10 կարևոր խորհուրդ ուսուցիչների բարեկեցության համար նոր կրթական կիսամյակին ընդառաջ

Հոգացե՛ք ձեր բարեկեցության և ինքնազգացողության մասին

ՅՈՒՆԻՍԵՖ
Ուսուցիճն աշխատում  երեծայի հետ դասասենյակում։
UNICEF Armenia/2020/Biayna Mahari
07 Սեպտեմբեր 2021

Սիրելի ուսուցիչներ, քանի որ կրթական տարին արդեն սկսվել է և դեռ կան ՔՈՎԻԴ-19-ով պայմանավորված բազմաթիվ մարտահրավերներ, կարևոր է չմոռանալ հոգ տանել ձեր բարեկեցության և ինքնազգացողության մասին։ Միայն այդպես դուք ավելի շատ դրական էներգիա կկուտակեք ձեր, ձեր աշակերտների և նրանց ընտանիքների համար:

Ներկայացնում ենք 10 մոտեցում, որ կարող եք կիրառել։

Սահմաններ դրեք

ՔՈՎԻԴ-19-ով պայմանավորված ուսումնական նոր պահանջները, առողջական և ընտանեկան խնդիրները հանգեցրել են բազմաթիվ ուսուցիչների սթրեսի մակարդակի բարձրացմանը: Անկախ նրանից՝ դասավանդում եք առցանց, թե՝ դասարանում, ամբողջ օրը անընդհատ հոգում եք աշակերտների կարիքները: Այդ ընթացքում, սակայն, մի՛ մոռացեք ժամանակ հատկացնել նաև ձեզ, ձեր ընտանիքին և ձեր սիրած զբաղմունքներին:

Ամենահեշտը ձեր ինքնազգացողությանն ու զգացմունքներին ուշադրություն դարձնելն է։ Նկատե՛ք այն ազդակները, որոնք հուշում են, որ ինչ-որ բան այն չէ։

Ժամանակ առանձնացրեք թե՛ դասերին պատրաստվելու, թե՛ հանգստանալու համար։

Կարող եք նաև հստակ ժամանակ առանձնացնել դասարանից դուրս աշակերտներին աջակցելու և օգնելու համար։ Համոզվեք, որ աշակերտները և նրանց ծնողները գիտեն, թե որն է ձեզ դիմելու ամենահարմար ժամանակը: Սկզբնական փուլում կարող եք նաև այս ընտրված ժամանակի վերաբերյալ հիշեցում դնել ինքներդ ձեզ համար։ Եթե նկատում եք, սակայն, որ մյուսները չեն հարգում ձեր հանգստի ժամանակը, նրբանկատորեն զրուցեք նրանց հետ և ներկայացրեք, թե որքան կարևոր է ձեր առողջության համար այդ առանձին ժամանակահատվածը։

Ժամանակ տրամարդեք լիցքաթափվելուն

Մտածեք այն մասին, թե ինչն է բարձրացնում ձեր տրամադրությունը, ինչն է օգնում հաղթահարել սթրեսը. երեխաների հետ խաղալը, զբոսնելը, ընկերների հետ զրուցելը, բույսեր խնամելը, գիրք կարդալը, թե՝ նոր բաղադրատոմսով ուտեստ պատրաստելը:

Ժամանակ նախատեսե՛ք ձեր հանգստի համար: Դա նույնքան կարևոր է, որքան ձեր աշխատանքը։

Շաբաթը նախապես ծրագրեք

Ուսումնական տարվա մեկնարկին հազար ու մի բան եք նախաձեռնել աշակերտներին այս անցումային փուլում աջակցելու համար: Ժամանակ մի կորցրեք և կազմեք ձեր օրակարգը: Օգտագործեք նոթատետր ձեր շաբաթը նախապես կազմակերպելու համար: Փոքր նպատակներ դրեք և համապատասխան ընդմիջումներ նախատեսեք: Դա կօգնի ձեզ ավելի լավ օգտագործել ձեր ժամանակը և կթեթևացնի չպլանավորված շատ անելիքների պատճառով առաջացող սթրեսը:

Պատվաստվեք

Պատվաստվելը կպաշտպանի ձեզ ՔՈՎԻԴ-19-ի ծանր հետևանքներից, հոսպիտալացումից և անգամ մահից։ Պատվաստվելով՝ ավելի ապահով և պաշտպանված կզգաք ձեզ դպրոց վերադառնալիս։ Այդպես նաև կպաշտպանեք ձեր ընտանիքին, ձեր աշակերտներին և նրանց ընտանիքներին: Պատվաստումից հետո հարկավոր կլինի հետևել բոլոր կանոններին, բայց հաստատ ձեզ ավելի ապահով և հանգիստ կզգաք։

Իրատես եղեք

Բոլորս ենք փորձում հարմարվել այս նոր իրավիճակին։ Այս անցումային շրջանում դուք միայն որոշակի հանգամանքներ կամ երևույթներ կարող եք վերահսկել։

Մի՛ տանջեք ինքներդ ձեզ, որպեսզի ապահովեք նույն ուսումնական փորձը, ինչ մինչ համավարակի սկսելն էիք ապահովում։ Դուք միայն մեկն եք և անում եք հնարավորը փոփոխություններին հարմարվելու համար: Ժամանակի ընթացքում բոլորս էլ կսովորենք և կհարմարվենք:

Ձեռք բերեք նոր հմտություններ և գնահատեք այն, ինչ արդեն ունեք

Ամբողջ աշխարհում ուսուցիչները հիմնականում պատրաստ չէին ապահովել կրթության շարունակականություն` հիմնականում սահմանափակ թվային հմտությունների պատճառով: Նոր հմտությունների ձեռքբերումն ու յուրացումը վստահություն կներշնչի և կօգնի ձեզ մասնագիտական նոր բարձրունքներ նվաճել։ Դուք կարող եք գրանցվել առցանց դասընթացների, սեմինարների, վեբինարների կամ դիտել տեսանյութեր՝ ձեր թվային հմտությունները զարգացնելու և այլընտրանքային ուսուցման մեթոդներին հարմարվելու համար: Նաև գնահատե՛ք այն հմտությունները, որոնք արդեն ունեք և որոնց շնորհիվ կարող եք շատ ավելին ձեռք բերել։

Եղեք բարի ձեր իսկ հանդեպ

Եթե գերբեռնված եք, պատմեք ձեր զգացմունքները մեկ այլ ուսուցչի, ընկերոջ կամ ընտանիքի անդամի։ Ձեր անմիջական ղեկավարի կամ դպրոցի ղեկավարի հետ զրույցը կօգնի նրանց հասկանալ ձեզ և համապատասխան աջակցություն առաջարկել։

Հիշեք, որ առողջ հարաբերությունները միայն դրական ազդեցություն կունենան ձեր աշակերտների վրա։

Շփվեք ընկերների հետ

Վարակի տարածումը սահմանափակելու համար կարող եք անհրաժեշտ ֆիզիկական, բայց ոչ՝ սոցիալական հեռավորություն պահպանել։ Կարևոր է, որ շարունակեք շփվել ձեր ընկերների, ընտանիքի և գործընկերների հետ։ Տոնեք ուրախ առիթները, թեկուզև՝ տեսազանգերի միջոցով, գրանցվե՛ք վիրտուալ աշխատանքային խմբերում: Աշխատեք կազմակերպել բացօթյա հանդիպումներ և դիմակ դրե՛ք՝ ըստ առողջապահության նախարարության պահանջի։

Ֆիզիկապես ակտիվ եղեք

Ապացուցված է, որ ֆիզիկական ակտիվությունը սթրեսի և անհանգստության դեմ պայքարելու հզոր միջոց է։ Կանոնավոր մարզվելով՝ դուք օրվա ընթացքում ավելի շատ էներգիա կունենաք, գիշերն ավելի լավ կքնեք, ավելի սուր հիշողություն կունենաք, ավելի հանգիստ կլինեք և ավելի լավատես կլինեք։ Նույնիսկ 10 րոպեանոց արագ քայլքը կարող է բարձրացնել տրամադրությունը և լավացնել ինքնազգացողությունը: Եթե դուք չեք կարող ամեն օր մարզասրահ հաճախել, խաղացեք ձեր երեխաների հետ կամ պարային երեկո կազմակերպեք։

Երբ կարիք լինի, դիմեք մասնագետի

Հոգ տարեք ձեր հոգեկան առողջության և բարեկեցության մասին։ Եթե ունեք դեպրեսիայի, անհանգստության և հյուծվածության նշաններ, դիմեք մասնագետի։ Հոգնած լինելը և տխրություն զգալը դեռ չի նշանակում, որ դուք ընկճախտի մեջ եք։

Ընկճախտի, հուզական այրման կամ հոգեկան առողջության այլ խնդիրների հիմնական նշաններն են․անընդհատ հոգնած զգալը, քնի հետ կապված խնդիրները, սրտի զարկերի և շնչառության արագացումը, վտանգի զգացումը, ախորժակի և քաշի կորուստը, մշտական գլխացավերը և պարբերաբար մարսողական խնդիրները։

Չբուժելու դեպքում վերջիններս կարող են խանգարել ձեր ուրախ և ակտիվ կյանքին: Այս ախտանշաններին ուշադրություն դարձնելը և բժշկական կամ հոգեբանական աջակցություն փնտրելն առաջին քայլն է, որ կօգնի ձեզ ավելի լավ զգալ և կանխել ավելի լուրջ առողջական խնդիրները: