Ի՞նչ է անում ՅՈՒՆԻՍԵՖ-ը ՔՈՎԻԴ-19 համաճարակը կանխարգելելու համար

Այս արտակարգ իրավիճակում ինչպե՞ս է ՅՈՒՆԻՍԵՖ-ը աջակցում երեխաների կրթությանը։

ՅՈՒՆԻՍԵՖ-ն աջակցում է կառավարություններին նախապատրաստական և արձագանքման գործողություններ իրականացնելու հարցում։ Այդ թվում՝ ապահովելով, որ դպրոցներում անհրաժեշտ նախապատրաստական գործողություններ իրականացվեն, որպեսզի աշակերտները և ուսուցիչները պատշաճ տեղեկացված լինեն վարակից պաշտպանվելու միջոցների մասին, որպեսզի գործող դպրոցները անվտանգ լինեն, իսկ որտեղ դպրոցները չեն գործում, երեխաները շարունակեն կրթություն ստանալ այլ եղանակով։

Հայաստանում ՅՈՒՆԻՍԵՖ-ի աջակցությամբ Կրթական տեխնոլոգիաների ազգային կենտրոնում ստեղծվել է հեռավար դասընթացների նկարահանման երկրորդ հագեցած ստուդիան: Կենտրոնի հետ համատեղ մենք նկարահանելու ենք դասընթացներ և ստեղծելու ենք վիզուալ նյութեր, որպեսզի հարստացնենք առցանց դասերը: Միևանույն ժամանակ աշխատում ենք ուսուցիչների համար մեդիա գրագիտության հատուկ դասընթացների փաթեթի ստեղծման ուղղությամբ:

Ի՞նչ իրեր եք մատակարարում ՔՈՎԻԴ-19 համաճարակի դեմ պայքարելու համար։

Վարակի բռնկումից ցայսօր ՅՈՒՆԻՍԵՖ-ը երկրներին մատակարարել է ավելի քան 4,27 միլիոն զույգ ձեռնոց, 573,300 վիրահատական դիմակ, 98,931 N95 շնչառական դիմակ, 156,557 բժշկական համազգեստ և 12,750 ակնոց։

Մարտի 1-ից սկսած՝ երեք առաքում, ընդհանուր առմամբ 8 տոննա կշռով, հաջողությամբ հասել են Թեհրան։ Մատակարարված իրերը բաժանվել են ամենավարակված վեց տարածքների բուժհաստատություններին և հիվանդանոցներին։ Առաջիկայում նախատեսում ենք նաև 18,5 տոննա կշռով ապրանքներ ուղարկել այդ երկիր։

Հայաստանում ՅՈՒՆԻՍԵՖ-ը առողջապահական ու հիգիենայի պարագաներ է տրամադրել ՀՀ առողջապահության, աշխատանքի ու սոցիալական հարցերի, ինչպես նաև կրթության, գիտության, մշակույթի և սպորտի նախարարություններին:

Ինչպե՞ս եք դուք պաշտպանում փախստականների ճամբարներում կամ նմանատիպ այլ տարածքներում ապրող մարդկանց

Փախստականների ճամբարներում կամ նման այլ վայրերում ապրող երեխաները և ընտանիքները հատկապես խոցելի են վարակվելու և վարակը տարածելու առումով, մասնավորապես այն վայրերում, որտեղ մարդկանց թիվը մեծ է, իսկ ձեռքերը լվանալու կամ այլ սանիտարահիգիենիկ հարմարություններ չկան։

Նմանատիպ համայնքներում մենք աշխատում ենք կանխարգելել վարակի տարածումը՝ տեղեկացնելով վտանգների մասին, դպրոցներին և բուժհաստատություններին հիգիենայի և բժշկական պարագաներ տրամադրելով, գնահատելով բռնկման ազդեցությունը, որպեսզի կարողանանք ապահովել խնամքի, կրթության և սոցիալական ծառայությունների շարունակականությունը։

ՅՈՒՆԻՍԵՖ-ը շարունակում է կոչ անել կառավարություններին՝ փախստական, միգրանտ և տարհանված բնակչության համար ապահովել կանխարգելման և բուժման ծառայությունների հասանելիություն, այդ թվում առողջապահական ծառայությունների, ջրի, սանիտարահիգիենիկ պարագաների, կրթության և պաշտպանության։ ՅՈՒՆԻՍԵՖ-ը և գործընկերները նույնպես հարմարեցնում են իրենց կրթական ծրագրերը, որպեսզի տարհանված երեխաները ևս շարունակեն ուսումը առցանց ուղիներով՝ միևնույն ժամանակ շարունակելով սոցիալ-հգեբանական աջակցություն տրամադրել թե՛ գաղթի ճանապարհը բռնած երեխաներին և թե՛նրանց խնամակալներին։

Ի՞նչ է անում ՅՈՒՆԻՍԵՖ-ը, որպեսզի այս իրավիճակում աջակցի պատվաստումային արշավներին։

Հաշվի առնելով ստեղծված իրավիճակն ու խորհուրդ տրվող կանխարգելիչ միջոցառումները՝ այդ թվում՝ սոցիալական հեռավորություն պահպանելու կանոնը, կարծում ենք, որ ավելի լավ է ժամանակավորապես դադարեցնել պլանային պատվաստումները, քանի որ վարակվելու և վարակը ավելի տարածելու վտանգը մեծ է։

Առողջապահական համակարգը արդեն իսկ ծանրաբեռնված է պայքարելով կորոնավիրուսի դեմ, հետևաբար՝ դժվար թե բուժաշխատողները կարողանան ապահովել պատվաստման մեծ ու որակյալ ծածկույթ։ Պետությունները պետք է վերագնահատեն այս խաթարումներով պայմանավորված պլանային պատվաստումների շղթայում առաջացած դադարները և հետաձգեն դրանք։ Սա նաև վերաբերում է տնայցերին։