Հառնելով պատերազմի մոխիրներից. 1946-1979 թթ.

Երկրորդ համաշխարհային պատերազմի ծխից ու մոխիրներից առաջացավ փախստականների այնպիսի ճգնաժամ, որպիսին աշխարհը դեռ չէր տեսել: Տեղի ունեցած ավերի պատճառով ստեղծվեց ՅՈՒՆԻՍԵՖ-ը՝ աշխարհի ամենախոցելի երեխաների բեռը թեթևացնելու համար:

1946

Միջազգային մանկական ճգնաժամային հիմնադրամը (ICEF) ստեղծվեց ՄԱԿ-ի Օգնության և վերականգնման վարչության կողմից՝ Երկրորդ համաշխարհային պատերազմից տուժած երեխաներին օգնելու համար: ICEF-ը, ընդհանուր առմամբ, զբաղվում էր երեխաների առողջության հարցերով և օգնություն էր հատկացնում բոլոր երեխաներին՝ առանց խտրականության:

1946 թվականի դեկտեմբերի 11-ին ՄԱԿ-ի Գլխավոր ասամբլեայի բանաձևով ստեղծվեց ՄԱԿ-ի մանկական հիմնադրամը (ՅՈՒՆԻՍԵՖ-ը):

1947-ից 1965

Մորիս Պատը գործադիր տնօրենի պաշտոնում 18 տարի ձգտել է արձագանքելու երեխաների կարիքներին առավել համակողմանիորեն: Նա նաև ամրապնդել է փոխհամաձայնությունն այն հարցի շուրջ, որ երեխաների կարիքները վեր են քաղաքականությունից:
 

1947

Ընդունվեց առաջին մասնավոր հատկացումը ՅՈՒՆԻՍԵՖ-ին: ՅՈՒՆԻՍԵՖ-ը ապավինում է միլիոնավոր աջակիցներին, որոնք կօգնեն փոփոխություն մտցնելու երեխաների կյանքում:

Նույն տարում Միացյալ Նահանգներում ստեղծվեց ՅՈՒՆԻՍԵՖ-ի առաջին Ազգային կոմիտեն: Ազգային կոմիտեները անկախ բարեգործներից բաղկացած աջակցող ցանցեր են, որոնք միջոցներ են հայթայթում՝ ամբողջ աշխարհում ՅՈՒՆԻՍԵՖ-ի գործունեությունը խթանելու համար:

1949

Թողարկվեց ՅՈՒՆԻՍԵՖ-ի առաջին բացիկը: ՅՈՒՆԻՍԵՖ-ի քարտերի վաճառքը կարճ ժամանակում դարձավ կազմակերպության ամենախոշոր և տևական դրամահավաք գործողություններից մեկը: ՅՈՒՆԻՍԵՖ-ի Ազգային կոմիտեները կոչված էին կարևոր դերակատարություն ունենալու գալիք յոթ տասնամյակների ընթացքում միլիարդավոր բացիկների վաճառքի ձևով:

1950

«Երեխաների տառապանքը թոթափելուն ուղղված շարունակական գործունեության անհրաժեշտությամբ» պայմանավորված՝ Միավորված ազգերի Գլխավոր ասամբլեան ընդլայնեց ՅՈՒՆԻՍԵՖ-ի մանդատը՝ շեշտը դնելով Եվրոպայից դուրս ապրող երեխաներին աջակցելու վրա:

1953

ՅՈՒՆԻՍԵՖ-ը դարձավ ՄԱԿ-ի մշտական գործակալություն: «Միջազգային» և «Ճգնաժամային» բառերը հանվեցին պաշտոնական անվանումից, սակայն հապավումը մնաց նույնը:

Ջրի, սանիտարիայի և հիգիենայի ոլորտներում ՅՈՒՆԻՍԵՖ-ի ծրագրերը նպատակ ունեին կրճատելու մանկական տարիքում առաջացող հիվանդությունների և մահվան կանխարգելելի դեպքերի թիվը: Ֆրամբեզիայի, բորոտության և տրախոմայի վերացմանն ուղղված արշավները չափազանց արդյունավետ էին:

1954

Ամերիկյան սիրված հանդիսավար Դեննի Քեյը դարձավ ՅՈՒՆԻՍԵՖ-ի «Բարի կամքի դեսպան»:

1956

1956-1957 թվականներին մոր և մանկան ապահովության ավելի քան 13 000 կենտրոն՝ 102 երկրից, օգտվել է ՅՈՒՆԻՍԵՖ-ի հատկացումներից և տեխնիկական վերապատրաստումներից:

1957

ՅՈՒՆԻՍԵՖ-ը մեկնարկեց սնուցման նոր ծրագրեր: Համայնքները վերապատրաստվեցին բանջարեղեն մշակելու, ձկնաբուծության, թռչնաբուծության և անասնապահության ասպարեզներում և կրթվեցին սնուցման թեմաներով:

1959

Երեխայի իրավունքների մասին ՄԱԿ-ի հռչակագրով սահմանվեցին պաշտպանության, կրթության, առողջապահության, կացարանի և լավ սնուցման վերաբերյալ երեխաների իրավունքները:

1961

ՅՈՒՆԻՍԵՖ-ն ընդլայնեց իր ուղղվածությունը՝ ներառելով երեխաների կրթությունը: Ամբղջ աշխարհում մեկնարկեցին կրթությանն աջակցող ծրագրեր, որոնք պետք է շարունակվեին գալիք տարիներին:

1964

Իտալիայի Բելաջիո քաղաքում տեղի ունեցած Բելաջիոյի համաժողովը (կամ «Երեխաները և երիտասարդները՝ զարգացումը պլանավորելու գործում» խորագրով միջազգային կլոր-սեղանը) կենտրոնացած էր երեխաների բարեկեցությունը զարգացման ազգային ծրագրերին կապակցելու ուղիների վրա:

1965

ՅՈՒՆԻՍԵՖ-ին շնորհվեց Խաղաղության նոբելյան մրցանակ՝ «Ազգերի միջև եղբայրությունը խթանելու» համար: Խաղաղության նոբելյան մրցանակի շնորհմամբ հանուն երեխաների գործունեությունը ճանաչվեց հանուն խաղաղության գործունեություն:

1967

Զգալիորեն հակադիր կարծիքների պայմաններում հաստատվեց ՅՈՒՆԻՍԵՖ-ի աջակցությունը ընտանիքի պլանավորման հարցերին: Ընտանիքի պլանավորմանը աջակցությունը տրամադրվում է մոր և մանկան առողջության համատեքստում:

1968

ՅՈՒՆԻՍԵՖ-ը օգնություն տրամադրեց Նիգերիայի և Վիետնամի քաղաքացիական հակամարտություններից տուժած մայրերին ու երեխաներին՝ հավատարիմ մնալով ոչ քաղաքական և ոչ խտրական աջակցության իր փիլիսոփայությանը:

1971

ՅՈՒՆԻՍԵՖ-ի Գործադիր խորհուրդը ընդլայնեց աջակցության իր գործունեությունը՝ ներառելով այնպիսի ծառայություններ, որոնցից «կօգտվեին քաղաքային ետնախորշերի և տնակային ավանների երեխաները»՝ տարիների ընթացքում ավելացնելով կազմակերպության գործունեության հասանելիությունն ու խորությունը:

Միավորված ազգերի գործակալությունները մոբիլիզացվեցին՝ Արևելյան Պակիստանից (որը այժմ հայտնի է որպես Բանգլադեշ) փախած միլիոնավոր փախստականներին տրամադրելով կացարան, սնունդ, սանիտարական պարագաներ և ջուր:

1973

ՅՈՒՆԻՍԵՖ-ն ընդլայնեց օգնությունը ոչ ֆորմալ (կանոնավոր դպրոցներից դուրս) կրթությանը, հատկապես գյուղաբնակ երեխաների ու երիտասարդների համար:

1975

Հայտնագործվեց Mark II ջրի պոմպը, որը վերափոխեց գյուղական կյանքը:

1978

ԱՀԿ-ի և ՅՈՒՆԻՍԵՖ-ի համատեղ կազմակերպած Ալմա Աթայի համաժողովը աշխարհի ուշադրությունը կենտրոնացրեց առաջնային բուժօգնության հարցերի վրա, և ընդգծվեց, որ ամբողջ աշխարհում առողջության ընդունելի մակարդակի հասնելու բանալին ընտանեկան առողջությանը համայնքահեն մոտեցումներ ցուցաբերելն է:

1979

Ապաքաղաքական կարգավիճակի շնորհիվ ՅՈՒՆԻՍԵՖ-ը կարողացավ առաջնորդել Միավորված ազգերին և Կարմիր խաչին Կամպուչիայի, այժմ՝ Կամբոջայի ամբողջ տարածքում վերականգնողական գործողություններ իրականացնելու հարցում:

Ծանոթացեք, թե ինչպես է ՅՈՒՆԻՍԵՖ-ը կենտրոնացրել միջազգային ջանքերը՝ ծառայելու երեխաներին ամբողջ աշխարհում:

Ծանոթաց՛եք մեր 1980 -1988 թվականների ժամանակագրությանը։