ចូលរួមយុទ្ធនាការ #ខ្ញុំធូរចិត្តពេល...ជាមួយយូនីសេហ្វ
សុខភាពផ្លូវចិត្តមានសារសំខាន់សម្រាប់ការអភិវឌ្ឍរបស់កុមារ និងយុវជន។ សុខភាពផ្លូវចិត្តមិនសូវជាត្រូវបានលើកយកមកជជែកស៊ីជម្រៅនៅឡើយ។ តោះ ផ្លាស់ប្តូរគំនិតនេះ!
- Available in:
- English
- Khmer
ការរាតត្បាតជាសកលនៃជំងឺកូវីដ១៩ធ្វើឲ្យវិបត្តិសុខភាពផ្លូវចិត្តកាន់តែធ្ងន់ធ្ងរថែមទៀតចំពោះយុវជននៅទូទាំងពិភពលោក។ នៅកម្ពុជា យូនីសេហ្វ និងដៃគូ តាមរយៈការសិក្សាអំពីផលប៉ះពាល់សេដ្ឋកិច្ចសង្គម បានរកឃើញថាមាន ៤៥%នៃមនុស្សវ័យក្មេងបារម្ភអំពីសុវត្ថិភាពរបស់ខ្លួនអំឡុងការរាតត្បាតនៃកូវីដ ហើយ ១៦% មានការថប់បារម្ភ ឬបាក់ទឹកចិត្តតាំងពីការរាតត្បាតចាប់ផ្តើម។
ឆ្លើយតបចំពោះវិបត្តិផ្លូវចិត្ត យូនីសហេ្វកម្ពុជាបានបើកដំណើរការយុទ្ធនាការថ្មីមួយ មានឈ្មោះថា “#ខ្ញុំធូរចិត្តពេល...” ឧបត្ថម្ភថវិកាដោយទីភ្នាក់ងារជំនួយអាមេរិក USAID ប្រចាំកម្ពុជា។ យុទ្ធនាការនេះផ្តល់នូវព័ត៌មានបែបវិទ្យាសាស្ត្រ មានលក្ខណៈទាក់ទាញ និងសម្រិតសម្រាំងទាក់ទិននឹងសុខភាពផ្លូវចិត្ត។ មាតិកាទាំងនេះលើកទឹកចិត្តកុមារ និងយុវជនកម្ពុជាឲ្យផ្តល់អាទិភាពដល់សុខភាពផ្លូវចិត្តរបស់ខ្លួន និងប្រឆាំងការមាក់ងាយជុំវិញបញ្ហាផ្លូវចិត្ត។
នៅលើទំព័រនេះ លោក អ្នកនឹងទទួលបាននូវរឿងរ៉ាវពិតប្រាកដ ខ្សែវីដេអូ ក្រាហ្វិក សារសំខាន់ៗ និងព័ត៌មាននានាបង្កើតឡើងសម្រាប់យុទ្ធនាការ “ខ្ញុំធូរចិត្តពេល...”។ យូនីសេហ្វកម្ពុជាអញ្ជើញដៃគូ តំណាងផ្នែកអប់រំ សាលារៀន និងអង្គភាពនានានៅកម្ពុជា ដែលធ្វើការទាក់ទងនឹងសុខុមាលភាពផ្លូវចិត្តរបស់យុវជន ឲ្យប្រើប្រាស់មាតិកាទាំងនេះ។ ប្រសិនបើអ្នកជាដៃគូដែលមានបំណងកែសម្រួល ឬយកលំនាំតាមមាតិកាទាំងនេះ លោក អ្នកអាចទាក់ទងយើងតាមរយៈ bbut@unicef.org ។
ចូលរួមទាំងអស់គ្នាដើម្បីផ្សព្វផ្សាយចំណេះដឹង និងផ្តល់ឲ្យកុមារ និងយុវជនកម្ពុជានូវឱកាសដ៏ប្រសើរក្នុងការទទួលបានសុខភាពផ្លូវចិត្តដ៏ល្អ។