50 տարվա մեջ առաջին անգամ բարելավվել են Գորիսում աշակերտների կրթական պայմանները
ՅՈՒՆԻՍԵՖ-ը և «Հայաստան» համահայկական հիմնադրամի Արգենտինայի գրասենյակը նոր գույք են տրամադրել Գորիսի դպրոցներին:
- Հասանելի է նաև:
- Հայերեն
- English
Պատկերացնու՞մ եք՝ դուք գնում եք դպրոց և նստում ձեր շա՜տ հին գրասեղանի մոտ մի դասարանում, որտեղ կես դարում հարյուրավոր աշակերտներ են սովորել, բայց որը երբեք չի վերանորոգվել՝ համայնքում ռեսուրսների բացակայության պատճառով:
Գորիսի թիվ 2 հիմնական դպրոցը հիմնադրվել է 1952-ին, ներկայիս մասնաշենքում գործում է 1972-ից։ Դպրոցն այժմ ունի 383 աշակերտ։ Չնայած վերջին երկու տարիներին և հատկապես՝ 2020-ի զինված հակամարտությունից հետո Գորիսը հայտնվել է ոչ կայուն վիճակում, առկա անվտանգային խնդիրները հանգեցրել են արտագաղթի, սակայն դպրոցի տնօրեն Մարինե Շահգելդյանը հպարտությամբ ընդգծում է՝ իրենց աշակերտների թիվը ոչ միայն չի պակասել, այլև ավելացել է 50-ով։ Դպրոցում սովորում են նաև Լեռնային Ղարաբաղից տեղահանված և համայնքում հաստատված 21 աշակերտ, որոնց ինտեգրվելու համար գործադրել են բոլոր ջանքերը։
«Մեր դպրոցը բազում անվանի շրջանավարտներ է տվել` բժիշկներ, գիտնականներ, ակադեմիկոսներ, ոսկե, արծաթե, մեդալակիրներ: Սակայն դպրոցում խնդիրները բավականին շատ են։ Դրանք մեծապես մեղմվել են վերջերս դպրոցին տրամադրված գույքի շնորհիվ, քանի որ նախորդը, որը շուրջ 16 տարվա էր, այլևս պիտանի չէր օգտագործման համար։ Դեռ նախորդ տարի բարձրաձայնել էի, որ դպրոցի գույքը հին է, աշակերտական սեղան-նստարանները բազմիցս վերանորոգվել էին և դրա հետևանքով այլևս կրկին վերանորոգում հնարավոր չէր կատարել», -
Դպրոցում այս կենսական փոփոխությունները հնարավոր են դարձել ՅՈՒՆԻՍԵՖ Արգենտինայի և «Հայաստան» համահայկական հիմնադրամի Արգենտինայի գրասենյակի համատեղ ջանքերի շնորհիվ։ Նպատակ ունենալով աշակերտների համար ապահովել զարգացման համար առավել հարմար և պատշաճ պայմաններ՝ Արգենտինայի հայ համայնքի աջակցությամբ, Գորիսի թիվ 2, թիվ 6 դպրոցները, ինչպես նաև Վերիշեն համայնքի դպրոցը ապահովվել են նոր կահույքով և կրթական նյութերով։ Դպրոցներին տրամադրվել է 496 գրասեղան, 990 աթոռ, 50 ուսուցչական սեղան, գրատախտակներ, և 100 գրապահարան՝ նաև դպրոցների գրադարանների համար:
Գորիս քաղաքի թիվ 2 հիմնական դպրոցի գրադարանում անսովոր ակտիվություն է տիրում։ Աշակերտները մեկը մյուսի հետևից անցնում են գրապահարանների դարակներով, ուսումնասիրում գրքերը, գտնում փնտրածը, տեղավորվում սեղանի շուրջ և լուռ կարդում։
Դպրոցի գրադարանը, որ երկար տարիներ անմխիթար վիճակում էր, վերջերս ամբողջությամբ վերափոխվել է։ Նոր գրապահարանները, սեղաններն ու աթոռները թարմ շունչ են հաղորել գրադարանին՝ դարձնելով այն աշակերտների համար առավել գրավիչ վայր:
«Դպրոցում փոփոխությունները միանգամից նկատել եմ. նոր գույքը ուրախացրել է ինձ ու դասընկերներիս։ Ավելի լավ է, որ նոր է, հիմա էլ չենք փչացնի», -
«Աշակերտներիս համար կարևոր է, թե ինչ միջավայրում ենք սովորում։ Թեև ուսուցիչներն ամեն ինչ անում են, որպեսզի աշակարտները ստանան լավագույն կրթություն, դասապրոցեսը լինի հնարավորինս հետաքրքիր, իսկ նյութերը՝ բոլորին հասանելի, սակայն այս ամենից զատ, շրջապատի հարմարություն ու տեսքն էլ շատ կարևոր է։ Նոր գույքը, սեղանները, գրապահարանը մեր դասարանն ավելի են գեղեցկացրել, հիմա ավելի հաճույքով ենք դպրոց գալիս»,
«Երեխաները դպրոցում են անցկացնում իրենց օրվա մեծ մասը, ուստի անվտանգ և համապատասխան միջավայրը կարևոր է և նպաստում է նրանց կրթության բարելավմանը: ՅՈՒՆԻՍԵՖ-ն աշխատել է ՀՀ Կրթության, գիտության, սպորտի և մշակույթի նախարարության հետ՝ դիտարկելու աջակցության կարիք ունեցող դպրոցները: Այս նախաձեռնության շրջանակում Սյունիքի դպրոցների ուսուցիչները աշակերտների համար լրացուցիչ պարապմունքներ են նաև կազմակերպելու, որպեսզի վերջիններս լրացնեն COVID-19-ի և հակամարտության պատճառով առաջացած բացը», -
Բացի դպրոցների կահավորումից՝ ՅՈՒՆԻՍԵՖ-ը և և «Հայաստան» համահայկական հիմնադրամը վերանորոգում են Գորիսի թիվ 5 մանկապարտեզը, նաև Վերիշենում և Արթիկում նախատեսնում են հիմնել երիտասարդական տներ: Նույն նախաձեռնության շրջանակում վերանորոգվելու է Վանաձորում ընտանիքի և երեխաների աջակցության կենտրոնը:
