ទូបង្កករក្សាវ៉ាក់សាំង ដែលជាអំណោយរបស់ប្រទេសអូស្រ្តាលី ធ្វើឲ្យកម្ពុជាបន្តឈានមុខក្នុងកិច្ចខិតខំប្រឹងផ្ដល់វ៉ាក់សាំងបង្ការជំងឺកូវីដ

រាជធានីភ្នំពេញ ថ្ងៃ២៨ ខែកុម្ភៈ៖ ទូបង្កក​ត្រជាក់ខ្លាំងចំនួន ៣៣គ្រឿង (សីតុណ្ហភាព -៨០អង្សាសេ) ដែល​​ជាឧបករណ៍ចាំបាច់ ដើម្បីពង្រឹងសមត្ថភាពបរិក្ខារប្រព័ន្ធត្រជាក់របស់កម្ពុជា ត្រូវបាន​ផ្ដល់ជូន​ឃ្លាំងឱសថកណ្តាលរបស់ក្រសួងសុខាភិបាល​នៅរាជធានីភ្នំពេញ។ ទូបង្កកត្រជាក់ខ្លាំង ​ដែលជាអំណោយ​របស់រាជរដ្ឋាភិបាល​​អូស្រ្តាលី និងត្រូវផ្ដល់ជូន​ក្នុងភាពជាដៃគូជាមួយយូនីសេហ្វ បានទទួលស្វាគមន៍​ពីសំណាក់​​​ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ឯកឧត្តម Pablo Kang ឯកអគ្គរាជទូត​អូស្រ្តាលី​ប្រចាំកម្ពុជា និងលោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា។

ទូបង្កកទាំងនេះ ​នឹងត្រូវប្រើប្រាស់សម្រាប់គាំទ្រដល់ការផ្តល់វ៉ាក់សាំងប្រកបដោយសមធម៌របស់រាជ​រដ្ឋាភិបាលកម្ពុជា ចំពោះវ៉ាក់សាំងប្រភេទ Pfizer-BioNTech ដែលបានផ្ដល់ដោយប្រទេសអូស្រ្តាលី នាពេលកន្លងទៅថ្មីៗនេះ។ ទូបង្កកទាំងនេះ​ត្រូវបាន​ផ្ដល់​រួមជាមួយនឹង​ទូបង្កករក្សាវ៉ាក់សាំងចំនួន ១០០(សីតុណ្ហភាព -២០អង្សាសេ) គ្រឿងដទៃទៀត និង​បរិក្ខារប្រព័ន្ធត្រជាក់រក្សាវ៉ាក់សាំង​ដ៏ចាំបាច់ផ្សេងទៀត ដែលនឹងជួយពង្រឹង​ការគ្រប់គ្រងវ៉ាក់សាំង និង​ពង្រឹងសមត្ថភាពប្រព័ន្ធ​ត្រជាក់​នៅក្នុង​ប្រព័ន្ធថែទាំសុខភាពទាំងមូល។ ទូបង្កករក្សាវ៉ាក់សាំងចំនួន ១៣៣គ្រឿងនេះ គឺជាផ្នែកមួយនៃ​កញ្ចប់គាំទ្រចំនួន ៣៥,៧លានដុល្លារអូស្រ្តាលី ពីរាជរដ្ឋាភិបាលអូស្រ្តាលី ដែល​កំពុងត្រូវបានផ្ដល់​ក្នុងភាពជាដៃគូជាមួយយូនីសេហ្វ។ កញ្ចប់គាំទ្រនេះ​រួមមាន​វ៉ាក់សាំងប្រភេទ Pfizer-BioNTech ចំនួន ២,៣៥លានដូស ដែលត្រូវបានផ្ដល់ជូនព្រះរាជាណាចក្រកម្ពុជា កាលពីខែ​ធ្នូ កន្លងមកនេះ។

ឯកអគ្គរាជទូតអូស្រ្តាលី ឯកឧត្តម Pablo Kang បានមានប្រសាសន៍ថា៖ “ជាងមួយឆ្នាំកន្លងមក រាជរដ្ឋាភិបាល​កម្ពុជា និងដៃគូបានចាប់ផ្ដើមអនុវត្តនូវកម្មវិធីផ្ដល់វ៉ាក់សាំង ប្រកបដោយភាព​ជោគជ័យយ៉ាងខ្លាំង។ កម្មវិធីនេះបានគ្របដណ្ដប់ទៅដល់​ប្រជាពលរដ្ឋពេញវ័យ​ស្ទើរតែទាំងអស់ ហើយ​ជាងពាក់កណ្ដាលនៃ​ពួកគេក៏បានទទួលបានវ៉ាក់សាំង​ដូសជំរុញដ៏សំខាន់ផងដែរ។” ឯកឧត្តម បានបន្ថែមទៀតថា “​ដូសជំរុញទាំងនេះ គឺជាផ្នែកយ៉ាងសំខាន់​នៃ​កិច្ចខិតខំផ្ដល់វ៉ាក់សាំងជាសាកល ដើម្បីកាត់បន្ថយ​ការធ្លាក់ខ្លួនឈឺធ្ងន់ធ្ងរ និងការស្លាប់ពី​ជំងឺកូវីដ-១៩។ ខ្ញុំសូមលើកទឹកចិត្ត​ប្រជាពលរដ្ឋកម្ពុជា​ ដែលមានសិទ្ធិទទួលវ៉ាក់សាំង​ដូសជំរុញ ឲ្យ​ទៅទទួលដូសនេះ ដើម្បីការពារខ្លួន​អ្នក និងគ្រួសារ”។

ទូបង្កកត្រជាក់ខ្លាំងថ្មីៗទាំងនេះ​ នឹងជួយដល់ការរក្សាទុកវ៉ាក់សាំងប្រភេទ Pfizer-BioNTech
បានរយៈពេលវែង​ នៅតាមគ្រប់រាជធានីខេត្ត រួមទាំងខេត្តនៅឆ្ងាយៗផងដែរ។ ក្រុមការងារយូនីសេហ្វ នឹងជួយតម្លើង​បរិក្ខារទាំងនេះ ផ្ដល់ការប​ណ្ដុះបណ្ដាល​អំពីការប្រើប្រាស់ និងពិនិត្យតាមដាន​ផលប្រយោជន៍នៃការប្រើប្រាស់។ បរិក្ខារទាំងនេះ​នឹងបន្ត​ពង្រឹង​ប្រព័ន្ធថែទាំសុខាភិបាលជាតិ​នាពេលអនាគត។

ឯកឧត្តមឯកអគ្គរាជទូត  Kang ​បានកត់សម្គាល់ថា៖ “ប្រទេសអូស្រ្តាលី​កោតសរសើរដល់កិច្ចខិតខំរបស់​ក្រសួង​សុខាភិបាល និងយូនីសេហ្វ​ ក្នុងការធ្វើការងារ​ដោយផ្ទាល់ជាមួយសហគមន៍​នានា ដើម្បីកំណត់ និងជួយទៅដល់ប្រជាជនដែលងាយរងគ្រោះបំផុត។ យើងមានសេចក្ដីរីករាយ​ក្នុងការជួយដល់ក្រសួង​ ដើម្បីធានានូវយុទ្ធនាការ​មួយប្រកបដោយ​សមធម៌ និងបរិយាបន្ន​សង្គម។”

លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា បានមានប្រសាសន៍ថា៖ “យូនីសេហ្វ មានមោទនភាព​ ដែលបានសហការយ៉ាងជិតស្និទ្ធជាមួយរាជ​រដ្ឋាភិបាល និងដៃគូនានាដូចជាស្ថានទូតអូស្រ្តាលី​ ក្នុងយុទ្ធនាការចាក់វ៉ាក់សាំងឈានមុខក្នុងពិភពលោក​របស់ប្រទេសកម្ពុជា។ ជាមួយនឹងអំណោយសប្បុរសធម៌​របស់រាជរដ្ឋាភិបាលអូស្រ្តាលី យើងនឹងអាច​បន្ត​គាំទ្រ​ការប្រយុទ្ធប្រឆាំងនឹងជំងឺកូវីដ-១៩ របស់ប្រទេសកម្ពុជា និង​ពង្រឹង​​ប្រព័ន្ធ​សុខាភិបាល​ទាំងមូល ក្រោយបន្ទាប់ពីជំងឺរាតត្បាតនេះផងដែរ។ សមត្ថភាពបន្ថែមនៃបរិក្ខារប្រព័ន្ធត្រជាក់​នេះ នឹងមានតម្លៃមិនអាចកាត់ថ្លៃបាន ​ចំពោះ​សេវាសុខាភិបាល សម្រាប់រយៈពេលជាច្រើនឆ្នាំខាងមុខ ដូចជាការពង្រឹង​ការផ្ដល់វ៉ាក់សាំងជាប្រចាំដល់កុមារ និងការសង្រ្គោះអាយុជីវិតកុមារ​រាប់មិនអស់។ យើង​រីករាយណាស់ ដោយបានដើរតួនាទី​ជាផ្នែកមួយនៃ​កេរ្តិ៍ដំណែលនេះ​សម្រាប់អនាគត។”

សម្រាប់ព័ត៌មានបន្ថែម សូមទាក់ទង៖

• ស្ថានទូតអូស្ត្រាលី Media.Cambodia@dfat.gov