Հայաստանում փախստական երեխաներն անհապաղ աջակցության կարիք ունեն
Ավելի քան 30 000 երեխա և նրանց ընտանիքներն անհապաղ հումանիտար աջակցության և պաշտպանության կարիք ունեն: ՅՈՒՆԻՍԵՖ-ն արձագանքում է առաջնային և հետագա կարիքներին:
- Հասանելի է նաև:
- Հայերեն
- English
Սեպտեմբերի վերջին ավելի քան 100 000 անձ է ապաստան գտել Հայաստանում՝ իրենց համայնքներում ռազմական գործողությունների սրացումից հետո: Այս ընտանիքներն այժմ պայքարում են իրենց բնականոն կյանքը վերականգնելու համար՝ չունենալով գիշերելու տեղ, ապրուստի միջոց, մնալով գրեթե առանց ունեցվածքի:
Վերջին տարիներին նրանց բաժին հասած հումանիտար իրավիճակի, ռազմական սրացումների նկատմամբ վախի և երբեմն էլ կրկնվող տեղահանումների պատճառով նրանք վատթարացող հոգեկան առողջության և հոգեբանական խանգարումների ենթարկվելու վտանգի տակ են: Բացի այդ՝ երեխաներն իրենց համայնքներում զրկված են եղել շարունակական որակյալ կրթության և առողջապահական ծառայությունների հասանելիությունից:
Նման ճգնաժամերի ժամանակ ամենից շատ տուժում են երեխաները
ՅՈՒՆԻՍԵՖ-ը համագործակցում է ՀՀ Կառավարության և տեղական գործընկերների հետ՝ հոգալու ամենահրատապ կարիքները.
- Երեխաներին անհրաժեշտ բժշկական պարագաների և սարքավորումների տրամադրում, ինչպես նաև շարժական մանկաբուժական թիմերի ուղևորում այն շրջաններ, որտեղ բնակություն են հաստատել փախստական ընտանիքները:
- Ընտանիքի համար նախատեսված հիգիենայի պարագաներ, վերմակներ, ինչպես նաև սննդի փաթեթներ երեխաների համար:
- Կարիքավոր երեխաների համար դպրոցական պայուսակների և ուսումնական նյութերի տրամադրում:
- Լրացուցիչ ուսումնական կենտրոնների հիմնում՝ ապահովելու համար, որ բոլոր երեխաները կրթություն ստանալու հնարավորություն ունենան:
- Երեխաների համար ժամանակավոր անվտանգ վայրերի հիմնում, որտեղ նրանք կարող են ապահով զգալ և աջակցություն ստանալ:
- Երեխաներին և նրանց ծնողներին հոգեսոցիալական աջակցության տրամադրում, ինչպես նաև դեպքերի կառավարում ընտանիքի հատուկ կարիքներին աջակցելու նպատակով:
Սակայն կարիքները շատ ավելի մեծ են, քանի որ ընդունող համայնքները սակավ ռեսուրսներ և սահմանափակ ենթակառուցվածքներ ունեն:
Ժամանակը խիստ կարևոր հանգամանք է ՀՀ-ում հաստատված փախստական երեխաների համար, քանի որ նրանք շարունակական հոգեսոցիալական աջակցության, ձմռան համար անհրաժեշտ պարագաների, սննդի և առողջապահական ծառայությունների, ինչպես նաև որակյալ կրթության կարիք ունեն:
Կարիքները հրատապ են, և ձեր հանգանակությունը կարող է մեծ աջակցություն լինել դժվարին իրավիճակում հայտնված անձանց համար:
Խնդրում ենք նվիրաբերել հիմա: Հանգանակության չափն էական չէ, և յուրաքանչյուր լումա կարևոր է:
Կարդացե՛ք ավելին ՅՈՒՆԻՍԵՖ-ի հումանիտար գործողության կոչի մասին՝ հանուն Հայաստանում փախստական երեխաների:
Տեղեկացե՛ք, թե ինչպես է ՅՈՒՆԻՍԵՖ-ն արձագանքում այս ճգնաժամին, ինչպես նաև իրավիճակի մասին մեր հաշվետվություններին: