Ուղեկցող հիվանդությունները և ՔՈՎԻԴ–19–ը

Կարո՞ղ են արդյոք ուղեկցող հիվանդություններ կամ հիմնական հիվանդություններ ունեցողները ստանալ ՔՈՎԻԴ–19–ի դեմ պատվաստանյութ:

Այո՛: ՔՈՎԻԴ–19–ի դեմ պատվաստումը խորհուրդ է տրվում ուղեկցող հիվանդություններ կամ հիմնական հիվանդություններ ունեցողներին, քանի որ նրանց դեպքում ավելի բարձր է ՔՈՎԻԴ–19–ի ծանր ընթացքի վտանգը: Թոքերի քրոնիկ հիվանդություն, սրտի լուրջ հիվանդություն, շնչուղիների հիվանդություն ունեցող, ծանր ճարպակալումով, դիաբետով, քաղցկեղով, լյարդի հիվանդությամբ, մարդու իմունային անբավարարության վիրուսով (ՄԻԱՎ) և ՁԻԱՀ–ով տառապող բնակչության տարբեր խմբեր ներգրավված են եղել ՔՈՎԻԴ–19–ի դեմ պատվաստանյութերի կլինիկական մի շարք փորձարկումներում: Արդյունքները ցույց են տվել ապահովության նույն ցուցանիշները, իսկ ՔՈՎԻԴ–19–ի դեմ պատվաստանյութերի դեպքում ապացուցվել է դրանց անվտանգությունը և արդյունավետությունը արդեն իսկ առկա, ծանր հիվանդացության հավելյալ վտանգ ենթադրող առողջական խնդիրներ ունեցող մարդկանց պարագայում: Պատվաստանյութերը հատկապես խորհուրդ են տրվում հղի և կրծքով կերակրող կանանց, ինչպես նաև նախկինում ՔՈՎԻԴ–19–ով հիվանդացած անձանց:

ՔՈՎԻԴ–19–ի դեմ պատվաստման առումով ի՞նչն է համարվում հիմնական/ուղեկցող հիվանդություն:

Մեկ կամ մի քանի ուղեկցող հիվանդություն ունեցող ցանկացած տարիքի անձանց դեպքում ավելի բարձր է ՔՈՎԻԴ–19–ով ծանր հիվանդանալու վտանգը: Ծանոթացեք ուղեկցող հիվանդությունների՝ վերը բերված ցանկին: Հաշվի առեք, որ այդ ցանկը սպառիչ չէ, և ներառում է միայն այն խնդիրները, որոնց դեպքում եղել են բավարար հիմքեր` եզրահանգումներ անելու համար: Նման խնդիրներ ունեցող անձանց համար պատվաստումը պետք է առաջնահերթություն լինի:

Թուլացած կամ ընկճված իմունային համակարգ ունեցող անձինք արդյոք պե՞տք է պատվաստվեն:

Թուլացած իմունային համակարգը ենթադրում է, որ անձի մարմնի իմունային համակարգը թերի է գործում առողջական խնդրի կամ ընդունվող դեղորայքի պատճառով: Թուլացած կամ ընկճված իմունային համակարգով անձինք պետք է պատվաստվեն ՔՈՎԻԴ–19–ի դեմ: Թույլ իմունային համակարգը նրանց ենթարկում է ՔՈՎԻԴ–19–ով ծանր հիվանդանալու ավելի մեծ վտանգի, իսկ պատվաստումն ապահովում է որոշակի պաշտպանվածության մակարդակ, որն ավելի լավ է, քան անպաշտպան լինելը:

Պատվաստման օգուտները էապես գերազանցում են հնարավոր վտանգները, և թուլացած իմունային համակարգով անձինք պետք է պատվաստվեն ՔՈՎԻԴ–19–ի դեմ: Խորհուրդ է տրվում խորհրդակցել ընկճված իմունային համակարգը բուժող բժշկի հետ՝ քննարկելու և հասկանալու պատվաստման վտանգները և օգուտները, այդ թվում՝ պարզել, թե ինչպես պետք է պատվաստանյութը ժամանակային առումով համադրվի առկա հիվանդության բերումով ընդունվող դեղորայքի հետ:

ՔՈՎԻԴ–19–ի դեմ պատվաստանյութերից որո՞նք են արդյունավետ ուղեկցող հիվանդություններ կամ հիմնական հիվանդություններ ունեցողների համար:

Չկան տվյալներ, որոնք կվկայեն, թե ՔՈՎԻԴ–19–ի դեմ այս կամ այն պատվաստանյութը ավելի լավ իմունիտետ է ապահովում ուղեկցող հիվանդություններ ունեցող անձանց համար: Ձեր երկրում հաստատված ցանկացած պատվաստանյութ կարելի է ընդունել: Եթե անգամ անձի ներկա իրավիճակը հուշում է, որ նրա օրգանիզմը կարող է ինչպես հարկն է չարձագանքել պատվաստանյութին, ապա, միևնույնն է, կարևոր է պատվաստվել ՔՈՎԻԴ–19–ի դեմ՝ ինչ-որ չափով անձամբ պաշտպանվելու և սիրելիներին պաշտպանելու համար: Պատվաստանյութերը չեն զրոյացնում վարակման վտանգը: Պատվաստվածները ևս կարող են վարակվել:

Այդուհանդերձ, պատվաստանյութը նվազեցնում է հիվանդության ծանր ձևերը, որոնք կարող են հանգեցնել հոսպիտալացման կամ մահվան: Կանխարգելիչ այլ միջոցներ ձեռնարկելը (օրինակ՝ դիմակներ կրելը, ուրիշներից առնվազն 1 մետր ֆիզիկական հեռավորություն պահպանելը և փակ տարածքներն օդափոխելը) պետք է շարունակել անգամ պատվաստումից հետո՝ ՔՈՎԻԴ–19–ից պաշտպանվելու համար:

Ուղեկցող հիվանդություններ ունեցող երեխաները պե՞տք է արդյոք պատվաստվեն ՔՈՎԻԴ–19–ի դեմ:

Ուղեկցող առողջական խնդիրներ ունեցող երեխաների դեպքում ավելի բարձր է ՔՈՎԻԴ–19–ով ծանր հիվանդանալու վտանգը: ՔՈՎԻԴ–19–ի վիրուսով վարակված երեխաների մոտ կարող են ի հայտ գալ հավանական վտանգ պարունակող բարդություններ, բազմահամակարգ բորբոքային ախտանիշներ, որոնք կարող են հանգեցնել կյանքի համար վտանգավոր խնդիրների: Պատվաստումը նրանց պաշտպանելու անվտանգ և արդյունավետ միջոց է, որը կարող է երեխաներին զերծ պահել լուրջ հիվանդացածությունից, եթե անգամ նրանք վարակվել են ՔՈՎԻԴ–19–ով: Եթե երեխան 12 տարեկան է կամ ավելի և ունի ուղեկցող հիվանդություն, ապա ՔՈՎԻԴ–19–ի դեմ երեխաների համար հաստատված պատվաստանյութերից որևէ մեկը ստանալը կենսական նշանակություն ունի երեխայի համար:

Սույն արշավը ստեղծվել է Ամերիկայի ժողովրդի աջակցությամբ՝ ԱՄՆ միջազգային զարգացման գործակալության միջոցով: Արտահայտված տեսակետները միմիայն հեղինակներինն են և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները: