ՅՈՒՆԻՍԵՖ-ը AstraZeneca-ի հետ ՔՈՎԻԴ-19 պատվաստանյութերի մատակարարման համաձայնագիր է կնքել
- Հասանելի է նաև:
- Հայերեն
- English
Կոպենհագեն/Նյու Յորք, 1-ը մարտի, 2021 թ. – ՅՈՒՆԻՍԵՖ-ը և AstraZeneca-ն երկարաժամկետ համագործակցության համաձայնագիր են ստորագրել՝ COVAX միջազգային նախաձեռնության անունից ՔՈՎԻԴ-19-ի դեմ AstraZeneca պատվաստանյութի մատակարարման վերաբերյալ։
Մատակարարման պայմանագրի համաձայն՝ ՅՈՒՆԻՍԵՖ-ին և գործընկերներին, ինչպիսիք են Առողջապահության Համաամերիկյան կազմակերպությունը (PAHO), հասանելի կլինի 85 երկրի համար նախատեսված պատվաստանյութի՝ մինչև 170 միլիոն դեղաչափ: Pfizer-ի և Հնդկաստանի «Serum Institute»-ի հետ արդեն կնքված համաձայնագրերից հետո, սա ՔՈՎԻԴ-19-դեմ պատվաստանյութերի վերաբերյալ երրորդ համաձայնագիրն է։
Փետրվարի 15-ին AstraZeneca / oքսֆորդյան պատվաստանյութը ընդգրկվել է ԱՀԿ-ի՝ արտակարգ իրավիճակներում օգտագործման ցանկում (WHO Emergency Use Listing)։
Պատվաստանյութերի մատակարարումը նախատեսվում է սկսել 2021-ի առաջին եռամսյակում՝ COVAX-ի տեղաբաշխման շրջանակի համաձայն, որը հաշվի է առնում մի շարք գործոններ` ներառյալ երկրի պատրաստվածությունը, ազգային կարգավորող մեխանիզմները և պայմանագրային դրույթների ապահովումը, ինչպես նաև գործառնական և մատակարարման նկատառումները:
COVAX միջազգային նախաձեռնության նպատակն է՝ ՔՈՎԻԴ-19-ի դեմ պատվաստանյութերն անվտանգ և արդյունավետ հասանելի դարձնել բոլոր երկրների համար՝ անկախ դրանց տնտեսական վիճակից:
COVAX կառույցը, որը համաղեկավարում են «Gavi» պատվաստանյութերի դաշինքը, CEPI-ն և ԱՀԿ-ն, ՅՈՒՆԻՍԵՖ-ի հետ համատեղ, նպատակ ունի մինչև 2021 թվականի ավարտն ապահովել ՔՈՎԻԴ-19 հաստատված պատվաստանյութերի առնվազն 2 միլիարդ չափաբաժին: Մասնակից երկրներին դա հնարավորություն կտա պաշտպանել առաջնագծում աշխատողներին՝ առողջապահական ոլորտի և սոցիալական աշխատողներին, ինչպես նաև բարձր ռիսկային գոտում և խոցելի խմբերում գտնվող մարդկանց:
Մամուլի հարցերով պատասխանատու
ՅՈՒՆԻՍԵՖ-ի մասին
ՅՈՒՆԻՍԵՖ-ն աշխատում է, որպեսզի Հայաստանում յուրաքանչյուր երեխա լինի սիրված, սնված և խնամված: Հիմնվելով 70-ամյա միջազգային փորձի և Հայաստանի երեխաների համար 25 տարվա հաջողությունների վրա՝ ՅՈՒՆԻՍԵՖ-ը պարտավորություն է ստանձնում բարելավելու ամենախոցելի՝ աղքատության և մեկուսացման մեջ ապրող երեխաների կյանքը: Ծնվելու պահից մինչև ավագ դպրոցի ավարտը՝ ՅՈՒՆԻՍԵՖ-ն աշխատում է իր գործընկերների հետ, որպեսզի Հայաստանում յուրաքանչյուր երեխա և ընտանիք կարողանա օգտվել իր համար նախատեսված քաղաքականություններից և ծառայություններից:
Ստեղծման պահից ի վեր՝ ՅՈՒՆԻՍԵՖ-ն ամբողջությամբ ֆինանսավորվում է անհատների, մասնավոր հատվածի, հիմնադրամների և կառավարությունների կամավոր նվիրատվություններով:
Հայաստանում ՅՈՒՆԻՍԵՖ-ի գործունեությանը ավելի մանրամասն ծանոթանալու համար կարող եք այցելել www.unicef.am և www.babycef.am կայքերը կամ հետևել մեզ հետևյալ սոցիալական հարթակներում` Facebook, Twitter, Instagram և YouTube-ում:
