គោលនយោបាយ និងហិរញ្ញប្បទានសាធារណៈ ដើម្បីកុមារ
ឱកាសសម្រាប់កុមារគ្រប់រូប។
- Available in:
- English
- Khmer
បញ្ហាប្រឈម
ផលវិបាកដែលបង្កឡើងដោយភាពក្រីក្រ អាចដិតដានពេញមួយជីវិត។ កុមារក៏កម្រទទួលបានឱកាសទីពីរ ដើម្បីទទួលបានការអប់រំ ឬចាប់ផ្តើមជីវិតជាមួយនឹងសុខភាពល្អនោះដែរ។ នៅកម្ពុជា ប្រជាពលរដ្ឋ ៤០ ភាគរយរស់នៅខាងលើបន្ទាត់ភាពក្រីក្រតែបន្តិចតែប៉ុណ្ណោះ ខណៈពេលដែលកុមារ ១៦ ភាគរយ រស់នៅក្រោមបន្ទាត់ភាពក្រីក្រ និងកំពុងងាយរងគ្រោះខ្លាំង។ ភាពក្រីក្ររបស់កុមារ មិនត្រឹមតែគំរាមកំហែងដល់កុមារម្នាក់ៗប៉ុណ្ណោះទេ ព្រោះថាប្រសិនបើពុំមានអន្តរាគមន៍ឲ្យបានគ្រប់គ្រាន់ ភាពក្រីក្រទំនងជានឹងត្រូវផ្ទេរទៅជំនាន់ក្រោយៗទៀត ដែលបង្កឲ្យមានមានវិសមភាពកាន់តែធ្ងន់ធ្ងរក្នុងសង្គម។
ប្រទេសកម្ពុជា សម្រេចបាននូវវឌ្ឍនភាពសេដ្ឋកិច្ចគួរឲ្យកត់សម្គាល់នៅក្នុងរយៈពេលពីរទសវត្សរ៍ចុងក្រោយនេះ។ ក្នុងឆ្នាំ ២០១៦ ប្រទេសនេះបានក្លាយទៅជាប្រទេសដែលមានចំណូលមធ្យមកម្រិតទាប និងជាប់ចំណាត់ថ្នាក់ជាប្រទេសដែលមានសេដ្ឋកិច្ចរីកចម្រើនលឿនជាងគេទីប្រាំមួយ ក្នុងសកលលោក។
ទោះជាយ៉ាងណាក៏ដោយ លទ្ធផលដែលសម្រេចបានទាំងនេះ នៅមានភាពផុយស្រួលនៅឡើយ។ ខណៈពេលដែលប្រទេសនេះ បានសម្រេចនូវគោលដៅកាត់បន្ថយភាពក្រីក្រពាក់កណ្តាលក្នុង ២០០៩ គ្រួសារភាគច្រើនលើសលុបដែលរួចផុតពីភាពក្រីក្រ បច្ចុប្បន្នកំពុងរស់នៅលើរឹមនៃបន្ទាត់ភាពក្រីក្រប៉ុណ្ណោះ។ ក្នុងចំណោមប្រជាពលរដ្ឋប្រមាណ ១៦ លាននាក់នៅកម្ពុជា មានប្រហែល ៤,៥ លាននាក់ ដែលនៅបន្តរស់នៅកៀកនឹងភាពក្រីក្រ មានន័យថា ពួកគេងាយនឹងធ្លាក់ចូលទៅក្នុងភាពក្រីក្រវិញ នៅពេលដែលពួកគេប្រឈមនឹងវិបត្តិសេដ្ឋកិច្ច ឬវិបត្តិខាងក្រៅផ្សេងទៀត ដូចជា ការប្រមូលផលមិនបានល្អ ឬនៅពេលដែលឪពុក ឬម្តាយរបស់ពួកគេធ្លាក់ខ្លួនឈឺជាដើម។ លើសពីនេះ ផលចំណេញខាងសេដ្ឋកិច្ចដែលប្រទេសកម្ពុជា ទទួលបានក្នុងរយៈពេលប៉ុន្មានឆ្នាំចុងក្រោយនេះ ពុំទាន់ត្រូវបានបែងចែកឲ្យបានស្មើភាពគ្នានៅឡើយ។ កុមារក្រីក្រជាង ៧៩ ភាគរយ រស់នៅក្នុងតំបន់ជនបទ និងតំបន់ដែលគេពិបាកទៅដល់។
ភាពក្រីក្រ មិនមែនត្រឹមតែជាការវាស់វែងប្រាក់ចំណូលនោះទេ វាគឺជាបាតុភូតចម្រុះដែលគេអាចវាស់វែងតាមច្រើនបែបផែនច្រើនយ៉ាង ដូចជា ការមានសុខភាពមិនល្អ ទទួលបានការអប់រំទាប ទទួលបានការការពារទាប និងមានការចូលរួមទាបជាដើម។ ជារឿយៗ កុមារមកពីគ្រួសារក្រីក្រ ខកខានពុំបានទទួលសេវាសង្គមជាមូលដ្ឋាន ព្រោះថាពួកគេពុំអាចទៅសាលារៀន ជួបវេជ្ជបណ្ឌិត ឬទទួលបានអាហារូបត្ថម្ភឲ្យបានសមស្រប ដែលកត្តាទាំងអស់បង្កផលប៉ះពាល់យ៉ាងធំធេងលើការរស់រាន និងការអភិវឌ្ឍរបស់ពួកគេ។
ប្រជាពលរដ្ឋកម្ពុជា ជិតពាក់កណ្តាល កំពុងជួបប្រទះភាពក្រីក្រពហុសមាសភាគ។
ការបំពេញចំណុចខ្វះខាតដែលនាំឲ្យមានភាពក្រីក្រ មានន័យថាជាការជួយឲ្យកុមារទទួលបានសិទ្ធិសំខាន់ៗរបស់គេ។ ចំណុចនេះមានសារៈសំខាន់មិនត្រឹមតែសម្រាប់កុមារតែប៉ុណ្ណោះទេ ថែមទាំងសម្រាប់វដ្តទាំងមូលនៃការអភិវឌ្ឍមនុស្សផងដែរ។ ការសាយភាយនៃភាពក្រីក្រពហុសមាសភាគបែបនេះ បង្កការគំរាមកំហែងដល់ការអភិវឌ្ឍប្រជាពលរដ្ឋនាពេលអនាគត ក៏ដូចជាការអភិវឌ្ឍប្រទេសទាំងមូល។
កុមារនៅកម្ពុជា ត្រូវការជាបន្ទាន់នូវសេវាសង្គមជាមូលដ្ឋាន។ តួយ៉ាងដូចជាផ្តល់សំណាញ់សុវត្ថិភាព ដែលជាសេវាសង្គមជួយដោះស្រាយភាពក្រីក្រ ដោយធានាយ៉ាងណាឲ្យកុមារ ដែលជួបការលំបាក និងងាយរងគ្រោះជាងគេ អាចបំពេញតម្រូវការជាមូលដ្ឋានរបស់ខ្លួន។ សេវាសង្គម ធានាឲ្យកុមារអាចទៅរៀនបាន បើទោះបីជាឪពុកម្តាយរបស់ពួកគេពុំមានលទ្ធភាពបញ្ជូនពួកគេទៅរៀនក៏ដោយ ម្តាយអាចទៅជួបភ្នាក់ងារសុខភាពដែលមានសមត្ថភាព បើទោះបីជាចំណូលរបស់គាត់ទាបខ្លាំងដែលពុំអាចចាយវាយលើសេវានេះបាន ហើយកុមារដែលងាយរងគ្រោះត្រូវបានគេមិនអើពើ នឹងងាយទទួលរងអំពើហិង្សា ត្រូវបានគេកំណត់អត្តសញ្ញាណ និងទទួលបានការថែទាំ។
អត្រានៃភាពក្រីក្រ មានកម្រិតខ្ពស់នៅក្នុងចំណោមគ្រួសារ ដែលមានមេគ្រួសារជាស្រ្តី ក៏ដូចជាក្នុងចំណោមកុមារីជំទង់ បើធៀបនឹងគ្រួសារដែលមានបុរសជាមេគ្រួសារ និងក្មេងប្រុសជំទង់។
ដំណោះស្រាយ
យូនីសេហ្វ គាំទ្ររាជរដ្ឋាភិបាលស្វែងយល់កាន់តែច្បាស់ពីភាពក្រីក្រដែលកុមារកំពុងជួបប្រទះ និងទីកន្លែងដែលកុមារក្រីក្រកំពុងរស់នៅ។ យើងសហការជាមួយក្រសួងសេដ្ឋកិច្ច និងហិរញ្ញវត្ថុ ក្រសួងផែនការ និងដៃគូដទៃទៀតនៅគ្រប់កម្រិត ដើម្បីកាត់បន្ថយភាពក្រីក្រពហុសមាសភាគរបស់កុមារ ដោយផ្តោតការយកចិត្តទុកដាក់លើកុមារដែលងាយរងគ្រោះជាងគេ ដូចជាកុមារដែលរស់នៅតាមតំបន់ក្រីក្រនៅទីប្រជុំជន និងជនបទ កុមារជនជាតិដើមភាគតិច និងកុមារពិការជាដើម។ ការវិនិយោគធនធានហិរញ្ញវត្ថុ ដើម្បីជួយឲ្យកុមារអាចបន្តរស់រាន និងអភិវឌ្ឍសក្តានុពលរបស់ពួកគេឲ្យបានពេញលេញ គឺជាកាតព្វកិច្ចផ្នែកសីលធម៌ដែលមានសារៈសំខាន់ចាំបាច់ជាងគេ។ ប៉ុន្តែអ្វីដែលសំខាន់ផងដែរនោះ គឺការអនុវត្តជាក់ស្តែង។ ការវិនិយោគលើកុមារ ផ្តល់ប្រយោជន៍សេដ្ឋកិច្ច និងសង្គមទាំងមូល ហើយត្រូវបានគេមើលឃើញកាន់តែច្រើនថាជាយុទ្ធសាស្រ្តមួយក្នុងចំណោមយុទ្ធសាស្រ្តរយៈពេលវែងដែលមានតម្លៃជាងគេ ដែលប្រទេសមួយអាចប្រើប្រាស់ ដើម្បីទទួលបានអនាគតល្អប្រសើរ។
ការងាររបស់យើងនៅក្នុងវិស័យគាំពារសង្គម ពាក់ព័ន្ធជាមួយនឹងគ្រប់អន្តរាគមន៍ទាំងអស់របស់យើង។ ដោយសារមូលហេតុនេះហើយ ទើបយើងប្រើប្រាស់អភិក្រមចម្រុះ ដែលក្នុងនោះសកម្មភាពគាំពារសង្គម ត្រូវបានបញ្ចូលជាមួយនឹងកម្មវិធីដទៃទៀត ដូចជាសុខភាព និងអាហារូបត្ថម្ភ អនាម័យ និងទឹកស្អាត អប់រំ និងកិច្ចការពារកុមារជាដើម។
ការកំណត់គោលនយោបាយត្រឹមត្រូវ អាចជួយឲ្យប្រជាពលរដ្ឋអាចរស់រានសមរម្យ មានសុខភាពល្អ និងទទួលបានការអប់រំ។
កសាងបរិយាកាសការពារ
យូនីសេហ្វ ផ្តោតការយកចិត្តទុកដាក់លើលទ្ធផលរយៈពេលវែងសំខាន់ៗ ដែលកម្មវិធីគាំពារសង្គមគាំទ្រដល់កុមារ។ យើងគាំទ្ររាជរដ្ឋាភិបាលរៀបចំ អនុវត្ត និងពិនិត្យតាមដានកម្មវិធីគាំពារសង្គមឲ្យបានគ្រប់ជ្រុងជ្រោយ ដើម្បីធានាសិទ្ធិដល់ប្រជាពលរដ្ឋដែលងាយរងគ្រោះជាងគេ។
ការគាំពារសង្គមដែលនៅមានកម្រិតនៅឡើយ គឺជាមូលហេតុមួយក្នុងចំណោមមូលហេតុសំខាន់ៗ ដែលគ្រួសារមានចំណូលទាប ពុំអាចទទួលបានសេវាសម្រាប់កូនៗរបស់ពួកគេ។ ដើម្បីឆ្លើយតបចំពោះចំណុចខ្វះខាតនេះ កាលពីខែមីនា ឆ្នាំ២០១៧ រាជរដ្ឋាភិបាលបានដាក់ចេញនូវក្របខ័ណ្ឌគោលនយោបាយជាតិស្តីពីកិច្ចគាំពារសង្គម ២០១៦–២០២៥ ដែលដាក់ចេញនូវគម្រោងជំនួយសង្គម និងផែនទីបង្ហាញផ្លូវសម្រាប់ពង្រីកការអនុវត្តគម្រោងទាំងនេះ។ ឧទាហរណ៍រួមមានកម្មវិធី ការផ្ទេរសាច់ប្រាក់ដល់ស្រ្តីមានផ្ទៃពោះ និងកុមារតូច អាហារូបករណ៍សម្រាប់កុមារមកពីគ្រួសារក្រីក្រ និងប្រាក់ឧបត្ថម្ភសម្រាប់ជនពិការជាដើម។
យើងគាំទ្ររាជរដ្ឋាភិបាល ក្នុងការអនុវត្តក្របខ័ណ្ឌនេះ ដើម្បីឲ្យកុមារ និងស្រ្តីនៅកម្ពុជា ទទួលបានជំនួយសមស្របនៅពេលដែលពួកគេត្រូវការ។
ការវិនិយោគលើសេវាសង្គម
ការបង្កើនថវិកាជាតិសម្រាប់សេវាសង្គម រួមនឹងការអនុវត្តថវិកានេះឲ្យមានប្រសិទ្ធភាព គឺជាផ្នែកមួយដ៏មានសារៈសំខាន់សម្រាប់លើកកម្ពស់សុខុមាលភាពរបស់កុមារ ខណៈពេលដែលយើងខិតខំស្វែងរកការគាំទ្រដើម្បីឲ្យមានការវិនិយោគគ្រប់គ្រាន់ ប្រកបដោយសមធម៌ លើសេវាសង្គម និងកម្មវិធីគាំពារសង្គម។ យើងជួយឲ្យរដ្ឋាភិបាលរៀបចំ អនុវត្ត និងពិនិត្យតាមដានថវិកាសម្រាប់កម្មវិធីគាំពារសង្គមឲ្យបានច្បាស់លាស់ និងប្រកបដោយប្រសិទ្ធភាព តាមរយៈការចែករំលែកជំនាញដែលយើងមាននៅក្នុងវិស័យសង្គម និងតាមរយៈការគាំទ្ររាជរដ្ឋាភិបាល រកឲ្យឃើញនូវចំណុចខ្វះខាត និងសម្របសម្រួលសកម្មភាពនានា។
អ្វីដែលសំខាន់ជាងនេះទៅទៀត យើងប្តេជ្ញាលើកកម្ពស់ការចូលរួមរបស់យុវជននៅក្នុងការរៀបចំផែនការ និងរៀបចំថវិកាសម្រាប់កម្មវិធីសង្គមនៅកម្រិតមូលដ្ឋាន ហើយយើងបន្តរៀបចំវេទិកា ដើម្បីឲ្យពួកគេអាចលើកឡើងពីបញ្ហាប្រឈម ដែលពួកគេកំពុងជួបប្រទះ។ ការស្តាប់សំឡេងរបស់កុមារ យុវជន និងសហគមន៍ដែលបាត់បង់ឱកាស អាចជួយធានាឲ្យអន្តរាគមន៍នានា ពិតជាអាចឆ្លើយតបទៅនឹងតម្រូវការរបស់ពួកគេ តាមបែបផែនដែលផ្តល់នូវប្រយោជន៍ច្រើនបំផុតដល់អ្នកដែលត្រូវការសេវាការគាំទ្រទាំងនោះ។
ការវិនិយោគលើកុមារ មានសារៈសំខាន់សម្រាប់ការអភិវឌ្ឍមនុស្ស។
វាយតម្លៃលើសកម្មភាព និងកែសម្រួលជាបន្តបន្ទាប់
ការពិនិត្យតាមដាន និងការវាយតម្លៃសកម្មភាពនានា មានសារៈសំខាន់យ៉ាងខ្លាំង ដើម្បីសម្រេចឲ្យបាននូវវឌ្ឍនភាព។ យូនីសេហ្វ គាំទ្ររាជរដ្ឋាភិបាលក្នុងការបង្កើតយន្តការពិនិត្យតាមដាន និងវាយតម្លៃអន្តរាគមន៍ផ្នែកកិច្ចការពារ សុខភាព និងអន្តរាគមន៍ក្នុងវិស័យដទៃទៀត ដើម្បីគាំទ្រដល់រាជរដ្ឋាភិបាលឲ្យឈានទៅសម្រេចចក្ខុវិស័យដែលចង់ឲ្យកុមារ និងក្មេងជំទង់កាន់តែច្រើននាក់ជាងមុន អាចចាកផុតពីភាពក្រីក្រ។
យើងធ្វើការចែករំលែក និងផ្ទេរជំនាញ ដើម្បីឲ្យស្ថាប័នរដ្ឋាភិបាល និងមិនមែនរដ្ឋាភិបាលនៅគ្រប់កម្រិតទាំងអស់ អាចបង្កើត និងប្រើប្រាស់ទិន្នន័យសម្រាប់ពិនិត្យតាមដាន និងវាយតម្លៃកម្មវិធីនានា។ កាន់តែជាក់លាក់ទៅទៀត យើងផ្តល់ការគាំទ្របច្ចេកទេសដល់ក្រសួងផែនការ និងក្រសួងសេដ្ឋកិច្ច និងហិរញ្ញវត្ថុ ដើម្បីរៀបចំបញ្ចប់ និងអនុវត្តយុទ្ធសាស្រ្តពិនិត្យតាមដាន និងវាយតម្លៃ ដើម្បីឲ្យប្រព័ន្ធពិនិត្យតាមដាន និងវាយតម្លៃរបស់ប្រទេសកម្ពុជា កាន់តែមានភាពរឹងមាំ និងអាចជឿទុកចិត្តបាន។
យើងក៏ផ្តល់ការគាំទ្របច្ចេកទេស និងការគាំទ្រហិរញ្ញវត្ថុដល់វិទ្យាស្ថានជាតិស្ថិតិ ដើម្បីបញ្ចូលសំណួរពាក់ព័ន្ធមួយចំនួនទៅក្នុងការអង្កេតតាមគ្រួសារ ដែលងនឹងធ្វើឡើងនៅទូទាំងប្រទេស។ កត្តានេះ ជួយឲ្យមានការបំពេញចំណុចចន្លោះខ្វះខាតផ្នែកទិន្នន័យ អំពីក្រុមពលរដ្ឋងាយរងគ្រោះ ដូចជាកុមារពិការជាដើម។ ជាមួយនឹងទិន្នន័យដែលអាចយកទៅប្រើប្រាស់បានបែបនេះ យើងកាន់តែអាចជួយគាំទ្រដល់រដ្ឋាភិបាលកាន់តែប្រសើរជាងមុន ដើម្បីធានាថាគ្មានកុមារណាម្នាក់ត្រូវបានគេទុកចោលទ្បើយ។