ՅՈՒՆԻՍԵՖ-ի և Եվրոպական միության աջակցությամբ Լոռու մարզում ևս մեկ նախակրթարան է հիմնվել

Այսուհետ, Չկալով գյուղում բնակվող փոքրիկները նախադպրոցական կրթություն ստանալու հնարավորություն կունենան

01 Հունիս 2023
Երեխաները ՅՈՒՆԻՍԵՖ-ի աշխատակցի հետ նստած են խոտի վրա և զրուցում են
UNICEF Armenia/2023/Margaryan

Երևան, 1 հունիսի, 2023 թ. - ՀՀ կրթության, գիտության, մշակույթի և սպորտի (ԿԳՆ), տարածքային կառավարման և ենթակառուցվածքների նախարարությունների, Լոռու մարզային իշխանությունների և այլ գործընկերների հետ համակարգմամբ և համագործակցությամբ և Եվրոպական միության ֆինանսական աջակցությամբ ՅՈՒՆԻՍԵՖ-ը Թումանյան խոշորացված համայնքի Չկալով բնակավայրում նոր նախակրթարան է հիմնել: Չկալովը համայնքի ամենափոքր բնակավայրերից է, որի չափահաս բնակչության թիվը 156 է, իսկ երեխաներինը՝ 46: Այսօրվանից այս փոքրիկ գյուղում ապրող 12 երեխա վաղ ուսումնառություն ստանալու հնարավորություն կունենա, իսկ փոքրիկներից 6-ն արդեն իսկ հաճախում են նախակրթարան:

2014-2017 թվականների ընթացքում ՅՈՒՆԻՍԵՖ-ը և գործընկերները Թումանյան խոշորացված համայնքի 10 բնակավայրերից 4-ում արդեն հիմնել են այլընտրանքային նախադպրոցական ծառայություններ: Այսօրվա դրությամբ համայնքի 5 բնակավայրերում (Աթան, Ահնիձոր, Մարս, Շամուտ և Չկալով) բնակվող փոքրիկները նախակրթարան են հաճախում: Թումանյան համայնքը հոգում է նախակրթարանի պահպանման, գույքի կառավարման, ինչպես նաև դաստիարակների աշխատավարձի հետ կապված ծախսերը:

«Այս նախակրթարանը շատ կարևոր է և՛ իմ, և՛ որդուս համար: Այստեղ նա սովորում է այն, ինչը ես չեմ կարող սովորեցնել նրան տանը,օրինակ, սոցիալական հմտություններ ու խաղ այլ երեխաների հետ: Այս մանկապարտեզի շնորհիվ ես աշխատանք գտա և հիմա աշխատում եմ՝ իմանալով, որ երեխաս այդ ընթացքում սովորում և զարգանում է։ Այնքան ուրախ եմ, որ երրորդ երեխաս ունի այս հնարավորությունը և ափսոսում, որ մեծ աղջիկներս՝ Միլենան և Ելենան, նման հնարավորություն չունեցան, քանի որ գյուղում այն ժամանակ նախակրթարան չկար», - ասում է նախակրթարանի սան Գառնիկի մայրիկը՝ Հասմիկ Քոչինյանը:

2012 թվականին ՄԱԿ-ի Գլխավոր ասամբլեան հունիսի 1-ը հայտարարեց որպես Ծնողների համաշխարհային օր՝ հարգանք մատուցելու և տոնելու աշխարհի բոլոր խնամակալներին: Ծնողավարությունը չափազանց բարդ աշխատանք է, որպեսզի ծնողներն ու խնամակալներն այն միայնակ անեն: Նրանք աջակցության կարիք ունեն՝ իրենց երեխաների համար կյանքի լավագույն սկիզբն ապահովելու համար:

«ՅՈՒՆԻՍԵՖ-ը մեծ նշանակություն է տալիս ծնողներին և խնամակալներին վստահելի աջակցություն տրամադրելու գործին, որպեսզի վերջիններս հաջողության հասնեն ամենակարևոր գործերից մեկում՝ երեխաներին մեծացնելու հարցում: Վաղ ուսումնառության և զարգացման ծառայությունների հզորացումն այս աջակցության առանցքային մասն է: Մենք աշխատում ենք կառավարությունների, տեղական ինքնակառավարման մարմինների, քաղաքացիական հասարակության և այլ գործընկերների հետ՝ երեխաների, ինչպես նաև ծնողների ու խնամակալների համար վաղ ուսումնառության հնարավորությունները հասանելի դարձնելու հեռավոր և փոքր բնակավայրերում, որոնք հաճախ զրկված են այս հնարավորությունից»,- նշել է Հայաստանում ՅՈՒՆԻՍԵՖ-ի ներկայացուցչի տեղակալ Սիլվիա Մեստրոնին:

Որակյալ նախադպրոցական ուսումնառությունը երեխայի կյանքի հիմնաքարն է: Հաջորդող կրթական փուլերը հիմնված են այս վաղ փուլում ձեռք բերված հաջողության վրա: Այնուամենայնիվ, Հայաստանում նախադպրոցական տարիքի ավելի քան 200,000 երեխա, որից շուրջ 60,000-ը՝ գյուղաբնակ, ընդգրկված չեն նախադպրոցական ծառայություններում: Մինչև 2023 թվականի ավարտը ՅՈՒՆԻՍԵՖ-ը, գործընկերների հետ համագործակցությամբ, Հայաստանի մյուս գյուղական համայնքներում կհիմնի ևս 10 այլընտրանքային նախադպրոցական կենտրոն և կշարունակի համագործակցել Կառավարության և գործընկերների հետ՝ ապահովելու, որ երեխաները հավասար կրթական մեկնարկ ունենան:

Սրանով ՅՈՒՆԻՍԵՖ-ը նպաստում է ՀՀ կառավարության վաղ ուսումնառության հասանելիության ընդլայնման ծրագրին, այն է՝ 500 մանկապարտեզների վերանորոգմանը և կառուցմանը:

Մամուլի հարցերով պատասխանատու

Զառա Սարգսյան
Հաղորդակցման ծրագրերի ղեկավար
ՅՈՒՆԻՍԵՖ Հայաստան
Հեռ: 37477232169
Հեռ: 37410580174
Էլ. Փոստ: zsargsyan@unicef.org

ՅՈՒՆԻՍԵՖ-ի մասին

ՅՈՒՆԻՍԵՖ-ն աշխատում է, որպեսզի Հայաստանում յուրաքանչյուր երեխա լինի սիրված, սնված և խնամված: Հիմնվելով ավելի քան 75-ամյա միջազգային փորձի և Հայաստանի երեխաների համար գրեթե 30 տարվա հաջողությունների վրա՝ ՅՈՒՆԻՍԵՖ-ը պարտավորություն է ստանձնում բարելավելու ամենախոցելի՝ աղքատության և մեկուսացման մեջ ապրող երեխաների կյանքը: Ծնվելու պահից մինչև ավագ դպրոցի ավարտը՝ ՅՈՒՆԻՍԵՖ-ն աշխատում է իր գործընկերների հետ, որպեսզի Հայաստանում յուրաքանչյուր երեխա և ընտանիք կարողանա օգտվել իր համար նախատեսված քաղաքականություններից և ծառայություններից:

Ստեղծման պահից ի վեր՝ ՅՈՒՆԻՍԵՖ-ն ամբողջությամբ ֆինանսավորվում է անհատների, մասնավոր հատվածի, հիմնադրամների և կառավարությունների կամավոր նվիրատվություններով:

Հայաստանում ՅՈՒՆԻՍԵՖ-ի գործունեությանը ավելի մանրամասն ծանոթանալու համար կարող եք այցելել www.unicef.am և www.babycef.am կայքերը կամ հետևել մեզ հետևյալ սոցիալական հարթակներում` FacebookTwitterInstagram և YouTube-ում: