្រាប់អភិវឌ្ឍន៍អន្តរជាតិ (USAID) ភាពជាដៃគូសកលសម្រាប់ការអប់រំ (GPE) និង​យូនីសេហ្វ។ តាមរយៈ​យន្តការផ្ដល់មូលនិធិរួម CDPF ផ្ដល់ការគាំទ្រ​ក្នុងការអនុវត្ត​អាទិភាព
អភិវឌ្ឍន៍​សមត្ថភាព​នៅក្នុងវិស័យអប់រំ។ CDPF ​បាន​ឈានចូលដល់ដំណាក់កាលទីបីរបស់ខ្លួន​នៅឆ្នាំ២០១៨ ដែលនឹងបន្តរហូតដល់​ខែមិថុនា ឆ្នាំ២០២៣ ដោយគាំទ្រ​ដល់​គំនិត​ផ្ដួចផ្ដើមកសាងសមត្ថភាព​នៅក្នុងវិស័យអប់រំ​ជាមួយនឹងមូលនិធិចំនួន​ប្រមាណ៣៧លានដុល្លារអាមេរិក។ ដំណាក់កាលថ្មីនេះ​ពង្រឹងបន្ថែមលើ​ភាពជោគជ័យ​នៃដំណាក់កាលចំនួនពីរដំបូង ដែលត្រូវបានអនុវត្ត​ចាប់តាំងពីឆ្នាំ២០១១ ដោយមានមូលនិធិសរុបចំនួន ២៤លានដុល្លារអាមេរិក។

សម្រាប់ព័ត៌មានបន្ថែម សូមទាក់ទង៖

• ឯកឧត្តមបណ្ឌិត រស់ សុវាចា អ្នកនាំពាក្យក្រសួងអប់រំ យុវជន និងកីទ្បា
  ទូរសព្ទ៖ +៨៥៥ ៧៨ ៧៥៥ ៥៥៦ ឬសារអេទ្បិកត្រូនិក៖ soveacha2002@yahoo.com​​
• អ្នកស្រី រូឌីណា វ៉ូវ៉ូដា ប្រធានផ្នែកទំនាក់ទំនង យូនីសេហ្វ
  ទូរសព្ទ៖ (+៨៥៥) ៩២​ ៥៥៥​ ២៩៤ ឬ សារអេឡិកត្រូនិក៖ rvojvoda@unicef.org​
• លោក មាស ប៊ុនលី មន្រ្តីជំនាញផ្នែកទំនាក់ទំនង យូនីសេហ្វ
  ទូរសព្ទ៖ +៨៥៥ ១២ ៧៣៣ ៩០៩  ឬសារអេទ្បិកត្រូនិក៖ bmeas@unicef.org