បរិក្ខារអនាម័យ និងទឹកស្អាតនៅតាមព្រំដែនកម្ពុជា ជួយជនចំណាកស្រុកក្នុងគ្រាមានវិបត្តិ
បរិក្ខារអនាម័យ និងទឹកស្អាតនៅព្រំដែនកម្ពុជា ការពារជនងាយរងគ្រោះបំផុតក្នុងអំឡុងពេលជំងឺរាតត្បាត និងជួយដល់អ្នកដំណើរនៅឆ្នាំក្រោយៗទៀត។
- Available in:
- English
- Khmer
នៅពេលមានការរីករាលដាលជាសកលនៃជំងឺកូវីដ-១៩ ធ្វើឲ្យមានការប្រែប្រួល ជីវភាពរស់នៅរបស់ពលករកម្ពុជាដែលកំពុងធ្វើការងារនៅប្រទេសថៃ ពលករចំណាកស្រុករាប់ពាន់នាក់ ត្រូវបានបង្ខំឲ្យវិលត្រឡប់មកស្រុកកំណើតខ្លួនវិញ។ ប៉ុន្តែក្រោយពេលពួកគេមកដល់កម្ពុជា មិនឆ្ងាយប៉ុន្មានពីព្រំដែនផង ពួកគេត្រូវជួបនឹងវិបត្តិមួយបន្ថែមទៀត។
បញ្ហាខ្វះសម្ភារបរិក្ខារ ទឹកស្អាត និងអនាម័យនៅតាមច្រកព្រំដែនកម្ពុជា-ថៃ ដូចជាពុំមានបង្គន់សាធារណៈ កន្លែងលាងសម្អាតដៃឲ្យបានត្រឹមត្រូវ ទឹកស្អាត ឬសម្ភារអនាម័យចាំបាច់ដទៃទៀត មិនត្រឹមតែធ្វើឲ្យពលករចំណាកស្រុកដែលវិលត្រឡប់មកកម្ពុជាវិញងាយឆ្លងជំងឺកូវីដ-១៩ ប៉ុណ្ណោះទេ ប៉ុន្តែពេលដែលពួកគេត្រូវបន្តធ្វើដំណើរទៅតាមបណ្តាខេត្តនានានៅទូទាំងប្រទេស នឹងបង្កើនហានិភ័យក្នុងការចម្លងវីរុសនេះទៅកាន់សហគមន៍នៅជនបទ ដែលជាការគំរាមកំហែង និងដាក់សម្ពាធលើសលុបលើសមត្ថភាពឆ្លើយតបរបស់មន្ទីរពេទ្យ និងមូលដ្ឋានសុខាភិបាលនានា។
នៅពេលដែលពពួកវីរុសបំប្លែងខ្លួនថ្មីលេចចេញមកនៅចុងឆ្នាំ២០២១ ក្នុងនោះរួមមានវីរុសបំប្លែងខ្លួនដែលតា (Delta) ផងដែរ ស្របពេលដែលវិធានការរឹតត្បិតលើការធ្វើដំណើរត្រូវបានដកចេញជាបណ្តើរៗ ដែលអនុញ្ញាតឲ្យប្រជាពលរដ្ឋកាន់តែច្រើននាក់អាចឆ្លងកាត់ព្រំដែនដោយសេរី វារឹតតែសំខាន់ទៅទៀត ដែលត្រូវធានាថា ពលករចំណាកស្រុកបានទទួលការការពារ ហើយស្របពេលជាមួយគ្នាកាត់បន្ថយហានិភ័យនៃការឆ្លងរាលដាលជាទ្រង់ទ្រាយធំក្នុងសហគមន៍។
ដោយមានការគាំទ្រពីរដ្ឋាភិបាលជប៉ុន យូនីសេហ្វបានសហការជាមួយរាជរដ្ឋាភិបាលកម្ពុជា ដើម្បីធ្វើការកែលម្អបរិក្ខារទឹកស្អាត និងអនាម័យ ក៏ដូចជាផ្តល់សម្ភារសម្រាប់សម្អាត និងអនាម័យ នៅតាមច្រកព្រំដែន កម្ពុជា-ថៃ ក្នុងខេត្តបាត់ដំបង បន្ទាយមានជ័យ និងឧត្តរមានជ័យ។ ការគាំទ្រនេះបំពេញតួនាទីយ៉ាងសំខាន់ក្នុងការបំពេញចំណុចខ្វះខាត ដើម្បីទប់ស្កាត់ លុបបំបាត់ការឆ្លងរីករាលដាលនៃជំងឺកូវីដ-១៩ ហើយក្នុងពេលជាមួយគ្នា ឆ្លើយតបចំពោះតម្រូវការផ្នែកសុខភាពចាំបាច់ ចំពោះមុខរបស់ពលករចំណាកស្រុក ដែលកំពុងវិលត្រឡប់មកស្រុកកំណើតវិញ ក្រោយការអនុវត្តវិធានការទប់ស្កាត់ការឆ្លងរាលដាលជាសកល នៅក្នុងប្រទេសថៃ។
ពលករចំណាកស្រុកដែលវិលត្រឡប់ពីប្រទេសថៃ ត្រូវបានចាត់ទុកថាជាក្រុមងាយរងគ្រោះជាងគេមួយ ដោយសារផលប៉ះពាល់នៃការរីករាលដាលជាសកលនៃជំងឺនេះ។ ពលករទាំងនេះជាអ្នកដែលធ្វើការដោយមិនស្របច្បាប់ និងមិនទៀងទាត់ ដោយគ្មានប្រាក់ចំណូល ឬគ្មានឯកសារផ្លូវការ ហើយក៏មានលទ្ធភាពតិចតួចប៉ុណ្ណោះដើម្បីទទួលបានសេវានៅតាមមូលដ្ឋានសុខាភិបាលនានា មានន័យថា ពួកគេជាច្រើននាក់មានលទ្ធភាពតិចតួចដើម្បីទទួលបានការធ្វើតេស្ត និងការព្យាបាលជំងឺកូវីដ-១៩ និងមិនអាចអនុវត្តតាមអនុសាសន៍សុខភាពសាធារណៈបានឡើយ ព្រោះតែស្ថានភាពរស់នៅ និងការងាររបស់ពួកគេ ហើយការរស់នៅដាច់ដោយឡែកនៅក្នុងផ្ទះសម្រាប់អ្នកដែលធ្វើតេស្តឃើញថាបានឆ្លងជំងឺនេះ ក៏ជាអ្វីដែលមិនអាចធ្វើទៅបានដែរ។
ចាប់ពីខែកក្កដា ឆ្នាំ ២០២២ ដល់ខែមីនា ឆ្នាំ ២០២៣ យូនីសេហ្វបានសហការយ៉ាងជិតស្និទ្ធជាមួយក្រសួងអភិវឌ្ឍន៍ជនបទ មន្ទីរអភិវឌ្ឍន៍ជនបទ និងអាជ្ញាធរច្រកព្រំដែន ដើម្បីសាងសង់បង្គន់ កន្លែងលាងសម្អាតដៃ អណ្តូងស្នប់ បង្គន់នោមបុរស និងតភ្ជាប់ការផ្គត់ផ្គង់ទឹកតាមបំពង់ ព្រមទាំងធ្វើការកែលម្អបង្គន់ផ្សេងទៀតនៅច្រកព្រំដែនចំនួន ៧ តាមបណ្តោយព្រំដែនកម្ពុជា-ថៃ។ លើសពីនេះក៏មានការផ្តល់ជាសម្ភារ ទឹកស្អាត និងអនាម័យ រួមទាំងសំឡីអនាម័យសម្រាប់ពលករចំណាកស្រុកជាស្ត្រី ក៏ដូចជារៀបចំការអប់រំផ្សព្វផ្សាយ និងចែកឯកសារព័ត៌មានអំពីការទប់ស្កាត់ជំងឺកូវីដ-១៩ និងអំពីសារៈសំខាន់នៃការលាងសម្អាតដៃ ព្រមទាំងការប្រតិបត្តអនាម័យសំខាន់ៗដទៃទៀត ដែលបទពិសោទាំងអស់នេះសុទ្ធតែអាចយកមកអនុវត្តក្រោយការរីករាលដាលជាសកលនៃជំងឺកូវីដ-១៩។
បច្ចុប្បន្ននេះ ខណៈពេលដែលកម្ពុជាបានធូរស្បើយពីជំងឺកូវីដ-១៩ សម្ភារបរិក្ខារ ទឹកស្អាត និងអនាម័យទាំងនេះនៅតែបន្តផ្តល់ការគំាទ្រជាសារវន្តដល់ពលករចំណាកស្រុកដែលបន្តធ្វើដំណើរទៅមក រវាងប្រទេសទាំងពីរ។ សម្ភារបរិក្ខារទាំងនេះ ធ្វើឲ្យជីវិតអ្នកធ្វើដំណើរដែលប្រើប្រាស់វាជារៀងរាល់ថ្ងៃកាន់តែមានភាពងាយស្រួល។
នៅច្រកព្រំដែនអូររំដួល ក្នុងខេត្តបាត់ដំបង ប្រធានប៉ុស្តិ៍នគរបាលរដ្ឋបាល លោក ហីង អ៊ួក មានប្រសាសន៍ថា សម្ភារបរិក្ខារទាំងនេះបានផ្តល់ជាប្រយោជន៍ដល់អ្នកធ្វើដំណើរចន្លោះពី ២០ ទៅ ៥០នាក់ជារៀងរាល់ថ្ងៃ និង ចន្លោះពី ៣០០ ទៅ ៤០០នាក់ ពីរថ្ងៃក្នុងមួយសប្តាហ៍ នៅពេលដែលមានការបើកផ្សារនៅខាងប្រទេសថៃ។ លោកមានប្រសាសន៍បន្ថែមទៀតថា “សម្ភារបរិក្ខារ ទឹកស្អាត និងអនាម័យបំពេញតួនាទីយ៉ាងសំខាន់ និងបានជួយដល់យើងទាំងអស់គ្នាយ៉ាងច្រើន។ កាលពីមុនយើងមិនមានបង្គន់សារធារណៈ ឬកន្លែងលាងសម្អាតដៃឡើយ ហើយយើងជួបប្រទះនឹងបញ្ហាជាច្រើន ប៉ុន្តែឥឡូវនេះអ្វីៗមានភាពងាយស្រួលជាងមុនច្រើន។ យើងនឹងបន្តថែទាំ សម្អាត និងជួសជុលថែទាំសម្ភារបរិក្ខារទាំងនេះ ដើម្បីឲ្យវានៅតែដំណើរការបានល្អ។”
នៅច្រកព្រំដែនពីរផ្សេងទៀតក្នុងខេត្តបន្ទាយមានជ័យ និងឧត្តរមានជ័យ គឺច្រកបឹងត្រកួន និងច្រកជាំ អាជ្ញាធរធ្លាប់តែទិញទឹកពីអ្នកលក់ទឹកតាមស៊ីទែន ដើម្បីបំពេញតម្រូវការ ដែលចំណាយអស់ថវិការច្រើន និងពិបាកផង។ លោក ចាយ ជាវ ដែលមន្ត្រីយោធានៅច្រកជាំ បានមានប្រសាសន៍ថា ដោយសារអណ្តូងស្នប់ដែលទើបសាងសង់ថ្មីនេះ បានផ្គត់ផ្គង់ទឹកដល់អ្នកធ្វើដំណើរ និងប្រជាពលរដ្ឋដែលរស់នៅក្បែរនោះ ឥឡូវនេះ ពួកគេមានទឹកគ្រប់គ្រាន់សម្រាប់ប្រើប្រាស់ពេញមួយថ្ងៃ។ “យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះយូនីសេហ្វ និងប្រជាជនជប៉ុនដែលបានផ្តល់ការគាំទ្រយ៉ាងសប្បុរសដល់កម្ពុជា។ ច្រកជាំធ្លាប់ចំណាយថវិការចន្លោះពី ១៥ ដល់ ២០ដុល្លារ សម្រាប់ទិញទឹកជារៀងរាល់ថ្ងៃ។ “យើងមិនអាចប្រើទឹកឲ្យបានច្រើនតាមដែលយើងចង់នោះឡើយ ត្បិតយើងត្រូវចំណាយប្រាក់ជារៀងរាល់ថ្ងៃ។”
លោក យាត់ ណារ៉ា ដែលជាប្រធានក្រុមចត្តាឡីស័ក មកពីមន្ទីរសុខាភិបាលខេត្តឧត្តរមានជ័យ បានមានប្រសាសន៍បន្ថែមទៀតថា “អណ្តូងស្នប់ដែលទើបសាងសង់ថ្មីនេះអាចផ្គត់ផ្គង់ទឹកដល់ច្រកព្រំដែនទាំងមូល ហើយក៏បានជួយផ្គត់ផ្គង់ទឹកដល់ប្រជាពលរដ្ឋជាង ២០ គ្រួសារដែលកំពុងរស់នៅជុំវិញច្រកជាំនេះផងដែរ។”
ជារួម សម្ភារបរិក្ខារទឹកស្អាត និងអនាម័យនៅតាមច្រកព្រំដែនទាំង ៧ ផ្តល់សេវាដល់ពលករចំណាកស្រុក និងអ្នកធ្វើដំណើរផ្សេងទៀតប្រមាណ ១.០០០ នាក់ក្នុងមួយថ្ងៃ ក្នុងនោះពាក់កណ្តាលជាស្ត្រី និងមាន ១-២% ជាកុមារ។
កម្មវិធីដែលអនុវត្តរួមគ្នា ក្រោមការដឹកនាំរបស់អង្គការអន្តរជាតិទេសន្តរប្រវេសន៍ប្រចាំកម្ពុជា (IOM) អង្គការសុខភាពពិភពលោក (WHO) យូនីសេហ្វ និង មូលនិធិសហប្រជាជាតិសម្រាប់ប្រជាជន (UNFPA) ដើម្បីគាំទ្រដល់ពលករចំណាកស្រុកដែលវិលត្រឡប់មកកម្ពុជាវិញនៅដំណាក់ក្រោយៗនៃការរីករាលដាលនៃជំងឺកូវីដ-១៩ មានគោលបំណងធានាថាច្រកព្រំដែនទាំងនេះបានទទួលការបំពាក់សម្ភារ ដើម្បីអាចធ្វើការពិនិត្យបឋមលើពលករចំណាកស្រុកដែលវិលត្រឡប់មកកម្ពុជាវិញប្រកបដោយសុវត្ថិភាព មជ្ឈមណ្ឌលចត្តាឡីស័កនៅក្នុងខេត្តជាប់បណ្តោយព្រំដែនទាំង ៣ អាចទប់ស្កាត់ និងគ្រប់គ្រងករណីឆ្លងថ្មីយ៉ាងមានប្រសិទ្ធភាព ហើយបុគ្គលិកសុខាភិបាលនៅកន្លែងផ្តល់ការព្យាបាល បានត្រៀមខ្លួន ដើម្បីផ្តល់ការព្យាបាលដល់អ្នកជំងឺ។ រួមគ្នាជាមួយនឹងអាជ្ញាធរនៅថ្នាក់ជាតិ ដូចជាក្រសួងសុខាភិបាល និងក្រសួងមហាផ្ទៃជាដើម កម្មវិធីក៏បានសហការជាមួយនឹងអាជ្ញាធរខេត្ត នគរបាលអន្តោប្រវេសន៍ និងនគរបាលព្រំដែន កងរាជអាវុធហត្ថ មន្ទីរសុខាភិបាល និងការិយាល័យស្រុកប្រតិបត្តិ អង្គការក្រៅរដ្ឋាភិបាលក្នុងស្រុក និងអង្គការសង្គមស៊ីវិលផងដែរ។
លោកវេជ្ជបណ្ឌិត អានៀរបាន ឆាតឺរជី អនុប្រធានយូនីសេហ្វនៅកម្ពុជា បានមានប្រសាសន៍ថា “យូនីសេហ្វសូមវាយតម្លៃខ្ពស់ និងថ្លែងអំណរគុណយ៉ាងជ្រាលជ្រៅជូនចំពោះស្ថានទូតជប៉ុនប្រចាំកម្ពុជា ដែលបានផ្តល់ការគាំទ្រឥតងាករេ និងចូលរួមវិភាគទានដ៏សប្បុរសនេះ។ ដើម្បីកសាងសហគមន៍ឲ្យកាន់តែរឹងមាំ កាន់តែមានភាពធន់ និងកាន់តែមានបរិយាបន្ន វាជាការសំខាន់ និងចាំបាច់ណាស់ ដែលត្រូវផ្តល់ការការពារដល់ក្រុមដែលងាយរងគ្រោះជាងគេនៅក្នុងសង្គម។ សម្ភារបរិក្ខារ ទឹកស្អាត និងអនាម័យ ដែលត្រូវបានកែលម្អនៅតាមបណ្តោយព្រំដែនកម្ពុជា-ថៃទាំងនេះ ផ្តល់ការគាំទ្រយ៉ាងសំខាន់ដល់ពលករចំណាកស្រុក គ្រួសារដែលរស់នៅក្នុងតំបន់ទាំងនោះ ក៏ដូចជាដល់អ្នកធ្វើដំណើរទាំងអស់ ដែលឆ្លងកាត់ច្រកព្រំដែនរវាងប្រទេសទាំងពីរជារៀងរាល់ថ្ងៃ។ សម្ភារបរិក្ខារទាំងនេះមិនត្រឹមតែជួយទប់ស្កាត់ការឆ្លងរាលដាលជំងឺនានា តួយ៉ាងជំងឺកូវីដ-១៩ ប៉ុណ្ណោះទេ វាថែមទាំងការពារសុខភាព និងសុខមាលភាពរបស់ប្រជាជនដែលពិបាកទៅទទួលសេវាថែទាំសុខភាព និងសេវាចំាបាច់សំខាន់ៗដទៃទៀត ក៏ដូចជាដល់គ្រួសារ និងកុមារដែលនឹងប្រើប្រាស់សម្ភារបរិក្ខារទាំងនេះបន្តជាច្រើនឆ្នាំទៅមុខទៀត។”
