Ափշիֆթ՝ ոչ ֆորմալ կրթություն ստանալու հնարավորություն երիտասարդների համար
Ափշիֆթը միավորում է Սյունիքի դեռահասներին՝ լուծելու համայնքային խնդիրները:
- Հասանելի է նաև:
- Հայերեն
- English
Վերլուծական մտածողություն, ստեղծագործ միտք, խնդիրները լուծելու, առաջնորդելու, հաղորդակցվելու և ինքնակրթվելու հմտություններ. ահա թե ինչ է պահանջված լինելու աշխատաշուկայում մինչ 2027թ-ը՝ համաձայն Համաշխարհային տնտեսական ֆորումի նոր՝ 2023թ-ին հրապարակված զեկույցի:
Եվ հենց այս հմտություններն է ՅՈՒՆԻՍԵՖ-ը փոխանցում Ափշիֆթ երիտասարդական ծրագրի մասնակիցներին: Եվրոպական միության աջակցությամբ իրականացվող Ափշիֆթ նախաձեռնության հերթական կանգառը Գորիսն է: Քսան երիտասարդ հավաքվել է մեկ հարկի տակ՝ ներկայացնելու իրենց համայնքի խնդիրները և այդ խնդիրները լուծելու իրենց թիմի գաղափարը: Այսօրվանից սկսած՝ ստանալով 100 հզ դրամ ֆինանսավորում, թիմերը կսկսեն իրականացնել իրենց նախագծերը:
Մինչ այսօրվան հասնելը՝ տարբեր փուլեր են եղել: Երեք բնակավայրերի՝ Վերիշենի, Քարահունջի, Շինուհայրի դպրոցներում տեղեկատվական հանդիպումներ են անցկացվել երիտասարդների հետ: Դրան զուգահեռ ՅՈՒՆԻՍԵՖ-ի և ԵՆԿ-ի կողմից Գորիսի մամուլի ակումբի աջակցությամբ՝ վերապատրաստվել են Սյունիքի մենթորները: Հետո երիտասարդները մասնակցության հայտ են ուղարկել՝ ներկայացնելով խնդրի լուծման իրենց գաղափարը: Ստացված տասներեք հայտերից ընտրվել են երեքը: Երիտասարդների համար կազմակերպվել է ծրագրի մշակման դասընթաց և յուրաքանչյուր թիմին կցվել է մենթոր:
Այսօր Գորիսում տեղի ունեցող բուքեմփին Գորիսի համայնքապետարանի ներկայացուցիչները ողջունեցին երիտասարդներին և պատրաստակամություն հայտնեցին հետագայում օգնել թիմերին ծրագրերի իրականացման գործում, երիտասարդներին կարևոր մանրամասներ փոխանցվեց: Նրանց ներկայացվեց, թե ինպես պետք է ներկայացնել ծրագիրը, կարդալ պայմանագիրն ու ներկայացնել հաշվետվություն: Նաև հստակ հայտարարվեց, որ թիմերը մինչև հուլիսի վերջ պետք է իրականացրած լինեն իրենց նախագծերը. ժամանակը կառավարելու հմտությունը շատ կարևոր է:
«Ինձ համար թիմն առաջնորդելու առաջին փորձն էր: Թիմի հետ աշխատելը, թիմին համախմբելը հեշտ գործ չի: Հատկապես ավարտական դասարան ենք, բոլորի ժամանակը սուղ է: Բայց դե կարևոր է բոլորի մասնակցությունը, պետք է լսել թիմում բոլորին ու բոլորով որոշում կայացնել», -
Ռաֆին բնակվում է Վերիշենում: Իր թիմի հետ միասին հույս ունի խթանել գյուղատնտեսությունը, հատկապես՝ անասնաբուծությունը: Նրանք հատուկ սարք են մտածել, որ ցորենը ծլեցնելով կարողանան հինգից-վեց օրում երեք կիլոգրամ ցորենից տասնութ կիլոգրամ խոտ աճեցնել: «Քանի որ վերջին շրջանում տարածքների կորուստ է եղել, ու անասունների խոտը քչացել է, մարդիկ վաճառում են անասունները, լքում են մեր բնակավայրերը: Այս սարքով ստացված խոտի ինքնարժեքը տուկից էժան է ստացվում», - մտահոգված պատմեցին թիմակիցները:
Ափշիֆթ Սյունիքի մասնակից մյուս թիմն էլ ցանկանում է երիտասարդների համար ստեղծել կարդալու ու շփվելու լրացուցիչ հնարավորություն: Քարահունջում ունեն գրադարան-ընթերցասրահ, որ ժամանակին ակտիվ գործում էր, իսկ վերջին շրջանում տարածքն օգտագործվում էր այլ նպատակներով: Մտածել են, որ գյուղը պետք է անպայման ունենա գործող գրադարան-ընթերցարահ, որն էլ շատ հարմար վայր էհավաքվելու, շփվելու, կարդալու, ինքնակրթվելու ու զարգանալու համար:
«Կկազմակերպենք կինոդիտումներ, կունենանք տարբեր սեղանի խաղեր, ու կոգեշնչենք մեր համագյուղացիներին գալ, ակտիվ լինել, օգտվել գրքերից ու արդեն կձևավորենք ակտիվ երիտասարդների ակումբ և կշարունակենք լուծել գյուղի խնդիրները՝ հերթավ-կարքավ-շարքավ», -
Տաթևը նշեց, որ Քարահունջում խնդիրները շատ են՝ «տրանսպորտի խնդիր կա, սողանքային հարցեր կան, գյուղում աշխատանք չկա»:
Թիմն արդեն հասցրել է ստորագրահավաք կազմակերպել ու գտնել համայնքում համախոհների: Հետո խոսել են վարչական ղեկավարի հետ և վերջինս խոստացել է օգնել, գրադարանը-ընթերցասրահը նորից գործարկել:
«Սա ֆինանսներ կառավարելու իմ առաջին փորձն էր. Իրականացրել եմ գնահարցում, շրջել եմ տարբեր խանութներով, գտել ինձ անհրաժեշտ պարագաները՝ դուրս բերելով գին-որակ լավագույն համադրությունը: Մենթորի օգնությամբ կազմեցի մեր նախագիծն իրականացնելու համար անհրաժեշտ բյուջեն: Սա կարևոր փորձառություն էր, քանի որ ապագայում ցանկանում եմ ֆինանսիստ դառնալ», -
Երրորդ թիմն էլ, հաշվի առնելով զինված հակամարտության հնարավորությունը, կարևոր է համարում դպրոցում նորմալ բուժկետ ունենալը: Նրանք պլանավորում են համալրել բուժկետն անհրաժեշտ պարագաներով և իրականացնել առաջին բուժօգնության վերապատրաստումներ դպրոցում, այդպիսով բարձրացնելով արտակարգ իրավիճակներին դպրոցի պատրաստվածությունը:
«Շինուհայրում էլ խնդիրները շատ են: Մեր դպրոցում մարզադահլիճ չունենք, քիմիայի լաբարատորիա չունենք, բայց միևնույն է բուժկետի հարցն այսօր ավելի կարևոր է», - միաձայն փաստեցին թիմի անդամները:
«Սկզբից խուսափում էի խոսել, վախենում էի կարծիք հայտնել, բայց մի քանի հանդիպում հետո, ինձ ավելի վստահ զգացի: Հիմա հանգիստ արտահայտում եմ իմ կարծիքը, շփվում թիմի անդամների հետ», - կիսվեց 15-ամյա Անին:
«Գաղափարը նախագիծ դարձնելու, այն գրագետ ներկայացնելու, թիմում աշխատելու, համագործակցելու, ինքնավստահ լինելու և տասնյակ այլ հմտություններից զատ՝ ամենակարևորն այն է, որ Ափշիֆթի շնորհիվ երիտասարդները համայնքին սկսում են նայել պահանջատեր քաղաքացու աչքով: Նրանք սկսում են ոչ միայն նկատել խնդիրները, այլև փնտրել դրանց լուծումները: Ամբողջական ցիկլ ենք ապահովում՝ խնդրից՝ լուծում, որի ընթացքում երիտասարդը ոչ թե պասիվ մասնակիցն է, այլև ակտիվ դերակատարը. ինքն է որոշում՝ որ խնդիրն է առաջնային և ինչպես կարելի է դա լուծել», -ասաց Աննա Եղոյանը՝ Ափշիֆթի դասընթացավարը:
Տասներեքամյա Նոնան էլ հավելեց. «Իրականում, միշտ նկատել եմ համայնքի խնդիրները, դրանք միշտ մտահոգել են ինձ, բայց երբեք չէի մտածում, որ կարող եմ ինքս էլ, համախմբվելով ընկերների հետ, լուծել դրանք»:
«Ուզում ենք նաև ապացուցել, որ երիտասարդները համայնքի մեջ մեծ խնդիրներ կարող են լուծել, որ բոլորի համար կարող է օգտակար լինի: Մենք մտահոգված ենք մեր համայնքի խնդիրներով», -
Հարցին, թե ինչ է անհրաժեշտ երիտասարդներին, որ նրանք ավելի ակտիվ զբաղվեն համայնքի գործերով, պատասխանեց. «Ընկերներ, օգնող կողմեր, իհարկե, վստահություն և մոտիվացիա տվող ա՜յ այսպիսի նախագծեր. մեր գյուղում սա առաջին հնարավորությունն էր», -ասաց Տաթևը:
«Փոքր համայնքներում երիտասարդների համար ոչ ֆորմալ կրթություն ստանալու հնարավորությունները դեռևս քիչ են, և շատ կարևոր է երիտասարդների համար ստեղծել այդ հնարավորությունը՝ անկախ նրանց բնակության վայրից: Ափշիֆթ Սյունիքի առանձնահատկությունը նաև համագործակցությունն է, կամ ավելի ճիշտ՝ դրա խթանումը նույն մարզի տարբեր համայնքների միջև: Միայն տարբեր համայնքների միջև համագործակցության շնորհիվ կարելի է հասնել մարզում ավելի մեծ փոփոխությունների և երիտասարդության ներուժի իրացման ողջ մարզի կտրվածքով», -
ՅՈՒՆԻՍԵՖ-ն աշխատում է Կրթության, սպորտի և մշակույթի նախարարության և քաղաքացիական հասարակության գործընկերների հետ՝ խթանելու դեռահասների հնարավորությունները ողջ Հայաստանում: Երիտասարդները ամեն ինչ կարող են անել, ցանկացած վերելքի կարող են հասնել, նրանց միայն պետք է տալ ավելի բարձր թռչելու հնարավորություն:
