Երեխաների համաշխարհային օրվան ընդառաջ Հայաստանի բոլոր մարզերի երեխաները բարձրաձայնում են իրենց իրավունքների մասին

19 Նոյեմբեր 2022
Դեռահասները շրջանով նստած քննարկում են անցկացնում
UNICEF Armenia/2022/Galstyan

ԵՐԵՎԱՆ, 19-ը նոյեմբերի 2022 թվական- Հայաստանում Երեխաների համաշխարհային օրվա կապակցությամբ ՅՈՒՆԻՍԵՖ-ը միավորել է ջանքերը Մարդու իրավունքների պաշտպանի աշխատակազմի հետ՝ աջակցելու Մարդու իրավունքների պաշտպանին առընթեր երեխաների և երիտասարդների իրավունքների հարցերով հասարակական խորհրդի գործարկմանը: Հասարակական խորհրդի գործունեությունը կնպաստի երկրում երեխայի իրավունքների անկախ մշտադիրտարկմանը և կամրապնդի երեխաների՝ իրենց վերաբերող որոշումների կայացմանը մասնակցելու և կարծիք արտահայտելու իրավունքները: Սա կարևոր քայլ է Հայաստանում երեխաների մասնակցությունն ապահովելու առումով, քանի որ առաջին անգամ է, որ պաշտոնապես ստեղծվում է նման հասարակական խորհուրդ։ 

Նոյեմբերի 18-ին և 19-ը ՅՈՒՆԻՍԵՖ-ը և ՄԻՊ-ի աշխատակազմը խորհրդի անդամներին ներկայացրել են Երեխայի իրավունքների մասին ՄԱԿ-ի կոնվենցիան, Հայաստանում երեխայի իրավունքներին առնչվող իրավական դրույթները: Եվրոպական միության աջակցությամբ, ՅՈՒՆԻՍԵՖ-ը և ՄԻՊ-ի աշխատակազմը նաև իրականացրել են խորհրդի անդամների կարողությունների զարգացում, փաստերի հավաքագրման, հրապարակային խոսքի և քարոզչության, ինչպես նաև հոգեկան առողջության և բուլինգի թեմաներով քննարկումներ: Թեմաները նախապես ընտրվել են խորհրդի անդամների կողմից:

ՄԻՊ աշխատակազմը ներկայացրել է Մարդու իրավունքների պաշտպանի գրասենյակի ատեղծման պամությունը, անդրադարձել է՝ ինչ է անում աշխատակազմը երեխայի իրավուքների պաշտպանության համար, ինչ մեխանիզմներ են կիրառվում: Խորհրդի հետ իրականացվել են ֆոկուսային քննարկումներ իրավիճակային խնդիրների լուծման վերաբերյալ: ՅՈՒՆԻՍԵՖ-ի աշխատակազմը ներկայացրել է ՅՈՒՆԻՍԵՖ-ի դերը Երեխայի իրավունքների կոնվենցիայի դրույթների իրականացման հարցում, քննարկվել են երեխայի տարբեր իրավունքներ, Հայաստանում երեխաների իրավունքների ոլորտում առկա հիմնախնդիրները և դրանց հնարավոր լուծումներ: 

Միջոցառումներին ներկա էր ՅՈՒՆԻՍԵՖ-ի աջակից և Մանկական Եվրատեսիլի հաղթող Մալենան: «Եկել է ժամանակը, որ մենք՝ երեխաներս կարողանանք ավելի վստահ բարձրաձայնել մեր խնդիրները և մեծերից պահանջենք՝ ապահովել յուրաքանչյուր երեխայի յուրաքանչյուր իրավունքի իրացումը: Ուրախ եմ ծանոթանալու հասարակական խորհրդի անդամների հետ և մաղթում եմ արդյունավետ աշխատանք»,- նշել է ողջույնի խոսքի մեջ Մալենան: 

Նոյեմբերի 20-ին կկայանա խորհրդի անդրանիկ նիստը, որը կավարտվի տարբեր գերատեսչությունների և այլ կառավարական մարմինների որոշում կայացնողների հետ հարցուպատասխանի հանդիպում-քննարկմամբ:

Մամուլի հարցերով պատասխանատու

Զառա Սարգսյան
Հաղորդակցման ծրագրերի ղեկավար
ՅՈՒՆԻՍԵՖ Հայաստան
Հեռ: 37477232169
Հեռ: 37410580174
Էլ. Փոստ: zsargsyan@unicef.org

ՅՈՒՆԻՍԵՖ-ի մասին

ՅՈՒՆԻՍԵՖ-ն աշխատում է, որպեսզի Հայաստանում յուրաքանչյուր երեխա լինի սիրված, սնված և խնամված: Հիմնվելով ավելի քան 75-ամյա միջազգային փորձի և Հայաստանի երեխաների համար գրեթե 30 տարվա հաջողությունների վրա՝ ՅՈՒՆԻՍԵՖ-ը պարտավորություն է ստանձնում բարելավելու ամենախոցելի՝ աղքատության և մեկուսացման մեջ ապրող երեխաների կյանքը: Ծնվելու պահից մինչև ավագ դպրոցի ավարտը՝ ՅՈՒՆԻՍԵՖ-ն աշխատում է իր գործընկերների հետ, որպեսզի Հայաստանում յուրաքանչյուր երեխա և ընտանիք կարողանա օգտվել իր համար նախատեսված քաղաքականություններից և ծառայություններից:

Ստեղծման պահից ի վեր՝ ՅՈՒՆԻՍԵՖ-ն ամբողջությամբ ֆինանսավորվում է անհատների, մասնավոր հատվածի, հիմնադրամների և կառավարությունների կամավոր նվիրատվություններով:

Հայաստանում ՅՈՒՆԻՍԵՖ-ի գործունեությանը ավելի մանրամասն ծանոթանալու համար կարող եք այցելել www.unicef.am և www.babycef.am կայքերը կամ հետևել մեզ հետևյալ սոցիալական հարթակներում` FacebookTwitterInstagram և YouTube-ում: