Ավելի կանաչ Հայաստան. դարձնենք իրականություն

1. Միասին կազմե՛ք առանց թափոնի էկո-հավաքածու, որը ներառում է.

1. Տաք և սառը հեղուկների համար բազմակի օգտագործման բաժակ կամ շիշ

2. Թաշկինակ կամ որևէ կտոր՝ որպես անձեռոցիկ օգտագործելու համար

3. Բազմակի օգտագործման սպասք, ձողիկներ և կերակրափայտիկներ

4. Գնումների բազմակի օգտագործման պայուսակներ

2. Հրաժարվե՛ք մեկանգամյա օգտագործման իրերից:

Պլաստիկ փաթեթավորումը, փայլաթիթեղը, թղթե սրբիչները և փականով պլաստիկե պայուսակները կարող են հարմար լինել, բայց դրանց օգտագործման արդյունքում մեծ քանակի թափոն է առաջանում: Որևէ բան թխելիս փոխարինե՛ք փայլաթիթեղը կամ յուղաթուղթը սիլիկոնե գորգիկով, թղթե սրբիչները և անձեռոցիկները՝ կտորե սրբիչներով, որոնք կարելի է լվանալ և նորից օգտագործել: Օգտագործե՛ք կտորե անձեռոցիկներ, լաթեր, սպասքի սրբիչներ և նույնիսկ տակդիրներ, ինչպես նաև սննդի պահման բազմակի օգտագործման տարաներ և լվացվող պայուսակներ:

3. Հրաժե՛շտ տվեք մեկանգամյա օգտագործման իրերին, փոխարենը սկսե՛ք հավաքել:

Այնպիսի պարագաները, ինչպիսիք են խորտիկների համար տուփերը, սուրճի պատիճները և մեկանգամյա օգտագործման դանակ-պատառաքաղները, քիչ ժամանակ ու ջանք են պահանջում, բայց դրանց փաթեթավորման հետևանքով գոյանում են զգալի թափոններ: Գնե՛ք չփաթեթավորված սննդամթերք կամ հանրախանութ գնալիս ձեզ հետ վերցրե՛ք բազմակի օգտագործման տարաներ և պայուսակներ՝ դրանով իսկ խնայելով ձեր ժամանակն ու գումարը:

4. Ո՛չ ասեք մեկանգամյա օգտագործման ջրի շշերին և սուրճի բաժակներին:

Հակառակ տարածված կարծիքի՝ սուրճի մեկանգամյա օգտագործման թղթե բաժակները չեն վերամշակվում ներքին ծածկույթի պատճառով: Փոխարենը գավա՛թ օգտագործեք: Եվ ինչո՞ւ չփորձել թերմոս օգտագործել, ինչպես տաք, այնպես էլ սառը ըմպելիքների համար:

5. Խուսափե՛ք թեյի փաթեթներից և փոխարենը քամի՛չ օգտագործեք:

Թեյի պլաստիկե փաթեթը մեկ բաժակ թեյի մեջ կարող է արտազատել միկրոպլաստի շուրջ 11 միլիարդ մասնիկ: Նույնիսկ թեյի թղթե փաթեթները պարունակում են փոքր քանակությամբ պոլիպրոպիլեն, ինչի պատճառով դրանք ենթակա չեն վերամշակման և կենսաքայքայման: Վայելե՛ք թեյը առանց թափոնի՝ գնելով չփաթեթավորված թեյ և օգտագործելով թեյի քամիչ:

6. Փոխե՛ք ցնցուղ/լոգանք ընդունելու սովորությունը՝ շշալցված ապրանքների փոխարեն օգտագործելով օճառի սալիկներ:

Խնամքի և կոսմետիկական միջոցներ արտադրող ընկերությունները սկսել են արտադրել շամպուն, կոնդիցիոներ և լոգանքի համար օճառ սալիկների տեսքով: Եթե ​​ձեր մազերը լվանում եք շաբաթը երեք կամ չորս անգամ, դա նշանակում է մեկ տարվա ընթացքում օգտագործում եք 24, իսկ 10 տարվա ընթացքում՝ 240 սրվակ, և այս ամենը վերածվում է պլաստիկ թափոնի:

7. Վերաօգտագործե՛ք ապակե տարաներն ու պլաստմասե սպասքը:

Պիտակները հեռացնելուց հետո վերաօգտագործե՛ք սննդի դատարկ տարաներն ու ապակյա իրերը: Օգտագործե՛ք պլաստիկե տոպրակը կամ պլաստմասե տարաները հնարավորինս երկար:

8. Ինքնե՛րդ պատրաստեք ձեռքի ախտահանող միջոցներ:

Օրգանական ծագման, ոչ թունավոր ախտահանող միջոցը պատրաստվում է սպիրտի, ջրի, բուսական գլիցերինի, հալվեի և եթերայուղերի խառնուրդով: Այս անվտանգ հակաբակտերիալ միջոցը օգտակար է թե՛ ձեր դրամապանակի, թե՛ շրջակա միջավայրի համար: Այն պետք է պարունակի 60 % սպիրտ՝ կորոնավիրուսային բոլոր մանրէները ոչնչացնելու համար:

9. Ատամի խոզանակը, բամբակյա բարձիկները, զուգարանի թուղթը և նույնիսկ հագուստը փոխարինե՛ք բամբուկից պատրաստված տարբերակներով:

Բամբուկը օրական աճում է մոտ 3,5 ֆուտ (106.7 սմ), ինչը նրան դարձնում է պլաստիկի լավագույն փոխարինիչը: Էկոլոգիապես մաքուր է և կենսաքայքայվող: Պարզապես հիշե՛ք նախքան դեն նետելը բամբուկե ատամի խոզանակից հեռացնել խոզանը:

10. Միջադիրների փոխարեն օգտագործե՛ք հատուկ դաշտանային բաժակներ:

Սկսե՛ք օգտագործել դաշտանային բաժակ և բազմակի օգտագործման միջադիրներ: Եթե ուզում եք ձեր ներդրումն ունենալ միջավայրի պահպանման գործում կամ գումար խնայել, նկատի՛ ունեցեք, որ դաշտանային բաժակներից թափոն չի գոյանում՝ բացի սկզբնական փաթեթավորումից:

11. Եթե հնարավոր է, շշալցված ջրի փոխարեն ընտրե՛ք ծորակի ջուրը:

Աշխարհում յուրաքանչյուր րոպե գնում են խմելու ջրի 1 միլիոն պլաստիկե շիշ: 1 միլիոն՝ յուրաքանչյուր րոպեում…

12. Գրասենյակում խուսափե՛ք թղթիկների վրա նշումներ անելուց և մի՛ տպեք կամ տպեք երկկողմանի:

Նշումներ կատարելու համար օգտագործե՛ք ձեռքի տակ եղած օգտագործված թղթերը կամ գրատախտակ: Ցանկալի է խուսափել թղթի վրա նշումներ անելուց: Օգտագործե՛ք թղթի երկու կողմերը՝ փոխելով ձեր համակարգչի կարգավորումներն այնպես, որ երկկողմանի տպվի: Պակաս կարևորության փաստաթղթեր կազմելիս նվազեցրե՛ք միջտողային հեռավորությունը և լուսանցքները:

13. Վերամշակելի պարագաները տո՛ւն տարեք:

Եթե ձեր գրասենյակում վերամշակման ենթակա պարագաները բազմակի չեն օգտագործվում, տո՛ւն տարեք դրանք կամ նախաձեռնե՛ք թափոնի վերամշակման ծրագիր գրասենյակում: Նախ խոսե՛ք ղեկավար անձնակազմի հետ կամ դիմե՛ք «Համայնքների կայուն զարգացման նորարարական լուծումներ» ՀԿ-ին: