សេចក្តីថ្លែងការណ៍របស់យូនីសេហ្វអំពីការបាត់បង់ជីវិតកុមារក្នុងហេតុការណ៍លិចទូកចម្លងក្នុងខេត្តកណ្តាល

ខេត្តកណ្តាល ថ្ងៃទី ១៤ តុលា ឆ្នាំ ២០២២៖ យូនីសេហ្វ មានអារម្មណ៍ក្រៀមក្រំ និងតក់ស្លុតជាខ្លាំង ចំពោះការបាត់បង់ជីវិតកុមារនៅក្នុងឧប្បទ្ទវហេតុលិចទូកចម្លងនៅឃុំកំពង់ភ្នំ ខេត្តកណ្តាល កាលពីយប់ថ្ងៃទី ១៣ តុលា។ ខណៈព័ត៌មានអំពីឧប្បទ្ទវហេតុនៅកំពុងបន្តដំណើរការ របាយការណ៍ចុងក្រោយនៅម៉ោង ៩ព្រឹក ថ្ងៃទី ១៤ តុលាបានឲ្យដឹងថា​ មានកុមារចំនួន ១៥នាក់ បានធ្វើដំណើរពីសាលារៀនត្រឡប់មកផ្ទះ តាមទូកចម្លង។ ការរុករកជនរងគ្រោះបានធ្វើឡើងរយៈពេលមួយ​យប់ពេញ ដោយបានរកឃើញកុមារចំនួន ៨ នាក់បានបាត់បង់ជីវិត  ៤នាក់ ត្រូវបានសង្គ្រោះ និង ៣​នាក់​ ទៀតកំពុងបាត់ខ្លួន។

យូនីសេហ្វ សូមចូលរួមរំលែកទុក្ខដ៏ក្រៀមក្រំបំផុតជាមួយក្រុមគ្រួសារ ដែលបានបាត់បង់កូនៗជាទីស្រឡាញ់ និងគ្រួសារដែលមានកូនៗកំពុងបាត់ខ្លួននៅក្នុងឧប្បទ្ទវហេតុនេះ។​ យើងសង្ឃឹមថា កុមារ ៣នាក់​ ដែលកំពុងបាត់ខ្លួន នឹងរស់រានមានជីវិត និងត្រូវបានរកឃើញឆាប់ៗ ហើយគ្រួសារនិងកុមារដែលបានឆ្លងកាត់និងរងទុក្ខសោកដ៏សែនសោកសៅនេះ បានទទួលការគាំទ្រផ្នែកស្មារតីយ៉ាងសមស្រប និងទាន់ពេលវេលា។

យូនីសេហ្វ សូមអំពាវនាវដល់សាធារណជន មេត្តាកុំបន្តចែករំលែក ឬផ្ញើរូបភាព ឬវីដេអូ​ ដែលបង្ហាញហេតុការដ៏អកុសលនេះលើបណ្តាញសង្គម ពីព្រោះទង្វើនេះ នឹងបង្កផលប៉ះពាល់អវិជ្ជមានទៅលើកុមារ គ្រួសារជនរងគ្រោះ និងមនុស្ស​ជាទីស្រឡាញ់របស់ពួកគេ។​ ​