ԵՄ-ն և ՅՈՒՆԻՍԵՖ-ն աջակցել են Սյունիքում 30 նախադպրոցական հաստատություների անվտանգ վերաբացմանը

2020թ-ի աշնանը Եվրոպական միության կողմից ֆինանսավորվող «Ապագան այսօր» ծրագրի աշխատակիցները ուղևորվեցին Հայաստանի հարավ՝ Սիսիան, Քաջարան, Գորիս, Տաթև և Մեղրի՝ ծրագիրն իրականացնող գործընկեր «Լիարժեք կյանք» ՀԿ-ին 70 տուփ հիգիենայի պարագաներ տրամադրելու։ Այս իրերը պետք է բաժանվեին Սյունիքի 23 մանկապարտեզներին և 7 նախակրթարաններին, որպեսզի այդ հաստատությունները շարունակեն աշխատել նաև համավարակի ժամանակ։

«Վաղ մանկական խնամքի և կրթական ծառայությունները շատ կարևոր են երեխաների և երիտասարդ ընտանիքների համար: Որպեսզի երեխաները չկորցնեն վաղ մանկական զարգացման փուլի հնարավորությունները և պատրաստ լինեն դպրոցին, մեզ համար շատ կարևոր է աջակցել այս հաստատությունների անվտանգ վերաբացմանը, չնայած համավարակը դեռ չի նահանջել, բայց թեժ պահերի հետ համեմատած՝ ավելի վերահսկելի է», - ասաց ՅՈՒՆԻՍԵՖ Հայաստանի կրթական ծրագրերի ղեկավար Ալվարդ Պողոսյանը։

Այցելեցինք Գորիսի թիվ 4 մանկապարտեզ և այնտեղ հանդիպեցինք հինգամյա Սուսաննային և չորսամյա Յանային, ովքեր օգնում էին դաստիարակին դասավորել «Ապագան այսօր» ծրագրի շրջանակում ստացած հիգիենայի պարագաները։ Երեխաներն արդեն անգիր գիտեին համաճարակային կանոնները։ Սուսաննան ցույց էր տալիս, թե մատակարարված հակահամաճարակային պաստառների վրա նշված քայլերից քանիսն է կրկնում ձեռքերն ամեն անգամ լվալիս, և թե ինչպես է պետք դնել դիմակը վարակից պաշտպանվելու համար։

«Ճիշտ է՝ ներառական վաղ մանկական խնամքի և կրթական հաստատությունները չափազանց կարևոր են երեխաների համար, բայց ես չէի ցանկանա թերագնահատել այդ ծառայությունների կարևորությունը ընտանիքների և համայնքների համար։ Կարծում եմ՝ կարող ենք հանգիստ ասել, որ մայրերը, ովքեր երեխաների հիմնական խնամողներն են, շահում են, երբ իրենց երեխաները հաճախում են վստահելի մանկապարտեզներ։ Շատ հետազոտություններ փաստում են, որ այսպիսի ծառայությունների բացակայությունը խոչընդոտում է կանանց՝ հասարակության կյանքին ակտիվ մասնակցությանը և իրենց ուրույն տեղը գրավելուն, կրթություն ստանալուն և վերապատրաստումներին մասնակցելուն, ինչպես նաև խաչընդոտում է տնտեսական հզորացմանը նպաստող նախաձեռնություններին մասնակցությանը»,- ասաց ԵՄ դեսպան Անդրեա Վիկտորինը։ «Հայ կանայք արդեն իսկ շատ բեռ ունեն իրենց ուսերին, իսկ վաղ մանկական խնամքի և կրթական ծառայությունների հասանելիությունը կարևոր խնդիր է հատկապես մարզերում բնակվող ընտանիքների համար։ ԵՄ-ն հաստատակամորեն աջակցում է այս խաչընդոտների վերացմանը և քաջալերում է կանանց՝ զարգացող Հայաստանում ավելի ակտիվ և տեսանելի դերակատարում ունենալ»։

Երեքամյա Նատալին էլ, որ թիվ 5 մանկապարտեզի միջին խմբում ամենաաշխույժներից էր, հաստատեց տնօրենի խոսքերը։ «Շատ ուրախ եմ, որ եկել եմ պարտեզ, որովհետև ընկեր Արմինեն դաշնամուր է նվագում, իսկ մենք երգում ու պարում ենք»։

Հարցրի՝ ինչ է կորոնավիրուսը, ասաց․ «Կորոնավիրուսը չար բան է, բարի չէ։ Պիտի հեռանա»։ Հարցրի՝ ինչ անենք, որ հեռանա, պատասխանեց․ «Պիտի դիմակ դնել ու լվացվել»։

Արի՛ ու մի համաձայնվիր երգ ու պար սիրող այս խելացի աղջկա հետ:

2020թ-ի աշնանը ՅՈՒՆԻՍԵՖ-ը, Եվրոպական միության ֆինանսավորմամբ և գործընկերների՝ «Լիարժեք կյանք» և «Քայլ առ քայլ» կազմակերպությունների հետ համագործակցությամբ Հայաստանի հինգ մարզերում՝ Գեղարքունիքում, Սյունիքում, Լոռիում, Շիրակում և Տավուշում ավելի քան 355 մանկապարտեզի և նախակրթարանի համար հիգիենայի պարագաներ, ախտահանիչ նյութեր և հակահամաճարակային կանոնների վերաբերյալ պաստառներ է տրամադրել։ Ավելի քան 18,206 երեխա ավելի ապահով ու պաշտպանված կլինի՝ միաժամանակ շարունակելով հաճախել նախադպրոցական հաստատություն և կրթություն ստանալ։ Ընդհանուր առմամբ՝ 124 համայնքների համար մատակարարվել է 661 արկղ հիգիենայի պարագաներ, այդ թվում՝ 14,916 շիշ հեղուկ օճառ, 6,882 շիշ ձեռքերն ախտահանելու նյութ, 500 տուփ ռետինե ձեռնոց (100 հատ), 559 հատ KN95 դիմակ, 15,610 բժշկական դիմակ, 592 զույգ տնտեսական ձեռնոց և 323 ոչ կոնտակտային ջերմաչափ։ Ինչպես նաև մատակարարվել է 678 տարա 5 լիտրանոց ախտահանիչ հեղուկ՝ նախատեսված մակերեսների համար և 4,500 հատ հակահամաճարակային կանոնների վերաբերյալ պաստառ։

Հոդվածը ստեղծվել է ԵՄ ֆինանսական աջակցությամբ։ Բովանդակության համար պատասխանատու է «Ապագան այսօր» ծրագիրը, և պարտադիր չէ, որ այն արտահայտի ԵՄ տեսակետները։