ការសិក្សាស្រាវជ្រាវថ្មីបានបញ្ជាក់ថា កុមារកម្ពុជាបានជួបប្រទះនឹង “ការបាត់បង់ការរៀនសូត្រ” យ៉ាងច្រើន នៅក្នុងអំឡុងពេលនៃជំងឺរាតត្បាតកូវីដ-១៩ ដែលទាមទារឱ្យបង្កើនការវិនិយោគលើវិស័យអប់រំ
- Available in:
- English
- Khmer
រាជធានីភ្នំពេញ ថ្ងៃទី០៥ ខែមេសា ឆ្នាំ២០២២៖ ក្រសួងអប់រំ យុវជន និងកីឡា (ក្រសួង អយក) បានបង្ហាញនូវលទ្ធផលថ្មីគួរឱ្យភ្ញាក់ផ្អើល អំពីការបាត់បង់ការរៀនសូត្ររបស់សិស្សានុសិស្សកម្ពុជាក្នុងអំឡុងពេលនៃការរាតត្បាតជំងឺកូវីដ។ លទ្ធផលគឺបានមកពីការវាយតម្លៃជាតិចុងក្រោយរបស់ក្រសួង អយក ទៅលើការរៀនសូត្រនៅថ្នាក់ទី៦ ដែលត្រូវបានធ្វើឡើងនៅខែវិច្ឆិកា ឆ្នាំ២០២១ និងបានប្រកាសផ្សព្វផ្សាយនៅខែមីនា ឆ្នាំ២០២២ បន្ទាប់ពីមានការវិភាគយ៉ាងលម្អិត។ នាយកដ្ឋានធានាគុណភាពអប់រំ (EQAD) របស់ក្រសួង បានវាយតម្លៃលើសិស្សានុសិស្សចំនួនជាង ៦.០០០នាក់នៅក្នុងសាលារៀនចំនួន ២៣០ នៅទូទាំងប្រទេសកម្ពុជា ហើយបានរកឃើញថា ការសិក្សារបស់កុមារបានធ្លាក់ចុះនៅក្នុងអំឡុងពេលនៃជំងឺរាតត្បាត។ ដោយប្រៀបធៀបជាមួយការវាយតម្លៃដូចគ្នានៅឆ្នាំ២០១៦ ភាគរយនៃសិស្សានុសិស្ស ដែលមិនអាចបង្ហាញអំពីជំនាញចំណេះដឹងមូលដ្ឋានផ្នែកភាសាខ្មែរបានកើនឡើងពី ៣៤% ទៅ ៤៥% និងផ្នែកគណិតវិទ្យាបានកើនឡើងពី ៤៩% ទៅ ៧៤%។
សាលារៀននៅប្រទេសកម្ពុជាត្រូវបានបិទទ្វារអស់រយៈពេល ២៥០ថ្ងៃនៅឆ្នាំ២០២០ និង២០២១ ដែលចំនួននេះស្ទើរតែស្មើនឹងពីរភាគបីនៃឆ្នាំសិក្សាចំនួនពីរឆ្នាំ។ លទ្ធផលនៃការវាយតម្លៃលើការរៀនសូត្រនេះបង្ហាញថា ទោះបីជាសិស្សានុសិស្សទាំងអស់បានជួបប្រទះនឹងការបាត់បង់ការរៀនសូត្រ បន្ទាប់ពីការបិទសាលារៀនទាំងនេះក្ដី ផលប៉ះពាល់មិនមានលក្ខណៈដូចៗគ្នាឡើយ។ កុមារាបានបាត់បង់ការរៀនសូត្រច្រើនជាងមុន និងទទួលលទ្ធផលខ្សោយជាងមុននៅក្នុងការធ្វើតេស្ត៖ កុមារាចំនួន ៥៥% ត្រូវបានវាយតម្លៃថា មិនសម្រេចបានជំនាញចំណេះដឹងមូលដ្ឋានផ្នែកភាសាខ្មែរឡើយនៅឆ្នាំ២០២១ ធៀបនឹងកុមារីចំនួន ៣៤%។
ការវាយតម្លៃលើការរៀនសូត្រនេះត្រូវធ្វើឡើងនៅខែវិច្ឆិកា ឆ្នាំ២០២១ និងបន្ទាប់មក ត្រូវបានវិភាគ និងបោះពុម្ពនៅខែមីនា ឆ្នាំ២០២២។ ការវាយតម្លៃនេះត្រូវបានធ្វើឡើងដោយក្រសួង អយក និងគាំទ្រដោយយូនីសេហ្វ និងដៃគូនៃមូលនិធិភាពជាដៃគូដើម្បីអភិវឌ្ឍន៍សមត្ថភាពវិស័យអប់រំ (CDPF) រួមមានសហភាពអឺរ៉ុប (EU) ទីភ្នាក់ងារស៊ុយអែតសម្រាប់អភិវឌ្ឍន៍អន្តរជាតិ (SIDA) និងទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) និងភាពជាដៃគូសាកលសម្រាប់ការអប់រំ (GPE)។
លទ្ធផលដទៃទៀតបានបង្ហាញថា បើទោះជាសាលារៀននៅទីក្រុងបានសម្រេចលទ្ធផលល្អជាងសាលារៀននៅជនបទទាំងក្នុងឆ្នាំ២០១៦ និង២០២១ យ៉ាងណាក្ដី លទ្ធផលក៏បានបង្ហាញនូវការបាត់បង់ការរៀនសូត្រក្នុងកម្រិតកាន់តែធ្ងន់ធ្ងរផងដែរ។ លទ្ធផលក៏មានភាពខុសគ្នាយ៉ាងច្បាស់មួយចំពោះភាពធ្ងន់ធ្ងរនៃការបាត់បង់ការរៀនសូត្រនៅក្នុងមុខវិជ្ជាស្នូលទាំងពីរនេះ ពោលគឺគណិតវិទ្យា និងភាសាខ្មែរ។ លទ្ធផល គណិតវិទ្យាមានលក្ខណៈអន់ជាងលទ្ធផលភាសាខ្មែរគួរឱ្យកត់សម្គាល់ ដែលឆ្លុះបញ្ចាំងពីការពិតថាមុខវិជ្ជាគណិតវិទ្យា តែងតែទាមទារនូវការផ្តោតអារម្មណ៍ និងការយកចិត្តទុកដាក់ ក្នុងការរៀនសូត្រក្នុងថ្នាក់ដោយផ្ទាល់ (មិនមែនពីចម្ងាយ) ជាជាងភាសាខ្មែរ ដែលជាកត្តាលំបាកអាចធ្វើបាននៅពេលសាលាបិទទ្វារ។
ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានមានប្រសាសន៍ថា៖ “លទ្ធផលទាំងនេះគឺជាលទ្ធផលគួរឱ្យបារម្ភ”។ “យើងបានខិតខំប្រឹងប្រែងធ្វើការងារជាមួយដៃគូទាំងអស់របស់យើង ដើម្បីដាក់ចេញនូវវិធានការរៀនសូត្រពីចម្ងាយ នៅពេលសាលារៀនបិទទ្វារក្នុងអំឡុងពេលនៃជំងឺរាតត្បាត។ ការសិក្សានានាក៏បានបង្ហាញថា វិធានការទាំងនេះពិតជាបានជួយរក្សាការរៀនសូត្រសម្រាប់កុមារជាច្រើន ប៉ុន្តែលទ្ធផលនៃការវាយតម្លៃលើការរៀនសូត្របានបញ្ជាក់ថា សកម្មភាពទាំងនេះមិនទាន់គ្រប់គ្រាន់ ដើម្បីមកបង្គ្រប់មកវិញចំពោះសកម្មភាពទាំងអស់ ដែលកុមារបានបាត់បង់ នៅពេលពួកគេមិនបានរៀនសូត្រនៅក្នុងថ្នាក់។ ឥលូវនេះគឺជាពេលដែលយើងទាំងអស់គ្នាត្រូវព្យាយាម និងជួយកុមារកម្ពុជាតាមឱ្យទាន់ការរៀនសូត្រ ដែលពួកគេបានបាត់បង់ ដែលនេះជាដំណើរការមួយ ដែលបានចាប់ផ្ដើមរួចហើយ ប៉ុន្តែនៅពេលនេះ វាត្រូវតែពន្លឿនបន្ថែមជាមួយនឹងការគាំទ្រពីដៃគូទាំងអស់នៅក្នុង
វិស័យអប់រំ។”
ជាលទ្ធផលពីរបកគំហើញមិនគួរឲ្យពេញចិត្ត ក្រសួង អយក បានរៀបចំកិច្ចប្រជុំរបស់ក្រុមការងារបច្ចេកទេសរួមជាមួយនឹងដៃគូវិស័យអប់រំទាំងអស់របស់ខ្លួន ដើម្បីរៀបចំជំហានបន្ទាប់។ ក្រសួងក៏បានចាត់វិធានការចាំបាច់មួយចំនួនដូចជា ការកំណត់ការបង្រៀនមេរៀនបំប៉ននៅពេលសាលារៀនបើកឡើងវិញភ្លាម ប៉ុន្តែក្រុមការងារបច្ចេកទេសបានព្រមព្រៀងថា វិធានការទាំងនេះចាំបាច់ត្រូវបានពង្រីក និងពង្រឹង ដើម្បីជួយសិស្សានុសិស្សឱ្យតាមទាន់ការរៀនសូត្រ ជាមួយការបង្កើនការផ្ដោតគោលដៅទៅលើសិស្សានុសិស្សនៅក្នុងស្ថានភាពលំបាកបំផុត ដែលបានបាត់បង់ការរៀនសូត្រច្រើនបំផុត។ យូនីសេហ្វបានធ្វើការងារជាមួយដៃគូនានារួមមាន ក្រសួង អយក អង្គការសកម្មភាពសម្រាប់ការអប់រំនៅកម្ពុជា (KAP) អង្គការ VVOB និងភាពជាដៃគូសាកលសម្រាប់ការអប់រំ (GPE) ដើម្បីផលិតកម្រងធនធានបោះពុម្ព និងក្រៅអនទ្បាញ(Offline) ដើម្បីគាំទ្រដល់ការរៀនសូត្របំប៉ននេះ។ គ្រូបង្រៀនចំនួនពីរពាន់នាក់បានទទួលការបណ្ដុះបណ្ដាលអំពីការប្រើប្រាស់ធនធានទាំងនេះ ប៉ុន្តែជាការចាំបាច់ វាត្រូវមានការណែនាំដល់គ្រូបណ្ដុះបណ្ដាលជាច្រើននាក់បន្ថែមទៀត។
លោកស្រី ហ្វ័រូហ្គ ហ្វយូហ្សិថ នាយិកាយូនីសេហ្វប្រចាំកម្ពុជា បានមានប្រសាសន៍ថា៖ “នៅក្នុងសកលលោក ការបាត់បង់ការរៀនសូត្រត្រូវបានគេយល់ឃើញថាជាផលវិបាកដ៏អាក្រក់បំផុតមួយក្នុងចំណោមផលវិបាកដ៏អាក្រក់បំផុតនានាដែលបង្កដោយជំងឺរាតត្បាត ប៉ុន្តែប្រទេសកម្ពុជា គឺជាប្រទេសមួយក្នុងចំណោមប្រទេសតិចតួច ដែលបានបង្ហាញទំហំនៃការបាត់បង់នេះជាមួយនឹងទិន្នន័យដែលអាចជឿទុកចិត្តបាន។ ខ្ញុំសូមទទួលស្គាល់នូវជំហានដ៏សំខាន់ៗ ដែលក្រសួង អយក បានដាក់ចេញ ដើម្បីបង្កើត
ភស្តុតាងយ៉ាងសំខាន់នេះសម្រាប់ផ្ដល់ជាភស្តុតាង និងជាមគ្គុទ្ទេសក៏ដល់គោលនយោបាយ និងវិធានការចាំបាច់ដើម្បីផ្លាស់ប្ដូរទិសដៅនៃនិន្នាការនេះ”។ “កិច្ចការនេះរួមមានការបង្កើនការផ្ដល់ រយៈពេល និងប្រសិទ្ធភាពនៃការរៀនសូត្របំប៉ននេះ។ សិស្សានុសិស្សគប្បីទទួលបានការគាំទ្រដែលចាំបាច់ ដើម្បីជួយឱ្យពួកគេតាមទាន់ការអប់រំរបស់ខ្លួន។ យើងក៏ត្រូវតែវិនិយោគច្រើនទៀតលើគណិតវិទ្យា និងចំណេះដឹងភាសាខ្មែរនៅថ្នាក់ដំបូងផងដែរ។ សិស្សានុសិស្សក្មេងៗត្រូវការមូលដ្ឋានរឹងមាំលើមុខវិជ្ជាស្នូលទាំងនេះ ដើម្បីទទួលបានលទ្ធផលកាន់តែល្អនៅថ្នាក់ក្រោយៗទៀត។ សម្រាប់យូនីសេហ្វ យើងប្តេជ្ញាចិត្តផ្ដល់កិច្ចខិតខំប្រឹងប្រែងអតិបរមាជាមួយដៃគូទាំងអស់ ដើម្បីជួយធ្វើឱ្យកិច្ចខិតខំប្រឹងប្រែងទាំងនេះសម្រេចបាន។
នៅពេលនេះ ក្រសួង អយក យូនីសេហ្វ និងដៃគូនៃមូលនិធិភាពជាដៃគូដើម្បីអភិវឌ្ឍន៍សមត្ថភាពវិស័យអប់រំ (CDPF) កំពុងធ្វើការងារលើរបាយការណ៍ទាំងមូលអំពីការបាត់បង់ការរៀនសូត្រ និងវិធានការនានាដែលត្រូវតែធ្វើ ដើម្បីដោះស្រាយបញ្ហានេះ។ របាយការណ៍នេះនឹងត្រូវបោះពុម្ពនៅចុងខែមីនា ហើយវានឹងជួយបង្កើតនូវផែនទីបង្ហាញផ្លូវមួយ ដើម្បីជួយសិស្សានុសិស្សស្ដារឡើងវិញពីការបាត់បង់ការរៀនសូត្រដែលពួកគេបានជួបប្រទះ។
ព័ត៌មានបន្ថែមពីលទ្ធផល៖
សាលារៀននៅទីក្រុងបានជួបប្រទះនឹងការបាត់បង់ការរៀនសូត្រក្នុងកម្រិតខ្ពស់ជាង បើទោះជានៅតែមានលទ្ធផលនាំមុខក៏ដោយ។ ឧទាហរណ៍ ចំនួនសិស្សានុសិស្ស ដែលមិនសម្រេចបាននូវស្តង់ដារកម្រិតមូលដ្ឋានក្នុងមុខវិជ្ជាគណិតវិទ្យាបានកើនឡើងពីចំនួន ៣០% ទៅ ៦២% នៅសាលារៀននៅទីក្រុង ក្នុងខណៈដែលសាលារៀននៅជនបទ មានសិស្សានុសិស្សមិនបានសម្រេចនូវស្តង់ដារទាំងនោះបានកើនទ្បើងពី ៥៤% ទៅ ៧៧%។
សិស្សានុសិស្សកាន់តែច្រើនត្រូវបានរកឃើញធ្លាក់មុខវិជ្ជាគណិតវិទ្យា ជាជាងមុខវិជ្ជាភាសាខ្មែរ។ ចំពោះមុខវិជ្ជាគណិតវិទ្យា មានសិស្សចំនួន ៤៩% បានធ្លាក់កម្រិតស្តង់ដារមូលដ្ឋានក្នុងឆ្នាំ២០១៦ ធៀបនឹង ៧៤% ក្នុងឆ្នាំ២០២១។ សម្រាប់ភាសាខ្មែរ ភាគរយខុសគ្នាគឺមានកម្រិតតិចជាងគឺ ៣៤% មិនបានជាប់កម្រិតស្តង់ដារមូលដ្ឋានក្នុងឆ្នាំ២០១៦ ធៀបនឹង ៤៥% ក្នុងឆ្នាំ២០២១។
កំណត់សម្គាល់សម្រាប់និពន្ធនាយក៖
របាយការណ៍ស្តីពី “ការបាត់បង់ការរៀនសូត្រ” នៅក្នុងអំឡុងពេលនៃជំងឺរាតត្បាតកូវីដ-១៩ អាចទាញយកពីតំណភ្ជាប់នេះ។
អំពីភាពជាដៃគូសកលសម្រាប់ការអប់រំ (GPE)៖
ភាពជាដៃគូសកលសម្រាប់ការអប់រំ (GPE) គឺជាភាពជាដៃគូរវាងក្រសួងអប់រំ យុវជន និងកីឡានៅកម្ពុជា (ក្រសួង អយក) និងសហភាពអឺរ៉ុប (EU) ទីភ្នាក់ងារស៊ុយអែតសម្រាប់អភិវឌ្ឍន៍អន្តរជាតិ (SIDA) ទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) ភាពជាដៃគូសកលសម្រាប់ការអប់រំ (GPE) និងយូនីសេហ្វ។ តាមរយៈយន្តការផ្ដល់មូលនិធិរួម CDPF ផ្ដល់ការគាំទ្រក្នុងការអនុវត្តអាទិភាពអភិវឌ្ឍន៍សមត្ថភាពនៅក្នុងវិស័យអប់រំ។CDPF បានឈានចូលដល់ដំណាក់កាលទីបីរបស់ខ្លួននៅឆ្នាំ២០១៨ ដែលនឹងបន្តរហូតដល់ខែមិថុនា ឆ្នាំ២០២៣ ដោយគាំទ្រដល់គំនិតផ្ដួចផ្ដើមកសាងសមត្ថភាពនៅក្នុងវិស័យអប់រំជាមួយនឹងមូលនិធិចំនួនប្រមាណ ៣៧ លានដុល្លារអាមេរិក។ ដំណាក់កាលថ្មីនេះពង្រឹងបន្ថែមលើភាពជោគជ័យនៃដំណាក់កាលចំនួនពីរដំបូង ដែលត្រូវបានអនុវត្តចាប់តាំងពីឆ្នាំ២០១១ ដោយមានមូលនិធិសរុបចំនួន ២៤លានដុល្លារអាមេរិក។
សម្រាប់ព័ត៌មានបន្ថែម សូមទាក់ទង៖
- ឯកឧត្តមបណ្ឌិត រស់ សុវាចា
អ្នកនាំពាក្យក្រសួងអប់រំ យុវជន និងកីទ្បា
ទូរសព្ទ៖ +៨៥៥ ៧៨ ៧៥៥ ៥៥៦
សារអេទ្បិកត្រូនិក៖ soveacha2002@yahoo.com - អ្នកស្រី រូឌីណា វ៉ូវ៉ូដា
ប្រធានផ្នែកទំនាក់ទំនង យូនីសេហ្វ
ទូរសព្ទ៖ (+៨៥៥) ៩២ ៥៥៥ ២៩៤
សារអេឡិកត្រូនិក៖ rvojvoda@unicef.org - លោក មាស ប៊ុនលី
មន្រ្តីជំនាញផ្នែកទំនាក់ទំនង យូនីសេហ្វ
ទូរសព្ទ៖ +៨៥៥ ១២ ៧៣៣ ៩០៩
សារអេទ្បិកត្រូនិក៖ bmeas@unicef.org
ទំនាក់ទំនងប្រព័ន្ធផ្សព្វផ្សាយ
អំពីយូនីសេហ្វ៖
យូនីសេហ្វកម្ពុជាធ្វើការងារ ដើម្បីលើកកម្ពស់ការអភិវឌ្ឍល្អប្រសើររបស់កុមារ ការពារសិទ្ធិរបស់ពួកគេ និងជួយឱ្យពួកគេសម្រេចសក្ដានុពលចាប់ពីវ័យកុមារតូច រហូតដល់វ័យក្មេងជំទង់។ សម្រាប់ព័ត៌មានបន្ថែមអំពីយូនីសេហ្វ និងការងារដែលយូនីសេហ្វធ្វើដើម្បីកុមារ សូមចូលមើលគេហទំព័រwww.unicef.org/cambodia/ ។
សូមតាមព័ត៌មានអំពីយូនីសេហ្វ Twitter និង Facebook
