ՅՈՒՆԻՍԵՖ-ի գործունեության 75 տարին
Վերաիմաստավորելով ապագան յուրաքանչյուր երեխայի համար 1946 թվականից ի վեր
75 տարի շարունակ ՄԱԿ-ի մանկական հիմնադրամը (ՅՈՒՆԻՍԵՖ) անխոնջ գործունեություն է ծավալել հանուն երեխաների իրավունքների և յուրաքանչյուր երեխայի բարօրության: Անկախ նրանից, թե ովքեր են նրանք և որտեղ են ապրում:
ՅՈՒՆԻՍԵՖ-ը հանդես է եկել որպես ամբողջ աշխարհում երեխաների կյանքը փոխող անկասելի ուժ:
ՅՈՒՆԻՍԵՖ-ի հիմնադրումից ի վեր՝ Երկրորդ համաշխարհային պատերազմից հետո, մենք կանգնած են եղել մարդասիրական ճգնաժամերի, զինված հակամարտությունների և բնական աղետների հաղթահարման առաջնագծում: Չընկրկելով ճգնաժամի ծավալներից՝ մենք ընդունում ենք մարտահրավերը, վերանայում ամեն հնարավորը և օգնում միլիոնավոր երեխաների՝ գոյատևելու և զարգանալու: Մեր գործունեության շրջանակն ընդգրկել է 191 երկրներ ու տարածքներ՝ անձնվեր համագործակցությունները և նորարարությունները կարևորելու շնորհիվ:
ՅՈՒՆԻՍԵՖ-ի պատմությունը
Երբ աշխարհի ամենախոցելի երեխաներին հարկավոր է եղել հենարան, ՅՈՒՆԻՍԵՖ-ը նրանց կողքին է եղել:
Զինված հակամարտությունների, բնական աղետների և մարդասիրական ճգնաժամերի ընթացքում կարճատև օգնությունից մինչև գոյատևմանն ու զարգացմանն ուղղված երկարատև ծրագրերի միջոցով մենք աջակցել ենք ձևավորելու առողջապահության և բարեկեցության դիմակայուն համակարգեր աշխարհի բոլոր ծագերում: Հաղթահարել ենք հիվանդություններ, տրամադրել առաջնային անհրաժեշտության ծառայություններ, կրթություն և հմտություններ, ինչպես նաև զարգացրել ենք ավելի առողջ ու ապահով միջավայր երեխաների և նրանց ընտանիքների համար ամենուրեք:
1946 թվականից ի վեր ՅՈՒՆԻՍԵՖ-ի առաքելությունը ծավալվել է ամբողջ աշխարհի երեխաների կարիքներին համապատասխան:
Ապագան. վերաիմաստավորելով աշխարհը յուրաքանչյուր երեխայի համար
Այսօր աշխարհը դարձյալ կանգնած է բազմակի ճգնաժամերի առաջ. ՔՈՎԻԴ-19-ի համավարակ, կլիմայի փոփոխություն, համատարած սոցիալական և տնտեսական մարտահրավերներ և ահագնացող աղքատություն և անհավասարություն: Այս մարտահրավերներն ազդում են բոլորիս վրա, սակայն ամենացավոտ հարվածը դրանք հասցնում են ամենախոցելի երեխաներին:
Ներկան. երեխայի իրավունքների ճգնաժամի հաղթահարումը մե՛ր անելիքն է
Խաթարմանը հետևում է հնարավորությունը: Ճիշտ ինչպես վեր հառնեցինք Երկրորդ համաշխարհային պատերազմի թողած ավերներից, այսօր էլ մեր նպատակը շարունակում է մնալ գլոբալ վերականգնման ապահովումը՝ առաջնահերթություն տալով երեխաներին ուղղված ներդրումներին: Դրան հասնելու համար մենք կիրառում ենք մեր 75-ամյա փորձը հետևյալ առաջնահերթ ոլորտներում:
Պատվաստանյութեր բոլորի համար
Երեխաների կյանքին մեր բերած ամենախոշոր նպաստներից մեկը եղել է նրանց մահացու հիվանդություններից զերծ պահելը: Իմունիզացիային ուղղված մեր համաշխարհային ջանքերն օգնել են միլիոնավոր երեխաների՝ գոյատևելու և մեծանալու ավելի առողջ, երջանիկ և ուժեղ: Քանի դեռ ՔՈՎԻԴ-19-ի դեմ պատվաստանյութի բաշխումը շարունակվում է COVAX հարթակի միջոցով, մենք շարունակում ենք կառավարությունների և մասնավոր հատվածի հետ մեր համագործակցությունը՝ ապահովելու համար, որ պատվաստանյութերը հասնեն յուրաքանչյուրին՝ ներառյալ ամենածայրահեղ վիճակում գտնվողներին և անտեսվածներին:
Ուսումնառություն բոլորի համար
ՅՈՒՆԻՍԵՖ-ի Վերաիմաստավորել կրթությունը նախաձեռնությունը հեղաշրջում է ուսումնառության ու հմտությունների զարգացման մեջ՝ յուրաքանչյուր երեխայի տրամադրելով որակյալ կրթություն թվային ուսուցման, համացանցի հասանելիության, սարքավորումների տրամադրման, մատչելի տվյալների և երիտասարդների ներգրավման միջոցով:
Ներդրումներ հոգեկան առողջության ասպարեզում
Հոգեկան խանգարումների կեսը առաջանում է մինչև անձի 15 տարեկանը լրանալը, իսկ 75 տոկոսը՝ մինչև վաղ չափահասության տարիքը: Մենք կոչ ենք անում ներդրումներ անելու և միջոցներ ձեռնարկելու՝ երեխաների և երիտասարդների հոգեկան առողջությունը պաշտպանելու ուղղությամբ, ինչպես նաև վերջ դնելու անտեսման, չարաշահման դեպքերին և մանուկ հասակում վրա հասնող վնասվածքներին, որոնք հանգեցնում են կենսական վատ հետևանքների:
Կլիմայական ճգնաժամի հաղթահարում
Կլիմայի փոփոխությունը չի հապաղելու, 17 երկրում նախատեսված ջրաքանակն ամեն տարի գերածախսվում է, ուստի մենք պետք է վերաիմաստավորենք ջրով ապահովված աշխարհը երեխաների համար: Հստակ քայլեր ձեռնարկելով՝ մենք այժմ կարող ենք դիմակայել կլիմայի փոփոխություններին, պաշտպանել մեր միջավայրը և կառուցել ավելի լավ աշխարհ մեր երեխաների ու գալիք սերունդների համար:
Յուրաքանչյուր երեխայի համար
