Övladınızın ayrılma qorxusunu necə idarə etməli
Balacanızı dəstəkləmək haqqında nələri bilməlisiniz.
- English
- Azərbaycanca
Uşağınızdan uzaqda vaxt keçirmək hər ikiniz üçün ağrılı ola bilər. Ancaq bəzən vidalaşmaq övladınızda narahatlıq və kədər hissi yaradır. Burada balacanızın çətin hisslərinin öhdəsindən gəlməsi və nəticədə özünü daha rahat və təhlükəsiz hiss etməsi üçün diqqət yetirməli olduğunuz bəzi məqamlar və kömək edə biləcək bəzi üsullar qeyd olunub.
Ayrılma qorxusu nədir?
Ayrılma qorxusu ən çox 6 aydan 3 yaşa qədər olan dövrü əhatə etməklə bir çox uşaqlarda müşahidə edilir. Valideynlər və ya baxıcıları çağaların və körpələrin göz önlərini tərk etdikdə onlar narahat olmağa başlaya bilər, çünki bu ayrılıqların müvəqqəti olduğunu hələ tam öyrənməyiblər.
Övladımda ayrılma qorxusunun olduğunu göstərən əlamətlər hansılar ola bilər?
Adətən bu əlamətləri görmək asandır: Uşağınızı bağçaya qoyarkən göz yaşlarına şahid olursunuzmu? Əlamətlərdən biri elə budur. Digərlərinə isə aşağıdakılar aiddir:
- Uşaqlarınızı tərk edib harasa gedəndə sızıldamağa başlayırlar
- Yeni vəziyyətlərdə ağlayır və ya sızıldayırlar (əsasən 6 ay – 3 yaş arasında)
- Siz və ya hər hansı digər baxıcı yanında olmasa yatmaq istəmirlər
- Bütün gecəni oyanmadan yata bilsələr də, gecələr oyanıb ağlayırlar
Unutmayın ki, yanlarında deyilsinizsə, çağanız və ya körpənizin narahat olması tamamilə təbiidir. Onlarla nəzakətli və mərhəmətli davranmaq lazımdır.
Övladıma necə kömək edə bilərəm?
Övladınızı qısa müddətə tərk etməli olduğunuz zaman özünüzü günahkar hiss etmək üçün heç bir səbəb yoxdur. Əvəzində uşağınıza kömək edin ki, hisslərini sizsiz idarə edə bilsin – bu həm də onun daha müstəqil olması istiqamətində atılan vacib addımdır.
- Birlikdə sonra nə edəcəyiniz haqqında danışın
Övladınızdan ayrılarkən onun narahatlıqlarının bir hissəsini sizi bir daha görə bilməmə qorxusu təşkil edir. Qayıdış planlarını müzakirə etməyiniz bu qorxunu azaltmağa kömək edir: “İşimi bitirdikdən sonra gəlib səni götürəcəm və uşaq meydançasına gedib birlikdə yelləncəklərdə oynayacayıq.”
- Qısa ayrılıqları məşq edin və daha uzunmüddətli ayrılıqlara hazırlaşın
Uşağınızı yaxın dostunuz və ya qohumunuzun yanında qoyaraq onu qısa müddətliyinə tərk edin və görün işlər necə gedir. Belə hallar balacanıza yavaş-yavaş ayrı qalmağın nə demək olduğunu öyrənməyə imkan verəcək.
- Uşağınızın ayrılığı asan keçirməsi üçün gedərkən ona yumşaq oyuncaq və ya ədyal verin
Uşağınızın rahatlıq tapdığı sevimli əşyası varmı? Yoxdursa, belə bir əşya seçmək yaxşı olar. Xüsusi bir oyuncaq uşaq məyus olduğu zaman onu sakitləşdirməyə kömək edə bilər.
- Uşaqlarınız qorxanda onları sakitləşdirin
Uşağınızla bir yerdə olanda onun nə dediklərini dinləyin. Həmişə anlayış və şəfqətlə cavab verin və onların qayğılarını əhəmiyyətsizləşdirməməyə çalışın. Qeyri-verbal işarələrə, məsələn, vurnuxma və ya zəhlətökənliyin olub-olmamasına diqqət yetirin.
- Yeni baxıcıları tədricən təqdim edin
Əgər uşağınız üçün yeni dayə təyin etmisinizsə, uşağınızı onunla tək qoymazdan əvvəl üçünüz birlikdə vaxt keçirin. Belə olduqda, uşağınızı nə vaxtsa həmin dayə ilə təklikdə qoymalı olanda, o, övladınız üçün artıq yad olmayacaq.
- Tez və müsbət şəkildə vidalaşın
Övladınızla vidalaşmaq təkcə onun üçün deyil, sizin üçün də çətin olur! Əlvida deyərkən bacardığınız qədər sakit və müsbət olmağa çalışın. Gülümsəyin, uşağınıza tezliklə onu görəcəyinizi söyləyin və ayrılmağınızı çox uzatmayın. Bu rejimə riayət etsəniz, övladınız sizin evdən çıxmağınıza alışacaq və geri dönəcəyinizə əmin olacaq.