Բարելավվել են Սյունիքի դպրոցների սանիտարահիգիենիկ պայմանները
ՅՈՒՆԻՍԵՖ-ը ԱՄՆ կառավարության ֆինանասավորման շնորհիվ հիմնանորոգել է Սյունիքի 5 դպրոցների 17 սանհանգույցները:
- Հասանելի է նաև:
- Հայերեն
- English
8-ամյա Անժելան դպրոցի սանհանգույցում մանրակրկիտ լվանում է ձեռքերը, ասում է՝ լավ մաքրելու համար անհրաժեշտ է լվանալ ձեռքերն առնվազն 20 վայրկյան:
Երրորդ դասարանում սովորող աղջնակը նշում է՝ այս ուսումնական տարվանից է, որ չի խուսափում դպրոցում սանհանգույցից օգտվել։ Մինչ այս հոտն ու պայմաններն այնպիսին էին, որ անգամ կողքով անցնելն էր տհաճ։ «Հիմա համ օճառ կա դրված, համ էլ ջուրն է լավ հոսում», - ասում է Անժելան։
Գորիս քաղաքի թիվ 3 դպրոցը Սյունիքի մարզում ամենամեծ հիմնական դպրոցն է, որտեղ 553 աշակերտ է սովորում, ներառյալ՝ 2020թ-ին տեղահանված 44 երեխաները: 2022թ-ի տարեվերջին ՅՈՒՆԻՍԵՖ-ը ԱՄՆ կառավարության ֆինանսական աջակցության շնորհիվ հիմնանորոգել է տարրական դասարանների մասնաշենքի սանհանգույցները. չորսը՝ աշակերտների, մեկը՝ աշխատակազմի համար։ Բազմաթիվ խնդիրներ ունեցող դպրոցում սա իսկապես կարևոր փոփոխություն է։ Այս նույն նախագծի շրջանակում վերանորոգվել է նաև Կապանի թիվ 1 և թիվ 6 դպրոցների, ինչպես նաև Որոտան և Բռնակոթ գյուղերի դպրոցների սանհանգույցները. ընդհանուր առմամբ 17 սանհանգույց է հիմնանորոգվել: Ընդհանուր առմամբ, մարզում կրթական պայմանները բարելավվել են մոտ 1750 աշակերտի և 250 ուսուցչի և աշխատակցի համար:
Սյունիքի մարզի Գորիս քաղաքի թիվ 3 դպրոցում չեն էլ հիշում, թե վերջին անգամ սանհանգույցները երբ էին վերանորոգվել։
«Տարրական դպրոցի սանհանգույցների վերանորոգումը և ավելի հիգիենիկ պայմաններից օգտվելու հնարավորությունը մի ձեռքբերում է, որի համար շատ ուրախ են և՛ ծնողները, և՛ աշակերտները, և՛ ուսուցչական կազմը», - նշում է դպրոցի դասվարներից մեկը՝ Ռիտա Շալունցը։
Հիմնվելով նախնական կարիքների գնահատման վրա՝ ՅՈՒՆԻՍԵՖ-ը ՀՀ կրթության, գիտության, մշակույթի և սպորտի նախարարության և համայնքապետարանի հետ համատեղ ընտրեց հինգ դպրոց, որտեղ կարիքը մեծ էր:
«Դպրոցների սեյսմիկ անվտանգության բարելավման ազգային ծրագրին զուգահեռ՝ մենք թիրախավորել ենք այն դպրոցները, որոնք կարելի էր մասամբ վերանորոգել՝ հիմնանորոգման մեջ չմտնելով, բայց նաև, ի լրումն, 2020թ-ի սեպտեմբերի զինված հակամարտությունից հետո տեղահանված երեխաներ էին ընդունել, և այդպիսով կրթական պայմանների բարելավման խիստ կարիք կար», -
«Դպրոցների սանիտարահիգիենիկ պայմանների բարելավումը ՅՈՒՆԻՍԵՖ-ի համար միշտ էլ առաջնահերթություն է և հատկապես կարևոր էր ՔՈՎԻԴ-19-ի համավարակի պայմաններում վարակի հետագա տարածումը կանխելու համար»:
Դպրոցի ուսումնական գծով փոխտնօրեն Սերգեյ Ավանեսյանը, որը ևս այս դպրոցում է սովորել 1990-ականներին, փաստում է՝ սանհանգույցներն իր սովորելու տարիներից չէին փոխվել և շատ անմխիթար վիճակում էին։ «Անկեղծ ասած՝ երբեմն ծնողները, հաշվի առնելով սանհանգույցների վիճակը, խուսափում են իրենց երեխային մեր դպրոց ընդունել։ Այս տարի մենք զգացինք, որ դա էլ է ազդել, և մեր ընդունելությունը շատ լավ էր», - անկեղծանում է ուսումնական գծով փոխտնօրեն Ավանեսյանը:
Գորիսից շուրջ 45 կմ հեռավորության վրա գտնվող Բռնակոթ գյուղի միակ դպրոցի սովետական տարիներից շահագործվող շենքը ևս երբևէ չի վերանորոգվել ո՛չ հիմնովին, ո՛չ էլ մասնակի, չնայած որ դպրոցում սովորում է 189 աշակերտ։ ՅՈՒՆԻՍԵՖ-ը ԱՄՆ կառավարության միջոցներով ոչ միայն հիմնանորոգել է այս դպրոցի 5 սանհանգույցները, այլ նաև փոխել է դասասենյակներում առկա հին գույքը:
«Սանհանգույցները կոսմետիկ վերանորոգվել էին տարիներ առաջ, բայց ոչ հիմնովին, ինչի հետևանքով անընդհատ խնդիրներ էին ծագում։ Այժմ հիմնանորոգվել է հինգ սանհանգույց, սակայն դեռ չորսն էլ հիմնանորոգման ենթակա են», - հավելում է փոխտնօրեն Արուսյակ Գրիգորյանը: «Ես էլ ծնող եմ և ցանկանում եմ, որ երեխաս սովորի բարեկարգ, ջեռուցված դպրոցում։ Ճիշտ է գազ ունենք, տաքացնում ենք վառարաններով, բայց օրինակ, սպորտդահլիճն աշնան և ձմռան ամիսներին շատ ցուրտ է»:
14-ամյա Անահիտ Խաչատրյանը սովորում է 9-րդ դասարանում։ Ասում է՝ այս ուսումնական տարին սկսել են ավելի խանդավառ, քանի որ շրջակայքում կարևոր փոփոխություններ են եղել՝ նոր գույք, նոր սանհանգույցներ։ «Սովորողի համար իհարկե գույքը կապ չունի, բայց այսպիսի պայմաններում ավելի հաճույքով ես գալիս դասի ու չես մտածում, որ նստարաններից շորդ կճղես», - ասում է աշակերտուհին: Անահիտը նշում է՝ ֆիլմերում հաճախ է տեսնում, թե ինչպիսին են դպրոցներն այլ երկրներում ու երազում, որ մի օր էլ իրենց մոտ այդպես կլինի։ «Լավ է, որ արդեն մեզ մոտ էլ տաք ջուր կա, ձեռքերը չորացնելու սարք և ձեռքերդ էլ չես քսի շորերիդ՝ չորացնելու համար», - ժպտալով ասում է աղջիկը։
Ի լրումն այս դպրոցների կրթական պայմանների բարելավմանը, ՅՈՒՆԻՍԵՖ-ը ԱՄՆ կառավարության ֆինանսական աջակցության շնորհիվ դրամական աջակցություն է տրամադրել ավելի քան 3000 երեխաներին և նրանց ընտանիքներին, ինչպես նաև սոցիալ-հոգեբանական աջակցություն ավելի քան 17000 երեխաների և 5000 ծնողների և խնամակալների: Այս նախաձեռնության շրջանակում ՅՈՒՆԻՍԵՖ-ը նաև վերանորոգում և վերակահավորում է երեխայի և ընտանիքի աջակցման 7 պետական կենտրոններ՝ բարելավելու խոցելի երեխաներին և նրանց ընտանիքներին տրամադրվող համայնքային ծառայությունները:
